Read Dagara, Northern Wulu-ayi-sob 24 Bible Online

Wulu-ayi-sob 24 - Dagara, Northern bible

Wulu-ayi-sob 24

¹A ɩ mɛ̃ nɩr kul'ɩ pɔw, ɛ́ bibir kãw a pɔw bɛ cãà pɛlɩ a ʋ pʋɔ ɩ, bʋ̃ʋ n'ʋ vɛ̃, ʋ nyɛ̃ nɩ ɩb kãw na bɛ vɩɛl a, a ʋ zie. A lɛ n'a ʋ maalɩ zawr-bɛrʋ sɛbɛ kʋ̀ ʋ, ɛ́ ír ʋ a ʋ yir pʋɔ.

²A pɔw yi a ʋ zie baarɩ tɩ kul nɩ-yũo.

³A ɩ mɛ̃ a sɩrbɛ ayi sob ŋa mɩ̀ ta n sɔgɔ bɛ cãà nɔnɛ ʋ ɛ, maalɩ zawr-bɛrʋ sɛbɛ kʋ̀ ʋ, ɛ́ ír ʋ a ʋ yir pʋɔ, bɩɩ a sɩrbɛ ayi sob kpi na,

⁴a lɛn daar a, a ʋ sɩr-dãw-niwn sob, na tɩ zawr'ʋ bɛr a bɛ tɛr sɔ́r na lɛb de ʋ k'ʋ ɩ a ʋ pɔw ɛ. Bʋ̃ʋ n'ʋ vɛ̃, a pɔw lɩɛb'ɩ dɛwr sob a ʋ zie. A na ɩ n ɩb na bɛ maal'ɩ wob a, a Sore zie. Nyɩ kʋ̃ ɩ a tẽw a Sore nyɩ Naaŋmɩn na kʋ̀rɛ nyɩ kɛ́ nyɩ so a, ʋ tɛr yel-bier nɩ a ɩ-ɩrɩ á ŋá taabɛ ɩ.

⁵Nɩr wa kul pɔw paalʋ a, ʋ bɛ cere sojarɩ ɛ, bɛ mɩ̀ bɛ kʋ̀rɛ ʋ tõ-yoru kãw za ɩ. Bɛ na ír ʋ na bɛr bom za ƴãw, ʋ tʋ̃ɔ́ be a yir yũon-been, ɩ a ʋ pɔw ʋ na kul a wõ nʋ̃ɔ̀.

⁶Nɩr bɛ tɛr sɔ́r na de nɩr nɩɛr nɩ nebir, a nebir yõ saa n'ʋ mɩ̀ a, a ɩ san-bãwfʋ bome ɩ. Bʋ̃ʋ n'ʋ vɛ̃, a na ɩ n a bome na sõwne ʋ ʋ vʋʋrɛ a n'a ʋ de.

⁷Ɩsɩrayɛl nɩr wa nyɔw a ʋ Ɩsɩrayɛl nɩ-tɔ ƴãw k'ʋ ɩ a ʋ gbãgbaa, bɩɩ kʋɔrɩ ʋ a, a fɛr'a kɛ́ bɛ kʋ ʋ. Nyɩ na ír'ɩ a faalʋ bɛr à à ŋá a nyɩ sɔgɔ.

⁸Nyɩ maal ɩrɛ a kɔnʋ bàal-pɛ-bʋʋrɛ ƴãw: nyɩ cɛlɛ be tuur a lɛ za a levitɩ mɩnɛ bɛl na ɩ bàwr-maalbɛ a na na wule nyɩ a vla. Nyɩ sàwr a nɛ-ƴãwnɩ ɩ̃ na kʋ̀ bɛ a.

⁹Nyɩ cãà bãwnɩ a lɛ a Sore nyɩ Naaŋmɩn na ɩ a Mɩrɩyam[61] a, a lɛ nyɩ na tɩ yi a Eziptɩ baarɩ cãà lo a sɔ́r a.

¹⁰Nyɩmɛ wa pɛ̃w bom a nyɩ tɔ sob a, nyɩ taa kpɩɛr a ʋ yir dier san-bãwfʋ bom ɛ.

¹¹Nyɩ àr a yẽw, ɛ́ a sob nyɩ na pɛ̃w a bom a na wa n nɩ a san-bãwfʋ bom wa kʋ̀ nyɩ a yẽw be.

