Read Dagara, Northern Wulu-ayi-sob 33 Bible Online

Wulu-ayi-sob 33 - Dagara, Northern bible

Wulu-ayi-sob 33

¹A nɔ-vla a Naaŋmɩn nɩr Moyiir na ƴɛ̀r ƴãw a Ɩsɩrayɛl nɩbɛ ɛ́ bãw kpi a n'ɩ ŋa:

²«A Sore yi n a Sinayi tãw zu wa. Ʋ pur'ɩ a Seyiir tẽw, mɛ̃ mʋ̃tɔ̃w a, a ʋ nɩbɛ ƴãw. A ʋ cãà yi n a Paran tãw zu, ɛ́ caalɩ. Ʋ wa n a ʋ nɩbɛ zie, ʋlɛ n'ɩ malkɩ túre túre, ɛ́ tɛr a wulu a ʋ nũú, ʋ 'lere mɛ̃ vũu a.

³A Sore nɔnɛ nɩ a Ɩsɩrayɛl dɔwlʋ, ʋ gùre nɩ a bɛlɩ dem za ʋ na so, ɛ́ bɛ mɩ́ ɓã taa a ʋ pile, kɛ́ bɛ de a ʋ wulu a.

⁴Moyiir kʋ̀ tɩ nɩ wulu na ɩ a Zakɔb bʋʋrɛ na-bʋ̃-tuo a.

⁵A lɛ a nɩbɛ nɩ-bɛrɛ na tɩ ɓã taa lãwnɩ a Ɩsɩrayɛl dɔwlʋ a, Yesurun[71] tɩ páw nɩ nãà.»

⁶A Moyiir tɩ yel'a ƴãw pʋɔ: «A Urubɛn dɔwlʋ, ʋ be be! A ʋ nɩbɛ, bɛ be be kʋralɛ, bɛlɛ saa bɛ yãwmɛ yaga a!»

⁷A Zuda bʋʋrɛ ƴãw a, à ŋá n'a a Moyiir tɩ yel: «Sore e, wõ a Zuda dɔwlʋ bʋɔlʋ. Lɛb tɛr a Zuda nɩbɛ wa n a bɛ yɛbr zie. Bɛ ƴãw nɩ fãw zɛbr kɛ́ bɛ faa bɛ tʋɔra, sõw bɛ bɛ mɩ́ tʋ̃ɔ́ a bɛ dɔ̃ dem.»

⁸A Levi bʋʋrɛ ƴãw a, a Moyiir tɩ yel'a: «Sore e, a fʋ kpan-bie [72]a, fʋ de a na kʋ̀ a Levi bʋʋrɛ na su zu tone a fʋ tome a. Fʋ ɩ bɛ na kaa a Masa[73], fʋ zɛb'ɩ bɛ nɩ a Meriba.

⁹Bɛ wul'a kɛ́ bɛ nɔnɛ fʋ na zuo a bɛ sãà nɩ a bɛ mã, a bɛ yɛbr nɩ a bɛ bibiir. Bɛ sàw nɩ a fʋ ƴɛ̀rʋ, ɛ́ maal tɛr a wõ-taa fʋ na maal'ɩ bɛ a.

¹⁰Bɛlɛ nɛbɛ wule a Zakɔb bʋʋrɛ a tub fʋ na ƴãw a, nɩ a fʋ wulu a Ɩsɩrayɛl nɩbɛ. A tɩ-suur-zɔ̃-na-nyùur-vla-vla-a de-kʋ̀b nɩ a nyɩw-a-za-bagɛ a, bɛlɛ nɛbɛ dier a kʋ̀rɛ fʋ a fʋ bàwr-maal-kuur zu.

¹¹Sore e, maalɩ bɛ a bɛ kanyir dɩb pʋɔ, ɛ́ sàw de a bɛ tome za. Ŋmɛ a bɛ dɔ̃ dem sɩɩr wɛl! A bɛlɩ dem na hɩ̃ɛn bɛ a, bɛ taa lɛb ìre towtow ɛ!»

¹²A Bɛ̃zamɛ bʋʋrɛ ƴãw a, a Moyiir tɩ yel'a: «Bɛ̃zamɛ, a dɔwlʋ a Sore na nɔnɛ a n'ʋ, ʋ kpɩɛr'ɩ a ʋ zie, ɛ́ bom za bɛ damnɛ ʋ ɛ. A ʋ Naaŋmɩn gùre ʋ nɩ kʋralɛ, ɛ́ kpɩɛr a ʋ tãli sɔgɔ.»

¹³A Zuzɛb bʋʋrɛ ƴãw a, a Moyiir tɩ yel'a: «A Sore maal'ɩ a bɛ tẽsɔwr: a páwr'ɩ a salom ɓɩɛlʋ, nɩ a kʋ̃ɔ na bùle yire a tẽsɔw pʋ̃ɔmɩ za a.

¹⁴A mʋ̃tɔ̃w ɩrɛ na a bʋ̃-bule íre, bʋ̃-kʋ́ɔrɩ mɩ́ maal'ɩ cuw za.

¹⁵Dɩta-pɛ-yome za n'a, a tã-bɛrɛ nɩ a tãli zie ŋa bʋ̃-kʋ́ɔrɩ maalɛ vla.

¹⁶A tẽw ŋa bɛ na mɩ́ kɔ nyɛ̃ sɛw à ŋá za a, na-bome, nɩ a Naaŋmɩn na be a tuw pʋɔ a, maalʋ, a wa a Zuzɛb dɔwlʋ zu, ʋl na tɩ ɩ a ʋ yɛbr nɩ-kpɛ̃ɛ a!

