Read Dagara, Northern Zã 16 Bible Online

Zã 16 - Dagara, Northern bible

Zã 16

¹«Ɩ̃ yel'ɩ à á ŋá za kʋ̀ nyɩ kɛ́ nyɩ taa faarɛ lore a nyɩ naaŋmɩn-sàw-deb pʋɔ, a lɛn daar bɛ nãà wa dɔwrɛ nyɩ kɛ́ bɛ ɩ nyɩ kaa a ɩ.

²Bɛ na diw nyɩ na bɛr a Zifʋ mɩnɛ puoru-dirú. Mɔ̃ mɩ̀, bio waar'a na vɩɛ, bɛ na mɩ́ nyɔw nyɩ kʋ ɛ́ tɩɛrɛ kɛ́ bàwr'ʋ bɛ maalɩ kʋ̀ a Naaŋmɩn.

³À ŋá n'a bɛ na ɩrɛ, bɛ na bɛ bãw a ɩ̃ Sãà ɛ́ mɩ̀ bɛ bãw mɛ̃ a ƴãw.

⁴Ɛcɛ ɩ̃ yel'ɩ à á ŋá kʋ̀ nyɩ, kɛ́ a daar wa ta a, nyɩɩm lɛb tɩɛrɩ bãwnɩ k'ɩ̃ɩ tɩ yel a na kʋ̀ nyɩ.» «Ɩ̃ bɛ tɩ yel a yel ŋa kʋ̀ nyɩ a pɛr-tib daar ɛ, ɩ̃ na tɩ cãà be a nyɩ zie a ƴãw.

⁵Ɛcɛ ƴɛrɛŋa a, ɩ̃ cere nɩ a sob nɛ na tõ m a zie, ɛ́ nyɩ kãw za bɛ sowre mɛ̃: “Nyɩnɛ fʋ cere ɩ?”

⁶Ɛcɛ ɩ̃ na yel à á ŋá kʋ̀ nyɩ a n'a so pʋ-sãwna tɛr nyɩ yaga za.

⁷Ɛcɛ yel-mɩŋa n'a ɩ̃ yel kʋ̀ nyɩ: a nyɩ vla ƴãw a, a fɛr'a k'ɩ̃ɩ cen. Mãa bɛ wa cen a, a Gùre kʋ̃ wa a nyɩ zie ɩ, ɛcɛ mãa nɩ̃ɛ wa cen a, ɩ̃ na tɩ tõ ʋ na ʋ wa a nyɩ zie.

⁸Ɛ́ ʋlɛ wa wa a, ʋ na wul'ɩ a tẽ-daa k'ʋʋ tuli nɩ a yel-bier ƴãw, a yel-na-tu-sɔr-a ƴãw, nɩ a ƴɛ̀rʋ-maalʋ ƴãw.

⁹Ʋ tuli nɩ a yel-bier ƴãw, ʋ na bɛ sàw de m a.

¹⁰Ʋ tuli nɩ a yel-na-tu-sɔr-a ƴãw: ɩ̃ cere nɩ a ɩ̃ Sãà zie ɛ́ nyɩ kʋ̃ lɛb nyɛ̃ m ɛ.

¹¹Ʋ tuli nɩ a ƴɛ̀rʋ-maalʋ ƴãw: bɛ maal'ɩ nɩ a tẽ-daa ŋa nãà a ƴɛ̀rʋ baarɩ.»

¹²«Yel-yaga cãà nɩ be ɩ̃ na yel kʋ̀ nyɩ, ɛcɛ ƴɛrɛŋa a, nyɩ bɛ tɛr fãw a deb ƴãw ɛ.

¹³A yel-mɩŋa Vʋʋrʋ wa wa a, ʋ na wul nyɩ nɩ a yel-mɩŋa za. Ʋlɛ bɛ n'ʋ na nyɛ̃ ʋ tʋɔra ƴɛ̀rɛ ɩ, alɩ bom nɛ za ʋ na na wõ a, alɛ n'a ʋ na yel, ʋʋ na yel'ɩ nɩdaar yele kʋ̀ nyɩ.

¹⁴Ʋ na ɩ na a ɩ̃ yúor yi, mãa bʋ̃-sora na n'a ʋ na de wa yel kʋ̀ nyɩ a ƴãw.

¹⁵A ɩ̃ Sãà bʋ̃-sora za ɩ n a ɩ̃ dem, alɛ n'a so ɩ̃ yel: “Mãa zie n'a a Vʋʋrʋ na mɩ́ de a yele wa yel kʋ̀ nyɩ.”»

¹⁶«Ka nɩ blã nyɩ kʋ̃ lɛb nyɛ̃ m ɛ, ɛ́ a pùorí, a kʋ̃ cɛlɩ ɛ, ɛ́ nyɩ lɛb nyɛ̃ m.»

¹⁷A lɛ n'a a ʋ po-tuurbɛ bɛ mɩnɛ tɩ sowre taa: «Bʋ̃ʋ n'ʋ ʋ bɔbr k'ʋʋ yel kʋ̀ tɩ nɩ a ƴɛ̀r-bir ŋa: “Ka nɩ blã nyɩ kʋ̃ lɛb nyɛ̃ m ɛ, ɛ́ a pùorí, a kʋ̃ cɛlɩ ɛ, ɛ́ nyɩ lɛb nyɛ̃ m”? Nɩ kɛ́: “Ɩ̃ cere nɩ a ɩ̃ Sãà zie.”»

¹⁸Bɛ tɩ yere na: «“A ka nɩ blã ŋa” pɛr'ɩ bo? Tɩ bɛ bãw ʋlɩ bom nɛ ʋ na bɔbr k'ʋʋ yel a ɩ!»

