Read Dagara, Northern Zã 11 Bible Online

Zã 11 - Dagara, Northern bible

Zã 11

¹Nɩr kãw tɩ be n be ɩ bàal, a yúor dɩ kɛ́ Lazaar. Betani tẽw n'a ʋ tɩ yi, a Marya nɩ a ʋ yɛb Marta tẽw.

²A Marya ŋa tɔr za n'ʋ tɩ cir a parfɛ̃ ƴãw a Yeezu gbɛ́ɛ ƴãw, ɛ́ fɩɛl'ɩ a ʋ zukɔbɛ. A ʋ yɛ-dɛb tɩ n'ɩ a Lazaar na ɩ a bàal a.

³A Lazaar yeepuuli tɩ tõ na bɛ tɩ yel a Yeezu: «Sore e, a sob nɛ fʋ na nɔnɛ a ɩ n bàal.»

⁴A Yeezu na wa wõ a lɛ a, ʋ yel'a: «A bàalʋ ŋa bɛ ɩ a ʋ kũu-kʋra bàalʋ ɛ, ʋ na ɩ na a Naaŋmɩn nyɛ̃ yúor-vɩɛlʋ-danʋ, a Naaŋmɩn Bie nyɛ̃ yúor-vɩɛlʋ-danʋ.»

⁵A Yeezu tɩ nɔnɛ nɩ a Marta nɩ a ʋ yɛb Marya, lãwnɩ a Lazaar za.

⁶Ɛcɛ ʋ na saa tɩ wõ kɛ́ a Lazaar ɩ n bàal a, ʋ tɩ cãà na maalɩ bibie ayi a be ʋ na tɩ be a.

⁷Al pùorí, ʋ yel a ʋ po-tuurbɛ: «Nyɩ ɩ tɩ lɛb cen a Zude tẽw.»

⁸A ʋ po-tuurbɛ yel ʋ: «Wul-wul-kara a, daar yɩ̃ɛ ŋa bɛ n'a a Zifʋ mɩnɛ tɩ bɔbr kɛ́ bɛ lɔb'ɩ fʋ kʋsɛbɛ a be ɩ, ɛ́ fʋ lɛb bɔbr a be cenu u?»

⁹A Yeezu sɔw yel bɛ: «A mʋ̃tɔ̃w na mɩ́ pur a, ʋ bɛ mɩ́ maalɩ gbele pie nɩ ayi ɛ́ kpɛ ɩ? Sob nɛ za na cere mʋ̃tɔ̃w a bɛ ŋmɩɛr gbɛ́ɛ ɩ, ʋ na mɩ́ nyɛ̃ a tẽ-daa ŋa cãà a ƴãw.

¹⁰Ɛcɛ sob nɛ za na cere tɩ̃ɩsɔw a, ʋ mɩ́ ŋmɩɛr'ɩ gbɛ́ɛ, a cãà na bɛ be a ʋ zie a ƴãw.»

¹¹Ʋ na tɩ ƴɛ̀r à à ŋá baar'a, ʋ yel'a ƴãw pʋɔ: «A tɩ bá Lazaar gúr'a, ɛcɛ ɩ̃ na cen na tɩ sɩ̃w ʋ.»

¹²Lɛ n'a a po-tuurbɛ tɩ yel ʋ: «Sore e, ʋlɛ wa gúr a, ʋ na lɛb'a kpɛ̃w.»

¹³Zɩ̃ kɛ́ a Lazaar kũu ƴɛ̀rʋ n'a a Yeezu tɩ ƴɛ̀rɛ, a ʋ po-tuurbɛ tɩɛrɛ k'ʋʋ sɩrɩ na gúr.

¹⁴Lɛ n'a a Yeezu tɩ yel kʋ̀ bɛ cãàmɩlɛ: «A Lazaar kpi na,

¹⁵ɛcɛ a nyɩɩm ƴãw a, nʋ̃ɔ̀ kpɩɛr mɛ̃ na ɩ̃ na bɛ ka be a, a na ɩ na nyɩ sàw de m. Nyɩ ɩ tɩ cen a ʋ zie.»

