Read Dagara, Northern Luka 3 Bible Online

Luka 3 - Dagara, Northern bible

Luka 3

¹A Tɩbɛɛr Sezaar naalʋ-dɩb yome pie nɩ anũu sob daar, a lɛn daar a Pɔ̃sɩ-Pɩlatɩ na tɩ ɩ a Ʋrɔm tẽw na-kpɛ̃ɛ-lɩɛrɛ a Zude tẽw a, a lɛn daar a Erɔdɩ na tɩ ɩ a Galile tẽw nàle a, ɛ́ a ʋ yɛb Filib ɩ a Ɩtuure nɩ a Tɩrakonida ten nàle a, ɛ́ Lɩzanɩasɩ ɩ a Abɩlɛn tẽw nàle a,

²a lɛn daar a An nɩ Kayifʋ na tɩ ɩ a Zifʋ mɩnɛ bàwr-maal-karɩ a, lɛn daar'a a Zakari bidɛb Zã tɩ wõ a Naaŋmɩn ƴɛ̀rʋ a wɛja-kpalɛ pʋɔ.

³A Zã tɩ ìr'a zɔ cɔlɩ a Zurdɛ̃ man vuo za, hiere yere kɛ́ a nɩbɛ lɩɛbɩ a bɛ ɩb, ɛ́ sàw de a suob a bɛ yel-bebe suur-dɩ-kʋ̀b ƴãw,

⁴a tu mɛ̃ a lɛ a naaŋmɩn-ƴɛ̀r-manɛ Ɩzayi na tɩ sɛb a ʋ sɛbɛ pʋɔ a: «Nɩr kãw kɔkɔr cɩɩrɛ nɩ a wɛja-kpalɛ pʋɔ: Nyɩ maalɩ a Sore sɔ́r, nyɩ kɔ a ʋ soli dɛnɩ ƴãw a tori.

⁵Fʋɔla za na paal'a do, tã-kpɛ̃ɛ za nɩ tãle za na tuw na siw man, sɔ́r za na gɔ̃w a na tori na, sɔ́r za na ɩ kokobokobo a na man nɩ taa,

⁶ɛ́ bʋ̃-vʋʋra za na nyɛ̃ nɩ a Naaŋmɩn faafʋ[4].»

⁷A Zã tɩ yere na kʋ̀rɛ a zu-sɛbla na tɩ waar a ʋ zie a suob deb a: «Dɔpan bʋʋrɛ bɛ ŋa! Ãa n'ʋ wul nyɩ a lɛ nyɩ na na ɩ nɩɩrɩ a Naaŋmɩn ƴɛ̀rʋ maalʋ suur na waar a bɛr?

⁸Nyɩ ɩ a sãá a nyɩ ɩ-ɩrɩ pʋɔ kɛ́ nyɩ lɩɛb'ɩ a nyɩ ɩb, ɛ́ taa wa tɩɛrɛ nyɩ pʋɔ yere kɛ́: “Tɩ sãà n'ɩ Abraham ɛ!” Mãa n'ʋ yere kʋ̀rɛ nyɩ, a kʋsɛbɛ á ŋá na gã a, Naaŋmɩn na tʋ̃ɔ́ na ɩ a lɩɛbɩ Abraham bibiir.

⁹A lɛr'ɩ ŋan be a tɩɩr sɩɛ ƴãw baarɩ, tɩɛ nɛ za na bɛ wɔnɛ wɔ̃-vɩɛlɩ a, bɛ na cɛ ʋ na ŋmãa lɔb ƴãw vũumí.»

¹⁰A zu-sɛbla tɩ sowre ʋ na: «Bʋ̃ʋ n'ʋ a fɛr kɛ́ tɩ pãa ɩrɛ a?»

¹¹A Zã tɩ sɔw bɛ na: «Nɩr wa tɛr kparɩ ayi a, ʋ̃ʋ ír kʋ̀ a ʋ tɔ na bɛ tɛr ʋ a, ɛ́ nɩr na tɛr a dɩrɛ a, ʋ mɩ̀ ɩrɛ a lɛ.»

