Read Dagara, Northern Zã 14 Bible Online

Zã 14 - Dagara, Northern bible

Zã 14

¹A Yeezu tɩ yel bɛ na: «Nyɩ ta ɩ a nyɩ tɩɛrʋ damnɛ nyɩ ɛ: nyɩ sàw na de a Naaŋmɩn, nyɩ mɩ̀ sàw de m.

²Ziir yaga be n a ɩ̃ sãà yir pʋɔ, alɛ bɛ tɩ ɩ lɛ a, ɩ̃ nãá tʋ̃ɔ́ na yel k'ɩ̃ɩ cere na k'ɩ̃ɩ tɩ cɔbrɩ zie bɛr nyɩ ɩ?

³Ɛ́ mãa wa cen tɩ cɔbrɩ a zie bɛr nyɩ baar'a, ɩ̃ na lɛb'a wa wa tɛr nyɩ, ɛ́ a be ɩ̃ na be a, be n'a nyɩ mɩ̀ na be.

⁴Ɛ́ a be ɩ̃ na cere a, nyɩ bãw nɩ a sɔ́r.»

⁵Toma tɩ yel ʋ na: «Sore e, tɩ bɛ bãw a be fʋ na cere a ɩ, ɛ́ ŋmɩŋmɩn n'a tɩ na tʋ̃ɔ́ bãw a sɔ́r?»

⁶A Yeezu yel ʋ: «Mãa n'ɩ a sɔ́r, a yel-mɩŋa nɩ a nyɔ-vʋʋrʋ. Nɩr za kʋ̃ tʋ̃ɔ́ cen a Naaŋmɩn Sãà zie, a bɛ ɩ mãa zie k'ʋ tu ɛ.

⁷Nyɩmɛ wa bãw mɛ̃ a, nyɩ mɩ̀ na bãw nɩ a ɩ̃ Sãà, nyɩ bãw ʋ na baarɩ mɩ̀, ɛ́ nyɛ̃ ʋ.»

⁸Filib tɩ yel ʋ na: «Sore e, wul tɩ a Sãà, ɛ́ a na sɛw tɩ na.»

⁹A Yeezu yel ʋ: «Ɩ̃ be n a nyɩ zie tɩ cɛlɩ sɛw à ŋá za, ɛ́ fʋ cãà bɛ bãw mɛ̃ ɩ, Filib i? Ʋlɩ sob na nyɛ̃ m a, ʋ nyɛ̃ nɩ a Naaŋmɩn Sãà. Ŋmɩŋmɩn za n'a fʋ yel: “Wul tɩ a Naaŋmɩn Sãà?”

¹⁰Fʋ bɛ sàw k'ɩ̃ɩ lãw nɩ nɩ a ɩ̃ Sãà ɛ́ a ɩ̃ Sãà lãw nɩ mɛ̃ ɩ? A ƴɛ̀rʋ ɩ̃ na ƴɛ̀rɛ kʋ̀rɛ nyɩ a, mãa mɩŋa bɛ n'ʋ ŋmɛ nyãa ƴɛ̀rɛ ɩ. A ɩ̃ Sãà na kpɩɛr a ɩ̃ pʋɔ a tone nɩ a ʋl mɩŋa tome.

¹¹Nyɩ sàw de m, ɩ̃ lãw nɩ nɩ a ɩ̃ Sãà, ɛ́ a ɩ̃ Sãà lãw nɩ mɛ̃. Nyɩmɛ bɛ wa sàwr dier a ɩ̃ ƴɛ̀rʋ a, nyɩɩm sàw de a tome á ŋá zũú.

¹²Yel-mɩŋa sɩza sɩza n'a ɩ̃ yere kʋ̀rɛ nyɩ, ʋlɩ sob na sàw de m a, ʋ mɩ̀ na tõ n a tome ɩ̃ na tõ a, ʋ na tõ n tõ-bɛrɛ gãw lɛ mɩ̀: ɩ̃ na cere a Naaŋmɩn Sãà zie a ƴãw.

¹³Bom nɛ za nyɩ na na zɛlɩ a ɩ̃ yúor ƴãw a, ɩ̃ na ɩ na, a ɩ̃ Sãà tʋ̃ɔ́ nyɛ̃ yúor-vɩɛlʋ-danʋ a Bie pʋɔ.

¹⁴Nyɩmɛ wa zɛlɛ bom a ɩ̃ zie a ɩ̃ yúor ƴãw a, ɩ̃ na ɩ na.»

¹⁵«Nyɩmɛ wa nɔnɛ mɛ̃ a, nyɩ na sàwr'ɩ a ɩ̃ nɛ-ƴãwnɩ vla.

¹⁶Ɩ̃ɩ na zɛlɩ nɩ a Naaŋmɩn Sãà ʋ kʋ̀ nyɩ Gùre ƴen sob ʋ be a nyɩ zie kʋralɛ.

¹⁷A yel-mɩŋa Vʋʋrʋ n'ʋ, a ʋl a tẽ-daa na kʋ̃ tʋ̃ɔ́ sàw de a, ʋ na bɛ mɩ́ nyɛ̃ ʋ, ɛ́ mɩ̀ bɛ bãw ʋ a ƴãw. Nyɩɩm bãw ʋ na, ʋ na kpɩɛr a nyɩ zie ɛ́ be a nyɩ pʋɔ a.

