Read Dagara, Northern Zã 5 Bible Online

Zã 5 - Dagara, Northern bible

Zã 5

¹Al pùorí, a Yeezu tɩ do n a Zerizalɛm a Zifʋ mɩnɛ cuw kãw ƴãw.

²A Zerizalɛm a, kʋ̃ɔ-puulu zie kãw be n be pɩɛlɩ a Píir-Dɩdɔr. Bɛ bʋɔlɛ nɩ a zie nɛ kɛ́ Bezata a Zifʋ mɩnɛ kɔkɔr pʋɔ. Bɛ-caar anũu tɩ jil'a koli a kʋ̃ɔ-puulu zie ŋa.

³Bàalbɛ mɩ́ tɩ gbõ n taa gã a bɛ-caar al pʋɔ: zɔn, wʋbr, gbɛɛ. [Bɛ mɩ́ tɩ gã na gù kɛ́ a kʋ̃ɔ wa ɓuule a, bɛ̃ɛ siw a kʋ̃ɔmɩ́.

⁴Tɛm kãw pʋɔ, Sore malkɩ mɩ́ siw na dam a kʋ̃ɔ a ɓuule, ɛ́ sob nɛ wa de niwn siw a kʋ̃ɔ na ɓuule a pʋɔ a, a ʋ bàalʋ saa ŋmɛ̃ ŋmɩŋmɩn a, a mɩ́ baar'a.]

⁵Nɩr kãw na tɩ ɩ nɩ-kɔw yome lɩzɛr'ɩ pie nɩ ani n'ɩ à ŋá a, tɩ be n a be.

⁶A Yeezu na tɩ nyɛ̃ ʋ ʋ gã a, ʋʋ wõ kɛ́ à ŋá n'a ʋ ŋmɛ̃ koro za a, ʋ sowr'ʋ na: «Fʋ bɔbr'a kɛ́ fʋ sanɩ bɩɩ?»

⁷A nɩ-kɔw nɛ tɩ sɔw ʋ na yel: «Sore e, ɩ̃ bɛ tɛr nɩr ʋ na mɩ́ nyɔw mɛ̃ ƴãw a kʋ̃ɔ pʋɔ a lɛn daar a na mɩ́ ɓuule a ɩ, ɛ́ mãa wa yel kɛ́ a cenu n'a a, kãw mɩ́ de nɩ niwn siw a ɩ̃ ƴãw.»

⁸A Yeezu yel ʋ: «Ìr, ɓáw a fʋ bʋ̃-gana cere nɩ.»

⁹Daadaalɛ, a nɩr ʋl tɩ sanɩ na, ɛ́ ɓáw a ʋ bʋ̃-gana cere nɩ. Zɩ̃ kɛ́ a Zifʋ mɩnɛ pɩ̃ɛnʋ-bibir tɩ n'a.

¹⁰Lɛ so a Zifʋ mɩnɛ tɩ yel a nɩr ʋl na lɛb kpɛ̃w a: «Pɩ̃ɛnʋ-bibir'ɩ a dɩ̃a, a bɛ tɛr sɔ́r kɛ́ fʋ tuo a fʋ bʋ̃-gana ɩ.»

¹¹Ɛcɛ ʋ tɩ sɔw bɛ na: «A ʋlɩ sob na sanɩ mɛ̃ a, ʋlɛ n'ʋ yel mɛ̃: “Ɓáw a fʋ bʋ̃-gana cere nɩ.”»

¹²Bɛ tɩ sowr'ʋ na: «Ãa n'ɩ a nɩr ʋl na yel fʋ: “Ɓáw a fʋ bʋ̃-gana cere nɩ a?”»

¹³Ɛcɛ a sob nɛ na tɩ sanɩ a bɛ tɩ bãw ãa n'ʋ ɛ. Bʋ̃ʋ n'ʋ vɛ̃, a Yeezu tɩ cen na zãá nɩ a zu-sɛbla na tɩ gbõ taa a be a.

¹⁴Al pùorí, a Yeezu tɩ wa tuor'ʋ nɩ a Ŋmɩn-yir-kpɛ̃ɛ pʋɔ yel ʋ: «Ƴɛrɛŋa a, fʋ lɛb'a kpɛ̃w, taa lɛb maalɛ yel-bier ɛ, bom na kpɛ faa zuo lɛ a taa wa páwr fʋ ɛ.»

¹⁵A nɩr nɛ tɩ cen na tɩ manɩ kʋ̀ a Zifʋ mɩnɛ kɛ́ Yeezu n'ʋ sanɩ ʋ.

¹⁶A lɛ n'a a Zifʋ mɩnɛ tɩ tĩ bɛ bɛrɛ a Yeezu ɛ, ʋ na tɩ ɩ à à ŋá a pɩ̃ɛnʋ-bibir a.

¹⁷Ɛcɛ a Yeezu tɩ sɔw bɛ na: «Wa tɩ tɔ à ŋá a, a ɩ̃ Sãà be n a tome zu, ɩ̃ɩ mɩ̀ be a tome zu.»

