Read Dagara, Northern Nɩ-toni 28 Bible Online

Nɩ-toni 28 - Dagara, Northern bible

Nɩ-toni 28

¹Tɩ na wa cɩ̃ɛ baar'a, tɩ wõ na kɛ́ a kʋ̃ɔ-kpɛ̃ɛ-sɔgɔ-tẽw nɛ dɩ na kɛ́ Maltɩ.

²A tẽ-biir tɩ tɛr tɩ nɩ vla. Saa na tɩ waar ɛ́ ƴawr ɩrɛ a, bɛ gbɔw nɩ vũu-kpɛ̃ɛ ɛ́ ƴãw tɩ za taw ta.

³A Pol tɩ wob'ɩ dali-kon k'ʋʋ tɩ ƴãw a vũumí. Ɛcɛ a tʋlʋ tɩ ɩ na dɔpan yi dʋ̃ mɛr a Pol nũu.

⁴A tẽ-biir na wa nyɛ̃ a waab ŋa ʋ mɛr a Pol nũu ƴãw a, bɛ yere na kʋ̀rɛ taa: «Nɩ-kʋrɛ n'ɩ a nɩr ŋa, a kʋ̃ɔ-kpɛ̃ɛ bɛr ʋ na ʋ cɩ̃ɛ, ɛcɛ a Naaŋmɩn na tuur yel-mɩnʋ a, bɛ sàw ʋ na vʋʋrɛ ɩ.»

⁵Ɛcɛ a Pol tɩ mɩr'ɩ a waab ƴãw a vũumí ɛ́ bɛ wõ bom za ɩ.

⁶Bɛl tɩ tɩɛrɛ na k'ʋʋ na mɔr'ɩ a pɛr nɛ pʋɔ, bɩɩ k'ʋʋ na lo na kpi. Ɛcɛ a tɩ kɔwrɩ na, ɛ́ bɛ nyɛ̃ bom za bɛ ɩrɛ a Pol ɛ. A lɛ n'a a bɛ tɩɛrʋ tɩ lɩɛbɩ bɛ yel: «Ŋmɩn kãw n'ʋ!»

⁷Zie kãw tɩ pɩɛl'ɩ a be, bɛ yel kɛ́ a kʋ̃ɔ-kpɛ̃ɛ-sɔgɔ-tẽw nɩ-kpɛ̃ɛ za na dɩ Pibiliyisɩ a, ɛ́ ʋlɛ so ʋ. Ʋ tɩ tɛr tɩ na mɛ̃ ʋ bárɩ a, ɛ̀ tɩ kpɛ a be bibie ata.

⁸Ƴã-tʋlʋ nɩ bin-zɩ̃ɩ tɩ gaal'ɩ a ʋ sãà. A Pol tɩ cen na tɩ puori ƴãw ʋ, ɛ́ ír nuru dɔwlɩ ʋ sanɩ ʋ.

⁹Al pùorí, a kʋ̃ɔ-kpɛ̃ɛ-sɔgɔ-ten nɩbɛ za na tɩ ɩ bàalbɛ a, tɩ waar'ɩ a ʋ zie ʋ wa sanɛ bɛ.

¹⁰Bɛ tɩ wul'ɩ ƴãwfʋ bɛ tɛr vuo ɩ, a tɩ zie. Ɛ́ tɩ na wa yi lɛb kpɩɛr a gbor a, bɛ kʋ̀ tɩ nɩ bom za a tɩ sɔ́r ƴãw.

¹¹Tɩ tɩ kpɛ n a be tɩ maalɩ cuwr ata, ɛ́ bãw yi de gbor kãw na tɩ gã a be cɛlɛ kɛ́ a sɩ̃ɔ tɔl baar'a. Alɛsãdiri n'a a gbor ʋl tɩ yi, ɛ́ bɛ bʋɔlɛ kɛ́ Dɩɔsɩkiir.

¹²Tɩ tɩ tɛw na àr Sɩrakiizi maalɩ bibie ata.

