Read Dagara, Northern Wulu-ayi-sob 1 Bible Online

Wulu-ayi-sob 1 - Dagara, Northern bible

Wulu-ayi-sob 1

¹A ƴɛ̀rʋ a Moyiir na tɩ ƴɛ̀r kʋ̀ a Ɩsɩrayɛl nɩbɛ za a, a sɛbɛ ŋa pʋɔ n'a a be. Ʋ tɩ ƴɛ̀r'ɩ a bɛ zie, a lɛn daar bɛ na tɩ cãà be a Zurdɛ̃ saa-pɛrɩ́, a wɛja-kpalɛ tɩ̃tal pʋɔ na pɩɛlɩ Sufʋ a, Paran be ka lowr, ɛ́ Tofɛl, Lavan, Aserɔtɩ nɩ Di-Zahavʋ mɩ̀ be ka lowr, ɛ́ a tɩ̃tal be a sɔgɔ a.

²— Fʋ̃ʋ wa lo a sɔ́r na cere a Seyiir[1] tãgɛ̃́ a, bibie pie nɩ been n'a fʋ mɩ́ yi a Orɛb tãgɛ̃́ ɛ́ cen a Kadɛsɩ-Barneya. —

³Bɛ na tɩ yi a Eziptɩ a maalɩ yome lɩz'a ayi, a cuwr pie nɩ been sob bibi-dãw-niwn sob a n'a a Moyiir tɩ yel kʋ̀ a Ɩsɩrayɛl nɩbɛ, a alɩ bome nɛ za a Sore na tɩ yel k'ʋʋ yel kʋ̀ bɛ a.

⁴A Moyiir tɩ zɛb'a tʋ̃ɔ́ a Amoritɩ mɩnɛ nãà, Sihon, na tɩ kpɩɛr Hɛsɩbon a, ɛ́ mɩ̀ zɛb tʋ̃ɔ́ a Basan tẽw nãà, Ɔgɩ, na tɩ kpɩɛr Asɩtarɔtɩ na be Edɩrɛyɩ a.

⁵A Zurdɛ̃ saa-pɛrɩ́ Mowab tẽw n'a a Moyiir tɩ tĩ tɩrɛ a Naaŋmɩn wulu. A ʋ ƴɛ̀rʋ n'ɩ á ŋá:

⁶A lɛ tɩ na tɩ be a Orɛb tãgɛ̃́ a, a Sore tɩ Naaŋmɩn tɩ ƴɛ̀r'ɩ a tɩ zie à ŋá: «A cɛlɩ na nyɩ na be a tãw ŋa sɩɛmɩ́ a.

⁷Nyɩ pãa ìr lɛb lo a sɔ́r. Nyɩ cen kpɛ a Amoritɩ mɩnɛ tan pʋɔ nɩ a zi-kpɔwlɩ al a Kanãa tẽw dem na kpɩɛr a, a pɛr lɛ k'aa Zurdɛ̃ tɩ̃tal, a tãli vuo, a Ba-Peyi, a Negɛɛvʋ nɩ a zie ʋl na lanɩ a Mediterane kʋ̃ɔ-kpɛ̃ɛ a. Nyɩ cen tɩ tɔ a Libã tan nɩ a Efaratɩ[2] na ɩ a man-kpɛ̃ɛ a.

⁸Nyɩ nyɛ̃, ɩ̃ kʋ̀rɛ nyɩ nɩ a tẽw ŋa. Nyɩ cen tɩ de ʋ, só ʋ. Bʋ̃ʋ n'ʋ vɛ̃, a tẽw ŋa n'ʋ a mãa, a Sore, yel k'ɩ̃ɩ na kʋ̀ n a nyɩ sãàkʋm-kore Abraham, Ɩzaakɩ nɩ Zakɔb nɩ a bɛ bʋʋrɛ a pùorí.»

⁹A Moyiir tɩ yel'a[3]: Tɩ na tɩ be a Orɛb tãgɛ̃́ a, ɩ̃ tɩ yel nyɩ na: «Ɩ̃ kʋ̃ tʋ̃ɔ́ tɛr nyɩ ɩ̃ yõ tẽtẽ ɩ.

¹⁰A Sore nyɩ Naaŋmɩn ɩ na nyɩ yɛ̀r. A dɩ̃a a, nyɩ yãwmɛ na man a saa ŋmar-bie.

