Read Dagara, Northern Wulu-ayi-sob 12 Bible Online

Wulu-ayi-sob 12 - Dagara, Northern bible

Wulu-ayi-sob 12

¹Nyɛ̃ a wulu nɩ a tub nyɩ na na ƴãw fãw tuur a nyɩ bibi-vɩɛrɩ za nyɔ-vʋʋrʋ daar, a tẽw ʋl a Sore nyɩ sãàkʋm-kore Naaŋmɩn na na kʋ̀ nyɩ nyɩ so a pʋɔ a.

²Nyɩ na sãw nɩ a maalʋ-ziir al za na be a tã-kɛrɩ, a tãli nɩ a tɩ-zimpiri zimpiri za pile a bɛr. Be n'a a nɩ-bʋʋr-yoru nyɩ na na diw ɛ́ de a ten a tɩ maalɛ a bɛ ŋmɩmɛ.

³Nyɩ na ŋmɛr'ɩ a bɛ bàwr-maal-kube bɛr, nyɩ na ŋmɛ n a bɛ kʋsɛ-teli kar, nyɩ na nyɩw nɩ a bɛ dà-barɩ bɛr, nyɩ na ŋmɛ n a bɛ ŋmɩmɛ dasuli lɔb. Nyɩ na ɩ na a ŋmɩmɛ á ŋá yúor ta cãà pore a zie ʋl ɛ.

⁴A Sore nyɩ Naaŋmɩn puoru ƴãw a, nyɩ kʋ̃ ɩrɛ mɛ̃ a nɩ-bʋʋr-yoru bɛ ŋa a ɩ.

⁵A zie ʋl ʋ na na kaa ír a nyɩ dɔwlʋ za pʋɔ, kpɩɛr a be, ɛ́ mɩ́ wul k'aa be n'a ʋ be a, be yõ n'a nyɩ na mɩ́ cen tɩ puor'ʋ.

⁶Be n'a nyɩ na mɩ́ wa n a nyɩ nyɩw-a-za-bagɛ nɩ a nyɩ lãw-taa bagɛ, a nyɩ tɛra ziir pie sob, a nyɩ nuru bome, a de-kʋ̀b bome nyɩ na nɔnɛ wa n a, bɩɩ nyɩ na wa n nʋɔr nyɩ na kõ a íru ƴãw a, de nɩ a nyɩ nĩi, a nyɩ píir nɩ a nyɩ bʋʋr bil-dãw-dɔwrɩ.

⁷A Sore zi-sõw pʋɔ be mɩ̀ n'a, nyɩɩm nɩ a nyɩ yie dem na mɩ́ lãw dɩ a bàwr-maal-bome. Nʋ̃ɔ̀ na mɩ́ ɩrɛ nyɩ na, a Sore nyɩ Naaŋmɩn na maalɩ nyɩ a nyɩ tome za pʋɔ a ƴãw.

⁸Nyɩ kʋ̃ cãà puore a Sore mɛ̃ à ŋá tɩ na ɩrɛ a ka a dɩ̃a a ɩ, mɛ̃ à ŋá ŋa za na mɩ́ ɩrɛ a lɛ ʋ na nyɛ̃ a vɩɛl a ʋ zie a ɩ.

⁹Bʋ̃ʋ n'ʋ vɛ̃, nyɩ bɛ ta a tẽw a Sore nyɩ Naaŋmɩn na na kʋ̀ nyɩ nyɩ so a sɛr ɛ, a be nyɩ na na kpɩɛr ɛ́ bom bɛ damnɛ nyɩ a.

¹⁰Ɛcɛ nyɩ na gãw nɩ a Zurdɛ̃ man, zɩ̃ a tẽw ʋ na kʋ̀rɛ nyɩ kɛ́ nyɩ so a pʋɔ. Ʋ na gù nyɩ nɩ a dɔ̃ dem za na jil koli nyɩ a ƴãw, ɛ́ nyɩ na kpɩɛr'ɩ a be, ɛ́ bɛ bãw damnʋ ɛ.

¹¹A lɛn daar a, a zie ʋl a Sore nyɩ Naaŋmɩn na na kaa ír k'ʋʋ mɩ́ wul k'aa be n'a ʋ be a, a be n'a nyɩ na mɩ́ wa n a bome á ŋá za ɩ̃ na yel a wa kʋ̀ ʋ: a nyɩ nyɩw-a-za-bagɛ, a nyɩ lãw-taa bagɛ, a nyɩ tɛra ziir pie sob, a nyɩ nuru bome, nɩ a alɩ bome nɛ za nyɩ na yel kɛ́ nyɩ de kʋ̀ a Sore, ír'ɩ a nɛ́ɛ nyɩ na kõ a.

