Read Dagara, Northern Nɩ-toni 17 Bible Online

Nɩ-toni 17 - Dagara, Northern bible

Nɩ-toni 17

¹Bɛ tɩ tu na yi Ãfipolisɩ nɩ Apoloni ɛ́ ta Tesalonikɩ. A Zifʋ mɩnɛ tɩ tɛr'ɩ puoru-dĩo a be.

²Mɛ̃ a lɛ ʋ na mɩ́ tu a kʋralɛ a, a Pol tɩ cen na tɩ páw bɛ hieri a ƴɛ̀rʋ kʋ̀ bɛ pɩ̃ɛnʋ bibie ata tu taa. A Sɛb-sõw ƴɛ̀r-bie n'a

³ʋ mɩ́ tɩ de manɛ nɩ kʋ̀rɛ bɛ, ɛ́ wule kɛ́ a tɩ fɛr'a kɛ́ a Kɩrɩta wõ tuo tɩ kpi, ɛ́ lɛb yi a kũu pʋɔ. Ʋ tɩ yere na: «A Kɩrɩta a, ʋlɛ n'ɩ a Yeezu ŋa ɩ̃ na hiere kʋ̀rɛ nyɩ a.»

⁴A Zifʋ bɛ mɩnɛ nɩ a Gɩrɛkɩ bɛl na tu a Naaŋmɩn puoru sɔ́r a, mɩ̀ na bɛ dɩ vuo a, lãwnɩ a tẽw pʋɔ pɔw-tɩbr tɩbr, tɩ sàw na de ɛ́ tu a Pol nɩ a Sɩlasɩ pùor.

⁵Ɛcɛ a Zifʋ mɩnɛ tɩ nyɛ̃ nɩ suur bɛ dɩ vuo ɩ. Bɛ tɩ bʋɔl'ɩ a nɩ-guuri na cɔlɛ gʋɔr a sɛ́ɛ pʋɔ a, ɓã taa ɩrɛ nɩ gɔmɛ damnɛ nɩ a nɩbɛ, tɩ dam'ɩ a tẽw nyaw taa. Bɛ tɩ ta n Zazɔ̃ yir sowre a Pol nɩ a Sɩlasɩ. Bɛ tɩ bɔbr'a kɛ́ bɛ́ nyɔw bɛ cen nɩ a zu-sɛbla niŋé.

⁶Bɛ na tɩ bɔ a Pol nɩ a Sɩlasɩ gù a, bɛ nyɔw nɩ a Zazɔ̃ nɩ a yɛbr bɛ mɩnɛ cen nɩ a tẽw ƴɛ̀r-dɩrbɛ zie, tɩ ŋmɩɛr cɛlsɩ yere nɩ: «A nɩbɛ bɛ ŋa na dam a tẽ-daa za a, ƴɛrɛŋa a, bɛ be n a ka.

⁷Zasɔ̃ de bɛ nɩ a ʋ yir. A bɛ kãw za ɩ-ɩrɩ bɛ tu a nɛ́ɛ a Ʋrɔm tẽw na-kpɛ̃ɛ na ƴãw a ɩ. Bɛ yere na kɛ́ nãà kãw mɩ̀ lɛb'a be be dɩ kɛ́ Yeezu.»

⁸A cɛlsɩ á ŋá tɩ dam'ɩ a zu-sɛbla nɩ a ƴɛ̀r-dɩrbɛ,

⁹bɛ fɛr ƴãw a Zasɔ̃ nɩ a ʋ taabɛ bin libie ɛ́ bɛ bãw bɛr bɛ.

¹⁰A zie na wa sɔb a, a yɛbr tɩ ƴãw nɩ a Pol nɩ a Sɩlasɩ lo Beere sɔ́r daadaalɛ. Bɛ na tɩ ta a Beere a, bɛ cen nɩ a Zifʋ mɩnɛ puoru-dĩó.

¹¹A Beere tẽw Zifʋ mɩnɛ tɩ bãw nɩ yã zuo a Tesalonikɩ Zifʋ mɩnɛ. Bɛ tɩ sàw na de a Naaŋmɩn ƴɛ̀rʋ nɩ pʋ-pla, ɛ́ bibie za, bɛ mɩ́ jɛlɛ nɩ a Sɛb-sõw ƴɛ̀r-bie kɛ́ bɛ nyɛ̃, lɛ n'a a yele sɩrɩ tu u.

