Read Dagara, Northern Luka 4 Bible Online

Luka 4 - Dagara, Northern bible

Luka 4

¹A Yeezu tɩ yi n a Zurdɛ̃ manɩ́ lɛb wa, ɛ́ a Vʋʋrʋ Sõw tɩ paalɩ ʋ. A Vʋʋrʋ sõw tɩ tɛr ʋ na kpɛ n a wɛja-kpalɛ pʋɔ,

²be n'a a Gɛgɛra tɩ bɛlɩ ʋ bibie lɩz'a ayi ƴãw. Ʋ bɛ tɩ dɩ bom za a bibie al pʋɔ ɩ, ɛ́ a na wa tɔl baar'a, kɔ̃ nyɔw ʋ na.

³Lɛ n'a a Gɛgɛra tɩ yel ʋ «Fʋ̃ʋ wa ɩ a Naaŋmɩn Bie a, fʋ̃ʋ ƴãw a kʋsɩɛr ŋa ʋ lɩɛbɩ bʋ̃-dɩra[6]»

⁴Ɛcɛ a Yeezu tɩ sɔw ʋ na: «Bɛ sɛb'a yel: “Bʋ̃-dɩrɩ tɛwr bɛ n'a guole a nɩsaal ɛ[7].”»

⁵A Gɛgɛra tɩ tɛr ʋ na do n zie na zɛw a zu, tɩ ƴãw k'ʋ bɛl daƴen daadaa nyɛ̃ a tẽ-daa na-mɩnɛ naalʋ-ten za,

⁶ʋʋ yel ʋ: «Ɩ̃ na kʋ̀ b'ɩ a kpɛnʋ á ŋá za, nɩ a yúor a naalʋ-ten á ŋá na waar'ɩ a: mãa n'ʋ bɛ kʋ̀ à á ŋá za, ɩ̃ɩ mɩ̀ na tʋ̃ɔ́ na de a kʋ̀ ʋlɩ sob nɛ ɩ̃ na bɔbr a.

⁷Lɛ so, fʋ̃ʋ wa puori mɛ̃ nɩ fʋ tʋɔra-siwru a, fʋ̃ʋ na so a za.»

⁸Ɛcɛ a Yeezu tɩ yel ʋ na: «Bɛ sɛb'a kɛ́: “A Sore fʋ Naaŋmɩn yõ n'ʋ fʋ na gbine dume puore nɩ fʋ tʋɔra-siwru, ʋl yõ n'ʋ fʋ na maalɛ[8].”»

⁹Al pùorí, a Gɛgɛra tɩ tɛr'ɩ a Yeezu cen nɩ a Zerizalɛm, tɩ ɓáw ʋ do n a Ŋmɩn-yir-kpɛ̃ɛ nyʋɔrɩ́ za ɛ́ yel ʋ: «Fʋ̃ʋ wa ɩ a Naaŋmɩn Bie a, fʋ̃ʋ yi a ka, ɛ́ ƴaw tɩ lo a tẽw.

¹⁰Mɛ̃ bɛ taa sɛb kɛ́ “Naaŋmɩn na ƴãw nɩ nʋɔr kʋ̀ a ʋ malkɩ mɩnɛ kɛ́ bɛ gùre fʋ.”

¹¹Lɛ nɩ kɛ́: “Bɛ na ɓaabɩ fʋ nɩ a bɛ nuru pʋɔ, kɛ́ a fʋ gbɛ́r taa wa mab ŋmɩɛr kʋsɩɛr ɛ[9].”»

¹²Ɛcɛ a Yeezu tɩ sɔw ʋ na: «Bɛ yel'a kɛ́: “Ta bɛlɩ a Sore fʋ Naaŋmɩn ɛ[10].”»

¹³A Gɛgɛra na tɩ bɛ̀lɩ ʋ a bɛ̀l-bʋʋrɛ za gu a, ʋ tɩ cen na ɛ́ bɛr ʋ, ɛ́ gù a daar nãà wa ta a.

¹⁴A Yeezu tɩ lɛb'a wa a Galile, tɛr a Vʋʋrʋ Sõw kpɛnʋ, ɛ́ a ʋ yúor yi pàw a zie ʋl za.

¹⁵Ʋ tɩ kanɛ nɩ nɩ a nɩbɛ a puoru-diru pʋɔ, ɛ́ a nɩbɛ za tɩ danɛ ʋ.

¹⁶A Yeezu tɩ wa n a Nazarɛtɩ, a be ʋ na tɩ baa a, wa kpɛ a puoru-dĩó, mɛ̃ a lɛ ʋ na mɩ̀ ɩ a Zifʋ mɩnɛ pɩ̃ɛnʋ-bibir za a, ɛ́ ìr k'ʋʋ kanɩ a sɛbɛ.

