Read Dagara, Northern Nɩ-toni 14 Bible Online

Nɩ-toni 14 - Dagara, Northern bible

Nɩ-toni 14

¹A Ɩkonɩɔm a, a Pol nɩ a Banabasɩ mɩ́ tɩ kpɛ n a Zifʋ mɩnɛ puoru-dĩó tɩ ƴɛ̀r a ƴɛ̀rʋ vla, kɛ̀ Zifʋ yaga nɩ Gɩrɛkɩ yaga sàw de a Yeezu yele.

²Ɛcɛ a bɛlɩ Zifʋ nɛ na bɛ tɩ sàw de a Yeezu a, tɩ ɩ na a nɩ-bʋʋr-yoru tɩɛrʋ bɛ vɩɛl a yɛbr ƴãw ɛ.

³A na saa tɩ ɩ à ŋá a, a Pol nɩ a Banabasɩ tɩ kpɛ n a Ɩkonɩɔm kɔwrɩ. Bɛ bɛ tɩ bʋ́nɛ a bɛ ƴɛ̀rʋ pʋɔ ɩ. Bɛ tɩ ƴãw nɩ a bɛ tɩɛrʋ za a Sore ƴãw. A Sore mɩ́ tɩ kʋ̀ bɛ nɩ fãw bɛ maalɛ nɔ-ɓãa-yele nɩ yel-bãw-guuri, ʋʋ dɩrɛ a dãsɩɛ kɛ́ a kanʋ bɛ na kanɛ càarɛ nɩ a ʋ maalʋ a ɩ n sɩza.

⁴A tẽw nɩbɛ tɩ bʋ́r a: bɛ mɩnɛ tɩ tu n a Zifʋ mɩnɛ, ɛ́ ŋmaarɛ tu a nɩ-toni.

⁵A nɩ-bʋʋr-yoru nɩ a Zifʋ mɩnɛ, lãwnɩ a bɛ nɩ-bɛrɛ, tɩ bɔbr'a kɛ́ bɛ dɔwrɩ a Pol nɩ a Banabasɩ, ɛ́ lɔb'ɩ bɛ kʋsɛbɛ kʋ.

⁶A Pol nɩ a Banabasɩ na wa bãwnɩ a, bɛ zɔ na cen Likaoni lowr, Lɩsɩtɩr nɩ Dɛrbe ten nɩ a tẽ-kõkowe pʋɔ.

⁷A be a, bɛ mɩ̀ tɩ hiere nɩ a Yel-nʋ̃ɔ̀.

⁸A Lɩsɩtɩr tẽw be a, nɩr kãw tɩ be n be gbɛ̀r zɩ̃. A ʋ dɔwfʋ daar za n'a ʋ tɩ ɩ a nɩ-kɔw, ɛ́ bɛ dãw cen towtow ɛ.

⁹Ʋ tɩ bɛrɛ na wone a Pol ƴɛ̀rʋ. A Pol tɩ jɩ́r ʋ nɩ gbẽgbẽ, ɛ́ nyɛ̃ ʋ tɛr a naaŋmɩn-sàwfʋ a na tʋ̃ɔ́ faa ʋ.

¹⁰A Pol tɩ zɛw nɩ kɔkɔr yel ʋ: «Ìr àr dẽdẽ!» Ʋ tɩ vaa na ìr cere.

¹¹A zu-sɛbla na tɩ nyɛ̃ à à ŋá a Pol na ɩ a, bɛ tɩ yere na nɩ a Likaoni tẽw nɩbɛ ƴɛ̀rʋ: «A ŋmɩmɛ lɩɛb'a ŋmɛ̃ taa nɩ a nɩsaalbɛ, ɛ́ siw wa a tɩ zie.»

¹²Bɛ tɩ bʋɔlɛ nɩ a Banabasɩ Zesɩ, ɛ́ bʋɔlɛ a Pol Ɛrmɛsɩ, ʋlɛ na n'ʋ mɩ́ tɩ de a ƴɛ̀rʋ a.

¹³A Zesɩ puoru yir tɩ be n a tẽw dɩ̃dɔ-nʋɔr. A Zesɩ bàwr-maalɛ tɩ ƴãw na bɛ nyɔw nadɛɛ, bɛ na ƴãw tɩ-puuru pɩ̃ɛmɛ a, wa n ʋ wa wõ taa nɩ a zu-sɛbla kɛ́ bɛ maal'ɩ bàwr kʋ̀ a Pol nɩ a Banabasɩ.

