Read Dagara, Northern Luka 5 Bible Online

Luka 5 - Dagara, Northern bible

Luka 5

¹Bibir kãw, a zu-sɛbla tɩ nɛbr'ɩ taa a Yeezu zie a Naaŋmɩn ƴɛ̀rʋ bɛr-wob ƴãw, ɛ́ a Yeezu tɔr za tɩ àr a Zenezarɛtɩ kʋ̃ɔ-kpɛ̃ɛ nʋɔr.

²Ʋ tɩ nyɛ̃ nɩ gbee ayi na gã a kʋ̃ɔ-kpɛ̃ɛ nʋɔr a: a zʋm-nyɔwrbɛ tɩ yi na siw pɛ́wr a bɛ mɩ̃ɛnɩ.

³A Yeezu tɩ do na kpɛ a gbor kãw pʋɔ, na tɩ ɩ Sɩmʋ̃ gbor a, ɛ́ zɛlɩ ʋ k'ʋʋ taw zãá nɩ a kõkowr blã. Lɛ n'a a Yeezu pãa tɩ zɩ̃ a gbor pʋɔ ɛ́ kanɛ nɩ a zu-sɛbla.

⁴Ʋ na wa ƴɛ̀r baar'a, ʋ yel'ɩ a Sɩmʋ̃: «Duwri kpɛ n a zulu pʋɔ, nyɩ tɩ lɔb a mɩ̃ɛnɩ nyɔw a zʋ́mɛ́.»

⁵A Sɩmʋ̃ tɩ yel ʋ na: «Wul-wul-kara a, tɩ bàl'ɩ tɩ tʋɔra a tɩ̃ɩsɔw za tɩ vɩɛ nɩ zie, ɛ́ bɛ tuli nyɔw zʋm-bile za ɩ. Ɛcɛ fʋ̃ʋ na n'ʋ yel a, al ƴãw n'a ɩ̃ na lɔb a mɩ̃ɛnɩ.»

⁶Bɛ tɩ lɔb'ɩ a mɩ̃ɛnɩ nyɔw zʋ́mɛ́ yaga yaga za, a mɩ̃ɛnɩ tɩ cɩɛrɛ.

⁷Lɛ so bɛ tɩ kabrɩ bʋɔlɩ a bɛ zʋm-nyɔw-taabɛ na tɩ be a gbee ayi sob pʋɔ a, kɛ́ bɛ wa sõw bɛ. A bɛ taabɛ tɩ wa na, bɛ wa yaw a zʋmɛ paalɩ a gbee a za ayi a tɩ faar na lim.

⁸A Sɩmʋ̃ Pɩɛr na tɩ nyɛ̃ a lɛ a, ʋ lo na gbĩ dume a Yeezu pile ɛ́ yel ʋ: «Sore e, taw zaa a ɩ̃ zie, ɩ̃ ɩ n yel-bier sob.»

⁹Dɛ̃bɩ̃ɛ tɩ ɩrɛ nɩ a Sɩmʋ̃ yaga, ʋlɛ nɩ a nɩbɛ bɛl za na tɩ be a be a, a zʋ́mɛ́ bɛ na tɩ nyɔw sɛw a lɛ a ƴãw.

¹⁰Lɛ n'a a mɩ̀ tɩ ŋmɛ̃ a Sɩmʋ̃ zʋm-nyɔw-taabɛ zie, a Zebede bibiir, Zakɩ nɩ Zã. Ɛcɛ a Yeezu tɩ yel'ɩ a Sɩmʋ̃: «Ta zɔrɛ dɛ̃bɩ̃ɛ ɩ, dɩ̃a na ta a, nɩbɛ nɛbɛ fʋ na nyɔwr[13].»

¹¹Lɛ n'a bɛ tɩ duwri nɩ a gbee lɛb wa a kõkowr ƴãw, wa bɛr bom za ɛ́ tu a Yeezu pùor.

¹²A Yeezu na tɩ be a ten al ƴen sob[14] pʋɔ a, nɩr kãw na tɩ kɔ̃w ʋ za a, mɩ̀ tɩ be n a be. Ʋ na tɩ nyɛ̃ a Yeezu a, ʋ lo na vɔblɩ muru ɛ́ lɔbr nuru zɛlɛ nɩ ʋ yere nɩ: «Sore e, fʋ̃ʋ wa bɔbr a, fʋ na tʋ̃ɔ́ na ɩ ɩ̃ lɛb vɩɛl.»

