Read Dagara, Northern Nɩ-toni 24 Bible Online

Nɩ-toni 24 - Dagara, Northern bible

Nɩ-toni 24

¹Bibie anũu pùorí, a bàwr-maal-kara Ananɩasɩ tɩ tɛr'ɩ nɩ-kore bɛ mɩnɛ, nɩ dɔɔ kãw na dɩ Tɛrtilisɩ a, siw nɩ a Ʋrɔm tẽw na-kpɛ̃ɛ-lɩɛrɛ zie kɛ́ bɛ tɩ manɩ a Pol sãwna. A Tɛrtilisɩ tɩ ɩ n ƴɛ̀rʋ-maalʋ zie ƴɛ̀r-bãw-ƴɛ̀rɛ na mɩ́ ƴɛ̀r kpɛ nɩr bɩɩ ƴɛ̀r wul nɩr sãwna a.

²Bɛ tɩ bʋɔl'ɩ a Pol ʋ wa. A Tɛrtilisɩ tɩ tĩ na manɛ a Pol sãwna yere: «Felisɩ i, a ƴã-ɓaarʋ za tɩ na tɛr a, fʋ̃ʋ zie n'a a yi, ɛ́ mɩ̀ yi a yele fʋ na bãw vla kaa a tẽw ŋa lɩɛbɩ a.

³Kʋralɛ nɩ ziir za, tɩ puore fʋ nɩ yaga za a yel-vɩɛlɩ á ŋá ƴãw.

⁴Ɩ̃ bɛ bɔbr k'ɩ̃ɩ bàlɛ fʋ ɛ. Lɛ so ɩ̃ na ƴɛ̀r ŋmãalɛ, ɛ́ zɛlɛ kɛ́ fʋ sàw ƴãw tobr vla bɛr wõ a tɩ ƴɛ̀rʋ.

⁵Tɩ nyɛ̃ na kɛ́ a dɛb ŋa ɩ n zi-sãwnɛ mɩŋa: ʋ na ɩ a Nazarɛtɩ tẽw nɩbɛ lãw nɩ-kpɛ̃ɛ[34] a, ʋ ƴãwnɛ nɩ damnʋ a Zifʋ mɩnɛ za sɔgɔ a tẽ-daa za zu.

⁶Ʋ wa ìr'a bɔbr k'ʋʋ dɛw a tɩ Ŋmɩn-yir-kpɛ̃ɛ. Lɛ n'a tɩ nyɔw ʋ. [Tɩ tɩ bɔbr'a kɛ́ tɩ maal'ɩ ʋ a ƴɛ̀rʋ mɛ̃ a lɛ a tɩ Naaŋmɩn wulu na bin a.

⁷Ɛcɛ a sojarɩ túr (1 000) nɩ-kpɛ̃ɛ Lɩzɩasɩ wa na wa faa ʋ nɩ fãw a tɩ nuru pʋɔ,

⁸ɛ́ yel kɛ́ a bɛlɩ dem na tɛr'ɩ a nɩr ŋa ƴɛ̀rʋ a, kɛ́ bɛ wa a fʋ zie.] Fʋ̃ʋ mɩŋa wa sowr'ʋ a, fʋ na nyɛ̃ na kɛ́ a ʋ sãwna al za tɩ na manɛ a ɩ n yel-mɩŋa.»

⁹A Zifʋ mɩnɛ tɩ sàw na de a sãwna manʋ ŋa, ɛ́ yel ƴãw pʋɔ kɛ́ à ŋá n'a a yele sɩrɩ tu.

¹⁰A Ʋrɔm tẽw na-kpɛ̃ɛ-lɩɛrɛ na tɩ kabrɩ yel a Pol k'ʋʋ de a ƴɛ̀rʋ a, a Pol tɩ yel'a: «Ɩ̃ bãwnɩ a na, a yome yãwmɛ na fʋ na ɩ a ƴɛ̀r-maalɛ a tɩ tẽw ƴãw a, lɛ so, ɩ̃ na bɛr'ɩ tɩɛrʋ ɛ́ ƴɛ̀r wul a ɩ̃ yel-mɩŋa a fʋ niŋé.

¹¹A bɛ zuo bibie pie nɩ ayi ɛ, ɩ̃ na do a Zerizalɛm k'ɩ̃ɩ tɩ puor'a, fʋ̃ʋ mɩŋa na tʋ̃ɔ́ na sowri bãw sɩza n'a bɩɩ ziri n'a.

¹²Ɛcɛ nɩr bɛ dãw nyɛ̃ m ɩ̃ àr a Ŋmɩn-yir-kpɛ̃ɛ pʋɔ, bɩɩ a puoru-dirú, bɩɩ a tẽw pʋɔ mãa nɩ nɩr ŋmɩɛr nɔkpɛn ɛ, bɩɩ ɩ̃ ƴãwnɛ damnʋ a zu-sɛbla pʋɔ ɩ.

¹³A nɩbɛ bɛ ŋa na manɛ a ɩ̃ sãwna kʋ̀rɛ fʋ a ƴɛrɛŋa a, bɛ kʋ̃ tʋ̃ɔ́ wul fʋ a sãá k'ɩ̃ɩ sãw na ɩ.

¹⁴Bom nɛ ɩ̃ na bãw k'ɩ̃ɩ ɩ na a n'ɩ ŋa: ɩ̃ tu n a Sɔr-paala, tone a tɩ sãàkʋm-kore Naaŋmɩn tome. A sɔ́r ŋa n'ʋ bɛl bʋɔlɛ kɛ́ lãw na bɛ sɛw a. Ɩ̃ sàw na de a yele al za na sɛb ƴãw a Naaŋmɩn wulu sɛbɛ pʋɔ nɩ a naaŋmɩn-ƴɛ̀r-manbɛ sɛbr pʋɔ a.

