Read Dagara, Northern Wulu-ayi-sob 5 Bible Online

Wulu-ayi-sob 5 - Dagara, Northern bible

Wulu-ayi-sob 5

¹A Moyiir tɩ bʋɔl'ɩ a Ɩsɩrayɛl nɩbɛ za wa yel bɛ à ŋá: «Ɩsɩrayɛl nɩbɛ ɛ, nyɩ wone a wulu nɩ a tub ɩ̃ na kʋ̀rɛ nyɩ a dɩ̃a a. Nyɩ zanɩ a ɛ́ ƴãw fãw tuur a.

²A Sore tɩ Naaŋmɩn maal'ɩ tɩ nɩ wõ-taa a Orɛb tãw zu.

³A tɩ sãà mɩnɛ tɛwr bɛ nɛbɛ a Sore maal'ɩ a wõ-taa ŋa ɩ, a tɩɩm mɩ̀ nɛbɛ ʋ maal'ɩ, tɩɩm za na cãà vʋʋrɛ be a ka a dɩ̃a a.

⁴A Sore tɩ tori nyɩ na ɛ́ ƴɛ̀r a tãw zu, a vũu sɔwlɩsɔw.

⁵A lɛn daar a, ɩ̃ tɩ àr'ɩ a Sore nɩ a nyɩɩm cara pʋɔ, yere a ʋ ƴɛ̀rʋ kʋ̀rɛ nyɩ. Bʋ̃ʋ n'ʋ vɛ̃, nyɩ tɩ zɔrɛ nɩ a vũu, ɛ́ bɛ sàw do a tãw zu ɛ. A Sore tɩ yel'a[21]:

⁶Mãa n'ɩ a Sore fʋ Naaŋmɩn na ɩ fʋ yi a Eziptɩ a, a be fʋ na tɩ ɩ gbãgbaa a.

⁷Fʋ kʋ̃ tɛr ŋmɩmɛ pʋɔ a ɩ̃ ƴãw ɛ.

⁸Fʋ kʋ̃ maalɩ tɩɩb kãw za tɛr ɛ, a bome na be a saa-zu a salom zu a, a pile ka a tẽw zu, nɩ a kʋ̃ɔmɩ́ a tẽsɔw pile a, fʋ kʋ̃ maalɩ a kãw za dasule ɩ.

⁹Fʋ kʋ̃ mɩ́ dɔm a ŋmɩmɛ á ŋá taabɛ niŋé maalɩ a ɩ. Bʋ̃ʋ n'ʋ vɛ̃, mãa n'ɩ a Sore, a fʋ Naaŋmɩn, Naaŋmɩn na kpɛ nyuur[22] a. A bɛlɩ dem na hɩ̃ɛn mɛ̃ a, ɩ̃ mɩ́ ƴãw bɛ nɩ dɔwrʋ, bɛlɛ nɩ a bɛ bʋʋrɛ na dɔw tu taa tɩ ta gb'a ata bɩɩ gb'a anaar a.

¹⁰Ɛcɛ a bɛlɩ dem na nɔnɛ mɛ̃, ɛ́ sàwr a ɩ̃ nɛ-ƴãwnɩ a, ɩ̃ mɩ́ tɛr'ɩ nɔ̃wfʋ ɩb a bɛ zie, tɩ ta bɛ na dɔw tu taa gb'aa túr a.

¹¹Fʋ kʋ̃ bʋnɩ por a ɩ̃ yúor ɛ. Nɩr na bʋnɩ por a mãa Sore fʋ Naaŋmɩn yúor a, ʋ ɩ n sãwna sob a ɩ̃ zie.

¹²Maal tɛr a pɩ̃ɛnʋ-bibir, ɩ k'ʋ ɩ a ɩ̃ bibir, mɛ̃ a lɛ a mãa Sore fʋ Naaŋmɩn na yel kʋ̀ b a.

¹³Fʋ na mɩ́ tõ n bibie ayʋɔb, tõ a fʋ ton za.

