Read Dagara, Northern Wulu-ayi-sob 26 Bible Online

Wulu-ayi-sob 26 - Dagara, Northern bible

Wulu-ayi-sob 26

¹Nyɩ na kpɛ n a tẽw a Sore nyɩ Naaŋmɩn na kʋ̀rɛ nyɩ kɛ́ nyɩ so a pʋɔ. Nyɩmɛ wa so ʋ, ɛ́ zɩ̃ a ʋ pʋɔ baar'a,

²ŋa za na mɩ́ ír'ɩ a tẽsɔw ʋ na kɔ a bʋ̃-dan a mɩnɛ, a tẽw a Sore na kʋ̀ nyɩ a pʋɔ. Ʋ na ƴãw a nɩ pèlé pʋɔ wa n a zie ʋl a Sore nyɩ Naaŋmɩn na na kaa ír mɩ́ wul k'aa be n'a ʋ be a.

³Ʋ na cen na tɩ páw a bàwr-maalɛ na so a tome a ʋlɩ bibir nɛ a, ɛ́ yel ʋ à ŋá: «Ɩ̃ yere nɩ a dɩ̃a, a Sore fʋ Naaŋmɩn niŋé, k'ɩ̃ɩ ta n a tẽw ʋl a Sore na yel a tɩ sãàkʋm-kore zie k'ʋʋ na kʋ̀ tɩ na a.»

⁴A bàwr-maalɛ na de nɩ a pèlé a sob nuru pʋɔ, bin a Sore nyɩ Naaŋmɩn bàwr-maal-kuur niŋé.

⁵Lɛ n'a a sob nɛ na de a ƴɛ̀rʋ, a Sore nyɩ Naaŋmɩn niŋé, yel à ŋá: «A ɩ̃ sãàkʋm-kʋra tɩ ɩ n Arameyɛ̃ nɩ-yʋɔra[64]. Ʋ cen nɩ Eziptɩ tɩ tĩ ɩ nʋʋra a be, ʋlɛ nɩ a nɩbɛ blã bɛl na tɩ bɩɛlɛ ʋ a. Al pùorí bɛ yɛ̀r ta nɩ-bʋʋrɛ, tɛr fãw ɛ́ yãwmɛ.

⁶Ɛcɛ a Eziptɩ tẽw dem dɔwrɩ tɩ na, bɛ ɩ tɩ na a kpɛ, ƴãw tɩ gbãgba-tõ-kpɛn pʋɔ.

⁷Lɛ n'a tɩ tɩ kõ bʋɔlɩ a Sore, a tɩ sãàkʋm-kore Naaŋmɩn, ʋ wõ a tɩ cɛlsɩ, ɛ́ nyɛ̃ a lɛ bɛ na dɔwrɛ tɩ, damnɛ tɩ, ɛ́ ɩrɛ tɩ a kpɩɛr a.

⁸Ʋ tõ n gãda-tome na ɩrɛ dɛ̃bɩ̃ɛ a, maalɩ yel-bɛ-dãw-nyɛrɩ nɩ nɔ-ɓãa-yele, ƴãw tɩ yi a Eziptɩ.

⁹Ʋ tɛr tɩ na wa ta n a ka kʋ̀ tɩ a tẽw ŋa bʋ̀rʋ nɩ sɩwr na gbɔlɛ a[65].

¹⁰Alɛ n'a so a ƴɛrɛŋa, ɩ̃ waar'ɩ a tẽw a Sore na kʋ̀ m a bʋ̃-dan k'ɩ̃ɩ wa kʋ̀ ʋ.» A sob nɛ na bin nɩ a bome a Sore nyɩ Naaŋmɩn niŋé, ɛ́ gbĩ dume gũu tɩ tɔ tẽw puori a Sore nyɩ Naaŋmɩn.

¹¹Al pùorí, a maalʋ al za a Sore nyɩ Naaŋmɩn na kʋ̀ nyɩɩm nɩ a nyɩ yie dem a ƴãw a, nyɩ na wone nɩ nʋ̃ɔ̀, lãwnɩ a levitɩ mɩnɛ nɩ a nʋʋrɩ na kpɩɛr a nyɩ pʋɔ a.

