Read Dagara, Northern Wulu-ayi-sob 10 Bible Online

Wulu-ayi-sob 10 - Dagara, Northern bible

Wulu-ayi-sob 10

¹Lɛ n'a a Sore tɩ yel mɛ̃: «Pɛnɩ kʋsɛ-pamɛ ayi a ŋmɛ̃ mɛ̃ a de niwn dem a. Mɩ̀ maalɩ dàar dágá. Al pùorí, do wa a ɩ̃ zie a tãw zu.

²A nɛ-ƴãwnɩ na tɩ be a kʋsɛ-pamɛ fʋ na lɔb kar a zu a, ɩ̃ na sɛb a na ƴãw a kʋsɛ-pamɛ zu, fʋ de ƴãw a dágá pʋɔ.»

³A lɛ n'a ɩ̃ tɩ maalɩ dágá nɩ akasɩa dàar, pɛnɩ kʋsɛ-pamɛ ayi na ɩ mɛ̃ a de niwn dem a, ƴãw nuru pʋɔ do n a tãw zu.

⁴A nɛ-ƴãwnɩ pie a Sore na tɩ be a vũu pʋɔ ɛ́ kʋ̀ nyɩ a ʋlɩ bibir nyɩ na tɩ ɓã taa a tãw sɩɛmɩ́ a, ʋ sɛb a na ƴãw a kʋsɛ-pã-paalɛ zu, mɛ̃ a lɛ tɔr za ʋ na tɩ sɛb ƴãw a dãw-niwn dem zu a. Al pùorí ʋ de a kʋ̀ m.

⁵Ɩ̃ tɩ yi n a tãw zu lɛb siw nɩ tɩ ƴãw a a dágá ɩ̃ na tɩ maalɩ a pʋɔ. A be n'a a gã mɛ̃ a lɛ a Sore na tɩ yel kʋ̀ m a. —

⁶A Ɩsɩrayɛl nɩbɛ tɩ yi n a Bene-Yakan buli ƴãw cen Mosera. Be n'a a Aarɔ̃ tɩ kpi bɛ ũù, ɛ́ a ʋ bidɛb Eleazaar lɩɛr'ʋ ɩ a bàwr-maalɛ.

⁷Bɛ tɩ yi n a be cen Gudigoda, yi a Gudigoda cen Yɔtɩvata na ɩ bà-fʋɔlɩ tẽw a.

⁸A ʋlɩ vuo nɛ pʋɔ a, a Sore tɩ kʋ̀ n a Levi bʋʋrɛ tome á ŋá na ɩ a tʋɔra a: bɛ tuore a Sore wõ-taa dágá, bɛ mɩ́ àr a ʋ niŋé a ʋ tome tob ƴãw, bɛ mɩ́ ƴɛ̀r a nɔ-vla kʋ̀ a nɩbɛ a ʋ yúor ƴãw. A levitɩ mɩnɛ cãà na tone a tome á ŋá a dɩ̃a.

⁹Alɛ n'a so a Levi dɔwlʋ bɛ tɛr tẽsɔwr ʋ na so a, mɛ̃ a ʋ yɛbr a ɩ. A Sore n'ɩ a ʋ bom, mɛ̃ a lɛ a Sore nyɩ Naaŋmɩn na yel kʋ̀ ʋ a. —

¹⁰Ɩ̃ tɩ maal'ɩ bibie lɩz'a ayi nɩ tɩ̃ɩsɔwr lɩz'a ayi a tãw zu, mɛ̃ a dãwdãw a[37]. A Sore tɩ lɛb'a maal wõ a ɩ̃ puoru, ɛ́ bɛ sàw kʋ nyɩ pàw pɛr ɛ.

¹¹Al pùorí ʋ yel mɛ̃ à ŋá: «Ìr, cen tɩ de a nɩbɛ niwn, kɛ̀ bɛ cen tɩ de a tẽw ɩ̃ na pɔ a bɛ sãàkʋm-kore zie k'ɩ̃ɩ na kʋ̀ bɛ na a.»

