Read Dagara, Northern Wulu-ayi-sob 14 Bible Online

Wulu-ayi-sob 14 - Dagara, Northern bible

Wulu-ayi-sob 14

¹Nyɩ ɩ n a Sore nyɩ Naaŋmɩn bibiir. A na ɩ à à ŋá a, nyɩmɛ mɩ́ wa tɛr kuor a, nyɩ ta ƴãw bɛ wɛr wɛr nyɩ a ƴã-gan ɛ, ɛ́ ta põ a nyɩ zu a nisɔw ɛ[48].

²Bʋ̃ʋ n'ʋ vɛ̃, nyɩ ɩ n nɩ-bʋʋrɛ a Sore na sʋ̃ɔmɩ bul so a. Nyɩmɛ nɛbɛ ʋ kaa ír a tẽw zu nɩ-bʋʋrɛ za pʋɔ, kɛ́ nyɩ ɩ a ʋ na-bom[49].

³Nyɩ bɛ dɩrɛ bʋ̃-dɩra kãw za a Sore na nyɛ̃ ʋ ɩ bʋ̃-dɩ-dɛwr a ɩ.

⁴Nyɛ̃ a dʋn al nyɩ na na tʋ̃ɔ́ mɩ́ 'wɔb a[50]: a náab, a pɛ́rʋ, a bʋɔ,

⁵a wal-daa, a mɔlʋ, a ɩ̃ɔ-daa, a tan pʋɔ bʋɔ, a wɛ-pɛ́rʋ, a wal-piel, a wɛ-bʋɔ,

⁶nɩ a dʋn al za a nafɩlɛ na mɩ́ ɓar ziir ayi, ɛ́ a owr 'wɔbr a.

⁷A dʋn al na owr 'wɔbr a pʋɔ, bɩɩ a al a nafɩlɛ na ɓar ziir ayi a pʋɔ a, nyɛ̃ a al nyɩ na bɛ 'wɔbr a: a nyɔ̃wmɛ, a sɔ̃w nɩ a tasɩr. Dʋ̃-dɛgɛ n'a a nyɩ zie. Bʋ̃ʋ n'ʋ so, a owr a 'wɔbr, ɛ́ bɛ tɛr nafɩlɛ ɩ.

⁸Nyɩ mɩ̀ bɛ 'wɔbr dùo ɩ, dʋ̃-dɛwr'ʋ a nyɩ zie. Bʋ̃ʋ n'ʋ so, ʋ tɛr'ɩ nafɩlɛ ɛ́ bɛ owr 'wɔbr ɛ. Nyɩ taa 'wɔbr a dʋn á ŋá nɛn ɛ, ɛ́ taa tʋɔr a kũu mɩ̀ ɛ.

⁹A dʋn na kpɩɛr a kʋ̃ɔmɩ́ a pʋɔ a, nyɩ na tʋ̃ɔ́ na 'wɔbr a al na tɛr kɔ̀rɛ nɩ pɛgɛ a.

¹⁰Ɛcɛ nyɩ bɛ 'wɔbr a al na bɛ tɛr kɔ̀rɛ nɩ pɛgɛ a ɩ: dʋ̃-dɛgɛ n'a a nyɩ zie.

¹¹Nyɩ na tʋ̃ɔ́ na 'wɔbr a lili na bɛ tɛr dɛwr a.

¹²Ɛcɛ a lili nyɩ na bɛ 'wɔbr a n'ɩ á ŋá: a sɩla, a sɩl-pla, a kʋ̃ɔ-kpɛ̃ɛ sɩla,

¹³a dabaw, a sidum, nɩ a tuw pɛ-bʋʋrɛ za,

¹⁴a gbagba pɛ-bʋʋrɛ za,

¹⁵a kʋlãdisowle, a vìí-kpãakpul, a zʋm-yaarɛ, a sɩl-pɛ-bʋʋrɛ bʋʋrɛ,

¹⁶a vìí, a dũwledũwle nɩ a dãdãmul,

¹⁷a bãdaa-zɩɛra, a dũw, a bàa-lile,

¹⁸a gʋ̃ɔnagʋ̃ɔna, a cãcãpɛlɛ bʋʋrɛ bʋʋrɛ, a lili-kpa-cow nɩ a zãzã-cile.

¹⁹A dʋ̃-pɩgɛ cãcãpili ɩ n dʋ̃-dɛgɛ a nyɩ zie, nyɩ bɛ 'wɔbr a ɩ.

