Read Dagara, Northern Zã 2 Bible Online

Zã 2 - Dagara, Northern bible

Zã 2

¹A bibie ata sob[2] pùorí, kul-taa cuw tɩ be n Kana, Galile tẽw, ɛ́ a Yeezu mã tɩ be a cuw zie.

²Bɛ mɩ̀ tɩ bʋɔl'ɩ a Yeezu nɩ a ʋ po-tuurbɛ a kul-taa cuw zie.

³A divɛ̃ na bɛ tɩ cãà be a, a Yeezu mã tɩ yel ʋ na: «Bɛ bɛ cãà tɛr divɛ̃ ɩ.»

⁴Ɛcɛ a Yeezu tɩ sɔw ʋ na: «Mãa nɩ fʋ̃ʋ mɩ̀ bʋnʋ, pɔw i? A ɩ̃ daar bɛ ta sɛr ɛ.»

⁵A ʋ mã tɩ yel'ɩ a tõ-tõ-biir: «Bom nɛ za ʋ nãà wa yere kʋ̀rɛ nyɩ a, nyɩ maalɩ.»

⁶Kʋsɛbɛ sɩn ayʋɔb kãw tɩ be n be, bɛ mɩ́ 'wɔ̃w kʋ̃ɔ ƴãw a Zifʋ mɩnɛ gbɛ́ɛ nɩ a bɛ nuru pɛwfʋ ƴãw. A sɩ̃w za mɩ́ ƴãw na ta litɩr kʋba (100).

⁷A Yeezu tɩ yel'ɩ a tõ-tõ-biir: «Nyɩ 'wɔ̃w kʋ̃ɔ paalɩ a sɩn.» Bɛ 'wɔ̃w paalɩ a tɩ ƴãw a kɔkɛɛ.

⁸A Yeezu lɛb yel bɛ: «Nyɩ pãa 'wɔ̃w a tɩ kʋ̀ a sãan-kaarɛ.» Ɛ̀ bɛ ɩ tɩ kʋ̀ ʋ.

⁹A sãan-kaarɛ tɩ fúr'ɩ a kʋ̃ɔ na lɩɛbɩ a divɛ̃ a kaa, ɛ́ bɛ bãw a yi-waa zie ɛ. A tõ-tõ-biir bɛl tɩ bãw nɩ a yi-waa zie, bɛl na faa nɛbɛ tɩ 'wɔ̃w a kʋ̃ɔ a. Lɛ so a sãan-kaarɛ tɩ bʋɔlɩ a dɛb-sãan

¹⁰yel ʋ: «Bɛ mɩ́ dãw na de a divɛ̃-nʋ̃ɔ̀ tɩr, a nɩbɛ wa nyũ a ɩrɛ bɛ a, bɛ̃ɛ pãa de a al na bɛ maal nʋmɛ a wa n, ɛ́ fʋ̃ʋ nɩ̃ɛ gbab a divɛ̃-nʋ̃ɔ̀ bin wa tɔ ka za a?»

¹¹A Yel-dãw-niwn sob, na ɩ bãwfʋ sãá a, tɩ n'ɩ à ŋà a Yeezu na maalɩ a. Kana, Galile tẽw n'a ʋ tɩ maalɩ ʋ. Ʋ tɩ wul'ɩ a ʋ yúor-vɩɛlʋ-danʋ k'ʋ sãá, ɛ́ a ʋ po-tuurbɛ sàw de ʋ.

¹²Al pùorí, a Yeezu tɩ siw nɩ a Kafarnawɔm ʋlɛ nɩ a ʋ mã, nɩ a ʋ yɛbr, nɩ a ʋ po-tuurbɛ. Ɛcɛ bɛ tɩ maal'ɩ bibie blãlɛ tɛwr a be.

¹³A Zifʋ mɩnɛ Tɔl-gãw cuw tɩ tarɛ na. A Yeezu tɩ do n a Zerizalɛm.

