Read Dagara, Northern Nɩ-toni 22 Bible Online

Nɩ-toni 22 - Dagara, Northern bible

Nɩ-toni 22

¹«Ɩ̃ yɛbr nɩ ɩ̃ sãà mɩnɛ ɛ, nyɩ pãa wõ a ƴɛ̀rʋ ɩ̃ na tɛr a nyɩ zie, k'ɩ̃ɩ ƴɛ̀r faa ɩ̃ tʋɔra a.»

²Bɛ na tɩ wõ a Pol ƴɛ̀rɛ a bɛ zie a arameyɛ̃ kɔkɔr pʋɔ a, bɛ tɩ lɛb'a bãw nyɔw bɛ tʋɔra ɛ́ ŋma vʋʋrɛ. Lɛ n'a a Pol tɩ yel:

³«Zifʋ nɛ m, Tarsɩ na be Silisi a n'a ɩ̃ dɔw. Ɛcɛ a Zerizalɛm ka n'a ɩ̃ baa, Gamaliyɛl pile n'a ɩ̃ zànɩ a yele na càarɩ a tɩ sãàkʋm-kore Naaŋmɩn wulu a. Mɛ̃ a nyɩɩm za a dɩ̃a a, ɩ̃ mɩ̀ bɛ tɩ sàwr a Naaŋmɩn yele ƴãw ɛ.

⁴A bɛlɩ dem na tuur a sɔ́r ŋa a, ɩ̃ mɩ́ tɩ dɔwrɩ bɛ na tɩ kʋ. Ɩ̃ nyɔw nɩ dɛbr nɩ pɔwbɛ 'lẽ lɔb ƴãw gaso pʋɔ.

⁵A bàwr-maal-kara nɩ a nɩ-kore lãw nɩbɛ za na tʋ̃ɔ́ na dɩ a yele á ŋá dãsɩɛ. Bɛlɛ nɛbɛ tɩ kʋ̀ m sɛb-tʋɔlɩ a tɩ yɛbr ƴãw, a lɛn daar ɩ̃ na tɩ cen a Damasɩ, ɛ́ bɛ tõ m k'ɩ̃ɩ tɩ nyɔw a bɛl na be a be a, 'lẽ wa n a Zerizalɛm bɛ wa ƴãw bɛ dɔwrʋ a.»

⁶«Lɛ n'a ɩ̃ tɩ lo a sɔ́r cere tɩ pɩɛlɛ a Damasɩ. A tɩ man nɩ gbãgbãw daar, wa bere cãà-kpɛ̃ɛ kãw yi a salom zu wa pili pàw mɛ̃.

⁷Ɩ̃ tɩ lo na gã tẽw ɛ́ wõ kɔkɔr ʋ sowre mɛ̃: “Sol i, Sol i, bʋ̃ʋ ƴãw n'a fʋ dɔwrɛ mɛ̃?”

⁸Ɩ̃ tɩ sɔw na yel: “Ãa nɛ b, Sore e?” A kɔkɔr tɩ lɛb'a yel mɛ̃: “Nazarɛtɩ Yeezu nɛ m, mãa n'ʋ fʋ dɔwrɛ.”

⁹A ɩ̃ taabɛ tɩ nyɛ̃ nɩ a cãà, ɛcɛ bɛ bɛ tɩ wone a kɔkɔr na ƴɛ̀rɛ a ɩ̃ zie a ɩ.

¹⁰Lɛ n'a ɩ̃ tɩ lɛb sowri: “Bʋ̃ʋ n'ʋ a fɛr k'ɩ̃ɩ ɩ, Sore e?” A Sore tɩ sɔw na yel mɛ̃: “Ìr cen a Damasɩ, bɛ na tɩ yel'a kʋ̀ b a be a alɩ bome nɛ za a Naaŋmɩn na yel kɛ́ fʋ ɩ a.”

¹¹A cãà-kpɛ̃ɛ tɩ del'ɩ a ɩ̃ mimie ɩ̃ bɛ nyɛrɛ ɩ. A ɩ̃ sɔ́r lãw-cenbɛ tɩ nyɔw mɛ̃ nɩ nũú taw cen nɩ a Damasɩ.»

¹²«Dɔɔ kãw tɩ be n be dɩ Ananɩasɩ. Ʋ tɩ nɔnɛ nɩ puoru ɛ́ tuur a Naaŋmɩn wulu vla. A Zifʋ mɩnɛ za na tɩ kpɩɛr a be a tɩ nɔnɛ nɩ a ʋ yele.

¹³Ʋ tɩ wa na wa páw mɛ̃ yel: “Ɩ̃ yɛb Sol i, lɛb nyɛrɛ!” Daadaalɛ ɩ̃ tɩ lɛb'a nyɛrɛ, nyɛ̃ ʋ.

¹⁴A lɛ n'a ʋ tɩ yel mɛ̃: “A tɩ sãàkʋm-kore Naaŋmɩn tɩ dãw na bãwnɩ fʋ kaa ír, kɛ́ fʋ wa bãw a ʋ pʋ-tɩɛrʋ, kɛ́ fʋ wa bãw a nɩ-mɩŋa ɛ́ wõ a ʋ tɔr za kɔkɔr.

¹⁵A fɛr'a kɛ́ fʋ dɩ a ʋ dãsɩɛ a nɩsaalbɛ za niŋé, a yele á ŋá fʋ na nyɛ̃ ɛ́ wõ a ƴãw.

¹⁶A na ɩ à ŋá a, bʋ̃ʋ ƴãw n'a fʋ pãa na lɛb bʋ́nɛ a? Ìr de a suob bʋɔlɩ a ʋ yúor a fʋ yel-bebe pɛwfʋ ƴãw.”»