¹⁷A Zuzɛb so ƴãwfʋ! Ʋ ɩ na mɛ̃ dʋn pʋɔ nadɛr-dãw a. A ʋ ɩ́lɛ́ ayi kpɛmɛ na mɛ̃ wɛ-náab ɩ́lɛ́ a. Alɛ n'a ʋ cɔ̀rɛ nɩ a nɩ-bʋʋrɛ, ɛ́ canɛ bɛ bɛrɛ a tẽ-daa zi-zãánɩ. A ɩɩl kãw n'ɩ a Efarayim dɔwlʋ nɩbɛ na yãwmɛ yaga za a, ɛ́ a kãw ɩ a Manase dɔwlʋ nɩbɛ tu-tu-túr.»

¹⁸A Zabulɔ̃ nɩ a Ɩsakaar bʋʋrɛ ƴãw a, a Moyiir tɩ yel'a: «Zabulɔ̃ i, wone nʋ̃ɔ̀ nɩ a fʋ tome a kʋ̃ɔ-kpɛ̃ɛ zu, ɛ́ fʋ̃ʋ Ɩsakaar i, wone nʋ̃ɔ̀ a fʋ pɛnɛ-sɛwr pʋɔ!

¹⁹Nyɩ na mɩ́ bʋɔl'ɩ a nyɩ sɩman dem tã-sõw kãw zu, kɛ́ nyɩ tɩ maalɩ bagɛ a be, mɛ̃ a lɛ a na tu sɔ́r a, a nyɩ naalʋ[74] na yire a kʋ̃ɔ-kpɛ̃ɛ pʋɔ a ƴãw, nɩ na-bome[75] na sɔwlɩ a biire pʋɔ a ƴãw.»

²⁰A Gadɩ bʋʋrɛ ƴãw a, a Moyiir tɩ yel'a: «A Sore tɛr'ɩ puoru, ʋl na kʋ̀ a Gadɩ zie ʋ yɛlmɛ a! A Gadɩ gã na mɛ̃ gbẽw a, ʋ 'wɔbr'ɩ a dʋ̃w ʋ na nyɔw a bawŋman nɩ a zu mɔ̃ mɩ̀.

²¹Gadɩ de nɩ a tẽw zi-vla zie, a nɩ-kpɛ̃ɛ dem'ʋ ʋ kaa ír tɛr, al pùorí, ʋ cen tɩ pʋɔ a nɩbɛ nɩ-bɛrɛ pʋɔ, ʋ tu n a lɛ a Sore na tɩɛrɩ a yele bin a, ʋ sàw nɩ a lɛ ʋ na yel a Ɩsɩrayɛl nɩbɛ ƴãw a.»

²²A Dan bʋʋrɛ ƴãw a, a Moyiir tɩ yel'a: «A Dan ɩ na mɛ̃ gbẽw-pɔl na pal yi a Basan a.»

²³A Nɛfɩtali bʋʋrɛ ƴãw a, a Moyiir tɩ yel'a: «Bom za tu n a Nɛfɩtali, a Sore paal'ʋ na nɩ maalʋ. Ʋ yɛ̀lɩ nɩ a ʋ tẽw cen nɩ a mʋ̃tɔ̃w-kpɛb-lowr nɩ a saa-pɛrɩ́-dʋrʋ-lowr!»

²⁴A Asɛɛr bʋʋrɛ ƴãw a, a Moyiir tɩ yel'a: «A Asɛɛr, ʋ nyɛ̃ maalʋ a Zakɔb bidɛbr pʋɔ! A ʋ yɛbr, bɛ wule ʋ a bɛ nɔ̃wfʋ! A ʋ olivʋ tɩ-wɔmɛ kãá, a mɩ́ ʋr!

²⁵A ʋ dɩ̃dɛɛ, a piw ʋ tɛr a ʋ dɔ̃ dem ƴãw, a dɩ̃dɛɛ bʋ̃-kparɩ, a ɩ kure bɩɩ kur-zɩɛ! A ʋ fãw, ʋ cɛlɩ man a ʋ nyɔ-vʋʋrʋ!»

²⁶A Moyiir tɩ cãà na lɛb yel: «Yesurun i, ŋmɩn kãw za bɛ ŋmɛ̃ taa nɩ a fʋ Naaŋmɩn ɛ! Ʋ tʋ̃ɔ̀nɛ nɩ nɩ fãw a salom zu, waar a fʋ sõwfʋ, ɛ́ zɔm a zũzuwe.

²⁷A koro kãw za wa tɔ a dɩ̃a a, ʋlɛ n'ɩ a fʋ sɔwlʋ zie. A koro kãw za wa tɔ a dɩ̃a a, a ʋ fãw ɩ n kpɛ̃ɛ a tẽw zu. Ʋlɛ n'ʋ diw a fʋ dɔ̃ dem a fʋ niŋé, ɛ́ yel kɛ́ fʋ kʋ bɛ pàw pɛr.

²⁸A Ɩsɩrayɛl nɩbɛ kpɩɛr'ɩ a tẽw, bom bɛ damnɛ bɛ ɩ. A Zakɔb bidɛbr sɔwl'ɩ tẽw pʋɔ, ble nɩ divɛ̃ tɩɩr na búle a, ɓɩɛlʋ na lore a be a zũú.

²⁹Zu-nʋ̃ɔ̀ dem'ɩ nyɩ, Ɩsɩrayɛl nɩbɛ ɛ! A Sore faa nɩ nɩ-bʋʋrɛ kãw mɛ̃ a nyɩɩm a? A Sore ɩ na mɛ̃ zɛbr bom na piw nyɩ tɛr a, zɛbr-sɔ-kpɛ̃ɛ nyɩ na zɛb'ɩ tʋ̃ɔ́ a. A nyɩ dɔ̃ dem na bɔr'ɩ a nyɩ niŋé, ɛ́ a nyɩɩm a, nyɩ na so bɛ na.»