Read Dagara, Northern Luka 8 Bible Online

Luka 8 - Dagara, Northern bible

Luka 8

¹Al pùorí, a Yeezu tɩ cɔlɛ nɩ a tẽ-bɛrɛ nɩ a tẽli kanɛ nɩ a nɩbɛ, ɛ́ hiere yere a Naaŋmɩn Naalʋ Yel-nʋ̃ɔ̀. A po-tuurbɛ pie nɩ ayi tɩ bɩɛlɛ ʋ na,

²lãwnɩ pɔwbɛ bɛ mɩnɛ a Yeezu na tɩ diw kɔ̃tɔ̃-faar bɛr bɛ ɛ́ sanɩ a bɛ bàalʋ a: Marya bɛ na bʋɔlɛ kɛ́ Madala tẽw Marya a, a ʋl pʋɔ kɔ̃tɔ̃-faar ayopõi na tɩ yi a,

³Zan, a Kuza na ɩ a Erɔdɩ bʋ̃-kaarɛ a pɔw, Sizan nɩ pɔw-yaga bɛ mɩnɛ na tɩ kaarɛ a Yeezu nɩ a ʋ po-tuurbɛ zie nɩ a bɛ bʋ̃-tɛrɩ a.

⁴Nɩbɛ tɩ yi n ten za ɛ́ waar a Yeezu zie. A zu-sɛbla na tɩ gbone taa a, ʋ tɩ lɔb'ɩ zʋkpar yel:

⁵«Nɩr kãw tɩ yi na k'ʋʋ tɩ bʋ̀r a bʋ̃-bʋʋrɛ. Ʋ na tɩ bʋ̀rɛ[19] a, a bʋ̃-bie a mɩnɛ tɩ lo n sɔr-nʋɔr bɛ nɛb, ɛ́ a mʋ̃ɔ pʋɔ lili de dɩ.

⁶Bʋ̃-bie a mɩnɛ tɩ lo n zi-wɔ̃cɔ pʋɔ: a bul'a, ɛcɛ a na bɛ tɩ páwr ɓaarʋ a, a ko na.

⁷Bʋ̃-bie a mɩnɛ mɩ̀ tɩ lo n gʋʋr pʋɔ, alɛ nɩ a gʋʋr za lãw ìr, a gʋʋr fɩɩrɩ a kʋ.

⁸Bʋ̃-bie ŋmãa tɩ lo n tẽsɔw-vla pʋɔ. A bul'a dɔw, ka-zu za mɩ́ wɔ̃ ka-bie kʋba (100).» A Yeezu tɩ zɛw nɩ kɔkɔr yel ƴãw pʋɔ: «Sob nɛ na tɛr tobe bɛr-wob ƴãw a, ʋ bɛrɛ wone.»

⁹A Yeezu po-tuurbɛ tɩ sowr'ʋ nɩ a zʋkpar ŋa pɛr.

¹⁰Ʋ tɩ yel bɛ na: «A nyɩɩm a, Naaŋmɩn ɩ na nyɩ bãw a ʋ naalʋ yel-sɔwlɩ, ɛcɛ a ŋmaarɛ bɛl na cɛ a zie a, a mɩ́ ɩ n zʋkpaɩ, kɛ́ “bɛ tʋ̃ɔ́ mɩ́ jɩ́rɛ ɛ́ ta nyɛ̃ bom za ɩ, bɛrɛ wone ɛ́ ta bãw a pɛr ɛ[20].”»

¹¹«Nyɩ nyɛ̃ a zʋkpar ŋa pɛr: a Naaŋmɩn ƴɛ̀rʋ n'ɩ a bʋ̃-bʋʋrɛ.

¹²Nɩbɛ bɛ mɩnɛ ŋmɛ̃ na taa nɩ a bʋ̃-bie al na lo a sɔ́r nʋɔr a: bɛ mɩ́ wõ n a Naaŋmɩn ƴɛ̀rʋ, ɛ́ a Gɛgɛra wa faa a ƴɛ̀rʋ a bɛ socie pʋɔ kɛ́ bɛ taa wa mab sàw de, nyɛ̃ a faafʋ ɛ.