¹⁵Ɩ̃ tɩɛrɛ na kɛ́ a kũuni-lɛb-yibu be n a nɩsaalbɛ za ƴãw, a nɩ-mɩn lãwnɩ a nɩ-faar. A bɛl tɛɛ za mɩ̀ tɩɛrɛ nɩ à à ŋá.

¹⁶A lɛ ƴãw n'a ɩ̃ mɩ̀ mɩ́ fɛr ɩ̃ tʋɔra tɛr tɩɛrʋ na vɩɛl a, a Naaŋmɩn niŋé nɩ a nɩsaalbɛ niŋé.»

¹⁷«Yome yaga tɩ tɔl'a, ɩ̃ɩ wa lɛb wa a Zerizalɛm nɩ sõwfʋ a ɩ̃ nɩ-bʋʋrɛ ƴãw, nɩ Naaŋmɩn de-kʋ̀b bome.

¹⁸Lɛ n'a bɛ tɩ nyɛ m a Ŋmɩn-yir-kpɛ̃ɛ pʋɔ, a ɩ̃ dɛwr-so-bɛrʋ baarʋ daar. Nɩbɛ bɛ tɩ ɓã taa a ɩ̃ zie ɩ, ɛ́ damnʋ mɩ̀ bɛ tɩ ka be ɩ.

¹⁹Azi tẽw Zifʋ bɛ mɩnɛ kãw nɛbɛ tɩ be a be. Bɛlɛ nɛbɛ nãá àr a fʋ niŋé ka yel a ɩ̃ sãwna, bɛlɛ tɩ tɛr'ɩ mɛ̃ bom a.

²⁰Mɔ̃ mɩ̀, a nɩbɛ bɛ ŋa na zɩ̃ a ka a, bɛ yel a sãwna nɛ bɛ na nyɛ̃ a ɩ̃ zie a ʋlɩ bibir ɩ̃ na tɩ ƴɛ̀r a ƴɛ̀rʋ-dɩb-lãw niŋé a.

²¹Ɩ̃ tɩ ìr'a àr a bɛ sɔgɔ ɛ́ yel kpɛ̃w za: “A kũuni-lɛb-yibu ƴãw n'a ɩ̃ àr a nyɩ niŋé ka bɛ maalɛ nɩ mɛ̃ ƴɛ̀rʋ a dɩ̃a.” A ƴɛ̀r-bir ŋa taa wa n'ɩ a ɩ̃ sãwna ʋ?»

²²A Felisɩ tɩ bãw nɩ a Sɔr-paala yele vla. Ʋ tɩ lɩɛb'ɩ a bɛ ƴɛ̀rʋ-dɩb ƴãw bibir kãw, ɛ́ yel bɛ: «A sojarɩ túr (1 000) nɩ-kpɛ̃ɛ Lɩzɩasɩ wa wa a, lɛn daar'a ɩ̃ na dɩ a ƴɛ̀rʋ bãw a nyɩ yel ŋa.»

²³Ʋ tɩ ƴãw na kɛ́ a sojarɩ kʋba (100) nɩ-kpɛ̃ɛ cãà tɛr a Pol a gaso pʋɔ, ɛcɛ ta piw ʋ sɔ́r a yele za ƴãw ɛ, k'ʋʋ mɩ́ sàw bɛr a ʋ nɩbɛ za bɛ kaarɛ a ʋ zie.

²⁴Bibie à ŋá lɛ pùorí, a Felisɩ tɩ wa na, ʋlɛ nɩ ʋ pɔw Dirisil, na tɩ ɩ Zifʋ bʋʋrɛ a. A Felisɩ tɩ ƴãw na kɛ́ bɛ tɛr a Pol wa n ʋ wa ƴɛ̀r a Yeezu Kɩrɩta sàw-deb ƴɛ̀rʋ ʋ bɛr wõ.

²⁵Ɛcɛ a Pol na wa tĩ manɛ a yel-na-tu-sɔr-a, nɩ a tʋɔra nyɔwfʋ yele nɩ a ƴɛ̀rʋ-maalʋ na waar'a yele a, dɛ̃bɩ̃ɛ tɩ ɩrɛ nɩ a Felisɩ. Lɛ n'a ʋ tɩ yel a Pol: «A na ta ka a, lɛb kpɛ, mãa wa nyɛ̃ vuo a, ɩ̃ na lɛb'a bʋɔlɩ fʋ.»

²⁶Ʋ mɩ́ tɩ tɩɛrɛ na kɛ́ a Pol na kʋ̀ ʋ nɩ libie, alɛ so ʋ mɩ́ tɩ bʋɔl'ʋ kʋralɛ k'ʋʋ wa bɛ ƴɛ̀rɛ.

²⁷Yome ayi pùorí, Pɔrsɩyisi Fɛsɩtɩsɩ tɩ lɩɛr'ɩ a Felisɩ ɩ a Ʋrɔm tẽw na-kpɛ̃ɛ-lɩɛrɛ. Ɛcɛ a Felisɩ na tɩ bɔbr k'ʋʋ ɩ nʋ̃ɔ̀ kpɛ a Zifʋ mɩnɛ a, ʋ tɩ cãà na bɛr a Pol a gaso pʋɔ.