¹¹A Sore, a nyɩ sãàkʋm-kore Naaŋmɩn, ʋ ɩ nyɩ yãwmɛ gb'aa túr dɔwlɩ, ɛ́ ʋ maalɩ nyɩ mɛ̃ a lɛ ʋ na yel a!

¹²Ɛcɛ ɩ̃ kʋ̃ tʋ̃ɔ́ a ɩ̃ yõ tẽtẽ tuo a nyɩ yele, a nyɩ kpɩɛrʋ nɩ a nyɩ zɛbr ɛ.

¹³A na ɩ lɛ a, nyɩ kaa ír nɩbɛ na ɩ yã-bãwnbɛ a, nɩbɛ na cɩ ɛ́ bãw bom a, a nyɩ dɔwlʋ za pʋɔ, ɩ̃ɩ na ƴãw na bɛ ɩ a nyɩ nɩ-bɛrɛ.»

¹⁴A lɛ n'a nyɩ tɩ sɔw mɛ̃: «A lɛ fʋ na yel kɛ́ tɩ a, a vɩɛl'a.»

¹⁵Lɛ n'a ɩ̃ tɩ de nɩbɛ na ɩ yã-bãwnbɛ ɛ́ bãw bom a, a nyɩ kaafʋ ƴãw. Bɛ tɩ ɩ n a nyɩ dɔwlʋ nɩ-bɛrɛ baarɩ. Ɩ̃ tɩ ƴãw nɩ bɛ mɩnɛ bɛ ɩ nɩbɛ túre, nɩbɛ kɔbr, nɩbɛ lɩz'a ayiri nɩ piir nɩ nɩbɛ piir nɩ-bɛrɛ, ɛ́ ƴãw bɛ ŋmaarɛ bɛ ɩ sɛ-sɛbrbɛ a nyɩ dɔwlʋ been been pʋɔ.

¹⁶Ɩ̃ mɩ̀ tɩ yel'ɩ à ŋá kʋ̀ a nyɩ ƴɛ̀r-dɩrbɛ: «Nyɩ na mɩ́ jɛl'ɩ a yele a nyɩ yɛbr na wa n a, ɛ́ dɩ a ƴɛ̀rʋ a tu sɔ́r a Ɩsɩrayɛl bie nɩ a ʋ yɛb cara pʋɔ, bɩɩ ʋlɛ nɩ a nʋʋra na kpɩɛr a nyɩ sɔgɔ a cara pʋɔ.

¹⁷Nyɩ taa owre a ƴɛ̀rʋ-dɩb pʋɔ ɩ. Nyɩ mɩ́ bɛr wõ a nɩ-bɛ-tɛr-yúor nɩ a nɩ-yúor. Nyɩ taa zɔrɛ nɩr kãw za ɩ, bʋ̃ʋ n'ʋ vɛ̃, Naaŋmɩn yúor ƴãw n'a a fɛr kɛ́ nyɩ dɩrɛ a ƴɛ̀rʋ. Yel kãw mɩ́ wa kpɛmɛ zuo nyɩ a, nyɩ mɩ́ wa n ʋ wa kʋ̀ m, ɩ̃ɩ na jɛl ʋ na kaa.

¹⁸Ɩ̃ tɩ yel'a kʋ̀ nyɩ a lɛn daar, a lɛ za a na fɛr kɛ́ nyɩ ɩ a.»

¹⁹«Al pùorí, a Sore tɩ Naaŋmɩn tɩ ƴãw na tɩ yi a Orɛb tãgɛ̃́, ɛ́ tu tɔl a wɛja-kpalɛ kpɛ̃ɛ kpɛ̃ɛ ŋa na ɩrɛ dɛ̃bɩ̃ɛ a pʋɔ, a wɛja ŋa nyɩ na nyɛ̃ a, ɛ́ lo a Amoritɩ mɩnɛ tan pʋɔ sɔ́r, tɩ ta Kadɛsɩ-Barneya.

²⁰Ɩ̃ tɩ yel'a kʋ̀ nyɩ a lɛn daar: “Nyɩ ta na pɩɛlɩ a Amoritɩ mɩnɛ tan[4] vuo a Sore tɩ Naaŋmɩn na kʋ̀rɛ tɩ a.

²¹Nyɩ nyɛ̃, a Sore nyɩ Naaŋmɩn ɩ na a tẽw sãá a nyɩ niŋé. Nyɩ do tɩ de ʋ, so ʋ, mɛ̃ a lɛ a Sore, a nyɩ sãàkʋm-kore Naaŋmɩn na yel kʋ̀ nyɩ a. Nyɩ tɛr kanyir, nyɩ ta zɔrɛ dɛ̃bɩ̃ɛ ɩ!»

