Read Dagara, Northern Wulu-ayi-sob 32 Bible Online

Wulu-ayi-sob 32 - Dagara, Northern bible

Wulu-ayi-sob 32

¹«Salom i, ƴãw tobr, ɩ̃ ƴɛ̀rɛ na, tẽw i, bɛrɛ wone a lɛ ɩ̃ na yere a.

²A ɩ̃ wulu, a cire, mɛ̃ saa na waar ƴãwn tɩɩr a, a ɩ̃ ƴɛ̀rʋ, a ƴɛ̀r pàw a ziir mɛ̃ ɓɩɛlʋ na lo pàw mʋ̃ɔ a.

³Ɩ̃ na íre nɩ a Sore yúor. Ɩsɩrayɛl nɩbɛ ɛ, nyɩ sàw k'aa tɩ Naaŋmɩn ɩ n kpɛ̃ɛ!

⁴A Sore ɩ n pì-kpɛ̃w. A ʋ tome vɩɛl'ɩ a za. Lɛ za ʋ na yel a mɩ́ tu n yel-mɩŋa, a tɩ Naaŋmɩn ŋmɛ̃ n ʋ ŋmɛ̃a, ʋ bɛ ɩrɛ faa towtow ɛ, nɩ-mɩŋa nɩ nɩ-dẽdẽ n'ʋ kʋralɛ.

⁵Ɛcɛ a nyɩɩm, nɩ-bʋʋr-faa nɩ nɩ-bʋʋr-sãwna, nyɩ sãw nɩ a Sore. Nyɩmɛ so vĩ wɛ! Nyɩ bɛ cãà ɩ a ʋ bibiir ɛ.

⁶Nɩ-bʋʋrɛ na bol ɛ́ bɛ bãw yã a, a ɩb'ɩ à ŋá nyɩ na ɩrɛ a Sore zie a? Ʋlɛ bɛ n'ɩ a nyɩ sãà, a nyɩ íre, a sob nɛ na ɩ nyɩ ɩ a ʋ nɩ-bʋʋrɛ a ɩ?

⁷Nyɩ lɛb tɩɛrɩ a koro za bibie, nyɩ lɛb bɩɛrɩ a yome na tɔl a, a nɩbɛ na dɔw dɔw lɩɛrɩ taa a. Nyɩ sowri a nyɩ sãà mɩnɛ, bɛ na manɩ nyɩ na, nyɩ sowri a dɛb-nyamɛ, bɛ na yel'ɩ bom nɛ na ɩ a kʋ̀ nyɩ.

⁸A lɛ a Naaŋmɩn-na-do-saa-bɛ-pɩɛl-a na tɩ põ a ten kʋ̀ a tẽw zu dem a, ʋ ƴãw nɩ a nɩ-bʋʋrɛ tʋr-bɔwrɩ, ʋ de nɩ a nɩ-bʋʋrɛ been been, kʋ̀ salom zu nɩr kãw,

⁹ɛcɛ ʋ kaa na ír so a Ɩsɩrayɛl bʋʋrɛ, ʋlɛ n'ʋ gùre a Zakɔb bʋʋrɛ.

¹⁰A Sore nyɛ̃ nɩ a ʋ nɩ-bʋʋrɛ a wɛja-kpalɛ pʋɔ na tɩ ɩ gbõgbo-cili kon tɛwr'a. Ʋ kaa nɩ bɛ zie, ʋ wul bɛ na, ʋ gù bɛ na mɛ̃ a ʋ mimi-biir a.

¹¹Mɛ̃ sɩla na bɔbr k'aa ʋ bili ƴaw a, ʋ laarɛ nɩ a ʋ cow zu-sɔw. Ʋ yɛ̀r'ɩ a ʋ pɩgɛ pɛpɛɛ k'ʋʋ de a, ɛ́ tɛr a a ʋ pɩgɛ zu.

¹²A Sore yõ n'ʋ tɛr a ʋ nɩ-bʋʋrɛ, ŋmɩn-yoru kãw za bɛ pʋɔ a ʋ ƴãw ɛ.

¹³Ʋ ƴãw na bɛ zɩ̃ tan pʋɔ ʋʋ guoli bɛ nɩ a póru bʋ̃-kʋ́ɔrɩ. Ʋ ɩ na bɛ dɩ pìe bɔwrɩ sɩwr, ɛ́ ɩ olivʋ tɩɩr bul zi-kʋsɛbɛ pʋɔ, a bɛ ƴãw.

