Read Dagara, Northern Wulu-ayi-sob 16 Bible Online

Wulu-ayi-sob 16 - Dagara, Northern bible

Wulu-ayi-sob 16

¹Nyɩ na mɩ́ maal'ɩ a Tɔl-gãw cuw, a Sore nyɩ Naaŋmɩn ƴãwfʋ ƴãw, a Abɩb cuw pʋɔ. Bʋ̃ʋ n'ʋ vɛ̃, a cuw ŋa pʋɔ n'a a Sore nyɩ Naaŋmɩn ɩ nyɩ yi a Eziptɩ, tɩ̃ɩsɔw.

²Nyɩ na mɩ́ nyɔw nɩ dʋn a nyɩ píir, a nyɩ bʋʋr bɩɩ a nyɩ nĩi pʋɔ, maal'ɩ a Tɔl-gãw bàwr kʋ̀ a Sore nyɩ Naaŋmɩn, a zie ʋl ʋ na na kaa ír k'ʋʋ mɩ́ wul k'aa be n'a ʋ be a.

³A cuw dɩb pʋɔ a, nyɩ bɛ 'wɔbr dipɛ̃ na ƴãw dãbɩl a ɩ. Bibie ayopõi n'a nyɩ na 'wɔb a dipɛ̃ na bɛ ƴãw dãbɩl a, k'aa tʋ̃ɔ́ lɛb sɩ̃w a nyɩ tɩɛrʋ, kɛ́ fɔ̃w fɔ̃wlɛ n'a nyɩ yi a Eziptɩ. Nyɩmɛ wa 'wɔbr a nɩbaal-dipɛ̃ ŋa, a nyɩ nyɔ-vʋʋrʋ daar za a, nyɩ na mɩ́ lɛb'a bãwnɩ a bibir ʋl nyɩ na yi a Eziptɩ a.

⁴A bibie ayopõi á ŋá a, nɩr bɛ nyɛrɛ dãbɩl a nyɩ zie a nyɩ tẽw za pʋɔ ɩ. A dʋ̃w nyɩ na kʋ a bibi-dãw-niwn sob zaanʋɔra a, a nɛn bɛ bine tɩ tarɛ biɓaara ɩ.

⁵Nyɩ kʋ̃ mɩ́ tʋ̃ɔ́ maalɩ a Tɔl-gãw bàwr tẽ-kpɛ̃ɛ sãsaralɛ kãw pʋɔ, a Sore nyɩ Naaŋmɩn na kʋ̀rɛ nyɩ a ɩ.

⁶A zie ʋl yõ ʋ na na kaa ír, k'ʋʋ mɩ́ wul k'aa be n'a ʋ be a, be n'a nyɩ na mɩ́ maal'ʋ. A bàwr na mɩ́ maal'ɩ a zaanʋɔra, a mʋ̃tɔ̃w kpɛb daar, a pɛr lɛ k'aa lɛn daar nyɩ na man kɛ́ yi a Eziptɩ a.

⁷Nyɩ na mɩ́ dʋw nɩ a dʋ̃w ʋ bɩ, ɛ́ nyɩ 'wɔb ʋ a zie ʋl a Sore na kaa ír a, ɛ́ lɛb ta a nyɩ yie pʋɔ a biɓaara.

⁸Nyɩ na mɩ́ 'wɔb'ɩ dipɛ̃ na bɛ ƴãw dãbɩl a, bibie ayʋɔb. A bibie ayopõi sob a, lãw-kpɛ̃ɛ na mɩ́ be n be a Sore nyɩ Naaŋmɩn ƴãwfʋ ƴãw, ɛ́ ton za bɛ tone ɩ.

⁹A ʋlɩ bibir nyɩ na na tĩ ŋmarɛ a ble a, nyɩ na mɩ́ sɔr'ɩ dàrʋ ayopõi,

¹⁰al pùorí nyɩ maalɩ a dàrʋ cuw a Sore nyɩ Naaŋmɩn ƴãwfʋ ƴãw. Nyɩ na mɩ́ wa n nɩ de-kʋ̀b bome nyɩ na nɔnɛ tɩrɛ a, man nɩ a maalʋ a Sore na maalɩ nyɩ a.

¹¹Nyɩ na mɩ́ cen nɩ a zie ʋl a Sore na na kaa ír, k'ʋʋ mɩ́ wul k'aa be n'a ʋ be a. A be a, nʋ̃ɔ̀ na mɩ́ ɩrɛ nyɩ na, lãwnɩ a nyɩ bidɛbr nɩ a nyɩ pɔwyaar, a nyɩ tõ-tõ-bi-dɛbr nɩ a nyɩ tõ-tõ-bi-pɔwbɛ, lãwnɩ a levitɩ mɩnɛ na be a nyɩ tẽ-bɛrɛ pʋɔ a, nɩ a nʋʋrɩ na kpɩɛr a nyɩ zie a, a bi-kpebe nɩ a pɔw-kɔbɛ na kpɩɛr a nyɩ sɔgɔ a.