²²Lɛ n'a nyɩ tɩ wa nyɩ za wa páw mɛ̃ yel à ŋá: «Tɩ tõ nɩbɛ a tɩ nidaa bɛ tɩ cɔlɩ jɩ́r a tẽw kaa, ɛ́ wa yel a sɔ́r tɩ na na lo cen a kʋ̀ tɩ, nɩ a tẽ-bɛrɛ al tɩ na na ta a.»

²³A nyɩ yã tɩ sãá nɩ yã-vla, alɛ so ɩ̃ tɩ kaa ír nɩbɛ pie nɩ ayi a nyɩ pʋɔ, dɔwlʋ za pʋɔ nɩ-been.

²⁴Bɛ tɩ de nɩ a tan pʋɔ sɔ́r tɩ ta Hɛsɩkɔl fʋɔla pʋɔ, jɩ́r jɩ́r ʋ kaa.

²⁵Bɛ tɩ pɔr'ɩ a tẽw tɩ-wɔmɛ tɛr siw wa n wa kʋ̀ tɩ ɛ́ yel à ŋá: «A tẽw a tɩ Sore Naaŋmɩn na kʋ̀rɛ tɩ a ɩ n tẽw na vɩɛl a!»

²⁶Ɛcɛ nyɩ bɛ sàw cen a be ɩ, zawrɩ a lɛ a Sore nyɩ Naaŋmɩn na yel a.

²⁷Nyɩ tɩ zɛb'ɩ a nyɩ pɛnɛ-sɛwr pʋɔ yel à ŋá: «A Sore na hɩ̃ɛn tɩ a ƴãw n'a ʋ ɩ tɩ yi a Eziptɩ. Ʋ bɔbr'a k'ʋʋ bɛr tɩ kʋ̀ a Amoritɩ mɩnɛ, bɛ kʋ tɩ pàw pɛr!

²⁸Bʋnʋ ƴãw n'a tɩ na cen a be? A tɩ yɛbr ɩ na a tɩ kanyir za baarɩ. Bʋ̃ʋ n'ʋ vɛ̃, bɛ yel'a: “A tẽw ŋa nɩbɛ kpɛmɛ na zuo tɩ, ɛ́ yãwmɛ zuo tɩ, a bɛ ten ɩ n tẽ-bɛrɛ bɛrɛ bɛ na mɛ dacine viiri koli a do tɩ tɔ salom a.” Bɛ mɔ̃ mɩ̀ tɩ nyɛ̃ nɩ a nɩ-kɛra jarmam, Anakɩ, bʋʋrɛ a be!»

²⁹Ɩ̃ tɩ yel nyɩ na: «Nyɩ ta zɔrɛ dɛ̃bɩ̃ɛ ɩ, nyɩ ta zɔrɛ bɛ ɩ!

³⁰A Sore nyɩ Naaŋmɩn na de nyɩ niwn a na de nɩ a nyɩ zɛbr zɛbr, mɛ̃ a lɛ ʋ na ɩ kɛ̀ nyɩ nyɛ̃ a Eziptɩ

³¹nɩ a wɛja-kpalɛ pʋɔ a. Nyɩ nyɛ̃ a nɩ a be: ʋ tɛr nyɩ na mɛ̃ sãà na mɩ́ tɛr ʋ bie a, a sɔr-wogo ŋa za zu nyɩ na lo wa ta a ka a.»

³²A na saa tɩ ɩ à ŋá a, nyɩ bɛ sàw de a Sore nyɩ Naaŋmɩn ɛ.

³³Ɛcɛ ʋlɛ n'ʋ mɩ́ tɩ de nyɩ niwn a sɔ́r zu, k'ʋʋ tɩ bɔ zie nyɩ maalɩ a laɩ. Ʋ mɩ́ tɩ be n a vũu na ɩ mɛ̃ kpul a pʋɔ a tɩ̃ɩsɔw, caalɛ nyɩ a sɔ́r, ɛ́ be a zũzuwr na ɩ mɛ̃ kpul a pʋɔ a mʋ̃tɔ̃w.

