Read Dagara, Northern Nɩ-toni 20 Bible Online

Nɩ-toni 20 - Dagara, Northern bible

Nɩ-toni 20

¹A damnʋ na wa baar'a, a Pol bʋɔl'ɩ a po-tuurbɛ ɓã taa ɛ́ yel bɛ kɛ́ bɛ cãà ƴãw fãw a naaŋmɩn-sàw-deb pʋɔ. Ʋ na tɩ ƴɛ̀r à ŋá baar'a, ʋ puori bɛ na ɛ́ yi lo a Masedʋan sɔ́r.

²Ʋ tɩ tu na tɔl a tẽw vuo ʋl pʋɔ, kpaalɩ a po-tuurbɛ gb'aa yaga za kɛ́ bɛ ƴãw fãw a naaŋmɩn-sàw-deb ƴãw. Al pùorí, ʋ tɩ cen nɩ Gɩrɛsɩ

³tɩ kpɛ cuwr ata. Ʋ tɩ cɔbrɩ na k'ʋʋ de a gbor cen Siiri, ɛ́ wa wõ kɛ́ Zifʋ mɩnɛ bʋ̀rɛ nɩ taa a ʋ kʋb ƴãw, lɛ so ʋ tɩ yel k'ʋʋ na tu n a Masedʋan sɔ́r.

⁴Piirisi bidɛb Sopatʋrɔsɩ na yi Beere a, nɩ Tesalonikɩ tẽw Arɩsɩtakɩ nɩ Sekũdisi nɛbɛ tɩ bɩɛlɛ ʋ, bɛlɛ nɩ Dɛrbe tẽw Gayisɩ nɩ Timote, lãwnɩ Azi tẽw Tɩsɩkɩ nɩ Torofim.

⁵A nɩbɛ bɛ ŋa tɩ de nɩ niwn tɩ ta a Tʋrʋwasɩ cɛlɛ tɩ.

⁶A tɩɩm a, a dipɛ̃ na bɛ ƴãw dãbɩl a cuw bibie na wa tɔl baar'a, tɩ tɩ yi n a Filib cen tɩ kpɛ a gbor cere kɛ́ tɩ tɩ páw bɛ. Bibie anũu pùorí n'a tɩ wa tɩ páw bɛ a Tʋrʋwasɩ, tɛw maalɩ kɔsɩɛr-ɓil.

⁷A kɔsɩɛra zãa daarɩ́ zaanʋɔra, tɩ tɩ ɓã n taa kɛ́ tɩ ŋma a dipɛ̃ põ. A Pol tɩ yire nɩ a bio daarɩ́, lɛ so ʋ tɩ nyɔw nɩ a yɛbr a ƴɛ̀rʋ lɛɛɛ tɩ ta n tɩ̃ɩsɔw põ-zɛ̃-taa.

⁸Kanɩ̃a vũuni tɩ ʋr'ɩ a bɔwpɩɛ ʋl pʋɔ tɩ na tɩ ɓã taa a.

⁹Pɔlbile kãw, na dɩ Etikɩ a, tɩ zɩ̃ n a tokoro nʋɔr. A Pol na tɩ ƴɛ̀rɛ bɛ tɛr ŋmãafʋ daar a, gʋ̃ɔ tɩ nyɔw nɩ a pɔlbile ʋl ʋ gúr gbʋlfʋlʋ. Ʋ wa tɩ yi n a bɔwpɩ-suwle ata sob pʋɔ 'law tɩ lo a dapùorí. Bɛ na tɩ bɔbr kɛ́ bɛ nyɔw ʋ ʋ ìr a, bɛ tɩ nyɛ̃ na ʋ kpi.

¹⁰Lɛ n'a a Pol tɩ siw tɩ gũu ɓáw ʋ a ʋ nuru pʋɔ ɛ́ yel: «Nyɩ bɛr dɛ̃bɩ̃ɛ, ʋ vʋʋrɛ na.»

¹¹Ʋ na wa lɛb do a, a Pol ŋma n a dipɛ̃ ír 'wɔb, ɛ́ cãà cow a ʋ ƴɛ̀rʋ tɩ vɩɛ nɩ a zie, ɛ́ pãa yi lo a sɔ́r cere.

