Read Dagara, Northern Wulu-ayi-sob 7 Bible Online

Wulu-ayi-sob 7 - Dagara, Northern bible

Wulu-ayi-sob 7

¹A Sore nyɩ Naaŋmɩn na ɩ na nyɩ kpɛ a tẽw nyɩ na na so a pʋɔ. Ʋ na diw nɩ nɩ-bʋʋr-yaga a nyɩ niŋé, nɩ-bʋʋrɛ ayopõi na yãwmɛ zuo nyɩ, ɛ́ tɛr fãw zuo nyɩ a: a Hititɩ mɩnɛ, a Gɩrgasitɩ mɩnɛ, a Amoritɩ mɩnɛ, a Kanãa tẽw dem, a Perizitɩ mɩnɛ, a Hivitɩ mɩnɛ nɩ a Zebizitɩ mɩnɛ.

²A Sore nyɩ Naaŋmɩn na ƴãw bɛ nɩ a nyɩ nuru pʋɔ, nyɩ na zɛb'a tʋ̃ɔ́ bɛ, ɛ́ a ʋl zũú[29] nyɩ kʋ bɛ pàw pɛr. Nyɩ taa maalɛ nɩ bɛ wõ-taa kãw za ɩ, ɛ́ taa zɔrɛ bɛ nɩbaalʋ ɛ.

³Nyɩ ta ɩ kul-taa be nyɩɩm nɩ a bɛl cara pʋɔ ɩ: nyɩ taa kʋ̀rɛ a nyɩ pɔwyaar a bɛ bidɛbr ɛ, ɛ́ taa dier pɔwbɛ a bɛ pʋɔ kʋ̀rɛ a nyɩ bidɛbr ɛ.

⁴Alɛ bɛ ɩ lɛ, a nɩbɛ bɛ ŋa nãà mab'a ɩ a nyɩ bʋʋrɛ bɛr a Sore tub, ɛ́ puore ŋmɩn-yoru. A Sore na nyɛ̃ nɩ nyɩ nɩ suur, ɛ́ kʋ nyɩ pàw pɛr daadaalɛ.

⁵Nɩ̃ɛ nyɛ̃ a lɛ nyɩ na na ɩ a nɩ-bʋʋrɛ bɛ ŋa a: nyɩ na ŋmɛr'ɩ a bɛ bàwr-maal-kube bɛr, nyɩ na ŋmɛ n a bɛ kʋsɛ-teli kár, nyɩ na cɛ n a bɛ dà-barɩ lɔb, ɛ́ nyɩw a bɛ tɩbɛ bɛr.

⁶Bʋ̃ʋ n'ʋ vɛ̃, nyɩ ɩ n nɩ-bʋʋrɛ a Sore nyɩ Naaŋmɩn na so a. Nyɩmɛ nɛbɛ a Sore kaa ír, a tẽw zu nɩ-bʋʋrɛ za pʋɔ, kɛ́ nyɩ ɩ nɩ-bʋʋrɛ ʋ na sʋ̃ɔmɩ bul so a.

⁷A Sore wa tu nyɩ ɛ́ kaa ír nyɩ a, nyɩ na yãwmɛ zuo a nɩ-bʋʋrɛ za a ƴãw bɛ n'a ɩ. Nyɩmɛ nɛbɛ nɩ̃ɛ ɩ pʋrɩ zuo a nɩ-bʋʋrɛ za.

⁸Ɛcɛ a Sore nɔnɛ nyɩ na, ɛ́ tu a lɛ ʋ na tɩ pɔ yel a nyɩ sãàkʋm-kore zie a. Ʋ ɩ n nɩ a ʋ fãw na bɛ tɛr tʋ̃ɔ́fʋ a nyɩ yi a Eziptɩ, a be nyɩ na tɩ ɩ gbãgbaar a. Ʋ faa nyɩ nɩ a Eziptɩ nãà Faarawɔ̃ nuru pʋɔ.

⁹Nyɩ bãwnɩ a k'aa Sore nyɩ Naaŋmɩn n'ɩ a Naaŋmɩn-sɩza been yõ. Ʋ ŋmɛ̃ n ʋ ŋmɛ̃a, ɛ́ mɩ́ tɛr a ʋ wõ-taa nɩ a ʋ nɔ̃wfʋ tɩ ta a nɩbɛ na dɔw tu taa gb'aa túr a, a bɛlɩ dem na nɔnɛ ʋ ɛ́ sàwr a ʋ nɛ-ƴãwnɩ a zie.

¹⁰Ɛcɛ ʋ mɩ̀ càar'a dɔwrɩ fɔ̃wlɛ a bɛlɩ dem na hɩ̃ɛn ʋ a, ɩ kɛ̀ bɛ kpi.

¹¹A na ɩ à ŋá a, nyɩ maal ɩrɛ a nɛ-ƴãwnɩ, a wulu nɩ a tub ƴãw, ɩ̃ na yere a dɩ̃a kʋ̀rɛ nyɩ kɛ́ nyɩ tuur a.

¹²Nyɩmɛ wa cɛlɛ be a tub á ŋá ƴãw a, nyɩmɛ wa tɛr a tuur a, a Sore nyɩ Naaŋmɩn na ŋmɛ̃ ʋ ŋmɛ̃a a na maal'a tɛr a wõ-taa ʋ na maal'ɩ a nyɩ sãàkʋm-kore a, a nyɩ vla ƴãw.

