Read Dagara, Northern Nɩ-toni 6 Bible Online

Nɩ-toni 6 - Dagara, Northern bible

Nɩ-toni 6

¹A alɩ bibie nɛ pʋɔ, a po-tuurbɛ nʋɔr na tɩ kɛrɛ dɔwlɛ a, a bɛl na wone a Gɩrɛkɩ mɩnɛ ƴɛ̀rʋ a, tɩ zɛbr'ɩ nɩ a bɛl na wone a Ebre mɩnɛ ƴɛ̀rʋ a. Bɛ tɩ yel'a k'aa bibi-vɩɛrɩ za sõwfʋ pob pʋɔ a, bɛ bɛ kaarɛ a bɛ pɔw-kɔbɛ zie vla ɩ.

²Lɛ n'a a nɩ-toni pie nɩ ayi tɩ bʋɔlɩ a po-tuurbɛ za ɓã taa ɛ́ yel bɛ: «A bɛ sɛw kɛ́ tɩ bɛr a Naaŋmɩn ƴɛ̀rʋ hieru ɛ́ kaarɛ bʋ̃-dɩrɩ yele zie ɩ.

³A na ɩ lɛ a, yɛbr i, nyɩ bɔ dɛbr ayopõi a nyɩ pʋɔ, nɩbɛ na ɩrɛ vla, ɛ́ a Vʋʋrʋ Sõw nɩ yã-bãwfʋ be a bɛ zie a, ɛ́ tɩ na de nɩ a ton ŋa kʋ̀ bɛ.

⁴Tɩɩm ƴãw a, tɩ na su n zu a puoru ƴãw nɩ a Naaŋmɩn ƴɛ̀rʋ manʋ ƴãw.»

⁵A bɛ ƴɛ̀rʋ ŋa tɩ nʋmɛ nɩ a bɛ za zie, lɛ n'a bɛ tɩ kaa ír Ɩtɩɛn, na tɩ tɛr naaŋmɩn-sàw-deb yaga ɛ́ Vʋʋrʋ Sõw mɩ̀ be a ʋ zie yaga a, nɩ Filib, Porokɔɔr, Nɩkanɔɔr, Tɩmɔ̃, Parmena nɩ Nɩkola na yi Ãtɩɔsɩ ɛ́ kpɛ a Zifʋ mɩnɛ puoru a.

⁶Bɛ tɩ tɛr'ɩ a nɩbɛ bɛ ŋa wa n a nɩ-toni niŋé, bɛ wa puori kʋ̀ bɛ ɛ́ ír nuru dɔwlɩ a bɛ zu.

⁷A Sore ƴɛ̀rʋ tɩ yaarɛ nɩ a ziir za, a po-tuurbɛ nʋɔr mɩ̀ tɩ kɛrɛ nɩ yaga za a Zerizalɛm. A Zifʋ mɩnɛ bàwr-maalbɛ yaga yaga tɩ sàwr'a dier a Yeezu yele.

⁸A Naaŋmɩn maalʋ nɩ a Naaŋmɩn fãw tɩ be n a Ɩtɩɛn zie, ʋ maalɛ yel-bãw-guuri nɩ nɔ-ɓãa-yel-bɛrɛ a nɩbɛ sɔgɔ.

⁹Puoru-dĩo kãw tɩ be n be, bɛ bʋɔlɛ kɛ́ Gbãgbaar na lɛb so bɛ tʋɔra a puoru-dĩo. A puoru-dĩo ŋa nɩbɛ bɛ mɩnɛ nɩ Sɩɩrɛn tẽw nɩbɛ bɛ mɩnɛ, lãwnɩ Alɛsãdiri tẽw dem bɛ mɩnɛ nɩ Silisi nɩ Azi tẽw dem tɩ wa ŋmɩɛr'ɩ nɩ a Ɩtɩɛn nɔkpɛn.

¹⁰Ɛcɛ a Vʋʋrʋ Sõw na tɩ ɩ a Ɩtɩɛn ƴɛ̀rɛ nɩ yã-bãwfʋ a, bɛ bɛ tɩ tʋ̃ɔ́ ƴɛ̀rɛ tʋ̃ɔ́nɛ ʋ ɛ.

¹¹Lɛ n'a bɛ tɩ ya nɩbɛ ƴãw kɛ́ bɛ yel à ŋá: «Tɩ wõ na ʋ tʋ a Moyiir nɩ a Naaŋmɩn zʋmɛ.»

¹²Bɛ tɩ ɩ na a nɩbɛ, nɩ a nɩ-kore nɩ a Naaŋmɩn wulu sɛ-sɛbrbɛ damnɛ damnʋ na bɛ vɩɛl a, ɛ́ bɛ cen tɩ ùr nyɔw a Ɩtɩɛn, tɛr ʋ cen nɩ a Zifʋ mɩnɛ ƴɛ̀rʋ-dɩb-lãw zie.

¹³Bɛ mɩ̀ tɩ wa n nɩ dãsɩ-ziri dem, bɛ wa yel: «Kʋralɛ n'a a nɩr ŋa ƴɛ̀rɛ ƴɛ̀rʋ na bɛ vɩɛl a cáarɛ nɩ a tɩ Ŋmɩn-yir-kpɛ̃ɛ sõw nɩ a Naaŋmɩn wulu.

¹⁴Tɩ wõ na ʋ yel kɛ́ a Yeezu ŋa, na yi Nazarɛtɩ a, na ŋmɛr'ɩ a Ŋmɩn-yir-kpɛ̃ɛ bɛr ɛ́ lɩɛbɩ a ɩb a Moyiir na wul tɩ tuur a.»

¹⁵A bɛlɩ dem za na tɩ zɩ̃ a ƴɛ̀rʋ-dɩb zie a tɩ jɩ́rɛ nɩ a Ɩtɩɛn gbẽgbẽ, ɛ́ bɛ tɩ nyɛ̃ nɩ a ʋ niwn ʋ ŋmɛ̃ mɛ̃ malkɩ niwn a.