Read Dagara, Northern Nɩ-toni 1 Bible Online

Nɩ-toni 1 - Dagara, Northern bible

Nɩ-toni 1

¹Teofil i, a ɩ̃ sɛb dãw-niwn sob pʋɔ a, ɩ̃ manɩ nɩ a ɩ-ɩrɩ al za a Yeezu na ɩ a, nɩ a wulu al za ʋ na wul a pɛr-tib daar za

²tɩ ta n a ʋlɩ bibir nɛ bɛ na ír ʋ do n a tẽ-vla a. A Vʋʋrʋ Sõw n'ʋ tɩ ƴãw ʋ ƴɛ̀r a ʋ ƴɛ̀r-pɛ-baara kʋ̀ a ʋ nɩ-toni ʋ na tɩ kaa ír a, ɛ́ pãa bãw do a tẽ-vla pʋɔ.

³A ʋ kũu pùorí a, bɛlɛ nɛbɛ ʋ tɩ ɩ bɛ nyɛ̃ ʋ, ʋʋ wul bɛ gb'a a ŋmɩn za k'ʋʋ ɩ n nɩ-vʋʋra: bibie lɩz'a ayi ƴãw, ʋ tɩ wul'ɩ ʋ tʋɔra a bɛ zie ɛ́ ƴɛ̀r a Naaŋmɩn Naalʋ ƴɛ̀rʋ kʋ̀ bɛ.

⁴Bibir kãw, ʋ na tɩ lãw nɩ bɛ dɩrɛ a, ʋ tɩ ƴãw nɩ nʋɔr kʋ̀ bɛ kɛ́ bɛ taa cere zãánɛ nɩ a Zerizalɛm ɛ, ɛ́ gùre a bom nɛ a Naaŋmɩn Sãà na ƴãw nʋɔr k'ʋʋ na kʋ̀ bɛ na a. Ʋ tɩ yel bɛ na: «A nʋɔr a Naaŋmɩn Sãà na ƴãw a nyɩ zie a, mãa nʋɔrɩ́ n'a nyɩ wõ ʋ.

⁵Nyɩ bãwnɩ a, kʋ̃ɔ n'a a Zã-Bati kʋ̀ n a nɩbɛ a suob, ɛcɛ a nyɩɩm a, ka nɩ bibie à ŋá lɛ tɛwr ƴãw a, Vʋʋrʋ Sõw pʋɔ n'a nyɩ na de a suob.»

⁶Lɛ n'a a po-tuurbɛ na tɩ ɓã taa a Yeezu zie a, tɩ sowr'ʋ: «Sore e, a ƴɛrɛŋa n'ɩ a daar ʋl fʋ na na lɛb zɩɩlɩ a Ɩsɩrayɛl bʋʋrɛ naalʋ a bɩɩ?»

⁷Ʋ tɩ yel bɛ na: «A daar al, nɩ a bibie al a Naaŋmɩn Sãà na nɔ̃w ƴãw a, nyɩmɛ bɛ so a bãwfʋ ɛ.

⁸Ɛcɛ a Vʋʋrʋ Sõw na siw nɩ a nyɩ zu, kʋ̀ nyɩ fãw, ɛ́ nyɩ na ɩ n ɩ̃ dãsɩɛ nɩbɛ a Zerizalɛm, a Zude nɩ a Samaari ten za pʋɔ, tɩ tɔ n a tẽw baarʋ ziir za.»

⁹Ʋ na tɩ ƴɛ̀r a ƴɛ̀r-bie á ŋá baar'a, bɛ tɩ nyɛ̃ ʋ na ʋ ìr dúor a salom zu, zũzuwr wa yi pàw ʋ, bɛ bɛ cãà nyɛ̃ ʋ ɛ.

¹⁰Bɛ na tɩ cãà àr úore a Yeezu na dúor a salom zu a, bɛ wa bere na nɩbɛ ayi kãw su kpar-pɛlɛ wa ta àr'ɩ a bɛ zie,

¹¹ɛ́ sowri bɛ: «Galile tẽw dem i, bʋnʋ ƴãw n'a nyɩ àr úore a salom à à ŋá? A Yeezu ŋa bɛ na ír a nyɩ sɔgɔ do n a salom zu a, ʋ nãà lɛb'a wa, mɛ̃ à à ŋá nyɩ na nyɛ̃ ʋ k'ʋ dúor a salom zu a.»