¹²A pɔlbile ʋl a, ʋ tɩ vʋʋrɛ na bɛ tɛr kul'ɩ. A tɩ ɓãá bɛ nɩ ƴãw bɛ za.

¹³Tɩ tɩ kpɛ n gbor-kpɛ̃ɛ kãw de niwn cere Asɔsɩ. Be n'a a tɩ sɛw kɛ́ tɩ de a Pol, na tɩ yel kɛ́ ʋl na tu n a sɔ́r cen a.

¹⁴Ʋ na wa páw tɩ a Asɔsɩ a, tɩ de ʋ nɩ a tɩ gbor pʋɔ tɩ cere Mɩtɩlɛn.

¹⁵Tɩ tɩ ìr'ɩ a be cãà cow a tɩ sɔ́r, tɩ ta Kio a bio daarɩ́. A deyere daarɩ́ tɩ ta Samɔsɩ. A dɛtɛrɛ bibir, tɩ tɩ ta n a Mɩlɛ.

¹⁶A Pol tɩ dɛ n a Efɛɛzɩ bɛr, kɛ́ tɩ ta kɔwrɩ zawlalɛ a Azi ɛ. Ʋ tɩ páwr'a, bɔbr kɛ́ alɛ wa tʋ̃ɔ́ a, ʋ̃ʋ ta a Zerizalɛm a Pãtɩkɔtɩ cuw bibir.

¹⁷A Mɩlɛ n'a a Pol tɩ be, ɛ́ tõ bʋɔlɩ a Efɛɛzɩ Lãw-yir nɩ-kore.

¹⁸Bɛ na tɩ wa páw ʋ a, ʋ yel bɛ na: «A ʋlɩ bibir ɩ̃ na nɛ̃ gbɛ́r a Azi wa tɔ dɩ̃a a, nyɩ bãw nɩ lɛ ɩ̃ na ɩ a nyɩ zie kʋralɛ a.

¹⁹Ɩ̃ siwr'ɩ ɩ̃ tʋɔra tõ n a Sore tome nɩ kòn nɩ kpɩɛrʋ, a Zifʋ mɩnɛ na tɩ mɩ́ bʋ taa a ɩ̃ kʋb ƴãw a zũú.

²⁰Bom nɛ za a na sɛw kɛ́ nyɩ bãw a, ɩ̃ bɛ sɔwl'ʋ a nyɩ zie ɩ. Ɩ̃ nɩ̃ɛ na kanɩ nɩ nyɩ, ɩ̃ wul nyɩ nɩ a nɩbɛ pʋɔ bɩɩ a nyɩ tɛwr zie.

²¹A dãsɩɛ ɩ̃ na dɩ a, tɩ bɔbr'a kɛ́ a Zifʋ mɩnɛ nɩ a Gɩrɛkɩ mɩnɛ lɛb wa a Naaŋmɩn zie, kɛ́ bɛ sàw de a tɩ Sore Yeezu.

²²Ƴɛrɛŋa a, mãa n'ɩ ŋan lo a Zerizalɛm sɔ́r, mɛ̃ a lɛ a Vʋʋrʋ Sõw na fɛrɛ mɛ̃ k'ɩ̃ɩ ɩ a, ɛ́ bɛ bãw ʋlɩ bom nɛ na gùre mɛ̃ a be a ɩ.

²³Ɛcɛ alɛ saa ŋmɛ̃ ŋmɩŋmɩn za a, tẽw za pʋɔ ɩ̃ na tuur tɔlɛ a, a Vʋʋrʋ Sõw yere na kʋ̀rɛ mɛ̃, kɛ́ bamɛ nɩ kpɩɛrʋ n'a gùre mɛ̃.

²⁴Mãa zie a, a ɩ̃ nyɔ-vʋʋrʋ bɛ ɩ bʋ̃-sɩza kãw ɛ. Bom nɛ ɩ̃ na bɔbr tuo tuo a, ʋlɛ n'ɩ k'ɩ̃ɩ tʋ̃ɔ́ tõ a ɩ̃ tõ-nʋɔr tɩ ɓɩɩlɩ, lãwnɩ a ton a Sore Yeezu na kʋ̀ m a: a Naaŋmɩn maalʋ Yel-nʋ̃ɔ̀ hieru.»