¹⁶A lɛ n'a Toma, bɛ na bʋɔlɛ Didim[9] a, tɩ yel a taabɛ: «Nyɩ mɩ̀ ɩ tɩ cen, tɩɩm nɩ ʋl tɩ lãw kpi!»

¹⁷A Yeezu tɩ wa na wa nyɛ̃ bɛ ũù a Lazaar maalɩ bibie anaar.

¹⁸A Betani na tɩ pɩɛlɩ a Zerizalɛm ta mɛ̃ kilo[10] ata a,

¹⁹Zifʋ mɩnɛ yaga tɩ wa na kɛ́ bɛ wa puori a Marta nɩ a Marya a bɛ yɛ-dɛb kuor.

²⁰A Marta na tɩ wõ kɛ́ a Yeezu waar'a, ʋ yi na zɔ tuor'ʋ. A Marya ʋl tɩ cãà na zɩ̃ a yir.

²¹A Marta tɩ yel'ɩ a Yeezu: «Sore e, fʋ̃ʋ tɩ be ka a, a ɩ̃ yɛ-dɛb kʋ̃ʋ tɩ kpi ɛ.

²²Ɛcɛ a ƴɛrɛŋa mɩ̀ a, ɩ̃ bãwnɩ a na, bom nɛ za fʋ na na zɛlɩ a Naaŋmɩn zie a, a Naaŋmɩn na kʋ̀ b a.»

²³A Yeezu yel ʋ: «A fʋ yɛ-dɛb na lɛb'a yi a kũu pʋɔ.»

²⁴A Marta lɛb yel ʋ: «Ɩ̃ bãw na k'ʋʋ na lɛb'a yi a kũu pʋɔ a kũu-pʋɔ-lɛb-yibu daar, a bibi-pɛ-baara wa vɩɛ a.»

²⁵A Yeezu lɛb yel ʋ: «Mãa n'ɩ a Kũu-pʋɔ-lɛb-yibu nɩ a Nyɔ-vʋʋrʋ. Ʋlɩ sob na sàw de m a, ʋlɛ saa kpi, ʋʋ na vʋʋrɛ na,

²⁶ɛ́ sob nɛ za na vʋʋrɛ ɛ́ sàw de m a, ʋ kʋ̃ kpi towtow ɛ. Fʋ sàw nɩ à à ŋá bɩɩ?»

²⁷A Marta sɔw: «Bʋ̃ʋ ɩ? Sore e, ɩ̃ sàw na kɛ́ fʋ̃ʋ n'ɩ a Kɩrɩta, fʋ̃ʋ n'ɩ a Naaŋmɩn Bie, a sob nɛ na waar a tẽ-daa zu a.»

²⁸A Marta na wa ƴɛ̀r baar'a, ʋ cen na tɩ bʋɔlɩ a ʋ yɛb Marya ɛ́ waalɩ yel kʋ̀ ʋ: «A Wul-wul-kara be n ka, ɛ́ bʋɔlɛ fʋ.»

²⁹A Marya na wa wõ à à ŋá a, ʋ vaa na ìr daadaalɛ zɔ tuori a Yeezu.

³⁰A Yeezu bɛ tɩ kpɛ a tẽw pʋɔ sɛr ɛ, ʋ tɩ cãà na be a be a Marta na tɩ tuor'ʋ a.

³¹A Zifʋ mɩnɛ tɩ lãwnɩ nɩ a Marya be a dĩó mɔwlɛ ʋ. Bɛ na wa nyɛ̃ ʋ ʋ vaa ìr yire a, bɛ mɩ̀ tɩ ìr'a tuur ʋ, ɛ́ tɩɛr kɛ́ a yaa pɛr'a ʋ yire k'ʋʋ tɩ kõ.

³²A Marya na tɩ ta a be a Yeezu na be a, ʋ na dɛ wa nyɛ̃ a Yeezu a, ʋ lo na gbĩ dume a ʋ pile ɛ́ yel ʋ: «Sore e, fʋ̃ʋ tɩ be ka a, a ɩ̃ yɛ-dɛb kʋ̃ʋ tɩ kpi ɛ.»