¹²A bɛ yaga zie tɩ sàw na de a Yeezu yele, lãwnɩ Gɩrɛkɩ pɔw-tɩbr nɩ dɛbr yaga.

¹³Ɛcɛ, a Tesalonikɩ tẽw Zifʋ mɩnɛ na dɛ wa wone kɛ́ a Pol lɛb hiere nɩ a Naaŋmɩn ƴɛ̀rʋ a Beere a, bɛ ìr'a wa kɛ́ bɛ lɛb wa maal dam a nɩbɛ.

¹⁴Daadaalɛ, a yɛbr tɩ ƴãw nɩ a Pol de a kʋ̃ɔ-kpɛ̃ɛ sɔ́r, ɛ́ a Sɩlasɩ nɩ a Timote cãà be a Beere.

¹⁵A bɛl na tɩ bɩɛlɛ a Pol a, tɩ tɛr ʋ na tɩ ta n Atɛn ɛ́ lɛb wa, ɛ́ a Pol tõ bɛ kɛ́ bɛ tɩ yel a Sɩlasɩ nɩ a Timote, kɛ́ bɛ wa fɔ̃w wa páw ʋ a Atɛn.

¹⁶A Pol na tɩ be a Atɛn cɛlɛ a Sɩlasɩ nɩ a Timote a, a ʋ pʋɔ tɩ sãw na ʋ na tɩ nyɛ̃ a tɩbɛ paalɩ a Atɛn tẽw a ƴãw.

¹⁷Ʋ mɩ́ tɩ kpɛ n a puoru-dĩó tɩ ƴɛ̀rɛ nɩ a Zifʋ mɩnɛ, nɩ a bɛl na tu a Naaŋmɩn puoru sɔ́r a. Ɛ́ bibir za ʋ mɩ́ yi a nɩbɛ tuor-taa zie tɩ àr ƴɛ̀rɛ nɩ nɩr za ʋ na nyɛ̃ a.

¹⁸Yã-bãwnbɛ bɛ mɩnɛ kãw, bɛ na bʋɔlɛ Epikiir nɩbɛ[30] nɩ Sitoyisɩ̃ɛ mɩnɛ[31] a, mɩ̀ tɩ be n be ƴɛ̀rɛ nɩ a Pol. Bɛ mɩnɛ tɩ yere na: «Bʋ̃ʋ n'ʋ a gɔmɛ sob ŋa yere?» Ɛ́ bɛ mɩnɛ yere: «Ŋmɩn-sãanbɛ bɛ mɩnɛ kãw yele tɔ̃w n'a ʋ manɛ.» A Yeezu yele nɩ a kũu-pʋɔ-lɛb-yibu yele n'a a Pol tɩ hiere kʋ̀rɛ bɛ.

¹⁹Bɛ tɩ nyɔw ʋ na cen nɩ a Atɛn tẽw ƴɛ̀rʋ-dɩb-lãw nɩbɛ niŋé, bɛ na bʋɔlɛ kɛ́ Aaropaazɩ a, tɩ sowr'ʋ: «Tɩ na tʋ̃ɔ́ na bãw a wul-paala ŋa fʋ na wule a?

²⁰Fʋ kpole tɩ nɩ tobe nɩ yel-bõ-bome kãw, tɩ bɔbr'a kɛ́ tɩ bãw a pɛr.»

²¹A Atɛn tẽw dem za, nɩ a nɩ-sãanbɛ na kpɩɛr a Atɛn a, mɩ́ tɩ nɔnɛ nɩ a yel-paalɛ al na bɩɛrɩ yi a manʋ nɩ a bɛr-wob.

²²A Pol tɩ ìr'a àr a Aaropaazɩ nɩbɛ sɔgɔ ɛ́ yel: «Atɛn nɩbɛ ɛ, ɩ̃ nyɛ̃ nɩ a nyɩ yele za pʋɔ kɛ́ nyɩ puore na bɛ dɩ vuo ɩ.

²³Ɩ̃ na cɔlɛ a nyɩ sɛ́ɛ pʋɔ ɛ́ jɩ́rɛ a nyɩ ŋmɩmɛ maalʋ-ziir a, ɩ̃ wa tɩ nyɛ̃ nɩ bàwr-maal-kuur bɛ sɛb a ʋ zu: “Ŋmɩn tɩ na bɛ bãw a so ʋ.” A bom ʋl nyɩ na ƴãwnɛ à à ŋá ɛ́ bɛ bãw a, ʋlɛ n'ʋ ɩ̃ waar k'ɩ̃ɩ wa yel kʋ̀ nyɩ.