¹²A zuru-yar-dierbɛ mɩ̀ tɩ wa na wa de a suob ɛ́ sowri ʋ: «Wul-wul-kara a, bʋ̃ʋ n'ʋ a fɛr kɛ́ tɩ ɩrɛ?»

¹³Ʋ yel bɛ: «Nyɩ ta mɩ́ ŋmãa libie dɔwlɩ a lɛ bɛ na ƴãw a zu ɛ.»

¹⁴Sojarɩ mɩ̀ tɩ sowri ʋ na: «Ɛ́ tɩɩm, bʋ̃ʋ n'ʋ a fɛr kɛ́ tɩ ɩrɛ?» Ʋ tɩ sɔw bɛ na: «Nyɩ ta farɛ bɩɩ ŋmarɛ ziri dier nɩr libir ɛ, nyɩ mɩ́ de a nyɩ yar tɛwr.»

¹⁵A nɩbɛ za tɩ gùre na kɛ́ bʋ̃-kãw na ɩ na, ɛ́ tɩɛrɛ bɛ pʋɔ kɛ́ a Zã taa ɩrɛ wa n'ɩ a Kɩrɩta.

¹⁶Lɛ n'a a Zã tɩ yel kʋ̀ bɛ za: «Kʋ̃ɔ n'a mãa kʋ̀rɛ nɩ nyɩ a suob, ɛcɛ nɩr be n a ɩ̃ pùor waar, kpɛmɛ zuo mɛ̃, ɩ̃ mɩ̀ bɛ sɛwnɩ na cɛ̀r a ʋ nafawr bʋ̃-'leni ɛ. Ʋl a, Vʋʋrʋ Sõw nɩ vũu pʋɔ n'a ʋ na kʋ̀ nyɩ a suob.

¹⁷Ʋ tɛr'ɩ ble bʋ̃-yɛla a ʋ nũú, a ʋ ble yɛ́lʋ ƴãw. Ʋ na ƴãw nɩ a ble bie a ʋ bowrí ɛ́ nyɩw a ur bɛr, a dɩrɛ vũu na bɛ tɛr kpiiru daar a pʋɔ.»

¹⁸A Zã tɩ cãà na tɛr wulu ƴɛ̀r-bie yaga a nɩbɛ zie, ɛ́ à à ŋá n'a ʋ tɩ hiere a Yel-nʋ̃ɔ̀ kʋ̀rɛ bɛ.

¹⁹Ʋ tɩ yere nɩ a Galile tẽw nàle Erɔdɩ, ʋ na tɩ de a Erodɩadɩ na ɩ a ʋ yɛb pɔw a ƴãw, nɩ a yel-faar al za ʋ na tɩ maalɩ a ƴãw.

²⁰Lɛ n'a a Erɔdɩ nɩ̃ɛ lɛb tɩ maalɩ yel-faa ŋa dɔwlɩ: ʋ tɩ nyɔw nɩ a Zã pàw gaso pʋɔ.

²¹A nɩbɛ za na tɩ de a suob baarɩ, a Yeezu mɩ̀ de baarɩ ɛ́ puore a, a salom tɩ yuo na,

²²ɛ́ a Vʋʋrʋ Sõw siw a ʋ zu tɛr ƴã-gan mɛ̃ naŋmam a. Kɔkɔr tɩ yi n a salom zu yere: «Fʋ̃ʋ n'ɩ a ɩ̃ Bi-nɔna, a ɩ̃ pʋɔ pɛlɩ nɩ a fʋ ƴãw[5].»

²³A Yeezu na wa tɩ tine a ʋ tome a, ʋ tɛr'a ta yome lɩzɛr'ɩ pie. A nɩbɛ tɩ tɩɛrɛ na kɛ́ Zuzɛb bidɛb'ʋ, ɛ́ a Zuzɛb ɩ Eli bidɛb,

²⁴Eli ɩ Matatɩ bidɛb, Matatɩ ɩ Levi bidɛb, Levi ɩ Mɛlɩkɩ bidɛb, Mɛlɩkɩ ɩ Yanayi bidɛb, Yanayi ɩ Zuzɛb bidɛb,

