Read Dagara, Northern Zã 9 Bible Online

Zã 9 - Dagara, Northern bible

Zã 9

¹A Yeezu na tɩ tɔlɛ a, ʋ nyɛ̃ nɩ nɩr kãw na lãw dɔw nɩ zɔnʋ a.

²A Yeezu po-tuurbɛ tɩ sowr'ʋ na: «Wul-wul-kara a, a sob ŋa na lãw dɔw nɩ a zɔnʋ a, ãa n'ʋ sãw: ʋl mɩŋa n'ʋ bɩɩ a ʋ dɔwrbɛ nɛbɛ?»

³A Yeezu tɩ sɔw na: «Ʋ bɛ sãw ɛ, a ʋ dɔwrbɛ mɩ̀ bɛ sãw ɛ. Ɛcɛ a ɩ n à à ŋá, kɛ́ a Naaŋmɩn tome tʋ̃ɔ́ sãá a ʋ zie.

⁴A zie na cãà nyɛrɛ a, a fɛr'a kɛ́ tɩ tone a sob nɛ na tõ m a tome. A zie sɔbr'a, nɩr na kʋ̃ tʋ̃ɔ́ tõ ton a.

⁵Lɛn daar za ɩ̃ na be a tẽ-daa zu a, mãa n'ɩ a tẽ-daa cãà.»

⁶Ʋ na tɩ ƴɛ̀r à à ŋá baar'a, ʋ pʋʋr'ɩ mʋtaar a tẽw bu n tanɛ, ɩ sɔ sɔ a zɔ̃w mimie

⁷ɛ́ yel: «Cen tɩ so kʋ̃ɔ a Silowe kʋ̃ɔ-puulu zie», a Silowe pɛr'ɩ «Nɩ-tona». A zɔ̃w tɩ cen na tɩ so a kʋ̃ɔ, ʋʋ na tɩ lɛb wa a, ʋ tɩ nyɛrɛ na.

⁸A ʋ sɩman dem nɩ a bɛlɩ dem na mɩ́ tɩ nyɛ̃ ʋ k'ʋ zɩ̃ zɛlɛ a, tɩ yere na: «A sob ŋa bɛ n'ʋ mɩ́ tɩ zɩ̃ a ka zɛlɛ ɩ?»

⁹Bɛ mɩnɛ tɩ yere na: «Ʋlɛ n'ʋ!» Ɛ́ bɛ mɩnɛ yere: «Ʋlɛ bɛ n'ʋ ɛ, ʋ ŋmɛ̃-ta-tɔ n'ʋ.» Ɛcɛ a ʋl mɩŋa tɩ yere na: «Mãa tɔr za n'ʋ.»

¹⁰A lɛ n'a bɛ tɩ sowr'ʋ: «Ŋmɩŋmɩn n'a a fʋ mimie ɩ yuori?»

¹¹Ʋ tɩ sɔw na: «A nɩr ʋl bɛ na bʋɔlɛ a Yeezu a, ʋlɛ n'ʋ bu tanɛ sɔ sɔ a ɩ̃ mimie ɛ́ yel mɛ̃: “Cen tɩ so kʋ̃ɔ a Silowe kʋ̃ɔ-puulu zie”. A lɛ n'a ɩ̃ cen a be, tɩ so a kʋ̃ɔ ɛ́ nyɛrɛ.»

¹²Bɛ lɛb sowr'ʋ: «Ɛ́ a sob nɛ wa?» Ʋ sɔw: «Ɩ̃ bɛ bãw ɛ.»

¹³Bɛ tɩ tɛr'ɩ a nɩr ŋa, na tɩ dãw zɔ̃w a, cen nɩ a Faarizɩ̃ɛ mɩnɛ zie.

¹⁴Zɩ̃ kɛ̃ pɩ̃ɛnʋ-bibir'a a Yeezu tɩ bu a tanɛ yuo nɩ ʋ a mimie.

¹⁵A Faarizɩ̃ɛ mɩnɛ mɩ̀ tɩ sowr'ʋ na: «Ŋmɩŋmɩn n'a fʋ ɩ nyɛrɛ?» Ʋ tɩ yel bɛ na: «Ʋ bu n tanɛ sɔ a ɩ̃ mimie, ɩ̃ so kʋ̃ɔ ɛ́ nyɛrɛ.»