²⁵«Dɩ̃a na ta a, ɩ̃ bãwnɩ a na, nyɩɩm za sɔgɔ ɩ̃ na tu yi hieri a Naaŋmɩn Naalʋ dɩb a, nyɩ kʋ̃ lɛb nyɛ̃ a ɩ̃ niwn ɛ.

²⁶Lɛ so ɩ̃ yere kʋ̀rɛ nyɩ za a dɩ̃a, nyɩ kãw za wa bɔr a, a bɛ yi mãa zie ɩ.

²⁷A lɛ a Naaŋmɩn na cɔbrɩ a yele bin a, ɩ̃ manɩ nɩ a za kʋ̀ nyɩ, ɩ̃ bɛ sɔwlɩ bom za a nyɩ zie ɩ.

²⁸Nyɩ kaarɛ nyɩ tʋɔra zie vla lãwnɩ a Naaŋmɩn Lãw-yir, a Vʋʋrʋ Sõw na ƴãw kɛ́ nyɩ gùre a. Nyɩ kaarɛ a Naaŋmɩn Lãw-yir zie vla. A ʋ zɩ̃ɩ tɔr za n'a ʋ páw nɩ a Lãw-yir ŋa.

²⁹Ɩ̃ bãwnɩ a na, mãa wa cen baar'a, nɩbɛ na ɩ mɛ̃ wɛ-bà-faar a, na kpɛ n a nyɩ pʋɔ bɛ bɛrɛ a zaw dʋn ɛ.

³⁰Mɔ̃ mɩ̀, zir-ŋmarbɛ na yi n a nyɩ pʋɔ bɛ̀lɩ a po-tuurbɛ bɛ tu a bɛ pùor.

³¹Lɛ so, nyɩ cɛlɛ vla ɛ́ lɛb tɩɛrɩ bãwnɩ a kɛ́ yome ata za, mʋ̃tɔ̃w nɩ tɩ̃ɩsɔw za, ɩ̃ mɩ́ tɩ kpaalɛ nɩ a nyɩ za been been tɩ lãwnɩ kòn.

³²Ƴɛrɛŋa a, ɩ̃ dier nyɩ na kʋ̀rɛ a Naaŋmɩn, ɛ́ dier nyɩ kʋ̀rɛ a Naaŋmɩn ƴɛ̀rʋ na tɩrɛ maalʋ a. A Naaŋmɩn tɛr'ɩ fãw na tʋ̃ɔ́ mɛ a yir, ɛ́ ɩ a bɛlɩ dem za na ɩ nɩ-son a bɛ páw a gbã-dɩ-bom.

³³Ɩ̃ bɛ tɩ bɔbr nɩsaalɛ kãw za libir, bɩɩ a ʋ salm-zɩɛ, bɩɩ a ʋ pɛnɛ ɩ.

³⁴Nyɩ mɩŋa za bãwnɩ a na, a ɩ̃ nuru tome pʋɔ n'a ɩ̃ páw mãa nɩ a ɩ̃ taabɛ bʋ̃-bɔbrɩ.

³⁵Kʋralɛ, ɩ̃ wul nyɩ na kɛ́ nyɩmɛ wa hanɛ à ŋá a, lɛ n'a nyɩ na tʋ̃ɔ́ sõw a bãbàalbɛ, cãà tɩɛrɛ nɩ a ƴɛ̀r-bie á ŋá a Sore Yeezu mɩŋa na tɩ yel a: “A bom tɩrʋ waar'ɩ nɩ nʋ̃ɔ̀ zuo a bom páwfʋ.”»

³⁶A Pol na wa ƴɛ̀r à à ŋá baar'a, ʋ gbĩ n dume, ʋlɛ nɩ a bɛl za, ɛ́ puori.

³⁷Lɛ n'a bɛ za tɩ nyɔw kon, ɛ́ ƴawr nyɔwr a Pol were kɛ́ bɛ puor'ʋ.

³⁸A Pol na tɩ yel kɛ́ bɛ kʋ̃ lɛb nyɛ̃ a ʋ niwn a, alɛ n'a baa so a pʋ-sãwna na tɩ tɛr bɛ a. Al pùorí bɛ tɩ bɩɛl'ʋ na cen nɩ a ʋ gbor pɛr.