¹⁴A nĩi nɩ a píir tɩ kʋ̀rɛ bɛ nɩ bʋ̀rʋ, a peli, a pʋr-'wɔɛ nɩ a bʋrɩ tɩ kʋ̀rɛ bɛ nɩ nɛn. Ble na ɩ ble a n'a bɛ tɩ dɩrɛ, ɛ́ nyúur a bɛ divɛ̃ tɩɩr divɛ̃.

¹⁵A Yesurun[69] na wa kpɛ bɛ́rʋ baar'a, ʋ gaarɩ na. Ʋ na wa kpɛ bɛ́rʋ a, ʋ na wa 'wɔr a, ʋ na wa tɩbrɛ baar'a, ʋ zawr'ɩ a Naaŋmɩn bɛr, a ʋ Íre, ʋ ƴãw nɩ a ʋ pì-kpɛ̃w vĩ, a ʋ faarɛ.

¹⁶A Ɩsɩrayɛl nɩbɛ tɩ ɩrɛ nɩ ɩb na bɛ maal'ɩ wob a, ƴãw a Sore nyɛrɛ suur. Bɛ tɩ maalɛ nɩ ŋmɩn-yoru ɩ kɛ̀ nyuur[70] ɩrɛ ʋ.

¹⁷Bɛ tɩ maalɛ nɩ bàwr kʋ̀rɛ kɔ̃tɔmɛ na bɛ ɩ a Naaŋmɩn a, ɛ́ bɛ bɛ tɩ dãw bãw a ɩ. Ŋmɩn-paalɛ n'a, a bɛ sãàkʋm-kore tɛɛ za bɛ tɩ bãw a ɩ.

¹⁸Yel-mɩŋa za, Ɩsɩrayɛl i, fʋ bɛr'ɩ a fʋ pì-kpɛ̃w, a ʋl na dɔw fʋ a, fʋ yiir'ɩ a Naaŋmɩn na kʋ̀ fʋ a nyɔ-vʋʋrʋ a bɛr!

¹⁹A Sore na wa nyɛ̃ a lɛ a ʋ bidɛbr nɩ a ʋ pɔwyaar na ɩrɛ ʋ laar a, ʋ bɛ bʋɔlɩ bɛ nɩbɛ ɩ.

²⁰Lɛ n'a ʋ tɩ yel: “Nɩr bɛ sàwr dier a bɛ ƴɛ̀rʋ ɛ, nɩ-faar bʋʋrɛ sɩrɩ nɛbɛ. Ɩ̃ kʋ̃ cãà kaarɛ a bɛ zie ɩ, ɛ́ nyɛ̃ a lɛ a na na ŋmɛ̃ bɛ a.

²¹Bɛ tɛr'ɩ ŋmɩn-ziri, ƴãw k'ɩ̃ kpɛ nyuur. Bɛ ɩ na nɩ a bɛ tɩɩb-zawlɛ, a ɩ̃ suur ìr. Mãa a, nɩbɛ na bɛ ɩ nɩ-bʋʋrɛ mɩ̀ a nɛbɛ, ɩ̃ na ɩ na kɛ̀ bɛ kpɛ nyuur. Nɩ-bʋʋrɛ na bɛ bãw yã a nɛbɛ, ɩ̃ na ɩ na a bɛ suur ìr.

²²Sɩza n'a, a ɩ̃ suur ìr'ɩ kel mɛ̃ vũu a, ʋ dɩ na tɩ sãá a kpɩmɛ tẽw. Ʋ dɩrɛ nɩ a tẽsɔw bʋ̃-bule za, ʋ dɩrɛ nɩ a tan sɩɩr.

²³Ɩ̃ na ɩ na a kpɩɛrʋ do ta a bɛ zu, a ɩ̃ pime za n'a ɩ̃ na baw nɩ bɛ.

²⁴A kɔ̃ wa kpɛ bɛ kʋ bɛr a, a ƴã-tʋlʋ bɩɩ a bàal-faar wa ɩ bɛ bʋ̃-zaalɛ a, ɩ̃ na ƴãw na wɛ-dʋ̃-faar wa a bɛ ƴãw, nɩ wɩɩr na tɛr lɔw yaga a.

²⁵A zɛbr-sɔ-kpɛ̃ɛ na kʋrɛ nɩ a yẽw, ɛ́ a pʋl-vʋ̃ɔ kʋrɛ a dĩó. A kũu na kʋrɛ nɩ bɛ za, a pɔlbili nɩ a pɔwsɩrali, a dɛb-nyamɛ nɩ a bibiir.”

²⁶Ɩ̃ tɩ yel'a k'ɩ̃ɩ na kʋ bɛ na pàw pɛr, ɛ́ ɩ nɩr za ta cãà tɛr bɛ tɩɛrʋ a tẽw zu ɛ.