¹³Ʋ na nɔnɛ nyɩ na, ʋ na maalɩ nyɩ na, ʋ na ɩ na nyɩ yãwmɛ. Ʋ na kʋ̀ nyɩ nɩ bibiir yaga, ɛ́ ɩ nyɩ de bʋ̃-dieri yaga: ble, divɛ̃ nɩ kãá. Ʋ na ɩ n a nyɩ dʋn a yɛ̀r, a nĩi, a píir nɩ a bʋʋr a tẽw ʋl ʋ na na kʋ̀ nyɩ a pʋɔ, mɛ̃ a lɛ ʋ na pɔ yel kʋ̀ a nyɩ sãàkʋm-kore a.

¹⁴Ʋ na maalɩ nyɩ na zuo a nɩ-bʋʋrɛ za. Dɛb-ãan, pɔw-ãan nɩ dʋ̃w-ãan kãw za bɛ bere a nyɩ pʋɔ ɩ.

¹⁵A Sore na piw nyɩ na tɛr a bàalʋ za ƴãw, nɩ a bʋ̃-faar faar na tɩ páw a Eziptɩ a ƴãw, mɛ̃ nyɩ na bãw a. Ʋ kʋ̃ ɩ a páw nyɩ ɛ, ʋ na bɛr a na gùre nɩ a bɛlɩ dem na hɩ̃ɛn nyɩ a.

¹⁶A nɩ-bʋʋrɛ bɛl za a Sore nyɩ Naaŋmɩn na na ƴãw a nyɩ nuru pʋɔ a, nyɩ na bɛr'ɩ nɩbaal-zɔba ɛ́ kʋ bɛ pàw pɛr. Nyɩ taa puore a bɛ ŋmɩmɛ ɩ, bʋ̃ʋ n'ʋ vɛ̃, ʋ na ɩ n bɛra[30] a nyɩ zie.

¹⁷Nyɩ tɔ̃w tɩɛrɛ nɩ à ŋá: «A nɩ-bʋʋrɛ bɛ ŋa tɛr'ɩ fãw zuo tɩ. Ŋmɩŋmɩn n'a tɩ na ɩ de a bɛ ten?»

¹⁸Nyɩ ta zɔrɛ bɛ ɩ! Nyɩ lɛb tɩɛrɩ a lɛ a Sore nyɩ Naaŋmɩn na ɩ a Faarawɔ̃ nɩ a Eziptɩ tẽw za a:

¹⁹nyɩ nyɛ̃ nɩ a dɔwr-bɛrɛ bɛrɛ ʋ na ƴãw bɛ nɩ a yel-bɛ-dãw-nyɛrɩ nɩ a nɔ-ɓãa-yele ʋ na maalɩ a, nɩ a fãw na bɛ tɛr tʋ̃ɔ́fʋ ʋ na ɩ n nyɩ yi a tẽw ŋa pʋɔ a. A Sore nyɩ Naaŋmɩn na ɩ n a lɛ mɩ̀ a nɩ-bʋʋrɛ bɛl za nyɩ na zɔrɛ a zie!

²⁰Mɔ̃ mɩ̀, ʋ na ɩ na vurkperi wa a bɛ ƴãw, ɛ́ gù a bɛlɩ dem na cãà be ɛ́ sɔwlɛ a nyɩ ƴãw a tɩ baarɩ.

²¹Nyɩ taa màwr a nɩ-bʋʋrɛ bɛ ŋa niŋé ɩ: a Sore nyɩ Naaŋmɩn be n a nyɩ zie, ɛ́ ɩ Naaŋmɩn na ɩ kpɛ̃ɛ ɛ́ bɛ tɛr dɩ̃ɛnʋ a.

²²Bɩɛlbɩɛl'a ʋ na diw a nɩ-bʋʋrɛ bɛ ŋa a nyɩ niŋé. Nyɩ kʋ̃ tʋ̃ɔ́ baarɩ bɛ daƴen ɛ, alɛ bɛ ɩ lɛ, a wɛ-dʋ̃-faar na yãwmɛ na zuo fɛrɛ nyɩ.

²³Ɛcɛ a Sore nyɩ Naaŋmɩn na ƴãw nɩ a nɩ-bʋʋrɛ bɛ ŋa a nyɩ nuru pʋɔ. Dɛ̃bɩ̃-kpɛ̃ɛ na tɛr bɛ na, ɛ́ gù bɛ tɩ baarɩ bɛ za.

²⁴Ʋ na ƴãw nɩ a bɛ na-mɩnɛ a nyɩ nuru pʋɔ, ɛ́ nyɩ na ɩ na a bɛ yúor bɔr a tẽw zu. A bɛ been kãw za bɛ cãanɛ a nyɩ niŋé ɩ, nyɩ na tɛr'ɩ lɛɛɛ tɩ baarɩ bɛ za.

²⁵Nyɩ na nyɩw nɩ a bɛ ŋmɩmɛ dasuli bɛr. Nyɩ taa sàwr a salm-zɩɛ bɩɩ a salm-pla bɛ na nyɩl pàw a a bɛlɛ nyɩ ɛ. Nyɩ taa wa bɔbr kɛ́ nyɩ tɛr a ɩ, bʋ̃ʋ n'ʋ vɛ̃, bom na bɛ vɩɛl towtow a n'ʋ a Sore nyɩ Naaŋmɩn zie.

²⁶A bom ŋa tɔ na bɛ vɩɛl towtow a bɛ kpɩɛr a nyɩ yie pʋɔ ɩ. Alɛ bɛ ɩ lɛ, bɛ na sãw nyɩ na bɛr lãwnɩ ʋ. Bʋ̃ʋ n'ʋ vɛ̃, a fɛr'a kɛ́ bɛ mɩ́ sãw sãw a bome á ŋá taabɛ bɛr. A fɛr'a kɛ́ nyɩ zawr'a bɛr, ɛ́ hɩ̃ɛn a.