Read Dagara, Northern Nɩ-toni 12 Bible Online

Nɩ-toni 12 - Dagara, Northern bible

Nɩ-toni 12

¹A ʋlɩ daar nɛ, a nãà Erɔdɩ tɩ ìr'a nyɔw a Lãw-yir nɩbɛ bɛ mɩnɛ dɔwrʋ.

²Ʋ tɩ ƴãw na bɛ kʋ a Zã yɛb Zakɩ nɩ zɛbr-sɔ-kpɛ̃ɛ.

³Ʋ na tɩ nyɛ̃ a nʋmɛ a Zifʋ mɩnɛ zie a, ʋ tɩ ƴãw na bɛ mɩ̀ nyɔw a Pɩɛr. A dipɛ̃ na bɛ ƴãw dãbɩl a cuw bibie pʋɔ tɩ n'a.

⁴Bɛ na tɩ nyɔw a Pɩɛr baarɩ a, a Erɔdɩ tɩ ƴãw na bɛ pàw ʋ gaso pʋɔ, ɛ́ ƴãw sojarɩ anaar ziir anaar gùre ʋ. A Erɔdɩ tɩ bɔbr'a k'aa Tɔl-gãw cuw dɩ yi baarɩ, ʋʋ bãw maal'ɩ ʋ a ƴɛ̀rʋ a nɩbɛ niŋé.

⁵Ɛcɛ a Pɩɛr na tɩ be a gaso pʋɔ a, a Lãw-yir tɩ puore nɩ a Naaŋmɩn kpɛ̃w kpɛ̃w za kʋ̀rɛ ʋ.

⁶A Erɔdɩ nãá tɩ maal'ɩ ʋ a ƴɛ̀rʋ a nɩbɛ niŋé a bio daarɩ́ a, lɛ n'a a ʋlɩ tɩ̃ɩsɔw nɛ tɔr za, a Pɩɛr tɩ be sojarɩ ayi cara pʋɔ gúre. Bɛ tɩ 'lẽ ʋ na nɩ bamɛ ayi, ɛ́ nɩbɛ tɩ àr gù a dɩ̃dɔr.

⁷Bɛ wa bere na k'a Sore malkɩ àr a be, ɛ́ a gaso caalɩ ʋ za. A malkɩ tɩ tɔ n a Pɩɛr lõbowrí sɩ̃w ʋ ɛ́ yel: «Ìr fɔ̃w!» A bamɛ tɩ yɔl'ɩ a ʋ nuru ƴãw lo.

⁸A malkɩ tɩ yel ʋ na: «Sɛ a fʋ kpàwr ɛ́ ƴãw a fʋ nafawr.» A Pɩɛr ɩ a lɛ. A malkɩ lɛb yel ʋ: «Su a fʋ kpar-kpɛ̃ɛ ɛ́ tuur mɛ̃.»

⁹Ʋ tɩ yi na tuur ʋ, ɛ́ bɛ tɩ bãw k'aa yele a malkɩ na ɩrɛ a ɩ n sɩza ɩ: ʋ tɩ manɛ kɛ́ bʋ̃-nyɛra kãw n'ʋ ʋ nyɛ̃.

¹⁰Bɛ tɩ tɔl'a gãw a dɩ̃dɔ-gùrbɛ dãw-niwn dem bɛr, ɛ́ lɛb gãw bɛ mɩnɛ, ɛ́ ta a kure dɩ̃dɔ-kpɛ̃ɛ ƴãw, na ɩ a yẽw dɩ̃dɔr a, ʋ yuo ʋ tʋɔra a bɛ niŋé. Bɛ tɩ tɔl'a yi lo sɔ́r kãw cere, wa bere a malkɩ bɔr a be ɛ́ bɛr a Pɩɛr.

¹¹A Pɩɛr niwn tɩ cɩ na ʋ yel: «Ƴɛrɛŋa a, ɩ̃ bãwnɩ a nɩ yel-mɩŋa kɛ́ a Sore tõ n a ʋ malkɩ ʋ wa faa mɛ̃ a Erɔdɩ nuru pʋɔ, nɩ a lɛ a Zifʋ mɩnɛ na tɩ gùre kɛ́ bɛ wa ɩ m a.»

¹²A Pɩɛr na wa bãw a pɛr a, ʋ cen nɩ Zã bɛ na bʋɔlɛ Markɩ a mã, Marya, yir. Nɩ-yaga tɩ ɓã n taa a be puore.

¹³A Pɩɛr tɩ kpáwr'ɩ a dɩ̃dɔ-kpɛ̃ɛ ƴãw, tõ-tõ-bi-pɔwle kãw, na dɩ kɛ́ Orodɛ a, wa k'ʋʋ wa yuo.