¹⁴Ɛcɛ a bibie ayopõi sob a, a pɩ̃ɛnʋ-bibir ɩ̃ na so a n'ʋ, a mãa Sore fʋ Naaŋmɩn. Fʋ kʋ̃ tõ ton za a ʋlɩ bibir ɛ, a fʋ̃ʋ, a fʋ bidɛb, a fʋ pɔwyaa, a fʋ tõ-tõ-bi-dɛb, a fʋ tõ-tõ-bi-pɔw, a fʋ náab, a fʋ bõw, nɩ a fʋ dʋ̃w kãw za ɩ, nɩ a nʋʋra na kpɩɛr a fʋ tẽw pʋɔ a ɩ. À ŋá n'a a fʋ tõ-tõ-bi-dɛb nɩ a fʋ tõ-tõ-bi-pɔw na tʋ̃ɔ́ mɩ́ pɩ̃ɛnɩ mɛ̃ a fʋ̃ʋ a.

¹⁵Cãà bãwnɩ a fʋ na tɩ ɩ gbãgbaa a Eziptɩ, ɩ̃ɩ ɩ n a ɩ̃ fãw na bɛ tɛr tʋ̃ɔ́fʋ a fʋ yi a be a. Alɛ so a mãa Sore fʋ Naaŋmɩn ƴãw a pɩ̃ɛnʋ-bibir kʋ̀ b kɛ́ fʋ tuur.

¹⁶Ƴãwnɛ a fʋ sãà nɩ a fʋ mã, mɛ̃ a lɛ ɩ̃ na yel kʋ̀ b a, tʋ̃ɔ́ vʋʋrɩ cɛlɩ ɛ́ wone nʋ̃ɔ̀ a tẽw, a mãa Sore fʋ Naaŋmɩn na kʋ̀rɛ fʋ a pʋɔ.

¹⁷Fʋ kʋ̃ kʋ nɩr ɛ.

¹⁸Fʋ kʋ̃ maalɩ pɩ̃ɔ-yele ɩ.

¹⁹Fʋ kʋ̃ zu ɛ.

²⁰Fʋ kʋ̃ dɩ dãsɩ-ziri sãw a fʋ tɔ ɩ.

²¹Fʋ kʋ̃ tɩ́ɛrɛ kɛ́ fʋ̃ʋ nãá so a fʋ tɔ pɔw ɛ. Fʋ kʋ̃ tɩ́ɛrɛ kɛ́ fʋ̃ʋ nãá so a ʋ yir, a ʋ tõ-tõ-bi-dɛb, a ʋ tõ-tõ-bi-pɔw, a ʋ náab, a ʋ bõw nɩ a ʋ bʋ̃-sora kãw za ɩ.»

²²A ƴɛ̀rʋ n'ɩ à á ŋá a Sore na tɩ be a vũu sɔwlɩsɔw, a zʋ̀ʋ́r nɩ a zũzuw-zũgulu pʋɔ, ɛ́ ƴɛ̀r'ɩ kɔkɔ-kpɛ̃w kʋ̀ nyɩ a. A nyɩ zie n'a ʋ tɩ ƴɛ̀r, nyɩɩm za na tɩ ɓã taa a tãw sɩɛ ƴãw a, ɛ́ ʋ bɛ tɩ yel bom dɔwlɩ ɛ. Al pùorí, ʋ tɩ sɛb'ɩ a ƴɛ̀rʋ á ŋá za ƴãw kʋsɛ-pamɛ ayi zu kʋ̀ m.

²³A lɛ nyɩ na tɩ wõ a kɔkɔr ʋl k'ʋ ƴɛ̀rɛ yire a lige pʋɔ, a tãw na tɩ nyɔw vũu dɩrɛ a zu a, a nyɩ dɔwlʋ nɩ-bɛrɛ nɩ a nyɩ nɩ-kore tɩ taw na ta a ɩ̃ zie.

