Read Dagara, Northern Zã 20 Bible Online

Zã 20 - Dagara, Northern bible

Zã 20

¹A kɔsɩɛra bibir, Madala tẽw Marya tɩ ìr'ɩ biɓaar-pipi, a zie na tɩ cãà liw a, cen a yaa pɛr. Ʋ tɩ nyɛ̃ na bɛ bili a kʋsɩɛr bɛr a bɔw nʋɔr ƴãw.

²Ʋ tɩ zɔ na cen tɩ páw a Sɩmʋ̃ Pɩɛr nɩ a Yeezu po-tuur-nɔna yel bɛ: «Bɛ ír'ɩ a Sore a yaa pʋɔ ɛ́ tɩ bɛ bãw be bɛ na ƴãw ʋ a ɩ.»

³Lɛ n'a a Pɩɛr tɩ yi, ʋlɛ nɩ a po-tuure ʋl, bɛ cen a yaa pɛr.

⁴Bɛ za ayi tɩ lãw na zɔrɛ, ɛcɛ a po-tuure ʋl tɩ zɔ na zuo a Pɩɛr bɛr ɛ́ tɩ dãw ta a yaa pɛr.

⁵Ʋ tɩ muul'a nyɛ̃ a pɛnɛ na gã a, ɛcɛ ʋ bɛ tɩ kpɛ ɩ.

⁶A Sɩmʋ̃ Pɩɛr na tɩ tuur ʋ a, mɩ̀ pãa tɩ ta na. Ʋ tɩ kpɛ n a yaa pʋɔ nyɛ̃ a pɛnɛ na gã a.

⁷Ʋ mɩ̀ tɩ nyɛ̃ nɩ a pɛn ʋl na tɩ páw a Yeezu zu a. Ʋ bɛ tɩ bin lãwnɩ a pɛn-taabɛ ɩ, ʋ tɩ puuli na gã ʋ yõ zie.

⁸Lɛ n'a a po-tuure ʋl mɩ̀ pãa kpɛ, ʋl na tɩ de niwn ta a yaa pɛr a. Ʋ tɩ nyɛ̃ na ɛ́ sàw de.

⁹Wa tɩ tɔ a lɛn daar a, a po-tuurbɛ cãà bɛ tɩ bãwnɩ a kɛ́ a fɛr'a kɛ́ a Yeezu lɛb yi a kũuni pʋɔ, mɛ̃ a lɛ a Sɛb-sõw na yel a ɩ.

¹⁰Al pùorí, a po-tuurbɛ tɩ lɛb'a kul.

¹¹A Marya tɩ àr'ɩ a yẽw, a yaa pɛr, kone. Ʋ tɩ cãà na kone ɛ́ wa muuli a bɔw pʋɔ

¹²nyɛ̃ malkɩ mɩnɛ ayi bɛ su bʋ̃-pɛlɛ zɩ̃ nɩ a be tɔr za bɛ na tɩ gaalɩ a Yeezu ƴã-gan a: kãw tɩ zɩ̃ n a zu ƴãw, ɛ́ ƴen sob zɩ̃ a gbɛ́ɛ ƴãw.

¹³Bɛ tɩ sowr'ʋ na: «Pɔw i, bʋ̃ʋ n'ʋ tɛr fʋ fʋ kone?» Ʋ tɩ sɔw bɛ na: «Bɛ ír'ɩ a ɩ̃ Sore, ɩ̃ɩ bɛ bãw be bɛ na ƴãw ʋ a ɩ.»

¹⁴Ʋ na tɩ cãà ƴɛ̀rɛ a, ʋ wa lɩɛb'a nyɛ̃ a Yeezu ʋ àr a be, ʋʋ bɛ bãw kɛ́ ʋlɛ n'ʋ ɛ.

¹⁵A Yeezu tɩ sowr'ʋ na: «Pɔw i, bʋ̃ʋ n'ʋ tɛr fʋ fʋ kone? Ãa n'ʋ fʋ bɔbr?» Ɛcɛ a Marya ʋl tɩ manɛ kɛ́ a zaadɛ̃-gùre n'ʋ ɛ́ yel ʋ: «Sore e, fʋ̃ʋ wa n'ʋ de ʋ a, fʋ̃ʋ wul mɛ̃ a be fʋ na ƴãw ʋ a, ɩ̃ɩ na cen na tɩ ɓáw ʋ!»

¹⁶A Yeezu tɩ yel ʋ na: «Marya a!» Ʋ tɩ ƴaw na lɩɛbɩ ɛ́ yel ʋ nɩ a Ebre ƴɛ̀rʋ: «Arabuni!» A pɛr lɛ kɛ́: «Wul-wul-kara.»

¹⁷A Yeezu yel ʋ: «Ta nyɔw mɛ̃ tɛr ɛ! Bʋ̃ʋ n'ʋ vɛ̃, ɩ̃ bɛ do a ɩ̃ Sãà zie sɛr ɛ. Fʋ̃ʋ a, cen tɩ páw a ɩ̃ yɛbr yel bɛ k'ɩ̃ɩ dúor'ɩ a ɩ̃ Sãà mɩ̀ na ɩ a nyɩ Sãà a zie, a ɩ̃ Naaŋmɩn, mɩ̀ na ɩ a nyɩ Naaŋmɩn a zie.»

