Read Dagara, Northern Nɩ-toni 18 Bible Online

Nɩ-toni 18 - Dagara, Northern bible

Nɩ-toni 18

¹Al pùorí, a Pol tɩ yi n a Atɛn cen Korɛ̃tɩ.

²Ʋ tɩ páw nɩ Zifʋ nɩr kãw, na dɩ kɛ́ Akɩlasɩ a, a be. Pɔ̃ n'a a Akɩlasɩ tɩ yi. A Ɩtali n'a ʋlɛ nɩ a ʋ pɔw Pɩrɩsɩl tɩ yi wa ta paalʋ. Kuloor, na tɩ so a Ʋrɔm a, tɩ ƴãw nɩ nʋɔr kɛ́ a Zifʋ mɩnɛ za yi zaa a Ʋrɔm. A Pol tɩ cen na tɩ páw bɛ.

³Ʋlɛ nɩ a bɛl na tɩ lãw tõ-nʋɔr wóbr pɛnɛ-sɛwr a, ʋ tɩ be n a bɛ zie tone.

⁴Pɩ̃ɛnʋ-bibir za, ʋ mɩ́ tɩ de nɩ a ƴɛ̀rʋ a puoru-dĩó, ƴãw fãw kanɛ kɛ́ a Zifʋ nɩ a Gɩrɛkɩ mɩnɛ sàw de a Yeezu yele.

⁵Ɛcɛ a Sɩlasɩ nɩ a Timote na tɩ yi a Masedʋan wa ta a, a Pol tɩ bɛr'ɩ bom za, ɛ́ tu a Yel-nʋ̃ɔ̀ hieru tɛwr pùor. Ʋ mɩ́ tɩ wul'a a sãá a Zifʋ mɩnɛ zie, kɛ́ a Yeezu n'ɩ a Kɩrɩta.

⁶Ɛcɛ bɛ na tɩ zawrɩ a sàw-deb ɛ́ tʋʋr a Pol a, ʋ tɩ pĩ n a ʋ bʋ̃-suuri uuru ƴãw bɛ ɛ́ yel: «Nyɩmɛ wa bɔr a, a bɛ yi mãa zie ɩ! Ɩ̃ zaa n'ɩ ŋa! Dɩ̃a na ta a, a nɩ-bʋʋr-yoru zie n'a ɩ̃ na cen.»

⁷Ʋ tɩ yi n a be ɛ́ cen dɔɔ kãw na dɩ kɛ́ Tisiyusɩ Zitisɩ a yir. A dɔɔ ŋa tɩ ƴãwnɛ nɩ a Naaŋmɩn. A ʋ yir tɩ gbab'ɩ a puoru-dĩo.

⁸Kɩrɩsɩpɩsɩ, na tɩ ɩ a puoru-dĩo nɩ-kpɛ̃ɛ a, tɩ sàw na de a Sore, ʋlɛ nɩ a ʋ yir dem za. A Korɛ̃tɩ tẽw nɩbɛ yaga, na tɩ bɛr wõ a Pol ƴɛ̀rʋ a, tɩ lɩɛb'ɩ a bɛ ɩb ɛ́ sàw de a Sore, ɛ́ bɛ kʋ̀ bɛ a suob.

⁹Tɩ̃ɩsɔw kãw, a Pol tɩ nyɛ̃ nɩ a Sore ʋ yel ʋ: «Ta zɔrɛ dɛ̃bɩ̃ɛ ɩ, cãà ƴɛ̀rɛ, taa bɛrɛ ɩ.

¹⁰Ɩ̃ sɩrɩ na be a fʋ zie. Lɛ so, nɩr za bɛ íre nũu tʋɔr'ɩ fʋ k'ʋʋ dɔwrɩ fʋ ɛ. Bʋ̃ʋ n'ʋ vɛ̃, ɩ̃ tɛr'ɩ nɩbɛ yaga a tẽ-kpɛ̃ɛ ŋa pʋɔ.»

¹¹A Pol tɩ kpɛ n a be yũon-ɓil nɩ cuwr ayʋɔb, wule bɛ a Naaŋmɩn ƴɛ̀rʋ.

¹²A lɛn daar a Galɩɔ̃ na tɩ ɩ a Akayi tẽw kaarɛ a, a Zifʋ mɩnɛ za tɩ wa ìr'ɩ a Pol ƴãw, nyɔw ʋ cen nɩ ƴɛ̀rʋ-maalʋ zie.

¹³Bɛ tɩ ta na manɛ a ʋ sãwna yere nɩ: «Naaŋmɩn puoru na bɛ tu sɔ́r a pʋɔ n'a a nɩr ŋa tawr a nɩbɛ ƴãwn.»

¹⁴A Pol tɩ maal'a k'ʋʋ háa a nʋɔr, a Galɩɔ̃ ŋmãa de a ƴɛ̀rʋ sɔw yel a Zifʋ mɩnɛ: «Zifʋ mɩnɛ ɛ, alɛ tɩ kaar mɛ̃ ʋ kʋ n nɩr bɩɩ ʋ sãw nɩ nɔ-kpɛ̃ɛ kãw a, a nãá tɛr'ɩ sɔ́r k'ɩ̃ɩ bɛr wõ a nyɩ dem.