¹²A Sore nyɩ Naaŋmɩn zi-sõw pʋɔ be a, nʋ̃ɔ̀ na mɩ́ ɩrɛ nyɩ na, a nyɩɩm, a nyɩ bibiir, a nyɩ tõ-tõ-bi-dɛbr nɩ a nyɩ tõ-tõ-bi-pɔwbɛ, lãwnɩ a levitɩ mɩnɛ na kpɩɛr a nyɩ tẽ-bɛrɛ pʋɔ a, bɛl na bɛ tɛr tẽsɔw bɛ na põ ír kʋ̀ bɛ a nyɩ sɔgɔ a ƴãw[44].

¹³Nyɩ gù vla taa maalɛ a nyɩ bagɛ, maalʋ-zie kãw za nyɩ nãà wa nyɛ̃ a ɩ.

¹⁴Nyɩ maalɛ a a zie ʋl yõ a Sore na na kaa ír a nyɩ dɔwlʋ kãw tẽsɔw pʋɔ a. Be yõ n'a nyɩ na maalɛ a alɩ bome nɛ za ɩ̃ na yel kʋ̀ nyɩ a.

¹⁵Ɛcɛ, mɛ̃ a lɛ a Sore na na maalɩ nyɩ sɛw a be nyɩ na na kpɩɛr a, nyɩ na tʋ̃ɔ́ na mɩ́ kʋ dʋ̃w lɛn daar za nyɩ na bɔbr a, 'wɔb a nɛn. Bɛlɩ dem za na tɛr dɛwr a, nɩ a bɛl na bɛ tɛr dɛwr a, na tʋ̃ɔ́ na mɩ́ 'wɔb ʋ, mɛ̃ mɔlʋ bɩɩ wal-daa n'ʋ a.

¹⁶Ɛcɛ nyɩ bɛ 'wɔbr a dʋ̃w zɩ̃ɩ ɛ. Nyɩ na cir a na bɛr a tẽw mɛ̃ kʋ̃ɔ a.

¹⁷Nyɩ kʋ̃ mɩ́ tɛr sɔ́r dɩ a nyɩ ble, a nyɩ divɛ̃ nɩ a nyɩ kãá tɛra ziir pie sob a nyɩ yir ɛ, nɩ a nyɩ nĩi, a nyɩ píir nɩ a nyɩ bʋʋr bil-dãw-dɔwrɩ ɛ, nɩ a nyɩ nuru bome ɩ, nɩ a de-kʋ̀b bome nyɩ na nɔnɛ wa n, bɩɩ nyɩ na wa n nʋɔr nyɩ na kõ a íru ƴãw a ɩ.

¹⁸A zi-sõw pʋɔ yõ n'a nyɩ na tʋ̃ɔ́ mɩ́ dɩ a, be a Sore nyɩ Naaŋmɩn na na kaa ír a. Nyɩ na mɩ́ dɩ a na nyɩmɛ nɩ a nyɩ bidɛbr, a nyɩ pɔwyaar, a nyɩ tõ-tõ-bi-dɛbr nɩ a nyɩ tõ-tõ-bi-pɔwbɛ, nɩ a levitɩ mɩnɛ na kpɩɛr a nyɩ tẽ-bɛrɛ pʋɔ a. Nʋ̃ɔ̀ na mɩ́ ɩrɛ nyɩ nɩ a Sore nyɩ Naaŋmɩn zi-sõw pʋɔ be, a nyɩ tome za nyɩ na tõ a ƴãw.

¹⁹Lɛn daar za nyɩ na na kpɩɛr a nyɩ tẽw a, nyɩ gù vla taa lɔbr a levitɩ mɩnɛ bɛrɛ ɩ.

²⁰A Sore nyɩ Naaŋmɩn wa ɩ a nyɩ tẽw ʋ yɛ̀lɩ, mɛ̃ a lɛ ʋ na yel kʋ̀ nyɩ a, nɛn vʋla wa kpɩɛr nyɩ a, nyɩ na tʋ̃ɔ́ na 'wɔb sɛw lɛ za nyɩ na bɔbr a.