¹⁸A na tɩ tĩ a lɛ a n'a a Zifʋ mɩnɛ tɩ bɔbr a ʋ kʋb tuotuo, ʋ na tone a pɩ̃ɛnʋ-bibir sãwnɛ a ciiru a, ɛ́ baa zuo a za ʋ na bʋɔlɛ a Naaŋmɩn ʋ Sãà tɔr za a, a ɩ ʋlɛ nɩ a Naaŋmɩn sɛw taa a.

¹⁹A Yeezu tɩ lɛb'a yel bɛ: «Yel-mɩŋa sɩza sɩza n'a ɩ̃ yere kʋ̀rɛ nyɩ: a Bie kʋ̃ tʋ̃ɔ́ nyɛ̃ ʋ tʋɔra ɩrɛ bom ɛ. Bom nɛ ʋ na nyɛ̃ a Sãà ʋ ɩrɛ a, ʋl yõ n'ʋ ʋ mɩ̀ mɩ́ ɩrɛ. Bom nɛ a Sãà na mɩ́ ɩrɛ a, a Bie mɩ̀ mɩ́ ɩrɛ ʋ nɩ a lɛ tɔr za.

²⁰Bʋ̃ʋ n'ʋ vɛ̃, a Sãà nɔnɛ nɩ a Bie ɛ́ wule ʋ bom za ʋ na ɩrɛ a. A Sãà na wul ʋ nɩ tõ-bɛrɛ zuo lɛ, na na ɓãá nyɩ nʋɔr a.

²¹Bʋ̃ʋ n'ʋ vɛ̃, mɛ̃ a lɛ a Sãà na mɩ́ ɩ a kũuni bɛ lɛb ìr, ʋʋ ɩrɛ bɛ vʋʋrɛ a, lɛ n'a a Bie mɩ̀ mɩ́ ɩrɛ sob nɛ ʋ na bɔbr a ʋ vʋʋrɛ.

²²A Sãà bɛ maalɛ nɩ nɩr ƴɛ̀rʋ ɛ, ʋ de nɩ a ƴɛ̀rʋ-maalʋ fãw za kʋ̀ a Bie,

²³kɛ́ nɩbɛ za ƴãwnɛ a Bie, mɛ̃ a lɛ bɛ na ƴãwnɛ a Sãà a. Nɩr bɛ wa ƴãwnɛ a Bie a, ʋ mɩ̀ bɛ ƴãwnɛ a Sãà na tõ a Bie a ɩ.

²⁴Yel-mɩŋa sɩza sɩza n'a ɩ̃ yere kʋ̀rɛ nyɩ: sob nɛ na bɛrɛ wone a ɩ̃ ƴɛ̀rʋ ɛ́ sàw de a ʋlɩ sob na tõ m a, ʋ páw nɩ a nyɔ-vʋʋrʋ na be kʋralɛ a. Bɛ bɛ maalɛ nɩ ʋ ƴɛ̀rʋ ɛ, ʋ yi n a kũu pʋɔ kpɛ a nyɔ-vʋʋrʋ pʋɔ.

²⁵Yel-mɩŋa sɩza sɩza n'a ɩ̃ yere kʋ̀rɛ nyɩ, a daar waar'a, ɛ́ ʋlɛ n'ɩ ŋan ta, a kũuni na na wõ a Naaŋmɩn Bie kɔkɔr a, ɛ́ a bɛlɩ dem na na wõ a ʋ kɔkɔr a, bɛ na vʋʋrɛ na.

²⁶Mɛ̃ a lɛ a Sãà na tɛr a nyɔ-vʋʋrʋ a ʋ pʋɔ a, lɛ n'a ʋ mɩ̀ kʋ̀ a Bie ʋ mɩ̀ tɛr a nyɔ-vʋʋrʋ a ʋ pʋɔ.

²⁷A Sãà kʋ̀ n a Bie a ƴɛ̀rʋ-maalʋ fãw, ʋ na ɩ a Nɩsaal Bie a zũú.

²⁸À á ŋá za, a ta cãà ɩ nɔ-ɓãa-yel a nyɩ zie ɩ. A daar tarɛ na, a bɛlɩ dem za na be a yarʋ pʋɔ a na na wõ a ʋ kɔkɔr,

²⁹ɛ́ yi a bɛ yarʋ pʋɔ a. A bɛlɩ dem na tɩ tu a vla pùor a bɛ nyɔ-vʋʋrʋ pʋɔ a, na lɛb'a yi páw a nyɔ-vʋʋrʋ. Ɛcɛ a bɛlɩ dem na tu a faa pùor a, na lɛb'a yi nyɛ̃ dɔwrʋ.