¹⁷Bɛ tɩ de nɩ a naaŋmɩn-ƴɛ̀r-manɛ Ɩzayi sɛbɛ kʋ̀ ʋ, ʋ dɔlɛ tɩ nyɛ̃ a zie nɛ bɛ na sɛb a ƴɛ̀r-bie á ŋá a:

¹⁸«A Sore Vʋʋrʋ siw mɛ̃ na, ʋ kaa na ír mɛ̃ ka nũu ƴãw mɛ̃ k'ɩ̃ɩ tɩ yel a Yel-nʋ̃ɔ̀ kʋ̀ a nan dem. Ʋ tõ m'a k'ɩ̃ɩ tɩ hieri a faafʋ kʋ̀ a gaso pʋɔ dem, ɛ́ yel a zɔn kɛ́ bɛ na lɛb'a nyɛrɛ, k'ɩ̃ɩ tɩ faa a bɛlɩ dem bɛ na dɔwrɛ a,

¹⁹k'ɩ̃ɩ tɩ yel a Sore maalʋ yũon na tarɛ a[11].»

²⁰A Yeezu tɩ lɛb'a pili a sɛbɛ kʋ̀ a sõwne, ɛ́ zɩ̃. A nɩbɛ za na tɩ be a puoru-dĩó be a, tɩ jɩ́rɛ ʋ nɩ gbẽgbẽ.

²¹Lɛ n'a ʋ pãa tɩ nyɔw nɩ bɛ a ƴɛ̀rʋ yel: «A dɩ̃a a, a Sɛb-sõw ƴɛ̀r-bie á ŋá nyɩ na wõ a, a tu n a nyɩ ƴãw.»

²²A nɩbɛ za tɩ pore nɩ a ʋ yo-vla, ɛ́ mɩ́ tɩ nyɔw nʋɔr a ƴɛ̀r-vɩɛlɩ na tɩ yire a ʋ nʋɔrɩ́ a ƴãw, ɛ́ tɩ sowre: «A Zuzɛb bidɛb bɛ n'ɩ à ŋà ɩ?»

²³Ɛcɛ a Yeezu tɩ yel bɛ na: «Mɛ̃ nyɩ taa na lɔb a zʋkpar ŋa kʋ̀ m: “Dɔwta a, sanɩ fʋ tʋɔra!” A yele al za tɩ na wõ k'aa maal'ɩ a Kafarnawɔm a, mɩ̀ maal'a a fʋ tẽw pʋɔ ka!»

²⁴A Yeezu tɩ lɛb'a yel ƴãw pʋɔ: «Sɩza n'a ɩ̃ yere kʋ̀rɛ nyɩ: nɩr bɛ dier naaŋmɩn-ƴɛ̀r-manɛ yele a ʋ tẽ-dɔwra pʋɔ ɩ.

²⁵Yel-mɩŋa n'a ɩ̃ yere kʋ̀rɛ nyɩ, a Eli daar a, pɔw-kɔbɛ bɛ tɩ tɛr vuo a Ɩsɩrayɛl tẽw pʋɔ ɩ, a lɛ a saa na tɩ ŋmãa àr yome ata nɩ cuwr ayʋɔb ƴãw, ɛ́ kɔ̃-kpɛ̃ɛ tɩ lo a tẽw za a.

²⁶Ɛcɛ a bɛ been kãw za zie bɛ n'a a Naaŋmɩn tɩ tõ a Eli ɛ, pɔw-kʋɔr kãw na tɩ kpɩɛr Sarɛpta, Sɩdɔ̃ tẽw vuo pʋɔ a, ʋl zie n'a a Naaŋmɩn tɩ tõ ʋ.

²⁷Kɔn mɩ̀ bɛ tɩ tɛr vuo a Ɩsɩrayɛl tẽw pʋɔ a naaŋmɩn-ƴɛ̀r-manɛ Elize daar ɛ, ɛcɛ a bɛ been kãw za bɛ tɩ nyɛ̃ sanʋ ɛ, a bɛ ɩ Naamã na yi Siiri a ɩ[12].»

²⁸Bɛ na tɩ wõ a ƴɛ̀r-bie á ŋá a, bɛ za tɩ nyɛ̃ nɩ suur yaga, a puoru-dĩó be.

²⁹Bɛ tɩ ìr'a dá a Yeezu yi zaa nɩ a tẽw pʋɔ. Ɛ́ a bɛ tẽw na tɩ mɛ̃ tãw zu a, bɛ tɛr'ɩ a Yeezu cen nɩ zie kãw na ɩ cũgbulu a, kɛ́ bɛ tɩ dáa ʋ lɔb.

