Read Dagara, Northern Wulu-ayi-sob 30 Bible Online

Wulu-ayi-sob 30 - Dagara, Northern bible

Wulu-ayi-sob 30

¹A alɩ bome nɛ za ɩ̃ na yel a, a maalʋ nɩ a ŋmɛ-ƴãw, a na tu na. A Sore nyɩ Naaŋmɩn wa diw nyɩ yaarɩ a nɩ-bʋʋr-yoru pʋɔ a lɛn daar a, nyɩ na lɛb'a tɩɛrɩ a yele á ŋá.

²Nyɩ na lɛb'a wa a ʋ zie, nyɩɩm nɩ a nyɩ bʋʋrɛ, nyɩ na bɛrɛ na wone a ʋ ƴɛ̀rʋ nɩ a nyɩ pʋɔ za, nɩ a nyɩ sɩ́ɛ za, ɛ́ nyɩ na tuur'ɩ a nɛ-ƴãwnɩ za ɩ̃ na kʋ̀rɛ nyɩ a dɩ̃a a.

³A Sore nyɩ Naaŋmɩn na lɩɛb'ɩ a nyɩ nyɔ-vʋʋrʋ, ʋ na wul nyɩ nɩ a ʋ nɔ̃wfʋ, ɛ́ ɩ nyɩ yi a nɩ-bʋʋrɛ bɛl za pʋɔ ʋ na diw nyɩ yaarɩ cen nɩ a lɛb wa ɓã taa.

⁴Bɛlɛ saa na tɛr nyɩ cen nɩ a tẽw baarʋ ziir a, a Sore nyɩ Naaŋmɩn na cen na tɩ tɛr nyɩ a be.

⁵Ʋ na tɛr nyɩ na lɛb wa n a tẽw a nyɩ sãàkʋm-kore na tɩ dãw so a, ɛ́ nyɩ na lɛb'a so ʋ. A Sore nyɩ Naaŋmɩn na ɩ na nyɩ wone nʋ̃ɔ̀ ɛ́ yãwmɛ zuo a nyɩ sãàkʋm-kore.

⁶A Sore nyɩ Naaŋmɩn na ír'ɩ nyɩɩm nɩ a nyɩ bʋʋrɛ socie dɛwr bɛr, kɛ́ nyɩ tʋ̃ɔ́ nɔnɛ ʋ nɩ a nyɩ pʋɔ za, nɩ a nyɩ sɩ́ɛ za. Lɛ n'a nyɩ na tʋ̃ɔ́ vʋʋrɛ.

⁷A ŋmɛ-ƴãw al za ƴɛ̀rʋ ɩ̃ na ƴɛ̀r a, ʋ na ɩ na a páw a nyɩ dɔ̃ dem, a bɛlɩ dem na hɩ̃ɛn nyɩ ɛ́ ɩrɛ nyɩ a kpɩɛr a.

⁸A nyɩɩm a, nyɩ na lɛb'a bɛrɛ wone a Sore ƴɛ̀rʋ, nyɩ na sàwr'ɩ a ʋ nɛ-ƴãwnɩ za ɩ̃ na kʋ̀rɛ nyɩ a dɩ̃a a.

⁹A Sore nyɩ Naaŋmɩn na ɩ na a nyɩ yele za maalɛ vla cere. Nyɩ na tɛr'ɩ bibiir yaga, a nyɩ dʋn bili na yãwmɛ na, ɛ́ a nyɩ bʋ̃-dieri ʋr. Bʋ̃ʋ n'ʋ vɛ̃, a Sore na lɛb'a nɔnɛ a nyɩ maalʋ, mɛ̃ a lɛ ʋ na tɩ maalɩ a nyɩ sãàkʋm-kore a,

¹⁰nyɩmɛ wa bɛrɛ wone a Sore nyɩ Naaŋmɩn, sàwr a ʋ nɛ-ƴãwnɩ nɩ a ʋ wulu na sɛb a wulu sɛbɛ ŋa pʋɔ a, nɩ nyɩmɛ wa lɛb wa a Sore nyɩ Naaŋmɩn zie, nɩ a nyɩ pʋɔ za, nɩ a nyɩ sɩ́ɛ za a.