¹⁴Ʋ tɩ nyɛ̃ nɩ nɩbɛ bɛ kʋɔrɛ nĩi nɩ píir nɩ naŋmamɛ a Ŋmɩn-yir-kpɛ̃ɛ pʋɔ, ɛ́ a libi-tɛwrbɛ mɩ̀ zɩ̃ zɩ̃.

¹⁵Lɛ n'a a Yeezu tɩ de mie maal'ɩ fʋba diw nɩ bɛ bɛr a Ŋmɩn-yir-kpɛ̃ɛ pʋɔ, lãwnɩ a bɛ nĩi nɩ a bɛ píir. Ʋ tɩ ŋmɛ n a libi-tɛwrbɛ libie yaarɩ, ɛ́ da da a bɛ tabalɛ lɔb,

¹⁶ɛ́ yel a bɛlɩ dem na kʋɔrɛ a naŋmamɛ a: «Nyɩ ír à á ŋá za bɛr a ka, ɛ́ ta de a ɩ̃ Sãà yir ʋ lɩɛbɩ yɛ̀rʋ́ yir ɛ!»

¹⁷A ʋ po-tuurbɛ tɩ lɛb'a tɩɛrɩ a ƴɛ̀r-bir ŋa na sɛb a Sɛb-sõw pʋɔ a: «A fʋ yir nɔ̃wfʋ tɩɛrʋ na dɩrɛ mɛ̃ na mɛ̃ vũu a.»

¹⁸Ɛcɛ a Zifʋ mɩnɛ tɩ sowr'ʋ na: «Yel-na-ɩ-bãwfʋ-sãá-a buor sob'ʋ fʋ na tʋ̃ɔ́ maalɩ wul tɩ kɛ́ fʋ tɛr'ɩ sɔ́r na ɩrɛ à à ŋá?»

¹⁹A Yeezu tɩ sɔw bɛ na: «Nyɩ ŋmɛ a Ŋmɩn-yir-kpɛ̃ɛ ŋa ŋmɛr bɛr, ɩ̃ɩ na lɛb'a mɛ ʋ bibie ata.»

²⁰A Zifʋ mɩnɛ tɩ lɛb'a yel ʋ: «Yome lɩz'a ayi nɩ ayʋɔb'a bɛ mɛ a Ŋmɩn-yir-kpɛ̃ɛ ŋa, ɛ́ fʋ̃ʋ nãà wa lɛb mɛ ʋ bibie ata a?»

²¹Ɛcɛ a Ŋmɩn-yir-kpɛ̃ɛ a Yeezu na tɩ yere a, tɩ ɩ n a ʋ ƴã-gan.

²²Lɛ so ʋ wa lɛb yi a kũu pʋɔ baarɩ, a ʋ po-tuurbɛ lɛb tɩɛrɩ bãwnɩ a, k'ʋʋ tɩ yel'ɩ a lɛ, ɛ́ bɛ tɩ sàw na de a Sɛb-sõw yele nɩ a ƴɛ̀rʋ ʋ na tɩ ƴɛ̀r a.

²³A ʋlɩ vuo nɛ pʋɔ, a Yeezu na tɩ be a Zerizalɛm a Tɔl-gãw cuw ƴãw a, nɩ-yaga tɩ sàw na de a ʋ yele, a yele-na-ɩ-bãwfʋ-sãá ʋ na tɩ maalɩ bɛ nyɛ̃ a ƴãw.

²⁴Ɛcɛ a Yeezu ʋl bɛ tɩ sàw de a bɛ yele ɩ, ʋ na tɩ bãw bɛ za ŋmɛ̃a a ƴãw.

²⁵Ʋ bɛ tɩ gù kɛ́ nɩr wa dɩ a nɩsaal dãsɩɛ a ʋ zie ɩ, ʋl mɩŋa tɩ bãw nɩ ʋlɩ bom nɛ na be a nɩsaal socir pʋɔ a.