¹³A Yeezu tɩ dɔl'ɩ nũu tɔ n ʋ ɛ́ yel: «Ɩ̃ bɔbr'a, lɛb vɩɛl!» Ɛ́ daadaalɛ a ʋ kɔnʋ tɩ baarɩ.

¹⁴A lɛ n'a a Yeezu tɩ kpãa ʋ k'ʋʋ taa pore à á ŋá yúor kʋ̀rɛ nɩr ɛ, ɛ́ yel ʋ: «Nɩ̃ɛ cen tɩ ɩ a bàwr-maalbɛ jɩ́r fʋ ka a, ɛ́ fʋ tɩr a bàwr-maal-bom, fʋ na lɛb vɩɛl a ƴãw, mɛ̃ a lɛ a Moyiir na ƴãw a nʋɔr a: a tʋ̃ɔ́ wul a nɩbɛ kɛ́ fʋ lɛb'a vɩɛl.»

¹⁵A Yeezu yúor tɩ lɛb'a bãw yire yaga, ɛ́ zu-sɛbla na bɛ dɩ vuo a zɔrɛ gbone taa a ʋ zie kɛ́ bɛ tʋ̃ɔ́ bɛr wõ a ʋ ƴɛ̀rʋ, ʋʋ sanɩ a bɛ bàalʋ.

¹⁶Ɛcɛ a Yeezu mɩ́ tɩ taw na yi ʋ yõ zie a wɛjarɩ pʋɔ tɩ puore.

¹⁷Bibir kãw a Yeezu na tɩ kanɛ nɩ a nɩbɛ a, Faarizɩ̃ɛ mɩnɛ nɩ Naaŋmɩn wulu bãw-bãw-karɩ tɩ pʋɔ nɩ a nɩbɛ pʋɔ. Galile lowr tẽli za, nɩ Zude tẽw lowr tẽli nɩ Zerizalɛm n'a bɛ tɩ yi ɛ́ wa. A Sore fãw tɩ be n a Yeezu zie k'ʋ sanɛ bàalbɛ.

¹⁸Nɩbɛ kãw tɩ wa ta na tuo gbɛr a ʋ bʋ̃-gana zu. Bɛ tɩ bɔbr'ɩ a lɛ bɛ na na ɩ kpɛ n ʋ bin a Yeezu niŋé a.

¹⁹Ɛcɛ a zu-sɛbla tɩ gbõ n taa zuo, bɛ bɛ tɩ bãw be bɛ na na tu n ʋ kpɛ n a ɩ. Lɛ so bɛ tɩ do a gàrʋ́, ŋmãa sule puo, ɛ́ tur ʋ nɩ a ʋ bʋ̃-gana bɛr ʋ siw a Yeezu niŋé a nɩbɛ sɔgɔ.

²⁰A Yeezu na tɩ nyɛ̃ a bɛ naaŋmɩn-sàwfʋ ŋa a, ʋ yel'a: «Ɩ̃ bá a, a fʋ yel-bebe suur dɩ na.»

²¹A Naaŋmɩn wulu sɛ-sɛbrbɛ nɩ a Faarizɩ̃ɛ mɩnɛ tɩ tɩɛrɛ na: «Ãa n'ɩ a sob ŋa na tʋʋr a Naaŋmɩn zʋmɛ a? Nɩ-buor sob'ʋ na tʋ̃ɔ́ dɩ a yel-bebe suur a bɛ ɩ Naaŋmɩn yõ?»

²²Ɛcɛ a Yeezu na tɩ bãw a bɛ tɩɛrʋ a, ʋ sɔw na yel bɛ: «Bʋ̃ʋ n'ʋ so a tɩɛrʋ á ŋá taabɛ be a nyɩ zie?

²³Abobe sob'a ɩ kayãan zuo: ɩ̃ na na yel a gbɛr: fʋ páw nɩ a fʋ yel-bebe suur, bɩɩ ɩ̃ na na yel ʋ: ìr cere a?

²⁴Ɛcɛ ɩ̃ bɔbr'a kɛ́ nyɩ bãwnɩ a, a Nɩsaal Bie tɛr'ɩ fãw a tẽw zu na tʋ̃ɔ́ dɩ a yel-bebe suur.» Lɛ n'a a Yeezu tɩ yel a gbɛr: «Ɩ̃ yere na kʋ̀rɛ fʋ, ìr ɓáw a fʋ bʋ̃-gana kule nɩ a fʋ yir.»