²⁵Zuzɛb ɩ Matatɩasɩ bidɛb, Matatɩasɩ ɩ Amɔsɩ bidɛb, Amɔsɩ ɩ Nawum bidɛb, Nawum ɩ Ɛsɩlɩ bidɛb, Ɛsɩlɩ ɩ Nagayi bidɛb,

²⁶Nagayi ɩ Maatɩ bidɛb, Maatɩ ɩ Matatɩasɩ bidɛb, Matatɩasɩ ɩ Semeyin bidɛb, Semeyin ɩ Yosɛkɩ bidɛb, Yosɛkɩ ɩ Yoda bidɛb,

²⁷Yoda ɩ Yoanan bidɛb, Yoanan ɩ Ereza bidɛb, Ereza ɩ Zorobabɛl bidɛb, Zorobabɛl ɩ Salatɩɛl bidɛb, Salatɩɛl ɩ Neeri bidɛb,

²⁸Neeri ɩ Mɛlɩkɩ bidɛb, Mɛlɩkɩ ɩ Adi bidɛb, Adi ɩ Kosam bidɛb, Kosam ɩ Ɛlɩmadam bidɛb, Ɛlɩmadam ɩ Ɛɛr bidɛb,

²⁹Ɛɛr ɩ Yeezu bidɛb, Yeezu ɩ Eliezɛɛr bidɛb, Eliezɛɛr ɩ Yorim bidɛb, Yorim ɩ Matatɩ bidɛb, Matatɩ ɩ Levi bidɛb,

³⁰Levi ɩ Sɩmɩ̃ɔ bidɛb, Sɩmɩ̃ɔ ɩ Zuda bidɛb, Zuda ɩ Zuzɛb bidɛb, Zuzɛb ɩ Yonam bidɛb, Yonam ɩ Elɩakɩm bidɛb,

³¹Elɩakɩm ɩ Melea bidɛb, Melea ɩ Mɛna bidɛb, Mɛna ɩ Matata bidɛb, Matata ɩ Natam bidɛb, Natam ɩ Daviir bidɛb,

³²Daviir ɩ Zese bidɛb, Zese ɩ Yobɛdɩ bidɛb, Yobɛdɩ ɩ Bowaazʋ bidɛb, Bowaazʋ ɩ Sala bidɛb, Sala ɩ Nason bidɛb,

³³Nason ɩ Amɩnadab bidɛb, Amɩnadab ɩ Adɩmɩn bidɛb, Adɩmɩn ɩ Arni bidɛb, Arni ɩ Ɛsɩrɔm bidɛb, Ɛsɩrɔm ɩ Faarɛsɩ bidɛb, Faarɛsɩ ɩ Zuda bidɛb,

³⁴Zuda ɩ Zakɔb bidɛb, Zakɔb ɩ Ɩzaakɩ bidɛb, Ɩzaakɩ ɩ Abraham bidɛb, Abraham ɩ Tara bidɛb, Tara ɩ Nakoor bidɛb,

³⁵Nakoor ɩ Serugɩ bidɛb, Serugɩ ɩ Arago bidɛb, Arago ɩ Falɛkɩ bidɛb, Falɛkɩ ɩ Ebɛɛr bidɛb, Ebɛɛr ɩ Sala bidɛb,

³⁶Sala ɩ Kayinam bidɛb, Kayinam ɩ Arfasadɩ bidɛb, Arfasadɩ ɩ Sɛ́m bidɛb, Sɛ́m ɩ Nowe bidɛb, Nowe ɩ Lamɛkɩ bidɛb,

³⁷Lamɛkɩ ɩ Matuzala bidɛb, Matuzala ɩ Enɔkɩ bidɛb, Enɔkɩ ɩ Yarɛtɩ bidɛb, Yarɛtɩ ɩ Maleleyɛl bidɛb, Maleleyɛl ɩ Kayinam bidɛb,

³⁸Kayinam ɩ Enɔsɩ bidɛb, Enɔsɩ ɩ Sɛtɩ bidɛb, Sɛtɩ ɩ Adama bidɛb, Adama ɩ Naaŋmɩn bidɛb.