¹⁴Ʋ tɩ wõ n a Pɩɛr kɔkɔr bãw, nʋ̃ɔ̀ kpɛ ʋ, ʋ bɛr a pan yuofʋ, ɛ́ zɔ kpɛ tɩ yel kʋ̀ a nɩbɛ kɛ́ Pɩɛr'ʋ àr a dɩ̃dɔrɩ́.

¹⁵A nɩbɛ tɩ sɔw ʋ na: «Fʋ yáar'a bɩɩ?» Ɛcɛ a tõ-tõ-bi-pɔwle tɩ cãà na yere kɛ́ sɩza n'a. A lɛ n'a bɛ tɩ lɛb yel ʋ: «Alɛ wa ɩ lɛ a, a ʋ malkɩ n'ʋ!»

¹⁶Ɛcɛ a Pɩɛr ʋl tɩ cãà na kpáwrɛ a pan. Bɛ na pãa wa tɩ nanɩ yuo a pan a, bɛ nyɛ̃ na a ɩ ʋlɛ n'ʋ, a ɩ nɔ-ɓãan a bɛ zie.

¹⁷A Pɩɛr tɩ kabr'a yel kɛ́ bɛ bɛr gɔmɛ, ʋʋ manɩ kʋ̀ bɛ a lɛ a Sore na ɩ tɛr ʋ yi n a gaso pʋɔ a. Ʋ na wa ƴɛ̀r baar'a, ʋ cãà na lɛb yel bɛ: «Nyɩ cen tɩ manɩ kʋ̀ a Zakɩ nɩ a yɛbr bɛl na cɛ a.» Al pùorí, ʋ tɩ yi na lo a sɔ́r cen zi-yũo.

¹⁸A zie na wa vɩɛ a, a tɩ ɩ n damnʋ yaga a sojarɩ sɔgɔ: bɛ tɩ sowre nɩ taa a lɛ a Pɩɛr na ɩ a.

¹⁹A Erɔdɩ tɩ ƴãw na bɛ bɔ a Pɩɛr, ɛ́ bɔ tɩ gù. Lɛ n'a ʋ tɩ ƴãw bɛ tɛr a gaso-gùrbɛ wa n, ʋ wa maal'ɩ bɛ ƴɛ̀rʋ ƴãw bɛ kʋ bɛ. Al pùorí, ʋ tɩ yi n a Zude ɛ́ tɔl cen Sezaare tɩ kpɛ a be blã.

²⁰A Erɔdɩ suur tɩ ìr'ɩ yaga a Tɩ́ɩ̀r nɩ a Sɩdɔ̃ tẽw dem ƴãw. Lɛ n'a a Tɩ́ɩ̀r tẽw dem nɩ a Sɩdɔ̃ tẽw dem tɩ wõ taa kɛ́ bɛ cen tɩ páw a Erɔdɩ. Blasitisi na kaarɛ a nãà di-gana zie a n'ʋ tɩ tɩɛ bɛ a yele á ŋá pʋɔ. À ŋá n'a bɛ tɩ cen kɛ́ bɛlɛ nɩ a Erɔdɩ tɩ lɛb kpɛ taa, a nãà tẽw na n'a a bɛ bʋ̃-dɩrɩ mɩ́ yi wa a ƴãw.

²¹A bibir na wa vɩɛ a, a Erɔdɩ tɩ su n a ʋ nãà bʋ̃-suuri do zɩ̃ nɩ a ʋ naalʋ-dà-kɔw zu, ɛ́ ƴɛ̀r a ʋ ƴɛ̀rʋ kʋ̀ bɛ a nɩbɛ za niŋé.

²²A nɩbɛ tɩ cáarɛ na yere nɩ: «Naaŋmɩn kãw n'ʋ ƴɛ̀rɛ, nɩsaal bɛ n'ʋ ɛ!»

²³Ɛcɛ bɛ wa bere na Sore malkɩ ŋmɛ a Erɔdɩ, ʋ na bɛ tɩ sàw danɩ a Naaŋmɩn a ƴãw: zãzule tɩ dɩ ʋ na, ʋ kpi.

²⁴A Naaŋmɩn ƴɛ̀rʋ tɩ yɛ̀rɛ na dɔwlɛ cere.

²⁵A Banabasɩ nɩ a Sol bɛl a, bɛ na tɩ tõ a bɛ tome baarɩ a Zerizalɛm a, bɛ tɛr'ɩ a Zã bɛ na bʋɔlɛ Markɩ a lɛb'ɩ.