²⁰Ɛcɛ nyɩ na tʋ̃ɔ́ na 'wɔbr a dʋ̃-cãcãpili na bɛ tɛr dɛwr a.

²¹Nyɩ taa 'wɔbr dʋ̃-kũu nɛn ɛ. Nyɩ mɩ́ de ʋ kʋ̀ a nʋʋrɩ na kpɩɛr a nyɩ zie a, bɩɩ nyɩ mɩ́ kʋɔr'ʋ kʋ̀ nɩ-sãanbɛ. Bʋ̃ʋ n'ʋ vɛ̃, a nyɩɩm a, nyɩ ɩ n nɩ-bʋʋrɛ a Sore nyɩ Naaŋmɩn na sʋ̃ɔmɩ bul so a. Nyɩ kʋ̃ dʋw bʋle nɛn a ʋ mã bʋ̀rʋ pʋɔ ɛ[51].

²²Yũon za a, nyɩ na mɩ́ ír'ɩ a nyɩ bʋ̃-kʋ́ɔrɩ tɛra ziir pie sob.

²³Al pùorí, nyɩ na mɩ́ cen nɩ a zie ʋl a Sore nyɩ Naaŋmɩn na kaa ír k'ʋʋ mɩ́ wul k'aa be n'a ʋ be a. Nyɩ na mɩ́ tɩ dɩ n a nyɩ ble, a nyɩ divɛ̃-paala nɩ a nyɩ kãá tɛra ziir pie sob a be. Nyɩ mɩ̀ na mɩ́ 'wɔb'ɩ a nyɩ nĩi, a nyɩ píir nɩ a nyɩ bʋʋr bil-dãw-dɔwrɩ. À à ŋá n'a nyɩ na zanɛ a Sore nyɩ Naaŋmɩn zɔba kʋralɛ[52].

²⁴Kapaw a Sore nyɩ Naaŋmɩn na ɩ na nyɩ kɔ nyɛ̃ a yaga za, ɛ́ a zie ʋl a Sore nyɩ Naaŋmɩn na kaa ír k'ʋʋ mɩ́ wul k'aa be n'a ʋ be a, zãá nɩ nyɩ. A lɛn daar a, nyɩ kʋ̃ tʋ̃ɔ́ mɩ́ tuo a nyɩ tɛra ziir pie sob bome cen nɩ ɛ.

²⁵Alɛ wa ɩ à ŋá n'a a, nyɩ na mɩ́ kʋɔr'ɩ a nyɩ tɛra ziir pie sob bome wa n a libie a zie ʋl a Sore nyɩ Naaŋmɩn na kaa ír a.

²⁶A be a, nyɩ na mɩ́ dà n bom nɛ za nyɩ na bɔbr a: nĩi, píir, bʋʋr, divɛ̃ bɩɩ dã-kpɛn a mɩnɛ, bom nɛ za na ɩrɛ nyɩ vʋla a. Ɛ́ nyɩ na mɩ́ dɩ na ɛ́ nyũ à á ŋá za nɩ pʋ-pɩɛlʋ a be, a Sore niŋé, nyɩɩm nɩ a nyɩ yie dem.

²⁷Nyɩ taa lɔbr a levitɩ mɩnɛ na kpɩɛr a nyɩ tẽ-kpɛ̃ɛ pʋɔ a bɛrɛ a lɛn daar ɛ, bʋ̃ʋ n'ʋ vɛ̃, bɛ bɛ tɛr tẽsɔw bɛ na põ ír kʋ̀ bɛ a nyɩ sɔgɔ a ɩ.

²⁸Alɛ mɩ́ wa maalɩ yome ata a, nyɩ na mɩ́ ír'ɩ a yũon ʋl pʋɔ nyɩ na be a, bʋ̃-kʋ́ɔrɩ tɛra ziir pie sob maal bin a nyɩ tẽ-bɛrɛ pʋɔ.

²⁹A bome á ŋá pʋɔ n'a a levitɩ mɩnɛ na bɛ tɛr tẽsɔw bɛ na põ ír kʋ̀ bɛ a nyɩ pʋɔ a na mɩ́ wa ɩ dɩ tɩw, bɛlɛ nɩ a nʋʋrɩ, a bi-kpebe nɩ a pɔw-kɔbɛ na kpɩɛr a nyɩ pʋɔ a. Lɛ n'a a Sore nyɩ Naaŋmɩn na mɩ́ maalɩ nyɩ a nyɩ tome za pʋɔ.