¹³Bɛ mɩnɛ ŋmɛ̃ na mɛ̃ a zi-wɔ̃cɔ bʋ̃-bie a: bɛ mɩ́ wõ n a Naaŋmɩn ƴɛ̀rʋ ɛ́ sàw de nɩ nʋ̃ɔ̀. Ɛcɛ bɛ bɛ mɩ́ sàw bɛr a Naaŋmɩn ƴɛ̀rʋ tɛ nyɩgɛ a bɛ pʋɔ ɩ, bɛ mɩ́ sàw na de blãlɛ tɛwr ƴãw. Ɛ́ a kpɩɛrʋ wa ta a lɛn daar a, bɛ mɩ́ tɩɛ nɩ a naaŋmɩn-sàw-deb bɛr.

¹⁴A bʋ̃-bie al na lo a gʋʋr pʋɔ a, n'ɩ a bɛlɩ dem na mɩ́ wõ a Naaŋmɩn ƴɛ̀rʋ ɛ́ bɛr a yel-bɔbrɩ, a naalʋ nɩ a tẽw zu nʋ̃ɔ̀ fɩɩrɩ bɛ kʋ a bɛ cenu pʋɔ, ɛ̀ bɛ bɛ tʋ̃ɔ́ wɔ̃ wɔmɛ a.

¹⁵A bʋ̃-bie al na lo a tẽsɔw-vla pʋɔ a n'ɩ a bɛlɩ dem na bɛrɛ wone a Naaŋmɩn ƴɛ̀rʋ, ɛ́ mɩ́ sàw de nɩ bɛ pʋɔ za a. Bɛ bɛ lɛbr pùor ɛ, alɛ so bɛ mɩ́ wɔ̃ wɔmɛ.»

¹⁶«Bɛ bɛ dãw tɔ̃w fɩ̃tɩlɛ ɛ́ de laa vɔblɩ pàw ɛ, bɩɩ de ʋ tɩ su gado pile ɩ. Bɛ mɩ́ dɔwl'ʋ nɩ kpul zu ʋ zɛw, k'aa bɛlɩ dem na kpɩɛr a dĩó a, mɩ́ nyɛ̃ a cãà.

¹⁷Yel za bɛ be be sɔwlɩ kʋ̃ʋ wa yi ɛ, bom za bɛ be be sɔwlɩ bɛ kʋ̃ʋ wa bãw ɛ, ʋʋ yi sãá cãàmɩ́ ɛ.

¹⁸Nyɩ tɛr maal-ɩb a nyɩ ƴɛ̀rʋ bɛr-wob pʋɔ. Sob nɛ na tɛr a a, bɛ na kʋ̀ ʋ na dɔwlɩ, ɛ́ sob nɛ na bɛ tɛr a a, bɛ na faa nɩ a blã al ʋ na tɩɛr k'ʋʋ tɛr a a.»

¹⁹A Yeezu mã nɩ a Yeezu yɛbr tɩ wa n a ʋ nyɛ́b. Ɛcɛ a zu-sɛbla na tɩ gbõ taa bɛ dɩ vuo a, bɛ bɛ tɩ nyɛ̃ sɔ́r na ta a ʋ zie ɩ.

²⁰Bɛ tɩ yel'ɩ a Yeezu: «A fʋ mã nɩ a fʋ yɛbr'a ta àr yẽw bɔbr a fʋ nyɛ́b.»

²¹Ʋ tɩ sɔw na yel bɛ: «A bɛlɩ dem na bɛrɛ wone ɛ́ tuur a Naaŋmɩn ƴɛ̀rʋ a, bɛlɛ nɛbɛ ɩ a ɩ̃ mã nɩ a ɩ̃ yɛbr.»

²²Bibir kãw, a Yeezu nɩ a ʋ po-tuurbɛ tɩ do na kpɛ gbor pʋɔ. Ʋ tɩ yel bɛ na: «Nyɩ ɩ tɩ gãw a kʋ̃ɔ-kpɛ̃ɛ gãwn.» Ɛ̀ bɛ tɩ cen.

