Read Dagara, Northern Zã 8 Bible Online

Zã 8 - Dagara, Northern bible

Zã 8

¹A Yeezu tɩ tɔl'a do a Olivʋ tɩɩr tãw zu.

²A biɓaar-pipi, ʋ tɩ lɛb'a wa a Ŋmɩn-yir-kpɛ̃ɛ pʋɔ, ɛ́ a nɩbɛ za na tɩ zɔrɛ waar a ʋ zie a, ʋ tɩ zɩ̃ na ɛ́ nyɔw nɩ bɛ a kanʋ.

³A Naaŋmɩn wulu sɛ-sɛbrbɛ nɩ a Faarizɩ̃ɛ mɩnɛ tɩ tɛr'ɩ pɔw kãw, bɛ na nyɔw pɔw-gaa yel-bier maalʋ zu a, wa n a ʋ zie. Bɛ tɩ ƴãw ʋ nɩ sɔwlɩsɔw

⁴ɛ́ yel a Yeezu: «Wul-wul-kara a, bɛ ùr a nyɔw a pɔw ŋa pɔw-gaa yel-bier maalʋ zu.

⁵Ɛcɛ a Naaŋmɩn wulu sɛbɛ pʋɔ a, a Moyiir ƴãw nɩ nʋɔr kʋ̀ tɩ kɛ́ tɩ mɩ́ lɔb a pɔwbɛ bɛ ŋa taabɛ nɩ kʋsɛbɛ kʋ. Fʋ̃ʋ a, fʋ yel kɛ́ bʋnʋ?»

⁶Bɛ tɩ ƴɛ̀rɛ nɩ à ŋá kɛ́ bɛ ŋmãa ʋ pùor tɛr'ɩ ʋ ƴɛ̀rʋ. Ɛcɛ a Yeezu tɩ gũu na, ɛ́ sɛbr'ɩ a ʋ nobir a tẽsɔw.

⁷Bɛ na tɩ cãà sowre ʋ a, ʋ wa dʋɔ nɩ zu ɛ́ yel: «Sob nɛ na bɛ dãw maalɩ yel-bier a nyɩ pʋɔ a, ʋ de niwn lɔb'ɩ ʋ a kʋsɩɛr.»

⁸Ʋ tɩ lɛb'a gũu, lɛb sɛbr a tẽsɔw.

⁹Bɛ na tɩ wõ a ʋ sɔwfʋ ŋa a, bɛ tĩ nɩ a nɩ-kore pʋɔ ɛ́ fore tawr yire pùor. A Yeezu wa tɩ cɛ nɩ ʋ yõ, nɩ a pɔw na àr a ʋ niŋé a.

¹⁰Ʋ tɩ dʋɔ nɩ a zu ɛ́ sowri a pɔw: «Pɔw i, bɛ wa? Nɩr za bɛ ƴãw fʋ kũu dɔwrʋ ɛ?»

¹¹Ʋ sɔw: «Nɩr za bɛ ƴãw mɛ̃ kũu dɔwrʋ ɛ, Sore e.» A Yeezu lɛb yel ʋ: «Mãa mɩ̀, ɩ̃ bɛ ƴãwnɛ fʋ kũu dɔwrʋ ɛ. Cen, ɛ́ dɩ̃a na ta a, taa lɛb maalɛ yel-bier ɛ.»]

¹²A Yeezu tɩ lɛb'a ƴɛ̀r a zu-sɛbla zie yel: «Mãa n'ɩ a tẽ-daa cãà, sob nɛ na tuur mɛ̃ a kʋ̃ cere lige pʋɔ ɩ, ʋ na páw nɩ a cãà na tɩrɛ a nyɔ-vʋʋrʋ a.»

¹³A lɛ n'a a Faarizɩ̃ɛ mɩnɛ tɩ yel ʋ: «Fʋ̃ʋ tɔr za n'ʋ lɛb ŋmɛlɩ dɩrɛ fʋ tʋɔra dãsɩɛ, a fʋ dãsɩɛ bɛ ɩ sɩza ɩ!»

¹⁴A Yeezu tɩ sɔw bɛ na: «Sɩza n'a, ɩ̃ lɛb'a ŋmɛlɩ dɩrɛ a ɩ̃ tʋɔra dãsɩɛ, ɛcɛ a ɩ̃ dãsɩɛ ɩ n sɩza, bʋ̃ʋ n'ʋ vɛ̃, ɩ̃ bãw nɩ be ɩ̃ na yi wa a, nɩ be ɩ̃ na cere a, ɛcɛ a nyɩɩm a, nyɩ bɛ bãw be ɩ̃ na yi wa nɩ be ɩ̃ na cere a ɩ.

¹⁵A nyɩɩm a, nyɩ mɩ́ maal'ɩ a ƴɛ̀rʋ tu n nɩsaalʋ tɛwr. Mãa a, ɩ̃ bɛ maalɛ nɩ nɩr ƴɛ̀rʋ ɛ.

¹⁶Ɛ́ mãa saa wa maalɛ a ƴɛ̀rʋ a, a mɩ́ tu n yel-mɩŋa, ɩ̃ na bɛ ɩ ɩ̃ yõ a ƴãw: a sob nɛ na tõ m a pʋɔ nɩ a ɩ̃ ƴãw.

¹⁷A nyɩ Naaŋmɩn wulu sɛbɛ tɔr za pʋɔ a, bɛ sɛb'a kɛ́ nɩbɛ ayi wa dɩ yel dãsɩɛ a, a bɛ dãsɩɛ ɩ n yel-mɩŋa[7].

¹⁸Ɩ̃ dɩrɛ nɩ a ɩ̃ tʋɔra dãsɩɛ, ɛ́ a ɩ̃ Sãà na tõ m a mɩ̀ dɩrɛ a ɩ̃ dãsɩɛ.»

¹⁹A lɛ n'a bɛ lɛb sowr'ʋ: «A fʋ Sãà wa?» A Yeezu tɩ sɔw bɛ na: «Nyɩ bɛ bãw mɛ̃ ɩ, ɛ́ mɩ̀ bɛ bãw a ɩ̃ Sãà ɩ. Nyɩmɛ tɩ bãw mɛ̃ a, nyɩ mɩ̀ nãá bãw nɩ a ɩ̃ Sãà.»

²⁰A Yeezu na tɩ kanɛ nɩ a nɩbɛ a Ŋmɩn-yir-kpɛ̃ɛ pʋɔ a n'a, ʋ tɩ ƴɛ̀r a ƴɛ̀r-bie á ŋá, a be bɛ na bin a dawr a nɩbɛ ƴãwnɛ a libie a. Nɩr za bɛ tɩ sàw zɛw nũu tɔ n ʋ ɛ, a ʋ daar na bɛ tɩ ta sɛr a ƴãw.

²¹A Yeezu tɩ cãà na lɛb yel bɛ: «Ɩ̃ cere na, ɛ́ nyɩ na bɔ m'a, ɛcɛ nyɩ na kpi n nɩ a nyɩ yel-bier. A be ɩ̃ na cere a, nyɩ kʋ̃ tʋ̃ɔ́ cen ɛ.»

²²A lɛ n'a a Zifʋ mɩnɛ tɩ sowre: «Ʋ taa bɔbr ʋ tʋɔra kʋb ʋ? Ʋ na lɛb yel à ŋá a: “A be ɩ̃ na cere a, nyɩ kʋ̃ tʋ̃ɔ́ cen ɛ.”»

²³A Yeezu tɩ sɔw bɛ na: «Pile ka nɩbɛ n'ɩ nyɩ, ɛ́ mãa ɩ saa-zu nɩr. Nyɩ ɩ n a tẽ-daa ŋa zu nɩbɛ, ɛ́ mãa bɛ ɩ a tẽ-daa ŋa zu nɩr ɛ.