¹²Nyɩ bãwnɩ a nyɩ na tɩ ɩ gbãgbaar a Eziptɩ a, ɛ́ tuur a wulu á ŋá za.

¹³Nyɩmɛ wa va a bʋ̃-kʋ́ɔrɩ al na tɛr bie a baarɩ a, ɛ́ nɛb a divɛ̃ tɩ-wɔmɛ baar'a, nyɩ na mɩ́ maal'ɩ a Sɛwr cuw a lɛn daar, bibie ayopõi.

¹⁴Nʋ̃ɔ̀ na mɩ́ ɩrɛ nyɩ nɩ a cuw maalʋ ƴãw, nyɩmɛ nɩ a nyɩ bidɛbr nɩ a nyɩ pɔwyaar, nɩ a nyɩ tõ-tõ-bi-dɛbr nɩ a nyɩ tõ-tõ-pɔwbɛ nɩ a levitɩ mɩnɛ, a nʋʋrɩ na kpɩɛr a nyɩ zie a, a bi-kpebe nɩ a pɔw-kɔbɛ na kpɩɛr a nyɩ sɔgɔ a.

¹⁵A cuw ŋa a Sore nyɩ Naaŋmɩn ƴãwfʋ ƴãw, na mɩ́ maal'ɩ bibie ayopõi, a zie ʋl ʋ nãà wa kaa ír a. Nyɩ na mɩ́ cɩlɛ nɩ nyɩ za, a Sore na na ɩ a nyɩ bʋ̃-dieri ʋr a ƴãw, nɩ ʋ na na maalɩ nyɩ a nyɩ yele za pʋɔ a ƴãw.

¹⁶Yũon za a, a nyɩ nɩ-bʋʋrɛ dɛbr za na mɩ́ cen nɩ a Sore nyɩ Naaŋmɩn niŋé, a zie ʋl ʋ na na kaa ír a: a Dipɛ̃-na-bɛ-ƴãw-dãbɩl-a cuw daar, a Dàrʋ cuw daar, nɩ a Sɛwr cuw daar. Bɛ bɛ cere a be nũ-zawl ɛ.

¹⁷Ŋa za na mɩ́ wa n nɩ de-kʋ̀b bom man nɩ a ʋ fãw, nɩ a maalʋ a Sore nyɩ Naaŋmɩn na maalɩ ʋ a.

¹⁸A tẽ-bɛrɛ al za, a Sore nyɩ Naaŋmɩn na na kʋ̀ nyɩ a pʋɔ a, nyɩ na mɩ́ kaa na ír ƴɛ̀r-dɩrbɛ nɩ sɛ-sɛbrbɛ a nyɩ dɔwlʋ za ƴãw, bɛ mɩ́ dɩ a ƴɛ̀rʋ nɩ yel-mɩŋa kʋ̀ a nɩbɛ.

¹⁹Nyɩ taa dɩrɛ ƴɛ̀r-ziri ɛ, nyɩ taa owre a nɩbɛ a ƴɛ̀rʋ-dɩb pʋɔ ɩ. Nyɩ taa sàwr bɛ ŋmɩɛr nyɩ nʋɔr ɛ, bʋ̃ʋ n'ʋ vɛ̃, a nʋɔr-ŋmɛb liwr'ɩ a nɩbɛ na nyɛrɛ a tɩɛrʋ, ɛ́ mɩ́ ɩ a nɩ-mɩn ƴɛ̀rʋ-dɩb bɛ tu sɔ́r ɛ.

²⁰Nyɩ ƴãw fãw bɔbr a yel-mɩnʋ, a yel-mɩnʋ tɛwr. Lɛ n'a nyɩ na tʋ̃ɔ́ vʋʋrɛ, ɛ́ so a tẽw a Sore nyɩ Naaŋmɩn na kʋ̀rɛ nyɩ a.

²¹Nyɩ bɛ bàrɛ da-maala, bɛ sɛlɛ tɩ-maala kɔwr a bàwr-maal-kuur nyɩ na na mɛ a Sore nyɩ Naaŋmɩn ƴãw a ɩ.

²²Nyɩ mɩ̀ bɛ bàrɛ kʋsɛ-tela a Sore nyɩ Naaŋmɩn na bɛ nɔnɛ towtow a ɩ.