Read Dagara, Northern Nɩ-toni 15 Bible Online

Nɩ-toni 15 - Dagara, Northern bible

Nɩ-toni 15

¹Nɩbɛ bɛ mɩnɛ kãw na tɩ yi a Zude siw wa a Ãtɩɔsɩ a tɩ tĩ na kanɛ nɩ a yɛbr yere à ŋá: «Nyɩmɛ bɛ wa ƴãw bɛ ŋma nyɩ a yɛɛ, mɛ̃ a lɛ a Moyiir nʋɔr na ƴãw a, nyɩ kʋ̃ tʋ̃ɔ́ nyɛ̃ a faafʋ ɛ.»

²A tɩ ɩ n taw-taa gã, ɛ́ nɔkpɛn na bɛ vɩɛl a be a Pol nɩ a Banabasɩ nɩ a nɩbɛ bɛl cara pʋɔ. Lɛ n'a bɛ pãa tɩ wõ taa, ɛ́ yel kɛ́ a Pol nɩ a Banabasɩ nɩ nɩbɛ bɛ mɩnɛ na do n a Zerizalɛm, tɩ páw a nɩ-toni nɩ a nɩ-kore a taw-taa ŋa ƴãw.

³A Ãtɩɔsɩ tẽw Lãw-yir tɩ sõw bɛ na bɛ cen. Bɛ tɩ tu na tɔl a Fenisi nɩ a Samaari ten pʋɔ, manɛ kʋ̀rɛ a nɩbɛ a be, a lɛ a nɩ-bʋʋr-yoru na sàw de a Sore a. A mɩ́ tɩ ɩ n nʋ̃ɔ̀ kpɛ̃ɛ a yɛbr zie.

⁴Bɛ na tɩ ta a Zerizalɛm a, a Lãw-yir nɩ a nɩ-toni nɩ a nɩ-kore tɩ de bɛ nɩ a sãanʋ, ɛ́ bɛ tɩ manɩ a alɩ bome nɛ za a Naaŋmɩn na tɩ lãw nɩ bɛ maalɩ a kʋ̀ bɛ.

⁵A Faarizɩ̃ɛ mɩnɛ lãw nɩbɛ bɛ mɩnɛ, na tɩ sàw de a Yeezu yele a, tɩ ìr'a yel: «A fɛr'a kɛ́ bɛ ŋma a nɩ-bʋʋr-yoru bɛl na sàw de a Yeezu yele a yɛɛ, ɛ́ ƴãw bɛ tuur a Moyiir wulu.»

⁶A nɩ-toni nɩ a nɩ-kore tɩ kpaar'ɩ taa kɛ́ bɛ jɛl a yel ŋa kaa.

⁷Bɛ na tɩ ŋmɛ a nɔkpɛn a tɩ cɛlɩ a, Pɩɛr tɩ ìr'a yel: «Yɛbr i, nyɩ bãwnɩ a na a Naaŋmɩn na kaa ír mɛ̃ koro za a nyɩ pʋɔ, k'aa nɩ-bʋʋr-yoru tʋ̃ɔ́ wõ a Yel-nʋ̃ɔ̀ a ɩ̃ nʋɔrɩ́ ɛ́ sàw de a.

⁸A Naaŋmɩn na bãw a nɩsaalbɛ socie a tɩ dɩ n a bɛ dãsɩɛ, a lɛn daar ʋ na tɩ kʋ̀ bɛ a Vʋʋrʋ Sõw mɛ̃ a tɩɩm a.

⁹A Naaŋmɩn bɛ owri owru kãw za tɩɩm nɩ a bɛl ɛ, a bɛ naaŋmɩn-sàw-deb zũú n'a ʋ pɛ́w a bɛ socie a vɩɛl.

¹⁰A na ɩ à ŋá a, bʋnʋ ƴãw n'a nyɩ yel kɛ́ nyɩ ɩ a Naaŋmɩn kaa? Nyɩ na de tuor, tɩɩm nɩ a tɩ sãàkʋm-kore na bɛ tʋ̃ɔ́ tuo a, bɔbr kɛ́ nyɩ tuo a po-tuurbɛ a?

¹¹Ɩ̃ lɛb maal yel: tɩ tɩɛrɛ na k'aa Sore Yeezu maalʋ zũú n'a tɩ páw a faafʋ mɛ̃ a lɛ tɔr za bɛ na páw a.»