³³A Yeezu na wa nyɛ̃ ʋ, ʋlɛ nɩ a Zifʋ mɩnɛ bɛl na bɩɛlɛ ʋ a, bɛ za kone a, tɩɛrʋ tɩ dam ʋ na, ɛ́ pʋ̀lá vʋ̃ɔ ʋ.

³⁴Ʋ tɩ sowri bɛ na: «Nyɩnɛ n'a nyɩ ũù ʋ?» Bɛ tɩ yel ʋ na: «Wa nyɛ̃, Sore e.»

³⁵A Yeezu tɩ kõ na cir mʋta-kʋ̃ɔ.

³⁶A Zifʋ mɩnɛ tɩ yel'a: «Nyɛ̃ ʋ na tɩ nɔnɛ ʋ sɛw a!»

³⁷Ɛcɛ a bɛ pʋɔ a, bɛ mɩnɛ tɩ yel'a: «A ʋl na yuo a zɔ̃w mimie a, ʋ kʋ̃ʋ tʋ̃ɔ́ ɩ a Lazaar ʋ ta kpi ɛ?»

³⁸A Yeezu tɩɛrʋ tɩ lɛb'a dam ʋ, ʋʋ ta a yaa pɛr. Tãw bɔw tɩ n'ʋ, bɛ fùr a nʋɔr nɩ kʋsɩɛr.

³⁹A Yeezu tɩ yel'a: «Nyɩ ír a kʋsɩɛr bɛr.» A kũu yeepuule Marta yel ʋ: «Sore e, ʋ nyuur'a baarɩ, a ʋ bibie anaar'ɩ dɩ̃a ʋ na be a ka a.»

⁴⁰A Yeezu lɛb yel ʋ: «Ɩ̃ bɛ tʋ̃ɔ́ yel kʋ̀ b, kɛ́ fʋ̃ʋ wa sàw de a, fʋ na nyɛ̃ nɩ a Naaŋmɩn yúor-vɩɛlʋ-danʋ ɛ?»

⁴¹Lɛ n'a bɛ tɩ ír a kʋsɩɛr bɛr. A Yeezu tɩ uor'a kaa a salom, ɛ́ yel: «Ɩ̃ Sãà a, ɩ̃ puore fʋ nɩ yãanɩ, fʋ na sàw de a ɩ̃ zɛlʋ a ƴãw.

⁴²Mãa tɛwr ƴãw a, ɩ̃ bãw na kɛ́ fʋ mɩ́ sàw nɩ a ɩ̃ zɛlʋ kʋralɛ. Ɛcɛ a zu-sɛbla na jil pàw mɛ̃ a ƴãw n'a ɩ̃ ƴɛ̀r, kɛ́ bɛ sàw de kɛ́ fʋ̃ʋ n'ʋ tõ m.»

⁴³Al pùorí, ʋ tanɩ na yel kpɛ̃w za: «Lazaar i, wa yi yẽw!»

⁴⁴A sob nɛ na tɩ kpi a, tɩ ìr'a yi, a gbɛ́ɛ nɩ a nuru vili vili pɛnɛ, ɛ́ a pɛn kãw páw a niwn. A Yeezu tɩ yel bɛ na: «Nyɩ cɛ̀r ʋ bɛr, ɛ́ bɛr ʋ ʋ cere.»

⁴⁵A Zifʋ mɩnɛ na tɩ wa a Marya zie a, ɛ́ nyɛ̃ a yel ŋa a Yeezu na maalɩ a, nɩ-yaga tɩ sàw na de a Yeezu yele a bɛ pʋɔ.

⁴⁶Ɛcɛ bɛ mɩnɛ tɩ cen na tɩ páw a Faarizɩ̃ɛ mɩnɛ manɩ kʋ̀ bɛ a ʋlɩ bom nɛ a Yeezu na ɩ a.