¹⁴A nɩ-toni Banabasɩ nɩ Pol na wa wõ a a, bɛ taw nɩ a bɛ bʋ̃-suuri cɩɛrɩ, ɛ́ ŋmɛ cɛlsɩ zɔ cen nɩ a zu-sɛbla zie,

¹⁵tɩ yel: «Alɛ! Bá-mɩnɛ ɛ, bʋ̃ʋ n'ʋ so nyɩ ɩrɛ à à ŋá? Tɩ mɩ̀ ɩ n nɩsaalbɛ mɛ̃ a nyɩɩm a! A Yel-nʋ̃ɔ̀ tɩ na hiere kʋ̀rɛ nyɩ a, ʋlɛ n'ɩ kɛ́ nyɩ bɛr a bʋ̃-zawlɛ á ŋá ɛ́ sàw de a Naaŋmɩn na vʋʋrɛ a. Ʋlɛ n'ʋ ír a salom, a tẽw, a kʋ̃ɔ-kpɛ̃ɛ nɩ a bome za na be a pʋɔ a.

¹⁶A koro za, ʋ tɩ bɛr'ɩ a nɩ-bʋʋrɛ za bɛ tuur a bɛ sɛ́ɛ.

¹⁷Ɛcɛ ʋ tɩ cãà na wule bɛ a ʋ ɩ-vɩɛlɩ: mɩ́ kʋ̀ nyɩ a saa ɛ́ ɩ a bʋ̃-kʋ́ɔrɩ a maalɩ a daar. Ʋ mɩ́ kʋ̀ nyɩ nɩ bʋ̃-dɩrɩ ɛ́ ɩ kɛ̀ nʋ̃ɔ̀ ɩrɛ nyɩ yaga za.»

¹⁸Bɛ na saa tɩ ƴɛ̀r à à ŋá a, bɛ tɩ diw nɩ a zu-sɛbla bɛr hanɩ nɩ kɛ́ bɛ ta maalɩ bàwr kʋ̀ bɛ ɩ.

¹⁹Ɛcɛ a Ãtɩɔsɩ nɩ a Ɩkonɩɔm tẽw Zifʋ mɩnɛ tɩ wa na wa lɩɛbɩ a zu-sɛbla tɩɛrʋ, ƴãw bɛ tu bɛ, ɛ́ lɔb a Pol nɩ kʋsɛbɛ, ɛ́ nyɔw ʋ vu yi n bɛr a tẽw pʋɔ, ɛ́ tɩɛrɛ k'ʋʋ kpi na.

²⁰Ɛcɛ a po-tuurbɛ na tɩ wa gbõ taa ŋmãa viiri koli ʋ a, ʋ tɩ lɛb'a ìr kpɛ a tẽw pʋɔ. A bio daarɩ́, ʋ tɩ tɔl'a cen Dɛrbe, ʋlɛ nɩ a Banabasɩ.

²¹A Pol nɩ a Banabasɩ tɩ hier'ɩ a Yel-nʋ̃ɔ̀ a Dɛrbe, páw po-tuurbɛ yaga a be. Al pùorí, bɛ tɩ lɛb'a cen a Lɩsɩtɩr nɩ a Ɩkonɩɔm nɩ a Ãtɩɔsɩ ʋl na be a Pisidi a.

²²Bɛ tɩ ɩ na a po-tuurbɛ kpɛ socie ɛ́ bɛr dɛ̃bɩ̃ɛ. Bɛ tɩ kanɛ nɩ bɛ na yere kɛ́ bɛ ƴãw fãw tɛr a naaŋmɩn-sàwfʋ kʋralɛ, bɛ mɩ̀ tɩ yere nɩ à ŋá kʋ̀rɛ bɛ: «A fɛr'a kɛ́ tɩ nyɛ̃ dɔwrʋ yaga a Naaŋmɩn Naalʋ pʋɔ kpɛb ƴãw.»

²³Bɛ tɩ kaa na ír nɩ-kore a Lãw-yie been been kaafʋ ƴãw, ɛ́ bɛ na tɩ puori tɛr'ɩ mʋta-tuo wa baar'a, bɛ de nɩ a nɩbɛ bɛ ŋa, na tɩ ƴãw a bɛ tɩɛrʋ a Sore ƴãw a, kʋ̀ ʋ.

²⁴Lɛ n'a bɛ tɩ tu tɔl a Pisidi cen Pãfili.

²⁵Bɛ na wa manɩ a Naaŋmɩn ƴɛ̀rʋ kʋ̀ a Pɛrze tẽw dem baar'a, bɛ siw nɩ Atalɩa.

²⁶Be n'a bɛ tɩ kpɛ a gbor cen a Ãtɩɔsɩ ʋl na be a Siiri a, a be a nɩbɛ na tɩ dãw zɛlɩ kɛ́ a Naaŋmɩn maalʋ tu bɛ, a tome á ŋá bɛ na tõ baarɩ a ƴɛrɛŋa a ƴãw a.

²⁷Bɛ na tɩ ta a daadaalɛ a, bɛ bʋɔl'ɩ a Lãw-yir dem ɓã taa, ɛ́ manɩ a yele al za a Naaŋmɩn na tɩ lãw nɩ bɛ maalɩ a, nɩ a lɛ ʋ na yuo a ʋ sàw-deb dɩ̃dɔr kʋ̀ a nɩ-bʋʋr-yoru a.

²⁸A Pol nɩ a Banabasɩ tɩ kpɛ n a po-tuurbɛ zie be kɔwrɩ.