¹²Lɛ n'a a nɩ-toni tɩ yi a tãw ʋl zu bɛ na bʋɔlɛ Olivʋ tɩɩr tãw a, lɛb cen a Zerizalɛm. A tãw ŋa tɩ pɩɛl'ɩ a Zerizalɛm yɩ̃ɛlɛ, man a lɛ a na sɛw kɛ́ bɛ mɩ́ cen zãá a Zifʋ mɩnɛ pɩ̃ɛnʋ-bibir a.

¹³Bɛ na tɩ lɛb wa a, bɛ do n a bɔwpɩɛ pʋɔ na tɩ ɩ a bɛ beba zie a. Pɩɛr, Zã, Zakɩ nɩ Ãdere, Filib nɩ Toma, Batelemi nɩ Matie, Alfe bidɛb Zakɩ nɩ Sɩmʋ̃ Zelɔtɩ[1] nɩ Zakɩ bidɛb Zuda tɩ nɛbɛ.

¹⁴A bɛ ŋa za tɩ lãw nɩ taa mɛ̃ nɩ-been a, puore kʋralɛ, bɛlɛ nɩ pɔwbɛ bɛ mɩnɛ kãw, a Yeezu mã Marya nɩ a Yeezu yɛbr tɩ pʋɔ nɩ a bɛ pʋɔ.

¹⁵A alɩ bibie nɛ pʋɔ, a Pɩɛr tɩ ìr'a àr a yɛbr[2] na tɩ ɓã taa ta nɩbɛ lɩz'a ayʋɔb (120) a sɔgɔ, ɛ́ yel:

¹⁶«Yɛbr i, a Sɛb-sõw ƴɛ̀r-bie a Vʋʋrʋ Sõw na tɩ dãw yel'ɩ a Daviir nʋɔr a Zuda ƴãw a, a tɩ fɛr'a k'aa tu. A Zuda ŋa n'ʋ tɩ tɛr a nɩbɛ wa n bɛ wa nyɔw a Yeezu.

¹⁷Ʋ tɩ pʋɔ nɩ a tɩ pʋɔ tɩ lãw a tome.

¹⁸Zɩ̃ k'ʋʋ tɩ dà n púo nɩ a yel-faa ʋ na maalɩ a sã-ya libie: ʋ lo na tʋʋrɩ, a púor pur, a pʋsabɛ za yi gã.

¹⁹A Zerizalɛm tẽw nɩbɛ za wõ n a yel ŋa. Lɛ so bɛ bʋɔlɛ a púo ŋa nɩ a bɛ ƴɛ̀rʋ kɛ́: “Akɛldama” a pɛr lɛ kɛ́: “Zɩ̃ɩ púo.”

²⁰Ɛcɛ bɛ sɛb'ɩ a Sɛb-sõw yielu sɛbɛ pʋɔ kɛ́: “A ʋ kpɛb zie, ʋ gã zawla, nɩr za taa kpɩɛr a ʋ pʋɔ ɩ.” Nɩ kɛ́: “Nɩ-yũo, ʋ de a ʋ tõ-nʋɔr[3].”

²¹Lɛ so, a nɩbɛ bɛl na pʋɔ a tɩ pʋɔ, a ʋlɩ daar nɛ za a Sore Yeezu na tɩ be a tɩ sɔgɔ a,

²²a na tĩ a Zã suob ʋ na de a, ɛ́ tɩ ta a ʋlɩ bibir nɛ bɛ na lɛb ír ʋ a tɩ sɔgɔ a, a fɛr'a k'aa bɛ ƴen sob kãw pʋɔ a tɩ pʋɔ ɩ a ʋ kũu-pʋɔ-lɛb-yibu dãsɩɛ sob.»

²³Bɛ tɩ wul'ɩ nɩbɛ ayi: Zuzɛb, bɛ na tɩ bʋɔlɛ Barsabasɩ, ɛ́ kpɔwrɛ bʋɔlɛ kɛ́ Zitisɩ a, nɩ Matɩasɩ.

²⁴A nɩbɛ za tɩ lãw na puori à ŋá: «Sore e, fʋ̃ʋ na bãw a nɩbɛ socie a, wul a ʋlɩ sob fʋ na kaa ír a nɩbɛ bɛ ŋa ayi pʋɔ,

²⁵k'ʋʋ ɩ a nɩ-tona lɩɛrɩ de a zie a nɩ-tona tome pʋɔ, a Zuda na bɛr kɛ́ cen a ʋ mɩ̀ zie a.»

²⁶Al pùorí, bɛ tɩ ŋmɛ n a gbãw, ʋ lo Matɩasɩ zu, ɛ̀ bɛ de ʋ ƴãw a nɩ-toni pie nɩ been pʋɔ.