Read Dagara, Northern Nɩ-toni 9 Bible Online

Nɩ-toni 9 - Dagara, Northern bible

Nɩ-toni 9

¹A Sol ʋl cãà bɛ tɩ bɛrɛ a Sore po-tuurbɛ ɩ, ɛ́ bɔbr a bɛ kʋb. Ʋ tɩ cen na tɩ páw a bàwr-maal-kara,

²ɛ́ ƴãw ʋ kʋ̀ ʋ sɛb-tʋɔlɩ a Damasɩ tẽw puoru-diru nɩ-bɛrɛ ƴãw, kɛ́ ʋlɛ wa tɩ nyɛ̃ nɩbɛ, dɛbr bɩɩ pɔwbɛ, bɛ tuur a Yeezu sɔ́r a, ʋʋ nyɔw bɛ ƴãw bamɛ wa n a Zerizalɛm.

³Ʋ tɩ lo n a sɔ́r cere tɩ pɩɛlɛ a Damasɩ, wa bere cãà yi a salom zu wa caalɩ pili pàw ʋ.

⁴Ʋ tɩ lo na gã tẽw ɛ́ wõ kɔkɔr ʋ yere a ʋ zie: «Sol i, Sol i, bʋ̃ʋ n'ʋ so fʋ dɔwrɛ mɛ̃?»

⁵A Sol tɩ sowr'ʋ na: «Ãa nɛ b, Sore e?» Ʋ tɩ sɔw na: «Mãa n'ɩ a Yeezu, mãa n'ʋ fʋ dɔwrɛ.

⁶Ɛcɛ ìr kpɛ a tẽw pʋɔ, bɛ na tɩ yel'a kʋ̀ b a ʋlɩ bom nɛ a na fɛr kɛ́ fʋ ɩ a.»

⁷Dɛ̃bɩ̃ɛ tɩ gbini nɩ a Sol sɔr-lãw-cen-taabɛ bɛ àr gbili: bɛ tɩ wone nɩ a kɔkɔr, ɛcɛ bