Read Dagara, Northern Zã 3 Bible Online

Zã 3 - Dagara, Northern bible

Zã 3

¹Nɩr kãw tɩ be n be pʋɔ a Faarizɩ̃ɛ mɩnɛ lãw pʋɔ, a yúor dɩ kɛ́ Nikodem. Ʋ tɩ ɩ n a Zifʋ mɩnɛ nɩ-kpɛ̃ɛ kãw.

²Ʋ tɩ wa n tɩ̃ɩsɔw kãw wa páw a Yeezu yel ʋ: «Wul-wul-kara a, tɩ bãw na kɛ́ fʋ ɩ n wul-wule na yi Naaŋmɩn zie wa a. Alɛ bɛ ɩ lɛ, nɩsaalɛ za kʋ̃ tʋ̃ɔ́ maalɩ a yele-na-ɩ-bãwfʋ-sãá fʋ na maalɛ, Naaŋmɩn bɛ wa be a ʋ sob zie a ɩ.»

³A Yeezu tɩ sɔw ʋ na: «Yel-mɩŋa sɩza sɩza n'a ɩ̃ yere kʋ̀rɛ fʋ: nɩr bɛ wa lɛb dɔw a, ʋ kʋ̃ tʋ̃ɔ́ nyɛ̃ a Naaŋmɩn Naalʋ ɛ.»

⁴A Nikodem tɩ sowr'ʋ na: «Nɩr na kor a, ŋmɩŋmɩn n'a bɛ na ɩ lɛb dɔw ʋ? Ʋ na tʋ̃ɔ́ na lɛb kpɛ a ʋ mã púorí wa yi bɩɩ?»

⁵A Yeezu tɩ sɔw na: «Yel-mɩŋa sɩza sɩza n'a ɩ̃ yere kʋ̀rɛ fʋ: sob nɛ za na bɛ lɛb dɔw kʋ̃ɔ nɩ Vʋʋrʋ Sõw pʋɔ dɔwfʋ a, ʋ kʋ̃ tʋ̃ɔ́ kpɛ a Naaŋmɩn Naalʋ pʋɔ ɩ.

⁶A nɩsaal bʋ̃-dɔwra mɩ́ ɩ n nɩsaal, ɛ́ a Vʋʋrʋ Sõw bʋ̃-dɔwra ɩ vʋʋrʋ.

⁷Ta ɩ nɔ-ɓãa nyɔw fʋ, ɩ̃ na yel kʋ̀ b kɛ́ a fɛr'a kɛ́ nyɩ lɛb dɔw a ɩ.

⁸A sɛsɛb mɩ́ fure nɩ be za ʋ na bɔbr a, fʋ mɩ́ wone nɩ a ʋ damnʋ, ɛcɛ fʋ bɛ mɩ́ bãw be ʋ na yi waar nɩ be ʋ na cere a ɩ. A sob nɛ na lɛb dɔw a Vʋʋrʋ Sõw pʋɔ a, à ŋá n'a a mɩ́ ŋmɛ̃ a ʋ zie.»

⁹A Nikodem tɩ lɛb'a sowr'ʋ: «Ŋmɩŋmɩn n'a a na tʋ̃ɔ́ ɩ à à ŋá?»

¹⁰A Yeezu sɔw ʋ: «Fʋ ɩ n wul-wule a Ɩsɩrayɛl biir pʋɔ ɛ́ bɛ bãw a yele á ŋá ɩ?

¹¹Yel-mɩŋa sɩza sɩza, ɩ̃ yere na kʋ̀rɛ fʋ: bom tɩ na bãw a ƴɛ̀rʋ n'a tɩ ƴɛ̀rɛ, bom tɩ na nyɛ̃ a dãsɩɛ n'a tɩ dɩrɛ, ɛ́ nyɩ bɛ sàw dier a tɩ dãsɩɛ ɩ.

¹²Mãa mɩ́ wa manɛ a tẽw zu yele kʋ̀rɛ nyɩ ɛ́ nyɩ bɛ sàw dier a, ŋmɩŋmɩn n'a nyɩ na sàw de a tẽ-vla pʋɔ yele ɩ̃ nãà wa yere kʋ̀rɛ nyɩ a?

¹³Nɩr za bɛ do a tẽ-vla pʋɔ ɩ, a bɛ ɩ a ʋlɩ nɩr nɛ yõ na yi a tẽ-vla pʋɔ siw wa a, a Nɩsaal Bie.

¹⁴Mɛ̃ a lɛ a Moyiir na tɩ bà a dàa a wɛja-kpalɛ pʋɔ yawlɩ a kure waab, ʋ zɛw a, lɛ n'a a fɛr kɛ́ bɛ mɩ̀ bà a Nɩsaal Bie k'ʋ zɛw,

¹⁵kɛ́ nɩr za na sàw de a ʋ yele a, ʋ páw a nyɔ-vʋʋrʋ na be kʋralɛ a.

¹⁶Naaŋmɩn sɩrɩ na nɔ̃w a tẽ-daa yaga za, tɩ de a ʋ Bie, ʋ Bi-been kʋ̀ ʋ, kɛ́ nɩr za na sàw de ʋ a, ta kpi ɛ, ɛ́ páw a nyɔ-vʋʋrʋ na be kʋralɛ a.

¹⁷A Naaŋmɩn bɛ tõ a ʋ Bie a tẽ-daa zu k'ʋʋ wa maal'ɩ a tẽ-daa ƴɛ̀rʋ ɛ, ʋ tõ ʋ na kɛ́ a tẽ-daa wa tʋ̃ɔ́ nyɛ̃ a faafʋ a ʋ ƴãw.