³⁰Ɛcɛ ʋ tɩ tɔl'ɩ a bɛ sɔgɔ yi cere.

³¹A lɛ n'a a Yeezu tɩ yi a be siw a Galile tẽw kãw pʋɔ bɛ na bʋɔlɛ Kafarnawɔm a. Ʋ tɩ kanɛ nɩ nɩ a nɩbɛ a Zifʋ mɩnɛ pɩ̃ɛnʋ-bibir.

³²A ʋ kanʋ tɩ tɛr'ɩ fãw, a dɛ ɓãa bɛ nɛ́ɛ.

³³Nɩr kãw kɔ̃tɔ̃-faa na damnɛ a, tɩ be n a puoru-dĩó be. Ʋ tɩ ŋmɛ n cɛl kpɛ̃w za yel:

³⁴«Alɛ wɛ! Tɩɩm nɩ fʋ̃ʋ mɩ̀ bʋnʋ, Nazarɛtɩ tẽw Yeezu u? Fʋ wa na kɛ́ fʋ wa ɩ tɩ lo. Ɩ̃ bãw fʋ na: a Naaŋmɩn Nɩ-sõw nɛ b!»

³⁵A Yeezu tɩ tanɩ ʋ na yel: «Pàw a nʋɔr ɛ́ yi zaa a nɩr ŋa pʋɔ!» A kɔ̃tɔ̃-faa tɩ nyɔw nɩ a dɛb nɛ lɔb'ɩ tẽw a nɩbɛ sɔgɔ, ɛ́ yi ɛ́ bɛr ʋ, ɛ́ bɛ sãw ʋ zie za ɩ.

³⁶Dɛ̃bɩ̃ɛ tɩ nyɔw nɩ a bɛlɩ dem za na tɩ be a be a, bɛ yere kʋ̀rɛ taa: «Ƴɛ̀r-bʋ̃ʋ n'ɩ á ŋá? Ʋ mɩ́ tanɩ nɩ a kɔ̃tɔ̃-faar nɩ fãw k'aa yi, ɛ́ a yi.»

³⁷Ɛ́ a ʋ yúor tɩ yi na làarɩ a ziir za, a ʋlɩ vuo nɛ pʋɔ.

³⁸A Yeezu na tɩ yi a puoru-dĩó a, ʋ cen nɩ Sɩmʋ̃ yir. Ƴã-tʋl-faa kãw tɩ tɛr'ɩ a Sɩmʋ̃ dɩɛm-mã. Bɛ tɩ zɛlɛ nɩ a Yeezu k'ʋʋ ɩ ɩb kãw a ʋ ƴãw.

³⁹Ʋ tɩ gũu na cɔw a bàal ɛ́ tanɩ a ƴã-tʋlʋ, a ƴã-tʋlʋ bɛr ʋ, ʋ ìr daadaalɛ kaarɛ a bɛ zie.

⁴⁰A mʋ̃tɔ̃w na wa kpɛ a, bɛ tɛr'ɩ a bàalbɛ za, na tɛr bàal-pɛ-bʋʋrɛ za a, wa n a ʋ zie. Ʋ mɩ́ tɩ ír'ɩ nuru dɔwlɩ a bɛ za been been zu sanɩ bɛ.

⁴¹Kɔ̃tɔ̃-faar yaga mɩ́ tɩ yire nɩ a bɛ yaga pʋɔ cɩɩrɛ yere nɩ: «Fʋ ɩ n a Naaŋmɩn Bie!» Ɛcɛ a Yeezu tɩ tanɛ a na, ɛ́ bɛ sàwr a ƴɛ̀rɛ ɩ, a na tɩ bãw kɛ́ ʋlɛ n'ɩ a Kɩrɩta a ƴãw.

⁴²A zie na wa vɩɛrɛ a, ʋ yi na cen wɛja pʋɔ. A zu-sɛbla tɩ bɔbr ʋ na. Bɛ na wa nyɛ̃ ʋ a, bɛ bɔbr'a kɛ́ bɛ nyɔw ʋ tɛr, ʋ ta cen kɛ́ bɛr bɛ ɩ.

⁴³Ɛcɛ a Yeezu tɩ yel bɛ na: «A fɛr'a k'ɩ̃ɩ mɩ̀ hieri a Naaŋmɩn Naalʋ Yel-nʋ̃ɔ̀ kʋ̀ tẽ-yoru. Bʋ̃ʋ n'ʋ vɛ̃, al ƴãw n'a a Naaŋmɩn tõ m.»

⁴⁴Ʋ tɩ hiere nɩ a Yel-nʋ̃ɔ̀ a Zude tẽw puoru-dirú.