Read Dagara, Northern Zã 19 Bible Online

Zã 19 - Dagara, Northern bible

Zã 19

¹Lɛ n'a a Pɩlatɩ tɩ ƴãw bɛ nyɔw a Yeezu cen nɩ tɩ fɔb.

²A sojarɩ tɩ wób'ɩ gʋʋr kpawʋɔ vɔblɩ ʋ, ɛ́ de kpar-kpɛ̃ɛ zɩɛ kãw su ʋ.

³Bɛ mɩ́ tɩ taw na pɩɛl'ʋ, ɛ́ yel ʋ: «Yãanɩ, Zifʋ mɩnɛ nãà a!» Ɛ́ mɩ́ ɓa ʋ kɔrɩ́.

⁴A Pɩlatɩ tɩ lɛb'a yi tɩ yel a nɩbɛ: «Nyɩ nyɛ̃, ɩ̃ na tɛr ʋ na yi wa n a yẽw ka, kɛ́ nyɩ tʋ̃ɔ́ nyɛ̃ bãw k'ɩ̃ɩ bɛ nyɛ̃ sãwna za a nɩr ŋa zie na sɛw kɛ́ bɛ kʋ ʋ a ɩ.»

⁵A Yeezu tɩ yi na vɔblɩ a gʋʋr kpawʋɔ, ɛ́ su a kpar-kpɛ̃ɛ zɩɛ. A Pɩlatɩ tɩ yel bɛ na: «Nyɩ nyɛ̃ a nɩr!»

⁶Ɛcɛ a bàwr-maal-nɩ-bɛrɛ nɩ a bɛ nɩbɛ na wa nyɛrɛ ʋ lɛ pɛ a, bɛ ŋmɩɛr'ɩ cɛlsɩ yere nɩ: «Kpa ʋ da-gara zu! Kpa ʋ da-gara zu!» A Pɩlatɩ lɛb yel bɛ: «Nyɩ mɩ̀ de ʋ kpa a da-gara zu, mãa ƴãw a, ɩ̃ bɛ nyɛ̃ sãwna za a ʋ zie ɩ.»

⁷A Zifʋ mɩnɛ lɛb yel ʋ: «Tɩ tɛr'ɩ Naaŋmɩn wulu, ɛ́ a wulu ŋa tub ƴãw a, a fɛr'a k'ʋʋ kpi: ʋ na bʋɔlɛ ʋ tʋɔra Naaŋmɩn Bie a ƴãw!»

⁸A Pɩlatɩ na wa wõ a ƴɛ̀r-bie á ŋá a, dɛ̃bɩ̃ɛ lɛb'a bãw kpɛ ʋ yaga za.

⁹Ʋ tɩ lɛb'a kpɛ a dĩó tɩ sowri a Yeezu: «Nyɩnɛ fʋ yi?» Ɛcɛ a Yeezu bɛ tɩ háa nʋɔr sɔw ʋ ɛ.

¹⁰Lɛ n'a a Pɩlatɩ lɛb yel ʋ: «Fʋ bɛ ƴɛ̀rɛ ƴɛ̀rʋ sɔwr mɛ̃ ɩ? Fʋ bɛ bãw k'ɩ̃ɩ tɛr'ɩ fãw na tʋ̃ɔ́ kpa b a da-gara zu, bɩɩ lɛb bɛr fʋ ɛ?»

¹¹Ɛcɛ a Yeezu tɩ sɔw ʋ na: «Naaŋmɩn bɛ tɩ kʋ̀ b a fãw a, fʋ kʋ̃ʋ tɩ tɛr fãw kãw za a ɩ̃ zu ɛ. Alɛ so, a nɩr ʋl na mɩl mɛ̃ nyɔw ƴãw a fʋ nuru pʋɔ a tɛr'ɩ sãwna zuo fʋ.»

¹²A lɛ n'a a Pɩlatɩ tɩ bɔbr a Yeezu lɛb-bɛrʋ. Ɛcɛ a Zifʋ mɩnɛ tɩ ŋmɩɛr'ɩ cɛlsɩ yere nɩ: «Fʋ̃ʋ wa lɛb bɛr a nɩr ŋa a, fʋ bɛ ɩ a Sezaar bá ɩ! Nɩr za na bʋɔlɛ ʋ tʋɔra nãà a ɩ n a Sezaar dɔ̃ sob.»

¹³A Pɩlatɩ na wa wõ a lɛ a, ʋ ƴãw na bɛ tɛr a Yeezu yi wa n, ʋ do zɩ̃ a ƴɛ̀rʋ-dɩb dà-kɔw zu, a zie nɛ bɛ na bʋɔlɛ kɛ́ Kʋsɛ-pamɛ davʋra a, ɛ́ Ebre bʋɔlɛ Gabata a.