²⁵Daadaalɛ ʋ ìr a bɛ niŋé, ɛ́ ɓáw a ʋ bʋ̃-gana lo n a yir sɔ́r, danɛ nɩ a Naaŋmɩn kule nɩ.

²⁶Nʋɔr tɩ ɓãá nɩ bɛ za bɛ danɛ a Naaŋmɩn. Dɛ̃bɩ̃ɛ tɩ nyɔw bɛ na bɛ yere: «A dɩ̃a a, tɩ nyɛ̃ nɩ yel-bɛ-dãw-nyɛrɩ.»

²⁷A yele á ŋá pùorí, a Yeezu tɩ yi na nyɛ̃ zuru-yar-diere kãw, a yúor na dɩ kɛ́ Levi a, ʋ zɩ̃ a ʋ tome zie, ʋ yel ʋ: «Tuur mɛ̃!»

²⁸Ʋ tɩ bɛr'ɩ bom za, ɛ́ ìr tuur ʋ.

²⁹A Levi tɩ cɔbr'ɩ dɩb a Yeezu ƴãw a ʋ yir. Zuru-yar-dierbɛ yaga nɩ nɩbɛ bɛ mɩnɛ tɩ lãw nɩ bɛ na zɩ̃ dɩrɛ.

³⁰A Faarizɩ̃ɛ mɩnɛ nɩ a bɛ Naaŋmɩn wulu sɛ-sɛbrbɛ tɩ 'hũ'hune na yere kʋ̀rɛ a Yeezu po-tuurbɛ: «Bʋ̃ʋ n'ʋ so nyɩ lãw nɩ zuru-yar-dierbɛ nɩ yel-bebe dem dɩrɛ ɛ́ nyúur?»

³¹A Yeezu tɩ de nɩ a ƴɛ̀rʋ sɔw bɛ: «Nɩ-kpɛn bɛ nɛbɛ mɩ́ tɛr dɔwta yel-ɩra ɩ, bàalbɛ nɛbɛ.

³²Ɩ̃ sɩrɩ bɛ wa k'ɩ̃ɩ wa bʋɔlɩ nɩbɛ na tɩɛrɛ kɛ́ bɛ ɩ n nɩ-mɩn a ɩ, nɩbɛ na tɩɛrɛ kɛ́ bɛ ɩ n yel-bebe dem a bʋɔlʋ n'a ɩ̃ wa.»

³³A Faarizɩ̃ɛ mɩnɛ tɩ yel'ɩ a Yeezu: «A Zã po-tuurbɛ nɩ a tɩ po-tuurbɛ mɩ́ tɛr'ɩ a mʋta-tuo kʋralɛ puore nɩ, ɛcɛ a fʋ po-tuurbɛ cãà dɩrɛ ɛ́ nyúur.»

³⁴A Yeezu tɩ sɔw na yel bɛ: «Nyɩ tɩɛrɛ kɛ́ nyɩ na tʋ̃ɔ́ na fɛr kul-taa cuw dem ƴãw bɛ tɛr mʋta-tuo ɛ́ a dɛb-sãan be a bɛ zie e?

³⁵Ɛcɛ bibie na vɩɛ na bɛ ír a dɛb-sãan a bɛ zie, a lɛn daar a, bɛ na mɩ́ tɛr'ɩ a mʋta-tuo.»

³⁶Ʋ tɩ cãà na lɛb lɔb zʋkpar ŋa kʋ̀ bɛ yel: «Bɛ bɛ dãw cɩ̃ɛ pɛn kpar-paala ƴãw tɩ ɓe n kpar-kʋra ɩ, alɛ bɛ ɩ lɛ, bɛ na cɩ̃ɛ nɩ a kpar-paala ɛ́ a pɛn-paala nɩ a kpar-kʋra bɛ de taa ɩ.

³⁷Bɛ mɩ̀ kʋ̃ sàw de divɛ̃-paala ƴãw wɔ-gbã-kore pʋɔ ɩ, alɛ bɛ ɩ lɛ a, a divɛ̃-paala na pur'ɩ a wɔ-gban bɛr, a divɛ̃ cir ɛ́ a wɔ-gban sãw.

³⁸Bɛ mɩ́ ƴãw nɩ divɛ̃-paala wɔ-gbã-paalɛ pʋɔ.

³⁹Sob nɛ za na nyũ divɛ̃-kʋra mili a, bɛ mɩ́ lɛb bɔbr divɛ̃ paala ɩ, ʋ mɩ́ yel'a: “A divɛ̃-kʋra n'a nʋmɛ zuo.”»