¹⁹A Yeezu na tɩ bãw kɛ́ bɛ bɔbr'a kɛ́ bɛ sowr'ʋ a, ʋ yel bɛ na: «A ɩ̃ ƴɛ̀r-bie á ŋá pɛr'ʋ nyɩ bɔbr ɩ? “Ka nɩ blã nyɩ kʋ̃ lɛb nyɛ̃ m ɛ, ɛ́ a pùorí, a kʋ̃ cɛlɩ ɛ, ɛ́ nyɩ lɛb nyɛ̃ m.”

²⁰Yel-mɩŋa sɩza sɩza n'a ɩ̃ yere kʋ̀rɛ nyɩ, nyɩ na tɛr'ɩ pʋ-sãwna kone ŋmɩɛr'ɩ cɛlsɩ ɛ́ a tẽ-daa cɩlɛ. Nyɩ na tɛr'ɩ pʋ-sãwna, ɛcɛ a nyɩ kpɩɛrʋ na lɩɛb'ɩ nʋ̃ɔ̀.

²¹A pɔw na mɩ́ dɔwr a, ʋ mɩ́ wone nɩ tuo yaga, a ʋ tɛm na ta a ƴãw, ɛcɛ ʋlɛ wa dɔw baar'a, ʋ mɩ́ yiir'ɩ a ʋ tuo, nʋ̃ɔ̀ mɩ́ paal'ʋ na ʋ na dɔw nɩsaal a ƴãw.

²²À ŋá n'a nyɩ mɩ̀ wone tuo a ƴɛrɛŋa, ɛcɛ ɩ̃ na lɛb'a nyɛ̃ nyɩ, ɛ́ a lɛn daar a, nʋ̃ɔ̀ na paalɩ nyɩ na, ɛ́ nɩr za kʋ̃ tʋ̃ɔ́ faa a nʋ̃ɔ̀ ŋa a nyɩ zie ɩ.»

²³«A na ɩ à ŋá a, a ʋlɩ bibir nɛ a, nyɩ kʋ̃ lɛb sowre mɛ̃ bom za ɩ. Yel-mɩŋa sɩza sɩza n'a ɩ̃ yere kʋ̀rɛ nyɩ, nyɩmɛ wa zɛlɛ bom a ɩ̃ Sãà zie a ɩ̃ yúor ƴãw a, ʋ na kʋ̀ nyɩ na.

²⁴Wa tɩ tɔ dɩ̃a a, nyɩ bɛ zɛlɩ bom za a ɩ̃ yúor ƴãw ɛ: nyɩ zɛlɩ ɛ́ nyɩ na páw na, lɛ n'a a nʋ̃ɔ̀ na paalɩ nyɩ bɛ cɛ ɩ.»

²⁵«Ɩ̃ lɔb'ɩ zʋkpaɩ yel'ɩ à á ŋá za kʋ̀ nyɩ. Ɛcɛ bio waar'a na vɩɛ, ɩ̃ kʋ̃ cãà ƴɛ̀rɛ à à ŋá a nyɩ zie ɩ, ɩ̃ na manɛ nɩ a ɩ̃ Sãà yele kʋ̀rɛ nyɩ cãàmɩlɛ.

²⁶A ʋlɩ bibir nɛ, nyɩ na zɛlɛ nɩ a ɩ̃ yúor ƴãw. Ɛcɛ ɩ̃ bɛ yere kʋ̀rɛ nyɩ k'ɩ̃ɩ na puor'ɩ a ɩ̃ Sãà kʋ̀ nyɩ ɛ,

²⁷a Sãà tɔr za nɔnɛ nyɩ na, nyɩ na nɔ̃w mɛ̃ ɛ́ sàw de k'ɩ̃ɩ yi n a Naaŋmɩn zie a ƴãw.

²⁸Ɩ̃ yi n a ɩ̃ Sãà zie ɛ́ wa a tẽ-daa zu. Ƴɛrɛŋa a, ɩ̃ bɛrɛ nɩ a tẽ-daa ɛ́ cere a ɩ̃ Sãà zie.»

²⁹A ʋ po-tuurbɛ tɩ yel ʋ na: «Ƴɛrɛŋa a, fʋ bɛr'ɩ a zʋkpaɩ ɛ́ ƴɛ̀rɛ cãàmɩlɛ.

³⁰Ƴɛrɛŋa a, tɩ bãw na kɛ́ fʋ bãw nɩ bom za, ɛ́ a bɛ fɛrɛ kɛ́ bɛ sowri fʋ bom ɛ. Alɛ n'a so tɩ sàw de kɛ́ fʋ yi n a Naaŋmɩn zie wa.»

³¹A Yeezu tɩ sɔw bɛ na: «Ƴɛrɛŋa n'a nyɩ pãa sàw de e?

³²Daar waar'a na ta, ɛ́ ʋlɛ n'ɩ ŋa ta baarɩ, bɛ na diw nyɩ yaarɩ, ŋa za mɩ́ cere a ʋ cenu zie, ɛ́ nyɩ bɛr mɛ̃ ɩ̃ ɩ ɩ̃ yõ. Ɛcɛ ɩ̃ bɛ ɩ ɩ̃ yõ ɩ, mãa nɩ a ɩ̃ Sãà nɛbɛ.

³³Ɩ̃ yel'ɩ à á ŋá kʋ̀ nyɩ kɛ́ nyɩ lãw nɩ mɛ̃ tɛr a ƴã-ɓaarʋ. Pʋ-sãwna pʋɔ n'a nyɩ be a tẽ-daa ŋa zu, ɛcɛ nyɩ ƴãw fãw, ɩ̃ zɛb'a tʋ̃ɔ́ a tẽ-daa.»