³⁰Mãa a, ɩ̃ kʋ̃ tʋ̃ɔ́ nyɛ̃ ɩ̃ tʋɔra ɩ bom kãw za ɩ. Ɩ̃ maalɛ nɩ a ƴɛ̀rʋ mɛ̃ a lɛ a Naaŋmɩn na yere kʋ̀rɛ mɛ̃ a, ɛ́ a ɩ̃ ƴɛ̀rʋ-maalʋ tu n yel-mɩnʋ, ɩ̃ na bɛ bɔbr mãa mɩŋa pʋ-tɩɛrʋ maalʋ, ɛ́ bɔbr a sob nɛ na tõ m a pʋ-tɩɛrʋ maalʋ a.»

³¹«Mãa tɩ lɛb ŋmɛlɩ dɩrɛ a ɩ̃ dãsɩɛ a, a ɩ̃ dãsɩɛ kʋ̃ʋ tɛr pɛr ɛ.

³²Ɛcɛ nɩ-yũo n'ʋ dɩrɛ a ɩ̃ dãsɩɛ, ɩ̃ɩ bãwnɩ a na, a ʋ dãsɩɛ tu n yel-mɩŋa.

³³Nyɩ tõ n nɩbɛ a Zã zie, ʋ́ʋ̀ tɩ dɩ a yel-mɩŋa dãsɩɛ.

³⁴Mãa a, ɩ̃ bɛ tɛr nɩsaal dãsɩɛ yel-ɩra ɩ, ɛcɛ ɩ̃ ƴɛ̀rɛ nɩ à à ŋá kɛ́ nyɩ tʋ̃ɔ́ nyɛ̃ a faafʋ.

³⁵A Zã tɩ ɩ na mɛ̃ fɩ̃tɩlɛ bɛ na mɩ́ tɔ̃w ʋ caalɛ a: ɛ́ nyɩ sàw a cãà ŋa caalɩ nyɩ blã, ɛ́ a tɩ ɩ nyɩ nʋ̃ɔ̀.

³⁶Ɛcɛ ɩ̃ tɛr'ɩ dãsɩɛ na zuo a Zã dãsɩɛ a: alɛ n'ɩ a tome a Sãà na kʋ̀ m k'ɩ̃ɩ tõ a. Ɩ̃ tone nɩ a tome á ŋá, ɛ́ alɛ n'a dɩrɛ a ɩ̃ dãsɩɛ kɛ́ a Sãà tõ m a.

³⁷A Sãà na tõ m a, ʋl mɩŋa n'ʋ dɩ a ɩ̃ dãsɩɛ. Ɛcɛ nyɩ bɛ dãw wõ a ʋ kɔkɔr ɛ, ɛ́ bɛ dãw nyɛ̃ a ʋ niwn ɛ,

³⁸ɛ́ a ʋ ƴɛ̀rʋ bɛ kpɩɛr a nyɩ pʋɔ ɩ, nyɩ na bɛ sàw de a ʋlɩ sob nɛ ʋ na tõ a ƴãw.

³⁹Nyɩ ƴãw nɩ fãw vuole a Sɛb-son pʋɔ, nyɩ na tɩɛrɛ kɛ́ be n'a nyɩ na páw a nyɔ-vʋʋrʋ na be kʋralɛ a, ɛ́ alɛ n'a dɩrɛ a ɩ̃ dãsɩɛ.

⁴⁰Ɛ́ nyɩ bɛ bɔbr kɛ́ nyɩ wa a ɩ̃ zie wa páw a nyɔ-vʋʋrʋ na be kʋralɛ a ɩ.

⁴¹Nɩsaalbɛ zie bɛ n'a ɩ̃ bɔbr a danʋ ɛ.

⁴²Ɛcɛ ɩ̃ bãw nyɩ na, a Naaŋmɩn nɔ̃wfʋ bɛ be a nyɩ zie ɩ.

⁴³Ɩ̃ wa n a ɩ̃ Sãà yúor ƴãw, ɛ́ nyɩ bɛ wa de m ɛ. Ɛcɛ nɩ-yũo wa wa ʋ tʋɔra yúor ƴãw a, nyɩ na sàw na de ʋ!

⁴⁴Nyɩ zɛwr'ɩ taa yée, ɛ́ bɛ bɔbr a yúor ʋl na yi Naaŋmɩn yõ zie a ɩ, ŋmɩŋmɩn n'a nyɩ na tʋ̃ɔ́ sàw de ʋ?

⁴⁵Nyɩ taa tɩɛrɛ kɛ́ mãa n'ʋ na yel a nyɩ sãwna a ɩ̃ Sãà niŋé ɩ: Moyiir'ʋ, ʋl ƴãw nyɩ na ƴãw a nyɩ tɩɛrʋ a, ʋlɛ n'ʋ na yel a nyɩ sãwna.

⁴⁶Bʋ̃ʋ n'ʋ vɛ̃, mãa yele n'a a Moyiir sɛb, lɛ so, nyɩmɛ tɩ sàw de a Moyiir a, nyɩ mɩ̀ nãá sàw na de m.

⁴⁷Ɛcɛ nyɩ na bɛ sàw de a lɛ a Moyiir na sɛb a, ŋmɩŋmɩn n'a nyɩ pãa na sàw de a ɩ̃ ƴɛ̀rʋ?»