¹⁴A Tɔl-gãw cuw zãa daarɩ́ tɩ n'a, man a mʋ̃tɔ̃w na põ-zɛ̃-taa a. A Pɩlatɩ tɩ yel'ɩ a Zifʋ mɩnɛ: «Nyɩ nyɛ̃ a nyɩ nãà!»

¹⁵Ɛcɛ bɛ tɩ ŋmɩɛr'ɩ cɛlsɩ: «Ʋ kpi! Ʋ kpi! Kpa ʋ da-gara zu!» A Pɩlatɩ lɛb yel bɛ: «Ɩ̃ kpa a nyɩ nãà a da-gara zu bɩɩ?» A bàwr-maal-nɩ-bɛrɛ sɔw: «Sezaar yõ n'ɩ tɩ nãà.»

¹⁶Lɛ n'a ʋ tɩ bɛr a Yeezu kʋ̀ bɛ kɛ́ bɛ tɩ kpa ʋ a da-gara zu. A lɛ n'a bɛ tɩ nyɔw a Yeezu yi n.

¹⁷A Yeezu tɩ tuo nɩ a ʋ da-gara ʋ mɩŋa yi n a tẽw pʋɔ, cen nɩ a zie kãw na dɩ kɛ́ Zuŋman zie, ɛ́ bɛ bʋɔlɛ Gɔlgɔta a Ebre ƴɛ̀rʋ pʋɔ a.

¹⁸Be n'a bɛ tɩ kpa ʋ a da-gara zu nɩ nɩbɛ ayi a ʋ lõbowe ƴãw, ɛ́ a Yeezu be a sɔgɔ.

¹⁹A Pɩlatɩ tɩ ƴãw na bɛ sɛb a sɛbrʋ ŋa mɛr a da-gara zu: «A Yeezu na yi Nazarɛtɩ a, Zifʋ mɩnɛ nãà.»

²⁰A Zifʋ mɩnɛ yaga tɩ kanɩ nɩ a sɛbrʋ ŋa, a zie nɛ bɛ na tɩ kpa a Yeezu a da-gara zu a na bɛ tɩ zãá nɩ a tẽw pʋɔ a ƴãw, ɛ́ a sɛbrʋ tɩ sɛb'ɩ Ebre nɩ Latɛ̃ nɩ Gɩrɛkɩ ƴɛ̀rʋ a.

²¹A Zifʋ mɩnɛ bàwr-maal-nɩ-bɛrɛ tɩ yel'ɩ a Pɩlatɩ: «Ta sɛb kɛ́: “Zifʋ mɩnɛ nãà ɩ”, ɛcɛ sɛb kɛ́: “A nɩr ŋa yel'a: ɩ̃ ɩ n a Zifʋ mɩnɛ nãà.”»

²²A Pɩlatɩ sɔw bɛ: «A lɛ ɩ̃ na sɛb a, sɛb'a.»

²³A sojarɩ na wa kpa a Yeezu a da-gara zu baar'a, bɛ de nɩ a ʋ kparɩ põ ziir anaar, kɛ́ ŋa za tʋ̃ɔ́ páw. Ɛ́ pãa tɩ cɛ a kpar-kpɛ̃ɛ: ʋ bɛ tɩ tɛr sɩɛrʋ ɛ, wobru n'a bɛ tɩ tĩ a zu ɛ́ wob ʋ za ɓil tɩ baarɩ.

²⁴A sojarɩ tɩ yere na kʋ̀rɛ taa: «Tɩ ta cɩɛrɩ a kparʋ ŋa põ ɩ, tɩ ŋmɛ gbãw de.» A yele á ŋá za ɩ na, kɛ́ a Sɛb-sõw ƴɛ̀r-bie tʋ̃ɔ́ tu vla: «Bɛ põ nɩ a ɩ̃ fɔbr za, ɛ́ de a ɩ̃ kpar-kpɛ̃ɛ dɩ n gbãw[19].» A lɛ tɔr za n'a a sojarɩ tɩ ɩ.

²⁵A Yeezu mã nɩ a ʋ mã yɛb Marya, Kilofaar pɔw, nɩ Madala tẽw Marya tɩ àr'a pɩɛlɩ a Yeezu da-gara.

²⁶A Yeezu na wa nyɛ̃ a ʋ mã nɩ a ʋ po-tuur-nɔna na àr pɩɛl'ʋ a, ʋ yel'ɩ a ʋ mã: «Pɔw i, nyɛ̃ a fʋ bie.»

²⁷Ɛ́ lɛb yel a po-tuure nɛ mɩ̀: «Nyɛ̃ a fʋ mã.» Ɛ́ a na dɛ tɩ tĩ a ʋlɩ daar nɛ a, a po-tuure ʋl tɛr ʋ na kul'ɩ a ʋ yir.