²⁴A Naaŋmɩn ʋl na ír a tẽ-daa nɩ a ʋ pʋɔ bome za a, a ʋl na ɩ a salom nɩ a tẽw Sore a, ʋ bɛ kpɩɛr nɩsaal nuru yir-mɩɛrɩ pʋɔ ɩ,

²⁵ɛ́ mɩ̀ bɛ tɛr nɩsaal nuru yel-ɩra a ʋ tome ƴãw, mɛ̃ ʋ tɛr'ɩ bom kãw yel-ɩra a ɩ, ʋl na kʋ̀rɛ a nɩbɛ za a nyɔ-vʋʋrʋ, a pɩɛlʋ nɩ a ŋmãa al za na cɛ a.

²⁶Nɩ-been yõ n'ʋ ʋ de maal'ɩ a nɩ-bʋʋrɛ za ƴãw bɛ kpɩɛr a tẽw za zu. Ʋ ƴãw nɩ daar kʋ̀ a nɩsaalbɛ, ɛ́ tʋ̃ɔ̀ a bɛ kpɛb zie tʋr-bɔwrɩ wul bɛ.

²⁷À ŋá n'a a Naaŋmɩn tu, kɛ́ bɛ bɔblɛ bɔbr'ɩ ʋ, a mɩnɛ kãw bɛ nãà wa nyɛ̃ ʋ na, ʋl na bɛ zãá nɩ tɩ kãw za a.

²⁸Ʋlɛ n'ʋ so tɩ ɩ nɩbɛ vʋʋrɛ ɛ́ damnɛ, ɛ́ be mɛ̃ a lɛ a nyɩ yã-bãwnbɛ bɛ mɩnɛ na yel a: “Tɩ ɩ n a ʋ bʋʋrɛ.”

²⁹A na ɩ lɛ tɩ ɩ a Naaŋmɩn bʋʋrɛ a, a bɛ tɛr sɔ́r kɛ́ tɩ tɩɛrɛ kɛ́ a naaŋmɩnʋ ŋmɛ̃ na taa nɩ salm-zɩɛ, salm-pla bɩɩ kʋsɛ-vla tɩɩb nɩsaal bãwfʋ nɩ a ʋ yã na maalɩ a ɩ.

³⁰Ɛcɛ a Naaŋmɩn vɩɛ nɩ a zɔnʋ daar yele á ŋá bɛr, ɛ́ pãa bʋɔlɛ a nɩsaalbɛ za a ziir za, kɛ́ bɛ za lɩɛbɩ a bɛ ɩb.

³¹Sɩza n'a, ʋ ƴãw nɩ bibir ʋ na na maal'ɩ a tẽ-daa ƴɛ̀rʋ na tu yel-mɩŋa a. Ʋ kaa na ír nɩr a ƴɛ̀rʋ-maalʋ ŋa ƴãw. À ŋá n'a ʋ tɩ ɩ a sãá a nɩbɛ za zie, a lɛn daar ʋ na tɩ ɩ a nɩr ŋa lɛb yi a kũuni pʋɔ a.»

³²Bɛ na tɩ wone a kũu-pʋɔ-lɛb-yibu ƴɛ̀r-bir wa báarɛ a, bɛ mɩnɛ tɩ ɩrɛ ʋ na laar, ɛ́ bɛ mɩnɛ yere: «A na ta ka a, bibir kãw n'a tɩ na lɛb bãw bɛr wõ a fʋ ƴɛ̀rʋ a yel ŋa ƴãw.»

³³À ŋá n'a a Pol tɩ bɛr bɛ ɛ́ cen.

³⁴Ɛcɛ bɛ mɩnɛ tɩ tu n a Pol, bɛ tɩ sàw na de a Yeezu yele. Deni, na ɩ a ƴɛ̀rʋ-dɩb-lãw nɩr kãw a, nɩ pɔw kãw na dɩ Damaarisɩ a, nɩ bɛ mɩnɛ kãw tɩ pʋɔ nɩ a bɛl na sàw de a pʋɔ.