¹²Ƴɛrɛŋa a, Ɩsɩrayɛl nɩbɛ ɛ, bʋ̃ʋ n'ʋ a Sore nyɩ Naaŋmɩn gùre a nyɩ zie? A ʋlɩ bom nɛ tɛwr ʋ na gùre a, ʋlɛ n'ɩ kɛ́ nyɩ zɔrɛ ʋ, maalɛ a ʋ pʋ-tɩɛrʋ, nɔnɛ ʋ, ɛ́ tone a ʋ tome nɩ a nyɩ pʋɔ za, nɩ a nyɩ sɩ́ɛ za.

¹³Ʋ gù na kɛ́ nyɩ sàwr a ʋ nɛ-ƴãwnɩ nɩ a ʋ wulu ɩ̃ na kʋ̀rɛ nyɩ a dɩ̃a, a nyɩ vla ƴãw a.

¹⁴Yel-mɩŋa za, a Sore nyɩ Naaŋmɩn so a salom kpɛ̃ɛ kpɛ̃ɛ ŋa, a tẽsɔw nɩ a bome za na be a ʋ zu a.

¹⁵Ɛcɛ a koro koro a, a nyɩ sãàkʋm-kore pùor'a a Sore tɩ tu k'ʋʋ nɔnɛ bɛ, ɛ́ ƴɛrɛŋa a, a nyɩɩm na ɩ a bɛ bʋʋrɛ a, nyɩmɛ nɛbɛ ʋ kaa ír a nɩ-bʋʋrɛ za pʋɔ, mɛ̃ nyɩ na nyɛ̃ a dɩ̃a a.

¹⁶A na ɩ à ŋá a, nyɩ ɩ nɩbɛ a Sore na so[38] gbɛ́ɛ nɩ nuru a, nyɩ ta cãà dɩrɛ zu-kpɛnʋ a ʋ zie ɩ.

¹⁷Bʋ̃ʋ n'ʋ vɛ̃, a Sore nyɩ Naaŋmɩn n'ɩ a ŋmɩmɛ za Naaŋmɩn, a sorbɛ za Sore, a Naaŋmɩn na ɩ kpɛ̃ɛ a, na kpɛmɛ ɛ́ bɛ tɛr dɩ̃ɛnʋ a. Ʋ bɛ owre ɩ, ɛ́ bɛ sàwr bɛ ŋmɩɛr ʋ nʋɔr ɛ[39].

¹⁸Ʋ mɩ́ kpɛ n a bi-kpebe nɩ a pɔw-kɔbɛ, ɛ́ ɩ a ʋ nɔ̃wfʋ ʋ sãá a nʋʋrɩ na kpɩɛr a nyɩ pʋɔ a zie, mɩ́ kʋ̀ bɛ bʋ̃-dɩrɩ nɩ bʋ̃-suuri.

¹⁹A na ɩ à ŋá a, a nyɩɩm mɩ̀, nyɩ mɩ̀ nɔnɛ a nʋʋrɩ na be a nyɩ sɔgɔ a, bʋ̃ʋ n'ʋ vɛ̃, nyɩ mɩ̀ tɩ ɩ n nʋʋrɩ a Eziptɩ.

²⁰Nyɩ zɔrɛ a Sore nyɩ Naaŋmɩn, nyɩ tone ʋ, nyɩ tu a ʋl yõ pùor, ɛ́ mɩ́ pɔ n a ʋ yúor yõ.

²¹Ʋlɛ n'ʋ nyɩ na mɩ́ danɛ, ʋlɛ n'ɩ a nyɩ Naaŋmɩn na maalɩ yel-bɛrɛ na ɩrɛ dɛ̃bɩ̃ɛ a, a nyɩ ƴãw, yele nyɩ na nyɛ̃ nɩ mimir a.

²²A nyɩ sãàkʋm-kore tɩ ɩ n lɩz'a ata nɩ pie tɛwr, a lɛ bɛ na ta a Eziptɩ tẽw a. Ɛ́ ƴɛrɛŋa a Sore nyɩ Naaŋmɩn ɩ nyɩ yãwmɛ man a saa ŋmar-bie[40].