¹⁶A Faarizɩ̃ɛ mɩnɛ pʋɔ a, bɛ mɩnɛ tɩ yere na: «A nɩr ŋa bɛ yi Naaŋmɩn zie wa ɩ, ʋ na mɩ́ tone a pɩ̃ɛnʋ-bibir a.» Ɛcɛ bɛ mɩnɛ tɩ yere na: «Ŋmɩŋmɩn n'a yel-bier-maalɛ na tʋ̃ɔ́ mɩ́ maalɩ a yele á ŋá taabɛ na ɩ bãwfʋ sãá a?» A tɩ ɩ n bʋ́r-taa a bɛ cara pʋɔ.

¹⁷Lɛ so bɛ tɩ lɛb sowri a zɔ̃w: «Ɛ́ fʋ̃ʋ, fʋ yel kɛ́ ãa n'ɩ a sob ŋa na yuo fʋ a mimie a?» Ʋ sɔw: «naaŋmɩn-ƴɛ̀r-manɛ n'ʋ.»

¹⁸Ɛcɛ a Zifʋ mɩnɛ na bɛ tɩ wõ a nɩr ŋa dɔwrbɛ sɛr a, bɛ bɛ tɩ sàw k'ʋʋ tɩ zɔ̃w na ɛ́ lɛb wa nyɛrɛ ɩ. Lɛ so bɛ tɩ bʋɔlɩ a ʋ dɔwrbɛ wa

¹⁹sowri bɛ: «A nyɩ bidɛb n'ɩ à ŋà nyɩ na yel k'ʋʋ lãw na dɔw nɩ zɔnʋ a? Ŋmɩŋmɩn n'a ʋ ɩ nyɛrɛ ƴɛrɛŋa?»

²⁰A dɔwrbɛ tɩ sɔw na: «Tɩ bãwnɩ a na ʋ na ɩ a tɩ bie, ɛ́ lãw dɔw nɩ zɔnʋ a.

²¹Ŋmɩŋmɩn n'a ʋ ɩ nyɛrɛ ƴɛrɛŋa a, tɩ bɛ bãw ɛ. Ãa n'ʋ yuo ʋ a mimie a? Tɩ bɛ bãw ɛ. Nyɩ sowr'ʋ, nɩ-kpɛ̃ɛ n'ʋ, ʋl mɩŋa, ʋ man a ʋ yele kʋ̀ nyɩ!»

²²A dɔwrbɛ na tɩ zɔrɛ a Zifʋ mɩnɛ dɛ̃bɩ̃ɛ a n'a so bɛ ƴɛ̀r à à ŋá. A Zifʋ mɩnɛ tɩ wõ n taa, kɛ́ nɩr wa yere kɛ́ a Yeezu ɩ n a Kɩrɩta a, kɛ́ bɛ̃ɛ diw a sob a puoru-dĩó.

²³Alɛ n'a so a dɔwrbɛ tɩ yel: «Nyɩ sowr'ʋ, nɩ-kpɛ̃ɛ n'ʋ!»

²⁴A Faarizɩ̃ɛ mɩnɛ tɩ bʋɔl'ɩ a nɩr ʋl na tɩ dãw zɔ̃w a, a gb'a ayi sob, wa yel ʋ: «Yel yel-mɩŋa a Naaŋmɩn niŋé. Tɩɩm a, tɩ bãw na kɛ́ a nɩr ŋa ɩ n yel-bier-maalɛ.»

²⁵Ʋ tɩ sɔw bɛ na: «Mãa a, ɩ̃ bɛ bãw yel-bier-maalɛ n'ʋ bɩɩ yel-bier-maalɛ bɛ n'ʋ a ɩ, ʋlɩ bom nɛ yõ ɩ̃ na bãw a n'ɩ kɛ́ ɩ̃ tɩ zɔ̃w na, ɛ́ ƴɛrɛŋa ɩ̃ lɛb nyɛrɛ.»

²⁶Bɛ lɛb sowr'ʋ: «Bʋ̃ʋ n'ʋ ʋ ɩ b? Ŋmɩŋmɩn n'a ʋ yuo fʋ a mimie?»