¹²Nã́w sob wa n'ʋ kʋ̀ nyɩ a ʋ kpar-kpɛ̃ɛ, ʋ ɩ a ʋ san-bãwfʋ bom a, nyɩ kʋ̃ tɛr ʋ a tɩ̃ɩsɔw ɛ. Nyɩ na lɛb'a kʋ̀ ʋ a mʋ̃tɔ̃w kpɛb daar, ʋ tʋ̃ɔ́ su pàw nɩ ʋ tʋɔra gã nɩ, ʋʋ na puor nyɩ na. A na ɩ n ɩb na pɛlɩ a Sore nyɩ Naaŋmɩn pʋɔ a n'ʋ nyɩ ɩ.

¹⁴Nyɩ taa nɛbr tõ-tõ-bie na ɩ bãbàal ɛ́ ɩ nã́w sob a ɩ, a nyɩ Ɩsɩrayɛl nɩ-tɔ n'ʋ bɩɩ nʋʋra na kpɩɛr a nyɩ tẽw tẽ-kpɛ̃ɛ kãw pʋɔ a saa n'ʋ a.

¹⁵Nyɩ mɩ́ kʋ̀ ʋ a ʋ sã-ya bibir za. Nyɩ mɩ́ ya ʋ ɛ́ a mʋ̃tɔ̃w bãw kpɛ. Bʋ̃ʋ n'ʋ vɛ̃, nã́w sob'ʋ, ɛ́ mɩ́ tɛr a ʋ sã-ya yel-ɩra fɔ̃w fɔ̃w. Nyɩmɛ wa ɩ ʋ kõ kʋ̀ a Sore a, ʋ na ɩ n yel-bier a nyɩ zie.

¹⁶Bɛ kʋ̃ mɩ́ kʋ a sãà mɩnɛ a bɛ bibiir yel-bebe zũú ɛ. Bɛ kʋ̃ mɩ́ kʋ a bibiir a bɛ sãà mɩnɛ yel-bebe zũú ɛ. Ŋa za yel-bebe ƴãw n'a bɛ na mɩ́ kʋ ʋ.

¹⁷Nyɩ kʋ̃ nɛb nʋʋra bɩɩ bi-kpieb a ƴɛ̀rʋ-dɩb zie ɩ. Nyɩ kʋ̃ de pɔw-kʋɔr kparʋ, ʋ ɩ san-bãwfʋ bom ɛ.

¹⁸Nyɩ cãà bãwnɩ nyɩ na tɩ ɩ gbãgbaar a Eziptɩ, ɛ́ a Sore nyɩ Naaŋmɩn faa nyɩ a. Alɛ n'a so ɩ̃ yel kɛ́ nyɩ sàwr a nɛ-ƴãwnɩ á ŋá.

¹⁹Nyɩmɛ wa dier a nyɩ bʋ̃-dieri a lɛn daar a, nyɩmɛ wa yiiri ble zuru nyɩ na ŋma ɓã taa a bɛr a pu-pʋɔ a, nyɩ kʋ̃ lɛb cen tɩ wob ɛ, nyɩ na bɛr a na kʋ̀ a nʋʋrɩ, a bi-kpebe nɩ a pɔw-kɔbɛ. Lɛ n'a a Sore nyɩ Naaŋmɩn na maalɩ nyɩ, a nyɩ yele za pʋɔ.

²⁰Lɛ mɩ̀ n'a, nyɩmɛ mɩ́ wa mĩí a nyɩ olivʋ tɩɩr a, nyɩ kʋ̃ mɩ́ lɛb wa yiiri a a pùorí ɛ, nyɩ na mɩ́ bɛr a na kʋ̀ a nʋʋrɩ, a bi-kpebe nɩ a pɔw-kɔbɛ.

²¹Nyɩmɛ mɩ́ wa pɔr a nyɩ divɛ̃ tɩɩr wɔmɛ a, nyɩ kʋ̃ mɩ́ lɛb cen tɩ yiiri a wɔmɛ na cɛ a ɩ, nyɩ na mɩ́ bɛr a na kʋ̀ a nʋʋrɩ, a bi-kpebe nɩ a pɔw-kɔbɛ.

²²Nyɩ cãà bãwnɩ a nyɩ na tɩ ɩ gbãgbaar a Eziptɩ a. Alɛ n'a so ɩ̃ yere kʋ̀rɛ nyɩ kɛ́ nyɩ sàwr a nɛ-ƴãwnɩ á ŋá.