²⁷Ɛcɛ ɩ̃ zɔ n dɛ̃bɩ̃ɛ, a bɛ dɔ̃ dem nãà wa ɩrɛ mɛ̃ laar a, bɛ nãà wa tuli yere: “A Sore bɛ n'ʋ kʋ bɛ pàw pɛr ɛ, tɩmɛ nɛbɛ ɩ à á ŋá za!”

²⁸A Ɩsɩrayɛl nɩbɛ bɛ ŋa bɛ tɛr tɩɛrʋ ɛ, bɛ bɛ tɛr yã ɩ.

²⁹Bɛlɛ tɩ ɩ yã-bãwnbɛ a, bɛ nãá bãw nɩ a pɛr, bɛ nãá bãw nɩ be à á ŋá za na wɩɛr'ɩ bɛ a.

³⁰Dɔ̃ sob been yõ na tʋ̃ɔ́ na diw Ɩsɩrayɛl nɩbɛ túr (1 000) bɛ zɔ ɔ? Dɔ̃ dem ayi na tʋ̃ɔ́ na diw Ɩsɩrayɛl nɩbɛ tùr-pie (10 000) bɛ zɔ ɔ? Ʋ̃ʋ, a na tʋ̃ɔ́ na ɩ a lɛ, a mãa Sore na ɩ a bɛ pì-kpɛ̃w a wa ƴãw bɛ a bɛ dɔmɛ nuru pʋɔ a.

³¹Ɛcɛ a bɛ dɔ̃ dem tɛɛ za bãwnɩ a na, k'aa bɛ ŋmɩn na gùre bɛ a, bɛ ta a Ɩsɩrayɛl Naaŋmɩn ɛ.

³²Bɛl ƴãw a, bɛ bɛ sa a Sodɔm nɩ a Gomɔɔr ten dem ɛ. Bɛ ŋmɛ̃ na taa nɩ divɛ̃ tɩɛ, na na wɔnɛ wɔ̃-tuor na tɛr lɔw a,

³³a bɛ divɛ̃ ɩ na mɛ̃ waab lɔw a, dɔpan lɔw-tuo kalkal.

³⁴Nyɛ̃ a ʋlɩ bom nɛ a mãa Sore na sɔwlɩ cɔbrɩ a, a ʋlɩ bom nɛ ɩ̃ na bin gùre nɩ bɛ a.

³⁵Ɩ̃ na yáa nɩ a san, ɩ̃ na ya bɛ na tu n a bɛ ɩb, a bɛ loba bibir wa vɩɛ a. A kpɩɛrʋ bibir ŋa bɛ cɛlɛ ɩ, a bɛ loba bibir pɩɛl'a.

³⁶A Sore na sɩrɩ na dɩ a ƴɛ̀rʋ nɩ mɩnʋ kʋ̀ a ʋ nɩ-bʋʋrɛ, ʋ na zɔ n a ʋ tõ-tõ-biir nɩbaalʋ, ʋlɛ wa nyɛ̃ a bɛ fãw za baarɩ a, ʋlɛ wa nyɛ̃ tɩ̀ɛrɛ nɩ sõwne za bɛ ka be a.

³⁷Ʋ na sowri bɛ na: “A ŋmɩmɛ al zie nyɩ na tɩ sɔwlɛ a, a wa?

³⁸Nyɩ tɩ maalɛ nɩ bàwr, kʋrɛ dʋn ƴãwn a a 'wɔbr. A tɩ nyuur'ɩ a divɛ̃ nyɩ na mɩ́ lãw nɩ a nyɩ de-kʋ̀b bome a. Á pãa ìr sõw nyɩ! Á wa gù nyɩ!”

³⁹Ƴɛrɛŋa a, nyɩ nyɛ̃, mãa yõ n'ʋ ɩ a Naaŋmɩn, ŋmɩn bɛ lɛb ka be, a bɛ ɩ a mãa ɩ. Mãa n'ʋ mɩ́ ɩ a nɩr kpi, ɛ́ ɩ ʋ vʋʋrɛ, mãa n'ʋ mɩ́ ƴãw a bàalʋ, ɛ́ lɛb sanɩ. Nɩr bɛ faarɛ nɩr a ɩ̃ nũú ɛ.

⁴⁰Ɩ̃ ture nɩ nũu cɔwr a salom, ɛ́ pɔrɛ yere à ŋá: “Yel-mɩŋa n'a, ɩ̃ vʋʋrɛ nɩ kʋralɛ.