¹²Lɛ n'a a kpaa-ta-kpɛ̃ɛ dem za tɩ ŋmãa vʋʋrʋ, ɛ́ bɛ bɛr wõ a Pol nɩ a Banabasɩ manɩ a nɔ-ɓãa-yele nɩ a yel-bãw-guuri al za a Naaŋmɩn na tɩ ƴãw bɛ maalɩ a nɩ-bʋʋr-yoru zie a.

¹³Bɛ na wa ƴɛ̀r baar'a, Zakɩ mɩ̀ tɩ de nɩ a ƴɛ̀rʋ yel: «Yɛbr i, nyɩ bɛrɛ wone.

¹⁴A Sɩmɩ̃ɔ lɛb'a manɩ kʋ̀ tɩ a ƴɛrɛŋa, a lɛ a pɛr-tib daar, a Naaŋmɩn na kaa a nɩ-bʋʋr-yoru zie, ɛ́ kaa ír nɩ-bʋʋrɛ a bɛ pʋɔ kɛ́ bɛ ɩ a ʋ nɩbɛ a.

¹⁵A yel ŋa nɩ a naaŋmɩn-ƴɛ̀r-manbɛ ƴɛ̀rʋ de nɩ taa, bɛ na sɛb yel kɛ́:

¹⁶“Al pùorí, ɩ̃ na lɛb'a wa wa mɛ a Daviir yir na lo a, ɩ̃ na lɛb'a libri a ʋ deboru, ɛ́ ɩ ʋ lɛ àr.

¹⁷Lɛ n'a a nɩsaalbɛ bɛl na cɛ a na bɔbr a Sore, a nɩ-bʋʋrɛ bɛl za ɩ̃ na bʋɔlɩ kɛ́ bɛ wa ɩ a ɩ̃ nɩ-sori a[27]. À ŋá n'a a Sore yere,

¹⁸ʋl na ɩ bɛ bãw a ʋ pʋ-tɩɛrʋ yele a koro za a.”

¹⁹Lɛ so, mãa sàw na k'aa nɩ-bʋʋr-yoru nɩbɛ bɛl na sàw de a Naaŋmɩn a, tɩ ta bàlɛ bɛ zawlalɛ ɩ.

²⁰Ɛcɛ tɩ sɛb yel kʋ̀ bɛ kɛ́ bɛ ciir a bàwr nɛnɛ, nɩ a pɩ̃ɔ-yele, bɛ taa 'wɔbr dʋ̃w bɛ na bɛ ŋmãa a kɔkɔr a nɛn ɛ, bɛ taa 'wɔbr a zɩ̃ɩ ɛ[28].

²¹Bʋ̃ʋ n'ʋ vɛ̃, a tẽ-kor daar za wa tɔ a dɩ̃a a, nɩbɛ be n a ten za manɛ a Moyiir wulu yele, ɛ́ pɩ̃ɛnʋ-bibir za, bɛ mɩ́ kanɩ ʋ nɩ a puoru-diru pʋɔ.»

²²A Yeezu nɩ-toni nɩ a nɩ-kore, nɩ a Lãw-yir za, tɩ wõ n taa yel kɛ́ bɛ na kaa na ír nɩbɛ a bɛ pʋɔ tõ a Ãtɩɔsɩ, bɛlɛ nɩ a Pol nɩ a Banabasɩ. A bɛlɩ nɩbɛ nɛ tɩ ɩ n nɩ-yée a yɛbr pʋɔ: Zuda bɛ na bʋɔlɛ Barsabasɩ a nɩ Sɩlasɩ[29] tɩ nɛbɛ.

²³Sɛbɛ ŋa n'ʋ bɛ tɩ kʋ̀ bɛ kɛ́ bɛ cen nɩ: «A Yeezu nɩ-toni nɩ a nɩ-kore, nyɩ yɛbr, puore nɩ a bɛ yɛbr bɛl na ɩ a nɩ-bʋʋr-yoru nɩbɛ ɛ́ be a Ãtɩɔsɩ, nɩ a Siiri nɩ a Silisi ten pʋɔ a.

²⁴Tɩ wõ na k'aa tɩ nɩbɛ bɛ mɩnɛ, tɩ na bɛ tõ a, wa na wa ƴãw bʋnʋ a nyɩ zie, ɛ́ dam a nyɩ tɩɛrʋ nɩ a bɛ ƴɛ̀rʋ.

²⁵Tɩ wõ n taa lãw nɔ-been, kaa ír nɩbɛ tone a nyɩ zie, bɛlɛ nɩ a tɩ yɛb-nɔnɩ Banabasɩ nɩ Pol,

²⁶na de a bɛ nyɔ-vʋʋrʋ za kʋ̀ a tɩ Sore Yeezu Kɩrɩta a.