²⁴Bɛ tɩ yel'ɩ à ŋá a nyɩ yúor ƴãw: «A Sore tɩ Naaŋmɩn wul'a a sãá a tɩ niŋé, ʋ na ɩ kpɛ̃ɛ ɛ́ tɛr yúor-vɩɛlʋ-danʋ a. Tɩ wõ n a ʋ kɔkɔr na tɩ ƴɛ̀rɛ yire a vũu sɔwlɩsɔw a. Tɩ nyɛ̃ a nɩ a dɩ̃a: Naaŋmɩn na tʋ̃ɔ́ na ƴɛ̀rɛ a nɩsaalbɛ zie, ɛ́ bɛ bɛ kpi ɛ.

²⁵Ɛcɛ bʋnʋ ƴãw n'a tɩ na ɩ a vũu-kpɛ̃ɛ ŋa ɩrɛ wa dɩ tɩ kʋ? Tɩmɛ wa cãà bɛrɛ wone a Sore tɩ Naaŋmɩn kɔkɔr a, tɩ na kpi na, a bɛ tɛr à ŋá ɩ!

²⁶Bʋ̃ʋ n'ʋ vɛ̃, nɩsaal kãw dãw na wõ a Naaŋmɩn na vʋʋrɛ a, ʋ be vũu sɔwlɩsɔw ɛ́ ƴɛ̀rɛ a ʋ zie, mɛ̃ a tɩɩm a, ʋʋ cãà vʋʋrɛ ɛ[23]?

²⁷A na ɩ à ŋá a, a fʋ̃ʋ Moyiir'ʋ na mɩ́ taw pɩɛlɩ a Sore tɩ Naaŋmɩn wõ a ʋ ƴɛ̀rʋ za. Fʋ na mɩ́ lɛb'a yel a kʋ̀ tɩ a pùorí, ɛ́ tɩ na mɩ́ bɛr a wõ ɛ́ tuur a.»

²⁸A Sore tɩ wõ n a ƴɛ̀rʋ za nyɩ na tɩ ƴɛ̀rɛ kʋ̀rɛ mɛ̃ a, ɛ́ yel à ŋá: «Ɩ̃ wõ n a lɛ a nɩbɛ na yel kʋ̀ b a. Bɛ tɛr'ɩ yel-mɩŋa, bɛ na ƴɛ̀r a lɛ a.

²⁹Bɛlɛ ɩ mɛ̃ bɛ ƴãw nɩ fãw zɔrɛ mɛ̃ ɛ́ sàwr a ɩ̃ nɛ-ƴãwnɩ za a, bɛlɛ nɩ a bɛ bʋʋrɛ na nyɛrɛ nɩ nʋ̃ɔ̀ a pʋɔ kʋralɛ.

³⁰Cen tɩ yel bɛ kɛ́ bɛ lɛb cen a bɛ pɛnɛ-sɛwr pʋɔ.

³¹Ɛcɛ fʋ̃ʋ a, àr a ɩ̃ zie ka. Ɩ̃ na kʋ̀ b'ɩ a nɛ-ƴãwnɩ za, a wulu nɩ a tub fʋ na na wul bɛ kɛ́ bɛ tuur a tẽw ɩ̃ na na kʋ̀ bɛ bɛ so a pʋɔ a.»

³²A Moyiir tɩ cãà na yel a Ɩsɩrayɛl nɩbɛ à ŋá: Nyɩ ƴãw fãw ɩrɛ mɛ̃ a lɛ a Sore nyɩ Naaŋmɩn na yel kʋ̀ nyɩ a, ɛ́ taa gãwnɛ a ʋ nɔ-ƴãwna kãw za bɛrɛ ɩ.

³³A sɔ́r a Sore nyɩ Naaŋmɩn na wul nyɩ a, nyɩ cere a ʋ zu kʋralɛ. Lɛ n'a nyɩ na vʋʋrɛ, ɛ́ a nyɩ nyɔ-vʋʋrʋ wõwme ɛ́ nʋmɛ a tẽw nyɩ na na de so a pʋɔ.