⁴¹Mãa n'ɩ ŋan saalɛ a ɩ̃ zɛbr-sɔ-kpɛ̃ɛ, ɩ̃ kàrɛ ʋ na k'ʋʋ nyɩwrɛ. Ɩ̃ kʋ̃ yaa kɛ́ dɩ n a ɩ̃ dɔ̃ dem ƴɛ̀rʋ ɛ, ɩ̃ na yáa nɩ a san a bɛ zu, ɩ̃ na ɩ n a bɛlɩ dem na hɩ̃ɛn mɛ̃ a mɛ̃ a lɛ bɛ na ɩ m a.

⁴²A ɩ̃ pime na ɩ n a bɛ zɩ̃ɩ tɛwr, a ɩ̃ zɛbr-sɔ-kpɛ̃ɛ na baarɩ bɛ nɩ bɛ za. A dɔ̃ dem zɛbr nɩr kãw za bɛ cɩ̃ɛnɛ ɩ, bɛ ƴãw bɛ nɩ bàalʋ, bɩɩ bɛ nyɔw bɛ na a, bɛ za na kpi na.”

⁴³Salom i, cɩlɛ lãwnɩ a Sore! A salom zu dem za, bɛ puore ʋ nɩ bɛ tʋɔra-siwru! A Sore na yáa nɩ a ʋ bibiir kũu san. Ʋ na yáa nɩ a san a ʋ dɔ̃ dem zu. Ʋ na kʋ̀ n a bɛlɩ dem na hɩ̃ɛn ʋ a, a ʋlɩ bom nɛ bɛ na sɛw taa nɩ a, ɛcɛ ʋ na lɛb'a ɩ a ʋ nɩ-bʋʋrɛ tẽw ʋ vɩɛl.»

⁴⁴A Moyiir nɩ a Nun bidɛb Zozue tɩ wa na wa yel a yielu ŋa ƴɛ̀r-bie za ƴãw a nɩbɛ tobe pʋɔ.

⁴⁵A Moyiir na wa ɩ a Ɩsɩrayɛl nɩbɛ bãw a Sore wulu baar'a,

⁴⁶ʋ yel bɛ na: «A ƴɛ̀rʋ ɩ̃ na ƴɛ̀r kʋ̀ nyɩ a dɩ̃a a, nyɩ de a a ɩ ƴɛ̀r-sɩza. A nãà wa dɩ n a dãsɩɛ nyɔw nyɩ. Nyɩ wul a a nyɩ bʋʋrɛ, ɛ́ yel kʋ̀ bɛ kɛ́ bɛ sàwr a wulu ŋa ƴɛ̀rʋ za.

⁴⁷Bʋ̃ʋ n'ʋ vɛ̃, a ƴɛ̀rʋ á ŋá bɛ ɩ ƴɛ̀r-zawlɛ ɩ. A na ɩ na nyɩ vʋʋrɛ, ɛ́ kpɛ a tẽw nyɩ na na so a Zurdɛ̃ gãwn a cɛlɩ.»

⁴⁸A ʋlɩ bibir nɛ tɔr za a, a Sore tɩ yel'ɩ a Moyiir à ŋá:

⁴⁹«Cen a Avarim tã-kɔlkɔl zu, a Mowab tẽw, na tori a Zeriko a. Do a Nebo tãw nyʋɔrɩ́, ɛ́ jɩ́r a Kanãa tẽw ɩ̃ na kʋ̀rɛ a Ɩsɩrayɛl nɩbɛ kɛ́ bɛ so a.

⁵⁰Al pùorí, a tãw ŋa zu fʋ na na do a, kpi a be cen tɩ páw a fʋ sãà mɩnɛ, mɛ̃ a lɛ tɔr za a fʋ yɛb Aarɔ̃ na kpi a Hoor tãw zu, cen tɩ páw a ʋ sãà mɩnɛ a.

⁵¹Fʋ̃ʋ nɩ a Aarɔ̃ a, nyɩ sãw mɛ̃ nɩ faa faa a Ɩsɩrayɛl nɩbɛ niŋé, a Meriba kʋ̃ɔ yele pʋɔ a Kadɛsɩ, a Tisin wɛja-kpalɛ pʋɔ. Nyɩ bɛ tɩ sàw a ɩ̃ sonu sãá a ʋlɩ bibir nɛ a Ɩsɩrayɛl nɩbɛ zie ɩ.

⁵²Alɛ n'a so fʋ na nyɛ̃ a tẽw ɩ̃ na kʋ̀rɛ a Ɩsɩrayɛl nɩbɛ a zi-zãána, ɛcɛ fʋ bɛ kpɩɛr a ʋ pʋɔ ɩ.»