²⁷A na ɩ lɛ a, Zuda nɩ Sɩlasɩ nɛbɛ tɩ tone a nyɩ zie, kɛ́ bɛ wa háa nʋɔr yel a yele á ŋá kʋ̀ nyɩ.

²⁸A Vʋʋrʋ Sõw nɩ a tɩɩm tɛɛ za sɩrɩ na yel kɛ́ tɩ kʋ̃ tʋ̃ɔ́ lɛb ƴãw fɛrʋ kãw za dɔwlɩ a nyɩ zu, a bɛ ɩ a yel-fɛrɩ á ŋá na bɛ tɛr nɩɩr-bɛrʋ a ɩ:

²⁹nyɩ ta 'wɔbr a bàwr-maal-nɛnɛ ɩ, nɩ a zɩ̃ɩ nɩ dʋ̃w bɛ na bɛ ŋmãa a kɔkɔr a nɛn ɛ, nyɩ bɛr a pɩ̃ɔ-yele. Nyɩmɛ wa ƴãw fãw bɛr à á ŋá za a, nyɩ na maal'ɩ vla. Nyɩ zɩ̃ vla.»

³⁰A nɩbɛ bɛl bɛ na tɩ kaa ír a, bɛ tɩ bɛr bɛ nɩ sɔ́r bɛ tɔl siw a Ãtɩɔsɩ, tɩ bʋɔlɩ a Lãw-yir nɩbɛ ɓã taa ɛ́ de a sɛbɛ kʋ̀ bɛ.

³¹A ʋ kanʋ tɩ ɩ bɛ nɩ nʋ̃ɔ̀, a sõwfʋ ʋ na tɩ wa n a bɛ zie a ƴãw.

³²A Zuda nɩ a Sɩlasɩ mɩ̀ na tɩ ɩ naaŋmɩn-ƴɛ̀r-manbɛ a, bɛ tɩ ƴɛ̀r'ɩ yaga a bɛ zie, kɛ́ bɛ tʋ̃ɔ́ sõw bɛ ɛ́ tɩɛ bɛ a naaŋmɩn-sàw-deb pʋɔ.

³³Bɛ tɩ kpɛ n a bɛ zie kɔwrɩ blã. Al pùorí, a yɛbr tɩ tɛr bɛ na ƴãw sɔ́rɩ́ puori bɛ, kɛ́ bɛ lɛb kul vla a bɛlɩ dem na tɩ tõ bɛ a zie. [

³⁴Ɛcɛ a Sɩlasɩ tɩ yel'a k'ʋʋ na kpɩɛr'ɩ a be.]

³⁵A Pol nɩ a Banabasɩ bɛl tɩ kpɩɛr'ɩ a Ãtɩɔsɩ. Bɛlɛ nɩ nɩ-yaga bɛ mɩnɛ tɩ kanɛ nɩ nɩ a nɩbɛ, ɛ́ hiere a Yel-nʋ̃ɔ̀ na ɩ a Sore ƴɛ̀rʋ a.

³⁶A na wa kɔwrɩ blã a, a Pol tɩ yel'ɩ a Banabasɩ: «Ɩ tɩ lɛb cen tɩ nyɛ̃ a yɛbr a ten al za pʋɔ tɩ na hieri a Sore ƴɛ̀rʋ a, tɩ tɩ nyɛ̃, ŋmɩŋmɩn n'a a ŋmɛ̃ a bɛ zie.»

³⁷A Banabasɩ tɩ bɔbr'a kɛ́ bɛ mɩ̀ tɛr a Zã, bɛ na bʋɔlɛ Markɩ a, cen nɩ.

³⁸Ɛcɛ a Pol bɛ tɩ bɔbr k'ʋʋ lɛb tɛr nɩr, na tɩ zawrɩ bɛ bɛr Pãfili ɛ́ bɛ pʋɔ a bɛ tome pʋɔ a, ʋ bɩɛl'ʋ ɛ.

³⁹Bɛ tɩ ŋmɛ n a nɔkpɛn faa faa tɩ bʋ́r'ɩ taa. A Banabasɩ tɩ tɛr'ɩ a Markɩ kpɛ n gbor cere Sɩɩpʋr.

⁴⁰A Pol ʋl tɩ tɛr'ɩ a Sɩlasɩ, ɛ́ a yɛbr na wa zɛlɩ a Sore maalʋ kʋ̀ ʋ baar'a, ʋ cen na.

⁴¹Ʋ tɩ cɔlɛ nɩ a Siiri nɩ a Silisi ten nyuwle a Lãw-yie naaŋmɩn-sàw-deb.