¹⁸Ʋlɩ sob na sàw de a ʋ yele a, ʋ yi na zaa ƴɛ̀rʋ-maalʋ pʋɔ. Ʋlɩ sob na bɛ sàw de a, ʋ ɩ n sãwna sob baarɩ, a ʋ na bɛ sàw de a Naaŋmɩn Bi-been yõ a ƴãw.

¹⁹A ƴɛ̀rʋ bɛ na na maalɩ a n'ɩ ŋa: a cãà wa n a tẽ-daa zu, ɛ́ a nɩsaalbɛ wa nɔ̃w a lige gãw a cãà, a bɛ ɩ-ɩrɩ na bɛ vɩɛl a zũú.

²⁰Yel-mɩŋa n'a, sob nɛ za na ɩrɛ faa a, ʋ bɛ nɔnɛ a cãà ɩ, ɛ́ bɛ yire cãà pʋɔ ɩ, kɛ́ a ʋ ɩ-ɩrɩ taa wa mab sãá ɩ.

²¹Ɛcɛ ʋlɩ sob ɩb na tu a yel-mɩŋa a, ʋ mɩ́ yire nɩ cãà pʋɔ, kɛ́ bɛ tʋ̃ɔ́ mɩ́ nyɛ̃ a sãá kɛ́ a ʋ ɩ-ɩrɩ tu n a lɛ a Naaŋmɩn na bɔbr a.»

²²A yele á ŋá pùorí, a Yeezu nɩ a ʋ po-tuurbɛ tɩ cen nɩ a Zude tẽw tɩ be a be, ɛ́ a Yeezu tɩrɛ a suob.

²³A Zã-Bati tɩ be n a Ayɩnɔn pɩɛlɩ a Salim tẽw, a kʋ̃ɔnɩ na tɩ ʋr a, mɩ̀ tɩrɛ a suob. A nɩbɛ tɩ waar'ɩ a ʋ zie wa dier a suob.

²⁴Bɛ bɛ tɩ nyɔw a Zã ƴãw a gaso pʋɔ sɛr ɛ.

²⁵Lɛ n'a a Zã po-tuurbɛ bɛ mɩnɛ nɩ Zifʋ nɩr kãw tɩ ŋmɩɛr nɔkpɛn a dɛwr-so-bɛrʋ yele ƴãw.

²⁶Bɛ tɩ cen na tɩ páw a Zã yel ʋ: «Wul-wul-kara a, a nɩr nɛ na tɩ be a fʋ zie a Zurdɛ̃ man gãwn a, a ʋl dãsɩɛ fʋ na dɩ a, ʋlɛ n'ɩ ŋan mɩ̀ tɩrɛ a suob, ɛ́ a nɩbɛ za cere a ʋ zie.»

²⁷A Zã tɩ sɔw bɛ na: «Nɩr kʋ̃ tʋ̃ɔ́ yel k'ʋʋ so nɩ bom Naaŋmɩn bɛ wa n'ʋ kʋ̀ ʋ a ɩ.

²⁸A nyɩɩm tɛɛ za, nyɩ dɩ n a ɩ̃ dãsɩɛ k'ɩ̃ɩ yel'a: “Mãa bɛ n'ɩ a Kɩrɩta ɩ. Ɩ̃ ɩ n a sob nɛ bɛ na tõ k'ʋʋ de ʋ niwn a.”

²⁹Ʋlɩ sob na so a pɔw-sãan a, ʋlɛ n'ɩ a dɛb-sãan. Ɛ́ a dɛb-sãan bá a, ʋ mɩ́ àr'a kɔw ʋ, bɛrɛ wone a ʋ ƴɛ̀rʋ, ɛ́ a dɛb-sãan kɔkɔr ɩrɛ ʋ nʋ̃ɔ̀ yaga. A ɩ̃ nʋ̃ɔ̀ n'ɩ à ŋà, ʋ vɩɛl'a bɛ cɛ ɩ.

³⁰A fɛr'a kɛ́ a ʋ yúor yire, ɛ́ a mãa yúor báarɛ.»

³¹«Sob nɛ na yi a saa-zu waar a do na gãw bɛ za. Sob nɛ na yi tẽw zu a ɩ n tẽw zu nɩr, ɛ́ mɩ́ ƴɛ̀rɛ mɛ̃ tẽw zu nɩr a. Sob nɛ na yi a salom zu waar a [do na gãw bɛ za]:

³²ʋ dɩrɛ nɩ a bom nɛ ʋ na nyɛ̃ ɛ́ wõ a dãsɩɛ, ɛ́ nɩr za bɛ sàwr dier a ʋ dãsɩɛ ɩ.

³³Nɩr na sàw de a ʋ dãsɩɛ a, wul'a kɛ́ Naaŋmɩn ɩ n yel-mɩŋa sob.

³⁴Bʋ̃ʋ n'ʋ vɛ̃, sob nɛ a Naaŋmɩn na tõ a yere nɩ a Naaŋmɩn ƴɛ̀r-bie, a Naaŋmɩn kʋ̀rɛ ʋ nɩ a ʋ Vʋʋrʋ bɛ tɛr manʋ ɛ.

³⁵A Sãà nɔnɛ nɩ a Bie, ɛ́ de bom za ƴãw a ʋ nuru pʋɔ.

³⁶Sob nɛ na sàw de a Bie a páw nɩ a nyɔ-vʋʋrʋ na be kʋralɛ a. Ɛcɛ sob nɛ bɛ wa sàw de a Bie a, ʋ kʋ̃ páw a nyɔ-vʋʋrʋ ŋa ɩ, ɛ́ a Naaŋmɩn suur be n a ʋ sob ƴãw.»