¹³Tɩ tɩ yi n a be, ɛ́ lanɩ a tẽw kõkowr tɩ ta Erezio. A bio daarɩ́, a saa-pɛrɩ́-dʋrʋ-lowr sɛsɛb tɩ cɛ̀r'a, tɩ maalɩ bibie ayi ɛ́ ta Puzɔl.

¹⁴Tɩ tɩ nyɛ̃ nɩ yɛbr a be, bɛ bʋɔlɩ tɩ kɛ́ tɩ wa kpɛ a bɛ zie tɩ ta kɔsɩɛra. À à ŋá n'a tɩ cen a Ʋrɔm.

¹⁵A yɛbr na tɩ be a Ʋrɔm a na wa wõ a tɩ yele a, bɛ tuori tɩ nɩ a Apiyisi Dàa pʋɔ, nɩ a be bɛ na bʋɔlɛ: Sãanbɛ-yie-ata a. A Pol na wa nyɛ̃ bɛ a, ʋ puor'ɩ a Naaŋmɩn yãanɩ. Ʋ tɩ lɛb'a nyɛ̃ ʋ tʋɔra.

¹⁶Tɩ na wa ta a Ʋrɔm a, a Pol zɛlɩ na bɛ sàw ʋ tɛr ʋ tʋɔra yir, ɛ́ soja gùre ʋ.

¹⁷Bibie ata pùorí, a Pol tɩ bʋɔl'ɩ a Zifʋ mɩnɛ nɩ-kore a ʋ yir. Bɛ na wa ɓã taa a, ʋ yel bɛ na: «Yɛbr i, ɩ̃ bɛ sãw a tɩ nɩ-bʋʋrɛ ɩ, ɛ́ bɛ lɛb tuli a tɩ sãàkʋm-kore nɛ́ɛ ƴãw ɛ, ɛcɛ mãa n'ɩ ŋa ɩ nɩ-pàwra, a lɛn daar za a Zifʋ mɩnɛ na nyɔw mɛ̃ a Zerizalɛm ƴãw a Ʋrɔm tẽw nɩbɛ nuru pʋɔ a.

¹⁸Bɛ na tɩ sowri mɛ̃ bãw a yel-mɩŋa a, a Ʋrɔm tẽw nɩbɛ bɛl tɩ bɔbr'a kɛ́ bɛ lɛb bɛr mɛ̃. Bɛl zie a, bɛ bɛ tɩ nyɛ̃ bom na sɛwnɩ kũu a ɩ.

¹⁹Ɛcɛ, a Zifʋ mɩnɛ bɛ tɩ sàw ɛ. Lɛ so a tɩ fɛr mɛ̃ ɩ̃ ta n a ɩ̃ yele a na-kpɛ̃ɛ zie. Ɛcɛ a ɩ̃ tɩɛrʋ bɛ tɩ n'ɩ k'ɩ̃ɩ tɛr'ɩ a ɩ̃ nɩ-bʋʋrɛ ƴɛ̀rʋ ɛ.

²⁰Alɛ so ɩ̃ bɔbr k'ɩ̃ɩ nyɛ̃ nyɩ tɩ ƴɛ̀r sɔw taa. Alɛ ɩrɛ mɛ̃ bom a, a ʋlɩ bom nɛ a Ɩsɩrayɛl nɩbɛ na tɩɛrɛ a, ʋl zũú n'a ɩ̃ ƴãw a bamɛ á ŋá.»

²¹Bɛ tɩ sɔw na yel ʋ: «Tɩ bɛ páw sɛbɛ za ʋ yi a Zude wa manɛ a fʋ yele ɩ, ɛ́ tɩ yɛb kãw mɩ̀ bɛ yi a be wa ta manɩ yel kʋ̀ tɩ a fʋ ƴãw, bɩɩ manɩ yel-faa ʋ na wõ a fʋ ƴãw a ɩ.