²⁴Lɛ so ɩ̃ yel kʋ̀ nyɩ kɛ́ nyɩ na kpi n nɩ a nyɩ yel-bebe. Nyɩmɛ bɛ wa sɩrɩ sàw k'ɩ̃ɩ “ɩ n a sob nɛ ɩ̃ na ɩ a”, nyɩ na kpi n nɩ a nyɩ yel-bebe.»

²⁵A lɛ n'a bɛ tɩ sowr'ʋ: «Ãa nɛ b?» A Yeezu tɩ sɔw bɛ na: «Mãa n'ɩ a sob nɛ ɩ̃ na yere kʋ̀rɛ nyɩ a pɛr-tib daar za a.

²⁶Ɩ̃ cãà na tɛr yel-yaga na càarɩ nyɩ a na yel, ɛ́ maal'ɩ nyɩ ƴɛ̀rʋ. Ɛcɛ a sob nɛ na tõ m a ɩ n yel-mɩŋa sob, ɛ́ bom nɛ ɩ̃ na wõ a ʋ zie a, ɩ̃ yere ʋ na kʋ̀rɛ a tẽ-daa.»

²⁷Bɛ bɛ tɩ bãw kɛ́ a ʋ Sãà ƴɛ̀rʋ n'a ʋ tɩ ƴɛ̀rɛ a bɛ zie ɩ.

²⁸A lɛ n'a a Yeezu tɩ yel bɛ: «A lɛn daar nyɩ nãá wa ba a Nɩsaal Bie ʋ zɛw a, nyɩ na bãw na k'ɩ̃ɩ “ɩ n a sob nɛ ɩ̃ na ɩ a”, nɩ k'ɩ̃ɩ bɛ nyɛrɛ ɩ̃ tʋɔra ɩrɛ bom ɛ: bom nɛ a ɩ̃ Sãà na wul mɛ̃ a n'ʋ ɩ̃ mɩ́ yel.

²⁹A sob nɛ na tõ m a be n a ɩ̃ zie: ʋ bɛ bɛr mɛ̃ ɩ̃ ɩ ɩ̃ yõ ɩ, ɩ̃ na mɩ́ ɩrɛ a pɛlɩ a ʋ pʋɔ kʋralɛ a ƴãw.»

³⁰A Yeezu na tɩ ƴɛ̀rɛ à à ŋá a, nɩ-yaga tɩ sàw na de ʋ.

³¹A lɛ n'a a Yeezu tɩ yel a Zifʋ mɩnɛ bɛl na sàw de ʋ a: «Nyɩmɛ wa de a ɩ̃ ƴɛ̀rʋ bɛ lɛbr pùor a, nyɩ sɩrɩ na ɩ a ɩ̃ po-tuurbɛ,

³²nyɩ na bãw nɩ a yel-mɩŋa, ɛ́ a yel-mɩŋa na ɩ na nyɩ so nyɩ tʋɔra.»

³³Bɛ tɩ sɔw ʋ na yel: «Abraham bʋʋrɛ n'ɩ tɩ, ɛ́ bɛ dãw ɩ nɩr za gbãgbaar ɛ: ŋmɩŋmɩn n'a fʋ yere kɛ́ tɩ na ɩ n nɩbɛ na so bɛ tʋɔra a?»

³⁴A Yeezu tɩ sɔw bɛ na: «Yel-mɩŋa sɩza sɩza n'a ɩ̃ yere na kʋ̀rɛ nyɩ, sob nɛ na maalɛ yel-bier a, ʋ ɩ n a yel-bier gbãgbaa.

³⁵A gbãgbaa bɛ mɩ́ kpɩɛr a yir pʋɔ kʋralɛ ɩ, a yir bie ʋl mɩ́ kpɩɛr'ɩ a yir pʋɔ kʋralɛ.

³⁶A na ɩ à ŋá a, alɛ wa ɩ a Bie n'ʋ íre nyɩ bɛrɛ a gbãgbaalʋ pʋɔ a, nyɩ na sɩrɩ na so nyɩ tʋɔra.

