Read Dagara, Northern Zã 15 Bible Online

Zã 15 - Dagara, Northern bible

Zã 15

¹«Mãa n'ɩ a divɛ̃ tɩ-sɩza ɛ́ a ɩ̃ Sãà n'ɩ a divɛ̃ tɩ-kʋ́ɔrɛ.

²Wule za, na be a ɩ̃ ƴãw, ɛ́ bɛ wɔnɛ a, ʋ mɩ́ cɛ ʋ na bɛr, ɛ́ wule za na wɔnɛ a, ʋ mɩ́ ɓɛlɓɛl'ɩ a wuli-ɓɛrmɛ bɛr k'ʋʋ tʋ̃ɔ́ wɔ̃ dɔwlɩ.

³Nyɩɩm a, nyɩ vɩɛl'a baarɩ, a kanʋ ɩ̃ na kanɩ nɩ nyɩ a ƴãw.

⁴Nyɩ lãwnɩ mɛ̃, mɛ̃ a lɛ ɩ̃ na lãw nɩ nyɩ a. Mɛ̃ a lɛ wule na kʋ̃ tʋ̃ɔ́ wɔ̃ wɔmɛ ʋ yõ, ʋlɛ bɛ wa nyɔw a tɩɛ a, lɛ n'a nyɩ kʋ̃ wɔ̃ wɔmɛ ɩ, nyɩmɛ bɛ wa lãw nɩ mɛ̃ a.

⁵Mãa n'ɩ a divɛ̃ tɩɛ ɛ́ nyɩmɛ n'ɩ a wuli. Ʋlɩ sob na lãw nɩ mɛ̃, ɩ̃ɩ lãw nɩ ʋ a, ʋ mɩ́ wɔ̃ n wɔmɛ yaga, mãa ƴãw sɩrɩ bɛ wa n'a a, nyɩ kʋ̃ tʋ̃ɔ́ ɩ bom za ɩ.

⁶Nɩr bɛ wa lãw nɩ mɛ̃ a, bɛ na lɔb ʋ na bɛr yẽw mɛ̃ a tɩɛ wule a, ʋ ko, ɛ́ a wuli-kon a, bɛ mɩ́ wob a na lɔb ƴãw vũumí a dɩ.

⁷Nyɩmɛ wa lãw nɩ mɛ̃ ɛ́ tɛr a ɩ̃ ƴɛ̀rʋ a, nyɩ zɛlɩ a ʋlɩ bom nɛ nyɩ na bɔbr a, ɛ́ nyɩ na páw ʋ na.

⁸À ŋá n'a a ɩ̃ Sãà yúor mɩ́ yi, nyɩ na mɩ́ wa wɔnɛ wɔmɛ yaga, ɛ́ wul à à ŋá kɛ́ nyɩ ɩ n a ɩ̃ po-tuurbɛ a.

⁹Mɛ̃ a lɛ a Sãà na nɔ̃w mɛ̃ a, lɛ n'a ɩ̃ mɩ̀ nɔ̃w nyɩ. Nyɩ be a ɩ̃ nɔ̃wfʋ pʋɔ.

¹⁰Nyɩmɛ wa sàwr a ɩ̃ nɛ-ƴãwnɩ a, nyɩ na be n a ɩ̃ nɔ̃wfʋ pʋɔ, mɛ̃ a lɛ ɩ̃ na sàw a ɩ̃ Sãà nɛ-ƴãwnɩ ɛ́ be a ʋ nɔ̃wfʋ pʋɔ a.»

¹¹«Ɩ̃ yel'ɩ à à ŋá kʋ̀ nyɩ kɛ́ a nʋ̃ɔ̀ na kpɩɛr mɛ̃ a, ʋ mɩ́ kpɩɛr nyɩ, ɛ́ a nyɩ nʋ̃ɔ̀ tʋ̃ɔ́ vɩɛl ʋ za.

¹²A ɩ̃ nɔ-ƴãwna n'ɩ ŋa: nyɩ nɔnɛ taa mɛ̃ a lɛ ɩ̃ na nɔ̃w nyɩ a.

¹³Nɔ̃wfʋ bɛ lɛb ka be ɩ kpɛ̃ɛ zuo a fʋ bárɩ fʋ na nɔ̃w tɩ de a fʋ nyɔ-vʋʋrʋ tɩr a bɛ ƴãw a ɩ.

¹⁴Nyɩ ɩ n a ɩ̃ bárɩ nyɩmɛ wa maalɛ a lɛ ɩ̃ na ƴãw a nʋɔr kʋ̀ nyɩ a.