¹⁸A lɛ n'a a Madala tẽw Marya tɩ cen tɩ yel kʋ̀ a po-tuurbɛ: «Ɩ̃ nyɛ̃ nɩ a Sore!» Ɛ́ tɩ manɩ a lɛ ʋ na yel kʋ̀ ʋ a kʋ̀ bɛ.

¹⁹A ʋlɩ kɔsɩɛra nɛ tɔr za bibir zaanʋɔra, a Yeezu po-tuurbɛ tɩ zɩ̃ n yir kãw pʋɔ ɛ́ kpa a pamɛ, a Zifʋ mɩnɛ dɛ̃bɩ̃ɛ ƴãw. Bɛ wa bere na a Yeezu wa àr a bɛ sɔgɔ ɛ́ yel bɛ: «A ƴã-ɓaarʋ, ʋ be a nyɩ zie!»

²⁰Ʋ na tɩ ƴɛ̀r à à ŋá baar'a, ʋ wul bɛ nɩ a ʋ nuru nɩ a ʋ lõbowr. Nʋ̃ɔ̀ tɩ ɩrɛ nɩ a ʋ po-tuurbɛ yaga, a bɛ na tɩ lɛb nyɛ̃ a bɛ Sore a ƴãw.

²¹Ʋ tɩ lɛb'a maal yel bɛ: «A ƴã-ɓaarʋ, ʋ be a nyɩ zie! Mɛ̃ a lɛ a ɩ̃ Sãà na tõ m a, lɛ n'a ɩ̃ mɩ̀ tone nyɩ.»

²²Ʋ na wa yel à ŋá baar'a, ʋ pɛbl'ɩ pɩɛlʋ ƴãw a bɛ zu ɛ́ yel bɛ: «Nyɩ de a Vʋʋrʋ Sõw!

²³Nyɩmɛ wa dɩ nɩbɛ yel-bebe suur kʋ̀ bɛ a, Naaŋmɩn mɩ̀ na dɩ na kʋ̀ bɛ, ɛ́ nyɩmɛ wa zawrɩ nɩbɛ yel-bebe suur dɩb a, Naaŋmɩn mɩ̀ na zawr'ɩ a dɩb.»

²⁴A Pie-nɩ-ayi ƴen sob kãw, na dɩ kɛ́ Toma, ɛ́ bɛ bʋɔlɛ Didim a, bɛ tɩ pʋɔ a bɛ pʋɔ a lɛn daar a Yeezu na tɩ wa a bɛ zie a ɩ.

²⁵A ʋ po-tuur-taabɛ tɩ yel a kʋ̀ ʋ: «Tɩ nyɛ̃ nɩ a Sore!» A Toma lɛb yel bɛ: «Mãa bɛ wa nyɛ̃ a pĩi-bie bãwfʋ a ʋ nuru pʋɔ a, mãa bɛ wa ír nobir tɔ n a pĩi-bie bãwfʋ á ŋá a, mãa bɛ wa ír nũu tõ a ʋ lõbowrí a, ɩ̃ kʋ̃ sàw de ɩ.»

²⁶Bibie ani pùorí, a Yeezu po-tuurbɛ tɩ lɛb'a maal ɓã taa a yir pʋɔ, a Toma mɩ̀ pʋɔ. A pamɛ tɩ cãà na kpa, ɛ́ a Yeezu wa kpɛ àr a bɛ sɔgɔ ɛ́ yel bɛ: «A ƴã-ɓaarʋ, ʋ be a nyɩ zie!»

²⁷Al pùorí, ʋ tɩ yel'ɩ a Toma: «Wa n a fʋ nobir ka, bɛl a ɩ̃ nuru nyɛ̃, wa n a fʋ nũu wa tõ a ɩ̃ lõbowrí, bɛr a nɔkpɛn ɛ́ sàw de.»

²⁸A Toma tɩ sɔw na yel: «Fʋ ɩ n ɩ̃ Sore nɩ ɩ̃ Naaŋmɩn!»

²⁹A Yeezu tɩ yel ʋ na: «Fʋ na nyɛ̃ m a bɛ n'a fʋ sàw de e? Zu-nʋ̃ɔ̀ dem'ɩ a bɛl na bɛ nyɛ̃ ɛ́ sàw de a!»

³⁰A Yeezu tɩ cãà na maalɩ yele yaga na ɩ bãwfʋ sãá a, a ʋ po-tuurbɛ niŋé, ɛcɛ bɛ bɛ tʋ̃ɔ́ sɛb a za ƴãw a sɛbɛ ŋa pʋɔ ɩ.

³¹À á ŋá bɛ na sɛb ƴãw a, bɛ sɛb'a ƴãw kɛ́ nyɩ sàw de kɛ́ a Yeezu sɩrɩ na ɩ a Kɩrɩta, a Naaŋmɩn Bie, ɛ́ a nyɩ sàwfʋ zũú n'a nyɩ na páw a nyɔ-vʋʋrʋ a ʋ yúor ƴãw.