²⁷Ʋ sɔw bɛ: «Ɩ̃ man na kʋ̀ nyɩ, ɛ́ nyɩ bɛ bɛr wõ ɩ. Bʋ̃ʋ so nyɩ bɔbr k'ɩ̃ɩ lɛb maal man kʋ̀ nyɩ? Nyɩ mɩ́ nɔ̃w bɔbr'ɩ a ʋ po-tuurbɛ lɩɛbʋ mɔ̃ bɩɩ?»

²⁸Lɛ n'a a Faarizɩ̃ɛ mɩnɛ tɩ nyɔw ʋ tʋʋr yere nɩ: «Fʋ̃ʋ n'ʋ ɩ a ʋ po-tuure! Tɩɩm a, Moyiir po-tuurbɛ n'ɩ tɩ.

²⁹Naaŋmɩn ƴɛ̀r'ɩ a Moyiir zie tɩ bãwnɩ, ɛcɛ a sob ŋa ʋl a, tɩ bɛ bãw ʋ yib zie ɩ!»

³⁰A nɩr ʋl tɩ sɔw na yel bɛ: «À ŋá n'ʋ pãa ɩ nɔ-ɓãan! Nyɩ na bɛ bãw a ʋ yib zie, ʋʋ nɩ̃ɛ yuo mɛ̃ a mimie a!

³¹Tɩ bãwnɩ a na: Naaŋmɩn bɛ dier yel-bier-maalɛ puoru ɛ, ɛcɛ nɩr wa puore Naaŋmɩn ɛ́ maalɛ a ʋ pʋ-tɩɛrʋ a, Naaŋmɩn mɩ́ de nɩ a ʋ sob puoru.

³²Bɛ bɛ dãw wõ kɛ́ nɩr sanɩ nɩ nɩr na lãw dɔw nɩ zɔnʋ a mimie ɩ.

³³A nɩr ŋa bɛ tɩ yi Naaŋmɩn zie a, ʋ kʋ̃ʋ tʋ̃ɔ́ ɩ bom za ɩ.»

³⁴Ɛcɛ bɛ tɩ sɔw ʋ na yel: «Fʋ̃ʋ n'ɩ ŋan dɔw yel-bier pʋɔ fʋ za, ɛ́ na wule tɩ ɩ?» Ɛ́ tɩ diw ʋ bɛr a puoru-dĩó.

³⁵A Yeezu tɩ wõ na bɛ na diw ʋ bɛr a. Ʋ na wa nyɛ̃ ʋ a, ʋ sowr'ʋ na: «Fʋ sàw na de a Nɩsaal Bie yele e?»

³⁶Ʋ sɔw: «Ãa nɩ̃ɛ n'ʋ, Sore e, ɩ̃ na sàw de a ʋ yele?»

³⁷A Yeezu tɩ yel ʋ na: «Fʋ nyɛ̃ ʋ na, ʋlɛ n'ʋ ƴɛ̀rɛ nɩ fʋ!»

³⁸A nɩr ʋl tɩ sɔw na: «Ɩ̃ sàw na de, Sore e.» Ɛ́ lo gbĩ dume a ʋ niŋé.

³⁹A lɛ n'a a Yeezu tɩ yel: «Ƴɛ̀rʋ-maalʋ ƴãw n'a ɩ̃ wa a tẽ-daa ŋa zu, kɛ́ a bɛlɩ dem na bɛ tɩ nyɛrɛ a, bɛ nyɛrɛ, ɛ́ a bɛlɩ dem na tɩ nyɛrɛ a, bɛ lɩɛbɩ zɔn.»

⁴⁰A Faarizɩ̃ɛ mɩnɛ na tɩ be a ʋ zie a, ɛ́ wõ a ƴɛ̀r-bie á ŋá a, bɛ tɩ sowr'ʋ na: «A tɩɩm mɩ̀, tɩ mɩ̀ ɩ n zɔn bɩɩ?»

⁴¹A Yeezu tɩ sɔw bɛ na: «Nyɩmɛ tɩ ɩ zɔn a, nyɩ kʋ̃ʋ tɛr yel-bier ɛ. Ɛcɛ ƴɛrɛŋa nyɩ yere na: “Tɩ nyɛrɛ na”, a nyɩ yel-bier cãà nɩ be.»