²⁸Al pùorí, a Yeezu na tɩ bãw kɛ́ a yele za nʋɔr kʋ na a, ʋ yel'ɩ à ŋá, k'aa Sɛb-sõw tʋ̃ɔ́ tu tɩ ɓɩɩlɩ: «Kʋ̃ɔ-nyúur kpɩɛr mɛ̃ na[20].»

²⁹Duwle kãw tɩ be n be paalɩ dã-miiru. Bɛ tɩ de nɩ sapɔ tõ a dã-miiru nɛ pʋɔ ɛ́ cɔ̀r bà ɩzɔpɩ dale ƴãw tur ʋ a nʋɔrɩ́.

³⁰A Yeezu tɩ nyũ n a dã-miiru, al pùorí ʋ yel: «A yele za nʋɔr kʋ na!» Ɛ́ pãa gʋɔ a zu, ɛ́ ŋmãa vʋʋrʋ.

³¹A cuw zãa daarɩ́ tɩ n'a. A Zifʋ mɩnɛ bɛ tɩ bɔbr k'aa kũuni cãà yawlɩ a da-garɩ zu a pɩ̃ɛnʋ-bibir ɛ, a ʋlɩ pɩ̃ɛnʋ-bibir na baa tɩ ɩ bibi-kpɛ̃ɛ a ƴãw. Bɛ tɩ cen na tɩ zɛlɩ a Pɩlatɩ k'ʋʋ ƴãw bɛ kar a kũuni gbɛ́ɛ, ɛ́ yaw bɛ a da-garɩ zu.

³²Lɛ n'a a sojarɩ tɩ wa wa kar a nɩbɛ ayi bɛl gbɛ́ɛ, bɛ na tɩ lãw kpa n a Yeezu a da-garɩ zu a.

³³Bɛ na wa ta a Yeezu zie a, bɛ nyɛ̃ ʋ na ʋ kpi baarɩ, alɛ so bɛ bɛ kar a ʋ gbɛ́ɛ ɩ.

³⁴Ɛcɛ a soja kãw tɩ cɔr'ɩ a ʋ lõbowr puo nɩ kafin. Daadaalɛ zɩ̃ɩ nɩ kʋ̃ɔ lãw pili taa yi.

³⁵A sob nɛ na nyɛ̃ a dɩ n a dãsɩɛ, ɛ́ a dãsɩɛ ʋ na dɩ a ɩ n yel-mɩŋa. A Sob ŋa bãw k'ʋʋ yere nɩ yel-mɩŋa kɛ́ nyɩ mɩ̀ sàw de.

³⁶A yele á ŋá za ɩ na kɛ́ a Sɛb-sõw ƴɛ̀r-bie á ŋá tu vla: «Bɛ kʋ̃ ka a ʋ kɔbr been kãw za ɩ[21].»

³⁷Zie kãw, a Sɛb-sõw lɛb'a yel: «Bɛ na jɩ́rɛ nɩ a ʋlɩ sob nɛ bɛ na cɔ̀r col a[22].»

³⁸A al pùorí, Zuzɛb na yi Arimate tẽw a, na tɩ ɩ a Yeezu po-tuure kãw ɛ́ sɔwlɛ bɛrɛ a Zifʋ mɩnɛ dɛ̃bɩ̃ɛ ƴãw a, tɩ zɛlɩ nɩ a Pɩlatɩ k'ʋʋ sàw ʋ de a Yeezu ƴã-gan. A Pɩlatɩ tɩ kʋ̀ ʋ a sɔ́r, ʋ cen tɩ de a Yeezu ƴã-gan.

³⁹Nikodem mɩ̀ tɩ wa na, ʋlɛ nɩ a Yeezu na tɩ nyɛ̃ taa tɩ̃ɩsɔw kãw a. Ʋ tɩ tɛr'ɩ mɩ́ɩ̀r kãa-nyũu bɛ na dʋw nɩ alowɛsɩ váar a, ta mɛ̃ kilo[23] lɩzɛr'ɩ pie a, wa n.

⁴⁰Bɛ tɩ de nɩ a kãá á ŋá zɛ a Yeezu ƴã-gan, ɛ́ de pɛnɛ vili nɩ ʋ mɛ̃ a lɛ a Zifʋ mɩnɛ na mɩ́ cɔbrɩ a bɛ kũuni a.

⁴¹Zaadɛ̃ kãw tɩ pɩɛl'ɩ a zie nɛ bɛ na kpa a Yeezu a da-gara zu a. Ɛ́ a zaadɛ̃ nɛ pʋɔ, bɔw-paala tɩ be n be, bɛ bɛ ũù nɩr za a ʋ pʋɔ sɛr ɛ.

⁴²A na tɩ ɩ a Zifʋ mɩnɛ cuw zãa daarɩ́, ɛ́ a bɔw nɛ tɩ pɩɛl'a, be n'a bɛ ũù a Yeezu.