¹⁵Ɩ̃ bɛ cãà bʋɔlɛ nyɩ tõ-tõ-biir ɛ, a tõ-tõ-bie na bɛ bãw ʋlɩ bom nɛ a ʋ nɩ-kpɛ̃ɛ na ɩrɛ a ƴãw. Ɩ̃ bʋɔlɛ nyɩ nɩ bárɩ, ɩ̃ na ɩ nyɩ bãw a yele al za a ɩ̃ Sãà na wul mɛ̃ a.

¹⁶Nyɩmɛ bɛ nɛbɛ kaa ír mɛ̃ ɩ, mãa n'ʋ kaa ír nyɩ, ɛ́ ƴãw kɛ́ nyɩ cen tɩ wɔ̃ wɔmɛ, ɛ́ a nyɩ wɔmɛ be kʋralɛ. Lɛ n'a a ɩ̃ Sãà na kʋ̀ nyɩ bom nɛ za nyɩ nãá zɛlɛ a ʋ zie a ɩ̃ yúor ƴãw a.

¹⁷A nʋɔr ɩ̃ na ƴãwnɛ kʋ̀rɛ nyɩ a, ʋlɛ n'ɩ kɛ́ nyɩ nɔnɛ taa.»

¹⁸«A tẽ-daa wa hɩ̃ɛn nyɩ a, nyɩ bãw kɛ́ mãa n'ʋ ʋ tɩ dãw de niwn hɩ̃ɛn.

¹⁹A tẽ-daa tɩ so nyɩ a, ʋ nãá nɔnɛ nɩ a ʋ bʋ̃-sora, ɛcɛ a tẽ-daa bɛ so nyɩ ɛ. Mãa n'ʋ kaa ír nyɩ a tẽ-daa zu, nyɩ be nyɩ tʋɔra, alɛ so a tẽ-daa hɩ̃ɛn nyɩ.

²⁰Nyɩ lɛb tɩɛrɩ a ƴɛ̀r-bir ŋa ɩ̃ na tɩ yel kʋ̀ nyɩ a: “Tõ-tõ-bie bɛ zuore a ʋ nɩ-kpɛ̃ɛ ɩ.” Bɛlɛ wa dɔwrɩ mɛ̃ a, bɛ mɩ̀ na dɔwrɩ nyɩ na, bɛlɛ wa sàw de a ɩ̃ ƴɛ̀rʋ a, bɛ mɩ̀ na sàw na de a nyɩ dem.

²¹Bɛ na ɩ nyɩ nɩ à á ŋá za a mãa yúor ƴãw, bɛ na bɛ bãw a sob nɛ na tõ m a ƴãw.

²²Mãa bɛ tɩ wa a, mãa bɛ tɩ ƴɛ̀r sɔw bɛ a, bɛ kʋ̃ʋ tɩ tɛr yel-bier ɛ, ɛcɛ a ƴɛrɛŋa a, a bɛ yel-bier bɛ lɛb tɛr zɛlɩ bɛr ɛ.

²³Sob nɛ na hɩ̃ɛn mɛ̃ a, mɩ̀ hɩ̃ɛn nɩ a ɩ̃ Sãà.

²⁴Ɩ̃ tõ n tome a bɛ sɔgɔ nɩsaalɛ za na bɛ tõ a. Mãa bɛ tɩ tõ a tome á ŋá a, bɛ kʋ̃ʋ tɩ tɛr yel-bier ɛ, ɛcɛ ƴɛrɛŋa bɛ na nyɛ̃ a a, bɛ cãà na hɩ̃ɛn mãa nɩ a ɩ̃ Sãà.

²⁵Ɛcɛ à á ŋá za ɩ na kɛ́ a ƴɛ̀r-bir ŋa na sɛb a bɛ Naaŋmɩn wulu sɛbɛ pʋɔ a tʋ̃ɔ́ tu: “Zawlalɛ n'a bɛ tɩ hɩ̃ɛn mɛ̃[18].”

²⁶Ɩ̃ na kʋ̀ nyɩ nɩ Gùre na na yi a ɩ̃ Sãà zie a. Ʋlɛ n'ɩ a yel-mɩŋa Vʋʋrʋ na yi a ɩ̃ Sãà zie a. Ʋlɛ wa wa a, ʋl mɩŋa na dɩ n a ɩ̃ dãsɩɛ.

²⁷Ɛ́ a nyɩɩm mɩ̀, nyɩ na dɩ n a ɩ̃ dãsɩɛ, nyɩ na be a ɩ̃ zie a pɛ-tib daar za a ƴãw.»