¹⁷«Ɩ̃ na tɩ lɛb wa a Zerizalɛm a, ɩ̃ wa yi n bibir kãw kpɛ a Ŋmɩn-yir-kpɛ̃ɛ pʋɔ tɩ be be puore wa nyɛ̃ bʋ̃-nyɛra.

¹⁸Lɛ n'a ɩ̃ tɩ nyɛ̃ a Sore ʋ tɩ yere kʋ̀rɛ mɛ̃: “Yi zaa fɔ̃wlɛ a Zerizalɛm tẽw pʋɔ. A ka a, bɛ kʋ̃ sàw de a ɩ̃ dãsɩɛ fʋ na na dɩ a ɩ.”

¹⁹Ɩ̃ tɩ sɔw na yel ʋ: “Sore e, bɛ bãwnɩ a na mãa na n'ʋ mɩ́ tɩ cen a puoru-dirú, tɩ ƴãw bɛ nyɔw a bɛlɩ dem na sàw de b'a, lɔb ƴãw gaso pʋɔ ɛ́ fɔb a.

²⁰Ɛ́ lɛb waar, a lɛn daar bɛ na tɩ kʋrɛ a fʋ dãsɩ-dɩrɛ Ɩtɩɛn a, ɩ̃ tɩ be n be, ɩ̃ tɩ sàw na kɛ́ bɛ kʋ ʋ. Mãa n'ʋ tɩ àr gù a bɛ bʋ̃-suuri.”

²¹Ɛcɛ ʋ tɩ yel mɛ̃ na: “Cere, zi-zãána nɩ-bʋʋr-yoru zie n'a mãa na tõ fʋ.”»

²²A Zifʋ mɩnɛ na tɩ bɛr wõ a Pol ƴɛ̀rʋ wa tɩ ta a ƴɛ̀r-bie á ŋá a, bɛ tɩ ŋmɩɛr'ɩ cɛlsɩ yere nɩ: «Nyɩ ɩ a nɩr ŋa tɔ ta cãà a tẽw zu ɛ! A bɛ sɛw k'ʋʋ cãà vʋʋrɛ ɩ!»

²³Bɛ tɩ ŋmɛrɛ nɩ kɔkɛɛ, yaarɛ nɩ a bɛ kpar-bɛrɛ, ɛ́ 'wɔ̃wnɛ tanɛ lɔbr saa-zu a ɩrɛ uuru.

²⁴A lɛ n'a a sojarɩ túr (1 000) nɩ-kpɛ̃ɛ tɩ ƴãw kɛ́ bɛ tɛr a Pol kpɛ n a sojarɩ yir tɩ ƴãw ʋ fʋba, sowri bãw bʋ̃ʋ n'ʋ so a gɔmɛ á ŋá a ʋ ƴãw.

²⁵Bɛ tɩ nyɔw nɩ a Pol 'lẽ kɛ́ bɛ fɔb. Lɛ n'a ʋ tɩ sowri a sojarɩ kʋba (100) nɩ-kpɛ̃ɛ ʋl na tɩ àr a be a: «Ʋrɔm tẽ-bie bɛ na bɛ maal'ɩ ƴɛ̀rʋ a, nyɩ tɛr'ɩ sɔ́r kɛ́ nyɩ fɔb ʋ bɩɩ?»

²⁶A sojarɩ kʋba nɩ-kpɛ̃ɛ na wa wõ à à ŋá a, ʋ cen na tɩ yel a sojarɩ tur nɩ-kpɛ̃ɛ: «Alɛ! bʋ̃ʋ n'ʋ fʋ tɩ bɔbr kɛ́ fʋ ɩ a? A nɩr ŋa ɩ n Ʋrɔm tẽ-bie dɛ!»

²⁷Lɛ n'a a sojarɩ túr (1 000) nɩ-kpɛ̃ɛ tɩ lɛb wa wa sowri a Pol: «Yel ɩ̃ nyɛ̃, Ʋrɔm tẽ-bie sɩrɩ nɛ b ɩ?» A Pol tɩ sɔw na kɛ́ ʋ̃ʋ.

²⁸A sojarɩ túr (1 000) nɩ-kpɛ̃ɛ tɩ lɛb'a yel: «Mãa a, libi-tɩbrʋ n'ʋ ɩ̃ ya tʋ̃ɔ́ ɩ a Ʋrɔm tẽ-bie.» Lɛ n'a a Pol tɩ yel ʋ: «Ɛ́ mãa, ɩ̃ lãw na dɔw nɩ.»

²⁹A bɛl na tɩ cɔbr'ɩ kɛ́ bɛ ƴãw ʋ a fʋba sowri ʋ a, tɩ bɛr ʋ nɩ daadaalɛ. A sojarɩ túr (1 000) nɩ-kpɛ̃ɛ na wa bãw kɛ́ Ʋrɔm tẽ-bie n'ʋ ʋ ƴãw bamɛ a, dɛ̃bɩ̃ɛ nyɔw ʋ na.

³⁰A sojarɩ túr (1 000) nɩ-kpɛ̃ɛ tɩ bɔbr'a k'ʋʋ sɩrɩ bãw a sãwna nɛ a Zifʋ mɩnɛ na tɩ ŋmaarɛ ƴãwn a Pol a. Alɛ so a bio daarɩ́ ʋ tɩ cɛ̀r a ʋ bamɛ bɛr, ɛ́ bʋɔlɩ a bàwr-maal-nɩ-bɛrɛ nɩ a Zifʋ mɩnɛ ƴɛ̀rʋ-dɩb-lãw nɩbɛ za. Ʋ tɩ ƴãw nɩ a Pol siw a bɛ zie kɛ́ bɛ tɩ maalɩ a ƴɛ̀rʋ.