¹¹A nɛ-ƴãwnɩ á ŋá ɩ̃ na kʋ̀rɛ nyɩ a dɩ̃a a bɛ kpɛmɛ gãw a nyɩ fãw ɛ, a bɛ zãá zuo kɛ̀ nyɩ kʋ̃ tʋ̃ɔ́ páw a ɩ.

¹²Salom zu bɛ n'a a be nɩr na yel: «Ãa n'ʋ na do a salom zu tɩ de a wa yel kʋ̀ tɩ tɩ tuur?»

¹³Kʋ̃ɔ-bɛrɛ gãwn mɩ̀ bɛ n'a a be nɩr na yel: «Ãa n'ʋ na gãw a kʋ̃ɔ-bɛrɛ tɩ de a wa yel kʋ̀ tɩ tɩ tuur?»

¹⁴Lɛ bɛ n'a ɩ, a ƴɛ̀rʋ ŋa pɩɛlɩ nyɩ nɩ yɩ̃ɛyɩ̃ɛ lɛ. Ʋ be n a nyɩ nʋɔrɩ́ nɩ a nyɩ socir pʋɔ kɛ́ nyɩ tuur ʋ.

¹⁵Ɩsɩrayɛl nɩbɛ ɛ, nyɩ nyɛ̃, a dɩ̃a a, ɩ̃ bine nɩ a nyɔ-vʋʋrʋ nɩ a nʋ̃ɔ̀ a nyɩ niŋé, a kũu nɩ a kpɩɛrʋ.

¹⁶Nʋɔr ŋa n'ʋ ɩ̃ ƴãwnɛ kʋ̀rɛ nyɩ a dɩ̃a: nyɩ nɔnɛ a Sore nyɩ Naaŋmɩn, nyɩ tuur a sɔ́r ʋ na wul nyɩ a, nyɩ sàwr a ʋ nɛ-ƴãwnɩ, a ʋ wulu nɩ a ʋ tub. A lɛ pʋɔ a, nyɩ na vʋʋrɛ na, nyɩ na yɛ̀r a yãwmɛ, ɛ́ a Sore nyɩ Naaŋmɩn na maalɩ nyɩ nɩ a tẽw nyɩ na cere kɛ́ nyɩ tɩ so a pʋɔ.

¹⁷Ɛcɛ nyɩmɛ wa gùr pùor cɔw ʋ, nyɩmɛ bɛ wa sàwr a ʋ nʋɔr, nyɩmɛ wa bɛr bɛ tɛr nyɩ tu n ŋmɩn-yoru puoru nɩ a maalʋ a,

¹⁸nyɩ na baar'ɩ nyɩ za cɔ̃cɔ̃, mãa n'ʋ yere a lɛ kʋ̀rɛ nyɩ a dɩ̃a. Nyɩ kʋ̃ cɛlɩ a tẽw nyɩ na na so a Zurdɛ̃ gãwn a pʋɔ ɩ.

¹⁹Ɩ̃ páw na yere kʋ̀rɛ nyɩ a dɩ̃a, ɛ́ a salom nɩ a tẽw dɩrɛ a dãsɩɛ: ɩ̃ bine nɩ a nyɔ-vʋʋrʋ nɩ a kũu a nyɩ niŋé, a maalʋ nɩ a ŋmɛ-ƴãw. Nyɩ kaa ír a nyɔ-vʋʋrʋ tʋ̃ɔ́ vʋʋrɛ, nyɩɩm nɩ a nyɩ bʋʋrɛ.

²⁰Nyɩ nɔnɛ a Sore nyɩ Naaŋmɩn, wone a ʋ ƴɛ̀rʋ, ɛ́ tu ʋ. À ŋá n'a nyɩ na vʋʋrɛ, ɛ́ kpɛ a tẽw a Sore na pɔ yel k'ʋʋ na kʋ̀ n a nyɩ sãàkʋm-kore Abraham, Ɩzaakɩ nɩ Zakɔb a, cɛlɩ.