¹⁵Ɛcɛ a na ɩ nɔkpɛn na càarɩ ƴɛ̀r-bie, nɩ yée, nɩ a nyɩ wulu a, mãa bɛ bɔbr k'ɩ̃ɩ dɩ a yele á ŋá taabɛ ƴɛ̀rʋ ɛ.»

¹⁶Ɛ́ tɩ diw bɛ bɛr a ƴɛ̀rʋ-maalʋ zie be.

¹⁷Lɛ n'a bɛ za tɩ lɩɛb lo a Sɔsɩtɛn zu, nyɔw ʋ ŋmɩɛr a ƴɛ̀rʋ-dɩb zie be. Ʋlɛ tɩ n'ɩ a puoru-dĩo nɩ-kpɛ̃ɛ. Ɛcɛ a bɛ tɩ ɩrɛ a Galɩɔ̃ bom za ɩ.

¹⁸A Pol tɩ cãà na kpɛ a Korɛ̃tɩ kɔwrɩ. Al pùorí, ʋ tɩ bɛr'ɩ a yɛbr ɛ́ kpɛ gbor, ʋlɛ nɩ a Pɩrɩsɩl nɩ a Akɩlasɩ, cere a Siiri. A Pol tɩ ƴãw na bɛ fɔr ʋ zu Sãkire, nʋɔr kãw ʋ na tɩ kõ a zũú.

¹⁹Bɛ na tɩ ta Efɛɛzɩ a, a Pol bɛr'ɩ a Akɩlasɩ mɩnɛ ɛ́ tɔl kpɛ a Zifʋ mɩnɛ puoru-dĩó tɩ ƴɛ̀r'ɩ a Zifʋ mɩnɛ.

²⁰Bɛ tɩ zɛlɛ na kɛ́ a Pol kpɛ a be kɔwrɩ. Ɛcɛ a Pol tɩ zawr'a,

²¹ɛ́ yel bɛ: «Naaŋmɩn wa sàw a, ɩ̃ na lɛb'a wa a nyɩ zie nɩdaar kãw.» Al pùorí, ʋ tɩ bɛr'ɩ a be ɛ́ kpɛ a gbor a Efɛɛzɩ

²²tɩ siw a Sezaare, tɔl do tɩ puori a Zerizalɛm Lãw-yir, ɛ́ siw a Ãtɩɔsɩ.

²³Ʋ tɩ kpɛ n a be kɔwrɩ blã. Al pùorí, ʋ tɩ yi na cɔlɩ Galasi tẽw vuo, ɛ́ cɔlɩ a Firizi, nyuwle a Yeezu po-tuurbɛ za naaŋmɩn-sàwfʋ.

²⁴Zifʋ kãw, na dɩ Apɔlɔsɩ ɛ́ yi Alɛsãdiri a, tɩ wa ta n a Efɛɛzɩ. Ʋ tɩ bãw nɩ ƴɛ̀rʋ vla vla, ɛ́ bãw a Sɛb-sõw bɛ dɩ vuo ɩ.

²⁵Ʋ tɩ bãw nɩ a Sore sɔ́r yele ɛ́ tʋlɛ a ƴãw, hiere wule a nɩbɛ a Yeezu yele. A ʋ wulu tɩ tori na, ɛcɛ, a Zã suob yõ n'ʋ ʋ tɩ bãw.

²⁶Lɛ n'a ʋ tɩ ɓãá ƴãw hiere a Yeezu yele a Zifʋ mɩnɛ puoru-dĩó. Ɛcɛ a Pɩrɩsɩl nɩ a Akɩlasɩ na wa bɛr wõ a ʋ ƴɛ̀rʋ a, bɛ tɛr ʋ nɩ bɛ tɛwr zie tɩ manɩ kʋ̀ ʋ a lɛ a Naaŋmɩn sɔ́r yele na sɩrɩ tu a.

²⁷A Apɔlɔsɩ na tɩ bɔbr k'ʋʋ cen a Akayi a, a yɛbr tɩ sàw na kʋ̀ ʋ, ɛ́ maalɩ sɛbɛ yel kʋ̀ a be dem Yeezu po-tuurbɛ, kɛ́ bɛ tɛr ʋ a sãanʋ vla. Ʋ na tɩ ta a be a, a bɛlɩ dem na tɩ sàw de a Yeezu yele a Naaŋmɩn maalʋ zũú a, ʋ sõw bɛ nɩ yaga za.

²⁸Lɛ n'a ʋ mɩ́ tɩ ƴɛ̀r tʋ̃ɔ́ a Zifʋ mɩnɛ a nɩ-yaga pʋɔ. A Sɛb-son n'a ʋ mɩ́ tɩ de wul'ɩ bɛ kɛ́ a Yeezu n'ɩ a Kɩrɩta.