²³Bɛ na tɩ duwr gãwnɛ a, a Yeezu tɩ gã na gúr. Bɛ wa bere na sɛsɛb kpɛ̃ɛ cɛ̀r a kʋ̃ɔ-kpɛ̃ɛ zu. Kʋ̃ɔ tɩ kpɩɛr'a paalɛ a gbor, ɛ́ a bɛl tɛɛ za tɩ bɔbr kʋ̃ɔ tub.

²⁴A Yeezu po-tuurbɛ tɩ taw na ta sɩ̃w ʋ ɛ́ yel: «Wul-wul-kara a, Wul-wul-kara a, tɩ kpiir'a!» Ʋ tɩ zaw na ìr tanɩ a sɛsɛb nɩ a kʋ̃ɔ-mie a lɛb gã zoom, ɛ́ a zie ŋmãa vʋʋrʋ cɩ̃ɩɩ.

²⁵A Yeezu tɩ yel'ɩ a ʋ po-tuurbɛ: «A nyɩ naaŋmɩn-sàwfʋ wa?» Ɛcɛ dɛ̃bɩ̃ɛ tɩ nyɔw bɛ na ɛ́ nʋɔr ɓãá bɛ, bɛ yere kʋ̀rɛ taa: «Nɩ-ŋmɩŋmɩn n'ɩ a nɩr ŋa? Ʋlɛ n'ɩ ŋan mɩ́ ƴɛ̀r a sɛsɛb nɩ a kʋ̃ɔ zie, ɛ́ a sàw a ʋ nʋɔr.»

²⁶Bɛ tɩ ta na siw Zerazenɩ̃ɛ mɩnɛ tẽw, na tori a Galile tẽw kʋ̃ɔ-kpɛ̃ɛ gãwn a.

²⁷A Yeezu na tɩ yire a gbor pʋɔ a, dɛb kãw na tɩ dãw kpɩɛr a tẽw pʋɔ a, tɩ zɔ na tuor'ʋ. A dɛb nɛ tɩ ìre nɩ kɔ̃tɔmɛ. Koro za n'a ʋ bɛ tɩ cãà suur bome ɩ, ɛ́ bɛ cãà kpɩɛr yir pʋɔ ɩ, ɛ́ kpɩɛr yarʋ bɔwrɩ[21] pʋɔ.

²⁸Ʋ na wa nyɛ̃ a Yeezu a, ʋ kõ na cɩɩrɩ ɛ́ lo gbĩ dume a ʋ pile, ɛ́ vaa kɔkɔr yel: «Naaŋmɩn-na-do-saa-bɛ-pɩɛl-a Bie, Yeezu u, mãa nɩ fʋ̃ʋ mɩ̀ bʋnʋ? Ɩ̃ zɛlɛ fʋ nɩ yãayãa, taa dɔwrɛ mɛ̃ ɩ!»

²⁹A Yeezu na tɩ tanɩ a kɔ̃tɔ̃-faa k'ʋʋ yi zaa a dɛb pʋɔ a n'a so a kɔ̃tɔ̃-faa tɩ yel à à ŋá. Gb'aa yaga za n'a a kɔ̃tɔ̃-faa ŋa mɩ́ tɩ ìr ʋ. Bɛ mɩ́ tɩ 'lẽ nɩ a dɛb ŋa gbɛ́ɛ nɩ a ʋ nuru nɩ bamɛ k'ʋʋ tʋ̃ɔ́ zɩ̃ zi-been, ɛcɛ ʋ mɩ́ tɩ taw nɩ a bʋ̃-'leni á ŋá za ŋma, ɛ́ a kɔ̃tɔn tɛr ʋ kpɛ n wɛja-kpalɛ pʋɔ.

³⁰A Yeezu tɩ sowr'ʋ na: «A fʋ yúor dɩ na kɛ́ bo?» Ʋ tɩ sɔw na yel: «Ɩ̃ yúor dɩ na kɛ́ “Bɛ-tɛr-nʋɔr.”» Kɔ̃tɔ̃-yaga tɩ sɩrɩ na kpɛ a ʋ pʋɔ.