¹⁸Ɩ̃ kʋ̃ bɛr nyɩ nyɩ ɩ bi-kpebe ɩ, ɩ̃ na lɛb'a wa a nyɩ zie.

¹⁹Blã blã, ɛ́ a tẽ-daa kʋ̃ lɛb nyɛ̃ m ɛ. Ɛcɛ a nyɩɩm, nyɩ na nyɛ̃ m'a, ɩ̃ vʋʋrɛ, ɛ́ nyɩ mɩ̀ na vʋʋrɛ na.

²⁰A ʋlɩ bibir nɛ a, nyɩ na bãw na k'ɩ̃ɩ lãw nɩ nɩ a ɩ̃ Sãà, kɛ́ nyɩ lãw nɩ mɛ̃ na, ɩ̃ɩ mɩ̀ lãw nɩ nyɩ.

²¹Ʋlɩ sob na sàwr a ɩ̃ nɛ-ƴãwnɩ ɛ́ tuur a vla a, a sob ŋa n'ʋ nɔnɛ mɛ̃. Ɛ́ ʋlɩ sob na nɔnɛ mɛ̃ a, a ɩ̃ Sãà na nɔnɛ ʋ na, ɩ̃ mɩ̀ na nɔnɛ ʋ na, ɩ̃ɩ na wul'ɩ ɩ̃ tʋɔra a ʋ sob.»

²²A Zuda na bɛ ɩ a Zuda Ɩsɩkarɩɔtɩ a tɩ sowr'ʋ na: «Sore e, bʋ̃ʋ n'ʋ so a fɛr kɛ́ fʋ wul fʋ tʋɔra a tɩɩm, ɛ́ ta wul fʋ tʋɔra a tẽ-daa?»

²³A Yeezu tɩ sɔw ʋ na: «Nɩr wa nɔnɛ mɛ̃ a, ʋ na tɛr'ɩ a ɩ̃ ƴɛ̀rʋ vla, a ɩ̃ Sãà na nɔnɛ ʋ na, ɛ́ tɩ na wa na wa kpɩɛr a ʋ sob zie.

²⁴Nɩr na bɛ nɔnɛ mɛ̃ a, ʋ bɛ dier a ɩ̃ ƴɛ̀rʋ ɛ. Ɛcɛ a ƴɛ̀rʋ nyɩ na wone a, a bɛ yi mãa zie ɩ, a ɩ̃ Sãà na tõ m a zie n'a a yi.

²⁵Ɩ̃ yel'ɩ a yele á ŋá kʋ̀ nyɩ, ɩ̃ na cãà be a nyɩ zie a.

²⁶Ɛcɛ a Gùre, a Vʋʋrʋ Sõw, a Sãà na na bɛr k'ʋ wa a nyɩ zie, a ɩ̃ yúor ƴãw a, ʋl na wul nyɩ nɩ a za. Ʋ na lɛb'a sɩ̃w a nyɩ tɩɛrʋ a yele al za ɩ̃ na yel kʋ̀ nyɩ a ƴãw.

²⁷Ƴã-ɓaarʋ n'a ɩ̃ bɛrɛ kʋ̀rɛ nyɩ, a ɩ̃ ƴã-ɓaarʋ n'a ɩ̃ kʋ̀rɛ nyɩ. Ɩ̃ bɛ kʋ̀rɛ nyɩ mɛ̃ a lɛ a tẽ-daa na mɩ́ tɩr a ƴã-ɓaarʋ a ɩ. Nyɩ ta ɩ pʋl-vʋ̃ɔ nɩ dɛ̃bɩ̃ɛ tɛr nyɩ ɛ.

²⁸Nyɩ wõ n a lɛ ɩ̃ na yel kʋ̀ nyɩ a, ɩ̃ cere na, ɛ́ na lɛb wa a nyɩ zie. Nyɩmɛ tɩ nɔnɛ mɛ̃ a, nʋ̃ɔ̀ nãá ɩrɛ nyɩ na, ɩ̃ na cere a ɩ̃ Sãà zie a: a ɩ̃ Sãà ɩ n kpɛ̃ɛ zuo mɛ̃.

²⁹Ɩ̃ yel'ɩ a yele á ŋá za kʋ̀ nyɩ a ƴɛrɛŋa, ɛ́ a bɛ ta sɛr ɛ, kɛ́ alɛ wa ta a, nyɩɩm sàw kɛ́ sɩza n'a.

³⁰Dɩ̃a na ta a, ɩ̃ kʋ̃ lɛb ƴɛ̀r'ɩ nyɩ cɛlɩ ɛ, bʋ̃ʋ n'ʋ vɛ̃, a tẽ-daa ŋa nãà waar'a. Sɩza n'a, ʋ bɛ tɛr ɩ̃ yel-ɩra ɩ,

³¹ɛcɛ à ŋá n'a a tẽ-daa na bãw k'ɩ̃ɩ nɔnɛ nɩ a Sãà ɛ́ ɩrɛ a lɛn tɔr za a Sãà na ƴãw nʋɔr kʋ̀ m a. Nyɩ ìr tɩ cen!»