²²Ɛcɛ tɩ bɔbr'a kɛ́ fʋ̃ʋ tɔr za manɩ a fʋ tɩɛrʋ tɩ wõ. Bʋ̃ʋ n'ʋ vɛ̃, tɩ bãwnɩ a na a nɩbɛ na bɛ dier a fʋ puoru sɔ́r ŋa a ziir za a.»

²³Bɛ tɩ wõ n taa ƴãw bibir. A bibir na wa vɩɛ a, bɛ wa n yaga dɔwlɩ wa páw a Pol a ʋ yir nɛ pʋɔ. A ʋ manʋ pʋɔ a, a Pol tɩ dɩrɛ nɩ a Naaŋmɩn Naalʋ dãsɩɛ, ɛ́ a biɓaara tɩ ta n a zaanʋɔra a, ʋ mɩ́ tɩ de nɩ a Moyiir wulu sɛbɛ nɩ a naaŋmɩn-ƴɛ̀r-manbɛ sɛbr manɛ nɩ a Yeezu yele, ɛ́ ƴãw fãw bɔbr k'ʋʋ ƴɛ̀r tʋ̃ɔ́ bɛ.

²⁴Bɛ mɩnɛ tɩ sàw na de, ɛ́ bɛ mɩnɛ zawrɩ.

²⁵Bɛ na tɩ lɛbr kule a, bɛ cãà bɛ tɩ wõ taa a ɩ. A lɛ n'a a Pol tɩ yel à ŋá tɛwr kʋ̀ bɛ: «A Vʋʋrʋ Sõw tɛr'ɩ yel-mɩŋa, a lɛn daar ʋ na tɩ ƴɛ̀r a nyɩ sãàkʋm-kore zie nɩ a naaŋmɩn-ƴɛ̀r-manɛ Ɩzayi nʋɔr a. Ʋ tɩ yel a:

²⁶“Cen tɩ páw a nɩ-bʋʋrɛ bɛ ŋa yel bɛ: nyɩ na mɩ́ wone na ɛ́ kʋ̃ bãw a pɛr ɛ. Nyɩ na mɩ́ jɩ́rɛ na ɛ́ kʋ̃ nyɛ̃ bom ɛ.

²⁷Bʋ̃ʋ n'ʋ vɛ̃, a nɩbɛ bɛ ŋa kpɛ n mimi-kõw, bɛ fur'ɩ a bɛ tobe, bɛ pàw nɩ a bɛ mimie kɛ́ bɛ taa nyɛrɛ nɩ a bɛ mimie ɩ, kɛ́ bɛ taa wone nɩ a bɛ tobe ɩ, kɛ́ a bɛ yã taa nyɛrɛ ɩ, kɛ́ bɛ taa lɩɛbɛ a bɛ ɩb ɛ, alɛ bɛ ɩ lɛ, ɩ̃ nãà sanɩ bɛ na[38].”

²⁸Lɛ so nyɩ bãwnɩ a, nɩ-bʋʋr-yoru nɛbɛ a Naaŋmɩn tɩr a faafʋ ŋa kʋ̀. Bɛl na bɛr'a wõ.» [

²⁹Bɛ na tɩ wõ a Pol ƴɛ̀r-bie á ŋá a, a Zifʋ mɩnɛ tɩ ŋmɩɛr'ɩ nɔkpɛn yaga kule nɩ.]

³⁰A Pol tɩ kpɛ n a yir nɛ pʋɔ yũo-ɓile ayi, yarɛ a yir. A bɛlɩ dem za na mɩ́ tɩ wa a ʋ zie a, ʋ mɩ́ tɛr bɛ na

³¹hiere a Naaŋmɩn Naalʋ kʋ̀rɛ bɛ, ɛ́ ɓãá ƴãw bɛr bom za ɛ́ manɛ a Sore Yeezu Kɩrɩta yele kʋ̀rɛ bɛ, ɛ́ bom za bɛ piw ʋ sɔ́r ɛ.