³⁴A Sore tɩ wõ n a lɛ nyɩ na yel a. Ʋ tɩ nyɛ̃ nɩ suur ɛ́ pɔ yel à ŋá:

³⁵«A nɩ-faar bʋʋrɛ bɛ ŋa been kãw za bɛ nyɛrɛ a tẽ-vla[5] ɩ̃ na pɔ yel k'ɩ̃ɩ na kʋ̀ n a bɛ sãàkʋm-kore a ɩ.

³⁶Yefune bidɛb Kalɛb yõ n'ʋ na nyɛ̃ ʋ. Ɩ̃ na kʋ̀ ʋ nɩ a tẽw ʋ na cɔlɩ a, ʋlɛ nɩ a ʋ bʋʋrɛ, ʋ na tu m nɩ a ʋ pʋɔ za a ƴãw.»

³⁷Nyɩmɛ nɛbɛ so a Sore mɩ̀ tɩ nyɛ̃ nɩ mɛ̃ suur. Ʋ tɩ yel mɛ̃ na: «A fʋ̃ʋ Moyiir a, fʋ mɩ̀ kʋ̃ kpɛ a tẽw ŋa pʋɔ ɩ!

³⁸A fʋ tõ-tõ-bie Zozue na ɩ Nun bidɛb a n'ʋ na kpɛ. Ɩ ʋ tɛr kanyir, ʋlɛ na n'ʋ na tɛr a Ɩsɩrayɛl nɩbɛ bɛ zɛb de a tẽw a ƴãw.»

³⁹Al pùorí, a Sore tɩ ƴɛ̀r'ɩ a nyɩ za zie à ŋá: «Nyɩ tɩ yere na kɛ́ bɛ na nyɔw nɩ a nyɩ bibiir bɛ ɩ gbãgbaar. Bɛl na bɛ bãw vla nɩ faa a dɩ̃a a, bɛ na kpɛ n a tẽw pʋɔ, bɛlɛ nɩ a Zozue. Bɛlɛ nɛbɛ ɩ̃ na de ʋ kʋ̀, bɛ so ʋ.

⁴⁰Nyɩɩm ƴãw a, nyɩ lɩɛbɩ pɛr-tul tu a wɛja-kpalɛ pʋɔ cere a Bàa-kɛkɛɛ kʋ̃ɔ-kpɛ̃ɛ lowr.»

⁴¹Nyɩ tɩ sɔw mɛ̃ nɩ a ʋlɩ bibir nɛ à ŋá: «Tɩ sãw nɩ a Sore. Ɛcɛ ƴɛrɛŋa a, tɩ bɔbr'a kɛ́ tɩ cen tɩ zɛb, mɛ̃ a lɛ a Sore tɩ Naaŋmɩn na yel a.» Ŋa za mɩ́ tɩ de nɩ a ʋ zɛbr bome, nyɩ na tɩ tɩ́ɛrɛ kɛ́ nyɩ na tʋ̃ɔ́ na zɛb de a tan vuo ʋl mɔlɛ lɛ a.

⁴²Lɛ n'a a Sore tɩ yel mɛ̃ à ŋá: «Yel bɛ kɛ́ bɛ taa cere tɩ zɛbr ɛ, ɩ̃ bɛ be a bɛ sɔgɔ ɩ. Bɛ ta cen a bɛ dɔ̃ dem tɩ zɛb tʋ̃ɔ́ bɛ ɩ.»

⁴³A lɛ n'a ɩ̃ tɩ kpãa nyɩ, ɛcɛ nyɩ bɛ tɩ bɛr wõ a ɩ̃ ƴɛ̀rʋ ɛ. Nyɩ tɩ zawr'ɩ a Sore nʋɔr, ɛ́ ɩ gãda-ɩb cen a tan vuo pʋɔ be.

⁴⁴Lɛ n'a a Amoritɩ mɩnɛ tɩ yi a tãw zu bɛ na kpɩɛr a, ɛ́ siw tuori nyɩ. Bɛ tɩ zɛb'a tʋ̃ɔ́ nyɩ a Seyiir vuo pʋɔ, ɛ́ diw nyɩ mɛ̃ sɩwr na pul a, tɩ sãá nɩ Hɔrma.

⁴⁵Nyɩ na tɩ lɛb wa a, nyɩ kõ na cɔw a Sore, ɛcɛ ʋ bɛ tɩ bɛr wõ ɩ, ʋ bɛ tɩ cɛlɩ be ɩ.

⁴⁶Lɛ n'a nyɩ tɩ zɩ̃ a Kadɛsɩ-Barneya cɛlɩ cɛlɩ yaga za.