³⁷Ɩ̃ bãwnɩ a na nyɩ na ɩ a Abraham bʋʋrɛ a: ɛcɛ nyɩ na bɛ dier a ɩ̃ ƴɛ̀rʋ a n'a so nyɩ bɔbr a ɩ̃ kʋb.

³⁸Mãa a, bom nɛ ɩ̃ na nyɛ̃ a ɩ̃ Sãà zie a n'ʋ ɩ̃ yere, ɛ́ a nyɩɩm a, bom nɛ nyɩ na wõ a nyɩ sãà zie a n'ʋ nyɩ ɩrɛ.»

³⁹Bɛ tɩ lɛb'a yel ʋ: «Abraham'ʋ ɩ a tɩ sãà.» A Yeezu yel bɛ: «Nyɩmɛ wa sɩrɩ ɩ a Abraham bibiir a, nyɩɩm tone a tome a Abraham na tõ a.

⁴⁰Ɩ̃ yel'ɩ a yel-mɩŋa ɩ̃ na wõ a Naaŋmɩn zie a kʋ̀ nyɩ, ɛ̀ nyɩ bɔbr a ɩ̃ kʋb a ƴɛrɛŋa. Abraham bɛ ɩ à à ŋá ɩ.

⁴¹Nyɩɩm a, a nyɩ sãà ɩ-ɩrɩ n'a nyɩ ɩrɛ.» Bɛ tɩ sɔw ʋ na yel: «Tɩ bɛ ɩ sɛ̃sɛ̃-biir ɛ! Sãà been yõ n'ʋ tɩ tɛr, ʋlɛ n'ɩ a Naaŋmɩn!»

⁴²A Yeezu lɛb yel bɛ: «A Naaŋmɩn tɩ ɩ a nyɩ sãà a, nyɩ nãá nɔnɛ mɛ̃ na, ɩ̃ na yi a Naaŋmɩn zie wa a ƴãw. Ɩ̃ bɛ nyɛ̃ ɩ̃ tʋɔra wa ɩ, ʋlɛ n'ʋ tõ m.

⁴³Bʋ̃ʋ n'ʋ so nyɩ bɛ bãwnɛ a ɩ̃ ƴɛ̀rʋ pɛr? Nyɩ na kʋ̃ tʋ̃ɔ́ bɛr wõ a ɩ̃ ƴɛ̀rʋ a n'a so.

⁴⁴Gɛgɛra n'ɩ a nyɩ sãà, ɛ́ nyɩ bɔbr a nyɩ sãà pʋ-tɩɛrʋ maalʋ. A pɛr-tib daar za n'a ʋ ɩ nɩ-kʋrɛ: ʋ bɛ dãw be yel-mɩŋa pʋɔ ɩ, yel-mɩŋa bɛ ka a ʋ pʋɔ ɩ. Ʋlɛ wa ŋmarɛ a ziri a, a ʋ dem mɩ́ n'a, ʋ na ɩ zir-ŋmarɛ nɩ a ziri sãà a ƴãw.

⁴⁵A mãa a, ɩ̃ na yere a yel-mɩŋa a n'a so nyɩ bɛ sàwr dier mɛ̃ ɩ.

⁴⁶A nyɩ buor sob'ʋ na tʋ̃ɔ́ wul k'ɩ̃ɩ maal'ɩ yel-bier? Ɛ́ mãa wa yere yel-mɩŋa a, bʋ̃ʋ n'ʋ so nyɩ bɛ sàwr dier mɛ̃?

⁴⁷Sob nɛ na yi a Naaŋmɩn zie a bɛrɛ na wone a Naaŋmɩn ƴɛ̀rʋ. Nyɩ na bɛ yi a Naaŋmɩn zie a n'a so nyɩ bɛ bɛrɛ wone a ɩ̃ ƴɛ̀rʋ ɛ.»