³¹A kɔ̃tɔmɛ á ŋá tɩ zɛlɛ nɩ a Yeezu k'ʋʋ ta diw a ƴãw a kɔ̃tɔmɛ dɔwrʋ bɔw-zulu[22] pʋɔ ɩ.

³²Dobaar na bɛ tɛr vuo a, tɩ àr'ɩ a tãw zu be tʋʋrɛ bɔbr bʋ̃-dɩrɩ. A kɔ̃tɔmɛ tɩ zɛlɛ na k'aa Yeezu sàw a cen tɩ kpɛ a dobaar pʋɔ. A Yeezu tɩ kʋ̀ a nɩ sɔ́r.

³³A kɔ̃tɔmɛ tɩ yi n a dɛb nɛ pʋɔ tɩ kpɛ a dobaar pʋɔ. A lɛ n'a a dobaar tɩ yi a tãw na ɩ cũgbulu a zu ɛ́ dãw taa tɩ lo a kʋ̃ɔ-kpɛ̃ɛ pʋɔ tu kʋ̃ɔ a za.

³⁴A doba-cɩ̃ɩnbɛ na tɩ nyɛ̃ a lɛ a yele na ɩ a, bɛ zɔ na kul a tẽw pʋɔ nɩ a gue pʋɔ tɩ manɩ.

³⁵A nɩbɛ tɩ yi na kɛ́ bɛ wa nyɛ̃ a lɛ a yele na ɩ a. Bɛ tɩ ta n a Yeezu zie nyɛ̃ a dɛb ʋl pʋɔ a kɔ̃tɔmɛ na tɩ yi a, ʋ zɩ̃ a Yeezu gbɛ́ɛ pile, su bome ɛ́ lɛb bãw yã. Pʋ̀lá tɩ vʋ̃ɔ bɛ na.

³⁶A bɛlɩ dem na tɩ nyɛ̃ a yele za a, tɩ manɩ nɩ a lɛ a kɔ̃tɔ̃-ìre ŋa sanʋ na tu a.

³⁷A lɛ n'a a Zerazenɩ̃ɛ mɩnɛ tẽw nɩbɛ za tɩ zɛlɛ a Yeezu k'ʋʋ yi zaa a bɛ tẽw pʋɔ, dɛ̃bɩ̃ɛ na tɩ ɩrɛ bɛ yaga a ƴãw. A Yeezu tɩ kpɛ n a gbor lɛb kule.

³⁸A dɛb ʋl a kɔ̃tɔ̃-faar na tɩ yi kɛ́ bɛr a, tɩ zɛlɛ nɩ a Yeezu k'ʋʋ sàw ʋ tuur ʋ. Ɛcɛ a Yeezu bɛ tɩ sàw ɛ, ɛ́ yel ʋ:

³⁹«Lɛb kul a fʋ yir, tɩ manɩ à á ŋá za a Naaŋmɩn na maalɩ a fʋ ƴãw a.» A dɛb ʋl tɩ cen na tɩ hieri a tẽw za pʋɔ a lɛ a Yeezu na tɩ ɩ a ʋ ƴãw a.

⁴⁰A Yeezu na tɩ yi a kʋ̃ɔ-kpɛ̃ɛ gãwn lɛb wa ta a, a zu-sɛbla tɩ zɔ na tuor'ʋ, bʋ̃ʋ n'ʋ vɛ̃, bɛ za tɩ gùre ʋ na.

⁴¹Puoru-dĩo nɩ-kpɛ̃ɛ kãw, a yúor na dɩ kɛ́ Zayiir a, tɩ wa na wa ta lo gbĩ dume a Yeezu pile ɛ́ zɛlɩ ʋ yãayãa k'ʋʋ wa a ʋ yir,

⁴²wa nyɛ̃ a ʋ pɔwyali-been na ŋmaar vʋʋrʋ a. A pɔwyale tɩ tarɛ nɩ yome pie nɩ ayi. A Yeezu na tɩ be a sɔ́r zu cere a, a nɩbɛ tɩ fɩɩrɛ ʋ nɩ a ziir za.