¹²A yome atarɩ za na mɩ́ ɩ n a “tɛra ziir pie sob yũon”. Nyɩmɛ wa ír a nyɩ bʋ̃-dieri tɛra ziir pie sob za baarɩ a, nyɩ na kʋ̀ a nɩ a levitɩ mɩnɛ, a nʋʋrɩ, a bi-kpebe nɩ a pɔw-kɔbɛ. À ŋá n'a bɛ na mɩ́ dɩ lɛ za bɛ na bɔbr a, a nyɩ tẽ-bɛrɛ pʋɔ.

¹³Lɛ n'a nyɩ na yel a Sore nyɩ Naaŋmɩn niŋé: «Sore e, ɩ̃ ír'ɩ a bome fʋ na so a bɛr a ɩ̃ yir. Ɩ̃ kʋ̀ a nɩ a levitɩ mɩnɛ, a nʋʋrɩ, a bi-kpebe nɩ a pɔw-kɔbɛ, mɛ̃ a lɛ fʋ na ƴãw a nʋɔr kʋ̀ m a. Ɩ̃ bɛ zawrɩ, ɛ́ mɩ̀ bɛ yiiri a fʋ nɛ-ƴãwnɩ bɛr ɛ.

¹⁴Ɩ̃ bɛ dɩ a tɛra ziir pie sob kãw za, a lɛ ɩ̃ na tɩ tɛr kuor a ɩ. Ɩ̃ bɛ ír bom za tɩr a lɛn daar ɩ̃ na tɩ ɩ dɛwr sob a ɩ, ɛ́ bɛ ír bom za tɩr kũu ƴãw ɛ. Sore ɩ̃ Naaŋmɩn i, ɩ̃ bɛr'a wõ a lɛ fʋ na yel a, ɩ̃ sàw nɩ a fʋ nɛ-ƴãwnɩ.

¹⁵A na ɩ à ŋá a, be a salom zu, a zi-sõw fʋ na kpɩɛr a, ɛ́ bɛl nyɛ̃, maalɩ a fʋ nɩ-bʋʋrɛ Ɩsɩrayɛl nɩ a tẽw fʋ na kʋ̀ tɩ a, mɛ̃ a lɛ fʋ na tɩ yel kʋ̀ a tɩ sãàkʋm-kore a, tẽw bʋ̀rʋ nɩ sɩwr na gbɔlɛ a.»

¹⁶A dɩ̃a bibir a, a Sore nyɩ Naaŋmɩn yel'a kɛ́ nyɩ tuur a wulu á ŋá nɩ a tub á ŋá. Nyɩ na maal'a tɛr a, ɛ́ sàwr a nɩ a nyɩ pʋɔ za, nɩ a nyɩ nɩɩlʋ za.

¹⁷Nyɩ ƴãw na a Sore yel a dɩ̃a, k'ʋʋ na ɩ n a nyɩ Naaŋmɩn, nyɩmɛ wa ɩrɛ a lɛ ʋ na bɔbr a, nyɩmɛ wa sàwr a ʋ wulu, a ʋ nɛ-ƴãwnɩ nɩ a ʋ tub a.

¹⁸A Sore mɩ̀ ƴãw na nyɩ yel kɛ́ nyɩ na ɩ n a ʋ nɩ-bʋʋrɛ, nɩbɛ ʋ na sʋ̃ɔmɩ bul so a, kɛ́ nyɩ na sàwr'ɩ a ʋ nɛ-ƴãwnɩ za.

¹⁹Lɛ n'a, a Sore nyɩ Naaŋmɩn bɔbr'a kɛ́ nyɩ de niwn a nɩ-bʋʋrɛ za ʋ na ír a ƴãw: nɩbɛ na nyɛrɛ ƴãwfʋ, tɛr yúor nɩ vɩɛlʋ zuo bɛ a. Ʋ bɔbr'a kɛ́ nyɩ ɩ nɩ-bʋʋr-sõw a ʋ zie, mɛ̃ a lɛ ʋ na yel a.