⁴⁸A Zifʋ mɩnɛ tɩ sɔw na yel a Yeezu: «Tɩ na yel kɛ́ fʋ ɩ n Samaari tẽw nɩr, nɩ kɛ́ fʋ ɩ n kɔ̃tɔ̃-ìre a, ziri n'a a?»

⁴⁹A Yeezu tɩ sɔw bɛ na: «Ɩ̃ bɛ ìre kɔ̃tɔmɛ ɩ, ɩ̃ Sãà n'ʋ ɩ̃ ƴãwnɛ, ɛ́ nyɩɩm bɛ ƴãwnɛ mɛ̃ ɩ!

⁵⁰Ɩ̃ mɩ̀ bɛ bɔbr ɩ̃ tʋɔra yúor-vɩɛlʋ-danʋ ɛ. Nɩr be n be bɔbr a ɩ̃ yúor-vɩɛlʋ-danʋ ɛ́ maalɛ a ƴɛ̀rʋ.

⁵¹Yel-mɩŋa sɩza sɩza, ɩ̃ yere na kʋ̀rɛ nyɩ: nɩr wa dier a ɩ̃ ƴɛ̀rʋ a, ʋ bɛ be za na kpi ɛ.»

⁵²A lɛ n'a a Zifʋ mɩnɛ tɩ yel ʋ: «Tɩ pãa bãwnɩ a na, fʋ ìre nɩ kɔ̃tɔmɛ! Abraham kpi na, a naaŋmɩn-ƴɛ̀r-manbɛ mɩ̀ kpi, ɛ́ fʋ̃ʋ wa yel: “Sob nɛ na dier a ɩ̃ ƴɛ̀rʋ a kʋ̃ kpi towtow ɛ”.

⁵³Fʋ zuo nɩ a tɩ sãà Abraham mɔ̃ bɩɩ? Ʋ kpi na. A naaŋmɩn-ƴɛ̀r-manbɛ mɩ̀ kpi! Fʋ de nɩ fʋ tʋɔra bʋɔlɛ anʋ?»

⁵⁴A Yeezu tɩ sɔw bɛ na: «Mãa tɩ bɔbr ɩ̃ tʋɔra yúor-vɩɛlʋ-danʋ a, a ɩ̃ yúor kʋ̃ʋ tɛr pɛr ɛ. A ɩ̃ Sãà n'ʋ zɛwr a ɩ̃ yúor, ʋl nyɩ na yel k'ʋʋ ɩ n a nyɩ Naaŋmɩn a.

⁵⁵Nyɩ bɛ bãw ʋ ɛ, ɛ́ mãa bãw ʋ. Mãa tɩ yere k'ɩ̃ɩ bɛ bãw ʋ a, ɩ̃ nãá ɩ n zir-ŋmarɛ mɛ̃ a nyɩɩm a, ɛcɛ ɩ̃ bãw ʋ na, ɛ́ dier a ʋ ƴɛ̀rʋ.

⁵⁶A nyɩ sãà Abraham tɩ cɩlɩ na, ʋ na tɩ tɩɛr k'ʋʋ na nyɛ̃ nɩ a ɩ̃ waa bibir a: ʋ nyɛ̃ ʋ na, ɛ́ nʋ̃ɔ̀ kpɛ ʋ bɛ dɩ vuo ɩ.»

⁵⁷A Zifʋ mɩnɛ tɩ sɔw ʋ na: «Fʋ bɛ tɛr yome lɩz'a ayi nɩ pie sɛr ɛ, ɛ́ nyɛ̃ a Abraham ɩ?»

⁵⁸A Yeezu tɩ sɔw bɛ na: «Yel-mɩŋa sɩza sɩza, ɩ̃ yere na kʋ̀rɛ nyɩ, a Abraham na bɛ tɩ be sɛr a, ɩ̃ be na.»

⁵⁹A ka n'a bɛ tɩ wob kʋsɛbɛ kɛ́ bɛ lɔb'ɩ ʋ. Ɛcɛ ʋ tɩ sɔwl'a yi a Ŋmɩn-yir-kpɛ̃ɛ pʋɔ.