⁴⁷A bàwr-maal-nɩ-bɛrɛ nɩ a Faarizɩ̃ɛ mɩnɛ tɩ bʋɔl'ɩ a Zifʋ mɩnɛ ƴɛ̀rʋ-dɩb-lãw nɩ-bɛrɛ ɓã taa ɛ́ yel: «Tɩ na ɩ n ŋmɩn? A nɩr ŋa maalɛ nɩ yele-na-ɩ-bãwfʋ-sãá a, bɛ dɩ vuo ɩ,

⁴⁸tɩmɛ wa cãà bɛr ʋ ʋ ɩrɛ à ŋá a, a nɩbɛ za na sàw na de ʋ, ƴãw a Ʋrɔm nɩbɛ ìr wa sãw a tɩ zi-sõw bɛr, ɛ́ kʋ a tɩ bʋʋrɛ pàw pɛr.»

⁴⁹A bɛ kãw na dɩ kɛ́ Kayifʋ a, ɛ́ tɩ ɩ a bàwr-maal-kara a ʋlɩ yũon a, tɩ yel a: «Nyɩ bɛ bãw bom za ɩ!

⁵⁰Nyɩ bɛ nyɛ̃ kɛ́ a nyɩ vla n'a kɛ́ nɩ-been yõ kpi a nɩbɛ za faafʋ ƴãw, ɛ́ a tɩ bʋʋrɛ za ta kpi ɛ?»

⁵¹Ʋlɛ bɛ tɩ n'ʋ nyɛ̃ ʋ tʋɔra ƴɛ̀r a ƴɛ̀r-bie á ŋá ɩ, ɛcɛ ʋ na tɩ ɩ bàwr-maal-kara a ʋlɩ yũon nɛ a n'a so ʋ ƴɛ̀r naaŋmɩn-ƴɛ̀r-manɛ ƴɛ̀rʋ, k'aa fɛr'a kɛ́ a Yeezu kpi a Zifʋ bʋʋrɛ ƴãw.

⁵²Ɛcɛ a bɛl tɛwr ƴãw kʋ̃ n'a ɩ, a mɩ̀ na ɩ n a Naaŋmɩn bibiir na yaarɩ a ziir za a ƴãw, k'ʋʋ lɛb ɓã bɛ taa bɛ ɩ been.

⁵³A ʋlɩ bibir nɛ n'a bɛ tɩ yel kɛ́ bɛ na kʋ n a Yeezu.

⁵⁴Alɛ n'a so a Yeezu bɛ mɩ́ tɩ cãà cɔlɛ cãàmɩlɛ a Zifʋ mɩnɛ sɔgɔ ɩ: ʋ tɩ cen nɩ a tẽw ʋl bɛ na bʋɔlɛ Efarayim a, a tẽw ŋa tɩ pɩɛl'ɩ a wɛja-kpalɛ. Be n'a ʋ tɩ be, ʋlɛ nɩ a ʋ po-tuurbɛ.

⁵⁵A Zifʋ mɩnɛ Tɔl-gãw cuw tɩ pɩɛl'a. Nɩ-yaga tɩ yi n a bɛ ten pʋɔ do a Zerizalɛm, kɛ́ bɛ tɩ so a bɛ dɛwr bɛr ɛ́ a cuw wa bãw ta.

⁵⁶Bɛ tɩ bɔbr'ɩ a Yeezu a cuw zie. A Ŋmɩn-yir-kpɛ̃ɛ pʋɔ bɛ na tɩ be a, bɛ tɩ sowre nɩ taa: «Nyɩ tɩɛr'ɩ ŋmɩn? Ʋ kʋ̃ sàw wa a cuw ɛ!»

⁵⁷A bàwr-maal-nɩ-bɛrɛ nɩ a Faarizɩ̃ɛ mɩnɛ tɩ ƴãw nɩ nʋɔr, kɛ́ sob nɛ wa bãw be ʋ na be a, a fɛr'a k'ʋʋ yel bɛ cen tɩ nyɔw ʋ.