⁴³Pɔw kãw tɩ be n be, a sɩɛ cire tɩ maalɩ yome pie nɩ ayi. Ʋ tɩ sãw nɩ a ʋ tɛra za bɛr a dɔwtarɩ zie, ɛ́ a bɛ kãw za bɛ tʋ̃ɔ́ sanɩ ʋ ɛ.

⁴⁴Ʋ tɩ yi n a zikurí luluw wa tɔ a Yeezu kparʋ zʋɔrɛ, ɛ́ daadaalɛ a ʋ zɩ̃ɩ ŋmãa.

⁴⁵A Yeezu tɩ sowr'a: «Ãa n'ʋ tɔ m?» Ŋa za na mɩ́ tɩ yel kɛ́ ʋlɛ bɛ n'ʋ a, a Pɩɛr tɩ yel''a: «Wul-wul-kara a, a zu-sɛbla jil'a pàw fʋ ɛ́ fɩɩrɩ fʋ a ziir za!»

⁴⁶Ɛcɛ a Yeezu tɩ yel'a: «Nɩr tɔ m'a, ɩ̃ nyɛ̃ na kɛ́ fãw yi n a ɩ̃ pʋɔ.»

⁴⁷A pɔw na tɩ nyɛ̃ k'aa bɛ tɛr ʋ sɔwlʋ a, ʋ wa na ɛ́ màwr ʋ za, wa lo gbĩ dume a Yeezu pile, ɛ́ manɩ a nɩbɛ za wõ ʋlɩ bom nɛ ƴãw na n'a ʋ tɔ ʋ a, nɩ a lɛ ʋ na sanɩ daadaalɛ a.

⁴⁸A Yeezu tɩ yel ʋ na: «Ɩ̃ pɔwyaa a, a fʋ naaŋmɩn-sàw-deb faa fʋ na, cere nɩ ƴã-ɓaarʋ.»

⁴⁹A Yeezu ƴɛ̀rʋ bɛ tɩ lo tẽw sɛr ɛ, ɛ́ nɩr yi a puoru-dĩo nɩ-kpɛ̃ɛ yir wa ta yere: «A fʋ pɔwyale kpi na, ta cãà dɩ tuo bàlɛ a Wul-wul-kara ɩ.»

⁵⁰Ɛcɛ a Yeezu na tɩ wõ a ƴɛ̀r-bir ŋa a, ʋ yel'ɩ a Zayiir: «Ta zɔrɛ dɛ̃bɩ̃ɛ ɩ, dɛ sàw de Naaŋmɩn, ɛ́ a fʋ pɔwyale na lɛb'a vʋʋrɛ.»

⁵¹A Yeezu na wa ta a yir a, ʋ bɛ sàw nɩr kãw za bɩɛl'ʋ kpɛ n a dĩó ɛ, a bɛ ɩ Pɩɛr nɩ Zã nɩ Zakɩ, pãa de nɩ a bie sãà nɩ a ʋ mã ɩ.

⁵²A nɩbɛ za tɩ tuo nɩ nuru zũú kone nɩ a powle. A lɛ n'a a Yeezu tɩ yel: «Nyɩ ta kone ɩ, ʋ bɛ kpi ɛ, gʋ̃ɔ n'a ʋ gúre!»

⁵³Ɛcɛ bɛ tɩ ɩrɛ nɩ a Yeezu laar, bɛ na tɩ bãwnɩ a kɛ́ a powle kpi na a.

⁵⁴Ɛcɛ a Yeezu tɩ nyɔw nɩ a powle nũú ɛ́ yel kpɛ̃w za: «Ɩ̃ bie e, ìr!»

⁵⁵A ʋ vʋʋrʋ tɩ lɛb'a wa, ʋ ìr daadaalɛ. A Yeezu ƴãw kɛ́ bɛ kʋ̀ ʋ bʋ̃-dɩrɩ.

⁵⁶A tɩ ɩ n nɔ-ɓãa-yel a bie dɔwrbɛ zie. Ɛcɛ a Yeezu tɩ yel bɛ na kɛ́ bɛ taa wa yere a yel ŋa kʋ̀rɛ nɩr kãw za ɩ.