Read Dagara, Northern Wulu-ayi-sob 25 Bible Online

Wulu-ayi-sob 25 - Dagara, Northern bible

Wulu-ayi-sob 25

¹A ɩ mɛ̃ Ɩsɩrayɛl nɩbɛ ayi zɛb'ɩ taa cen a ƴɛ̀rʋ-dɩb zie, kɛ́ bɛ tɩ dɩ n bɛ a ƴɛ̀rʋ, bɛ tɩ yel k'aa kãw bɛ sãw ɛ, ɛ́ a kãw sãw.

²Alɛ wa sɛw kɛ́ bɛ ŋmɛ a sãwna sob a, a ƴɛ̀r-dɩrɛ na ƴãw na bɛ nyɔw ʋ gaalɩ a ʋ niŋé, ɛ́ ŋmɛ ʋ a ŋmɩɛrʋ man nɩ a lɛ a ʋ sãwna na zɛ̃ a.

³Ɛcɛ a ŋmɩɛrʋ nʋɔr kʋ̃ zuo lɩz'a ayi ɛ. Bɛlɛ wa ŋmɛ ʋ tɔl yɩ̃ɛ a, a nyɩ yɛb kʋ̃ cãà ɩ nɩr a nyɩ zie ɩ.

⁴Nyɩ kʋ̃ mɩ́ 'lẽ a náab[62] na vàrɛ a ble a nʋɔr pàw ɛ.

⁵Yɛbr ayi wa lãw kpɩɛr, a bɛ kãw wa kpi ɛ́ bɛ tɛr bidɛb a, a ʋ pɔw-kʋɔr bɛ tɛr sɔ́r na kul zawlɛ na bɛ yi a yir pʋɔ a ɩ. A ʋ sɩr yɛb'ʋ na tõ a lɛ a na fɛr k'ʋʋ tõ a, a ʋ zie: ʋ na de ʋ na k'ʋ ɩ a ʋ pɔw, ʋʋ lãw nɩ ʋ.

⁶A bidɛb-dãw a pɔw na na dɔw a, na ɩ n a sob nɛ na kpi a bidɛb, a ʋ yúor tʋ̃ɔ́ cãà pore a Ɩsɩrayɛl nɩbɛ pʋɔ.

⁷Nɩr bɛ wa sàw na kul a ʋ yɛb pɔw-kʋɔr a, a pɔw na cen nɩ a ƴɛ̀rʋ-dɩb zie, a nɩ-kore niŋé, tɩ yel á ŋá: «A ɩ̃ sɩr yɛb bɛ sàw tõ a lɛ a na fɛr k'ʋʋ tõ a ɩ̃ zie a ɩ. Ʋ zawr'a na dɔw bidɛb kʋ̀ a ʋ yɛb, bidɛb na na cãà tɛr a ʋ yɛb yúor a Ɩsɩrayɛl nɩbɛ pʋɔ a.»

⁸A tẽ-kpɛ̃ɛ nɩ-kore na bʋɔl'ɩ a nɩr ŋa wa ƴɛ̀r'ɩ ʋ. Ʋlɛ wa cãà zawrɩ na kul a ʋ yɛb pɔw-kʋɔr a,

⁹a pɔw na wa n a ʋ zie, a nɩ-kore niŋé, wa yaa a ʋ nafaw-ɓɛwlɩkɛl a gbɛ́rɩ́, ɛ́ cɩr mʋtaar waarɩ ʋ a niwn, ɛ́ yel: «À ŋá n'a bɛ mɩ́ ɩ a nɩr na zawrɩ na dɔw bidɛb kʋ̀ a ʋ yɛb a!»

¹⁰Ɛ́ bɛ na bʋɔlɛ nɩ a nɩr ŋa yir a Ɩsɩrayɛl tẽw pʋɔ: «Gbɛ-zawla sob yir.»

¹¹A ɩ mɛ̃ dɛbr ayi zɛbr'ɩ taa, a kãw pɔw taw ta k'ʋʋ faa a ʋ sɩr à ŋà sob na pɔbr a. Ʋlɛ wa dɔl a nũu nyɔw nɩ a dɛb lamɛ a,

¹²nyɩ na ŋmãa ʋ nɩ a nũu: nyɩ kʋ̃ tɛr mimi-baalʋ za a ʋ ƴãw ɛ.

¹³Nyɩ kʋ̃ tɛr tɩbrʋ bʋ̃-mánɩ tɛɛtɛɛ a nyɩ vʋɔra pʋɔ, manʋ na ɩ been a ƴãw ɛ, a mɩnɛ tɩbrɛ ɛ́ a mɩnɛ bɛ maal tɩbrɛ ɩ.

¹⁴Nyɩ mɩ̀ kʋ̃ tɛr bʋ̃-mánɩ tɛɛtɛɛ a nyɩ yie pʋɔ ɩ, a mɩnɛ bɛrmɛ, ɛ́ a mɩnɛ ɩ pʋrpʋr, a manʋ been ƴãw ɛ.

¹⁵Tɩbrʋ bʋ̃-mánɩ na tori a, nɩ bʋ̃-mánɩ na tu sɔ́r a tɛwr'a nyɩ na tɛr. Lɛ n'a nyɩ na kpɛ a tẽw a Sore nyɩ Naaŋmɩn na na kʋ̀ nyɩ a cɛlɩ.

¹⁶Bʋ̃ʋ n'ʋ vɛ̃, a Sore nyɩ Naaŋmɩn bɛ nɔnɛ a bɛlɩ dem na mɩ́ tɛr a ɩ-ɩrɩ á ŋá taabɛ na bɛ mɩ́ tori a towtow ɛ.

¹⁷Nyɩ lɛb tɩɛrɩ a lɛ a Amalesitɩ mɩnɛ[63] na ɩ nyɩ, a lɛn daar nyɩ na tɩ yi a Eziptɩ baarɩ, cãà lo a sɔ́r a.

¹⁸Bɛ bɛ tɩ zɔ Naaŋmɩn towtow ɛ, ɛ́ tɩ gù nyɩ a sɔ́r zu, a lɛ nyɩ na tɩ bàl nyɩ za, bɛ cãà laar a. Lɛ n'a bɛ tɩ ŋmãa nɩ zɛbr a nyɩ pùor dem na cere guur a.

¹⁹Ƴɛrɛŋa a, a Sore nyɩ Naaŋmɩn na gù nyɩ nɩ a nyɩ dɔ̃ dem za na jil koli nyɩ a ƴãw, a tẽw ʋ na na kʋ̀ nyɩ nyɩ so a pʋɔ. A lɛn daar a, nyɩ na kʋ n a Amalesitɩ mɩnɛ za pàw pɛr, kɛ̀ nɩsaal za ta cãà tɛr a bɛ tɩɛrʋ a tẽw zu ɛ. Nyɩ taa yiire a yel ŋa ɩ.