²¹A zie a Sore nyɩ Naaŋmɩn na kaa ír, k'ʋʋ mɩ́ wul k'aa be n'a ʋ be a, ʋlɛ wa zãá zuo nyɩ a, nyɩ na tʋ̃ɔ́ na mɩ́ nyɔw dʋ̃w a nyɩ nĩi, a nyɩ píir bɩɩ a nyɩ bʋʋr, a Sore na na kʋ̀ nyɩ a pʋɔ kʋ. Nyɩ na tʋ̃ɔ́ na mɩ́ 'wɔb a nɛn sɛw lɛ za nyɩ na bɔbr a, a nyɩ yie pʋɔ, ɛ́ 'wɔb tu n a nɛ́ɛ ɩ̃ na ƴãw kʋ̀ nyɩ a.

²²A bɛlɩ dem na tɛr dɛwr a, nɩ a bɛl na bɛ tɛr dɛwr a, bɛ za na tʋ̃ɔ́ na mɩ́ 'wɔb, mɛ̃ mɔlʋ bɩɩ wal-daa n'ʋ nyɩ 'wɔbr a.

²³Ɛcɛ nyɩ ƴãw fãw taa 'wɔbr a zɩ̃ɩ ɛ, a zɩ̃ɩ na n'ɩ a nyɔ-vʋʋrʋ a ƴãw. A na ɩ à ŋá a, nyɩ kʋ̃ mɩ́ 'wɔb a nyɔ-vʋʋrʋ lãwnɩ a nɛn ɛ,

²⁴nyɩ taa 'wɔbr a ɩ, nyɩ mɩ́ cir a bɛr tẽw mɛ̃ kʋ̃ɔ a.

²⁵Nyɩ taa 'wɔbr a zɩ̃ɩ towtow ɛ, lɛ n'a nyɩ na nyɛ̃ a nʋ̃ɔ̀, nyɩɩm nɩ a nyɩ bʋʋrɛ. Bʋ̃ʋ n'ʋ vɛ̃, nyɩ na ɩ n a lɛ na vɩɛl a Sore zie a.

²⁶Ɛcɛ a dʋn al a Sore na so a, nɩ a nʋɔr íru dʋn, al tɛwr'a nyɩ na mɩ́ wa n a zie ʋl a Sore na kaa ír a.

²⁷A nyɩw-a-za-bagɛ ƴãw a, nyɩ na mɩ́ de nɩ a nɛn nɩ a zɩ̃ɩ za kʋ̀ a Sore nyɩ Naaŋmɩn, a bàwr-maal-kuur zu. A lãw-taa bagɛ ƴãw a, nyɩ na mɩ́ cir'ɩ a zɩ̃ɩ ƴãw a Sore bàwr-maal-kuur zu, ɛ́ 'wɔb a nɛn.

²⁸Nyɩ bɛrɛ wone ɛ́ tuur a nɛ-ƴãwnɩ á ŋá za ɩ̃ na kʋ̀rɛ nyɩ a. Lɛ n'a nyɩ na wone nʋ̃ɔ̀ kʋralɛ, nyɩɩm nɩ a nyɩ bʋʋrɛ. Bʋ̃ʋ n'ʋ vɛ̃, nyɩ na maal'ɩ a lɛ na vɩɛl ɛ́ pɛlɩ a Sore nyɩ Naaŋmɩn pʋɔ a.

²⁹A Sore nyɩ Naaŋmɩn na ɩ na a nɩ-bʋʋr-yoru bɛl na kpɩɛr a tẽw ʋl pʋɔ nyɩ na cere na tɩ diw bɛ a, bɛ baarɩ a nyɩ niŋé. Lɛ n'a nyɩ na lɩɛrɩ bɛ zɩ̃ a tẽw pʋɔ.

³⁰Bɛlɛ wa kʋ bɛ pàw pɛr baar'a, nyɩ gù vla taa cɔwrɛ bɛ, wa kpɛ bɛra pʋɔ ɩ. Nyɩ taa cɛlɛ a bɛ ŋmɩmɛ zie ɩ. Nyɩ taa yere à ŋá ɩ: «Ŋmɩŋmɩn n'a a nɩbɛ bɛ ŋa tɩ maalɛ a bɛ ŋmɩmɛ? Tɩ bɔbr'a kɛ́ tɩ mɩ̀ ɩrɛ mɛ̃ a bɛl a.»

³¹Nyɩmɛ wa puore a Sore nyɩ Naaŋmɩn a, nyɩ taa cɔwrɛ bɛ ɩ. Bʋ̃ʋ n'ʋ vɛ̃, a alɩ bome nɛ na kpɛ faa bɛ maal'ɩ wob a Sore zie a, bɛ maalɛ a nɩ a bɛ ŋmɩmɛ ƴãw, mɩ́ tɛr tɩ nyɩw a bɛ bidɛbr nɩ a bɛ pɔwyaar maal'ɩ bàwr[45] kʋ̀ a bɛ ŋmɩmɛ.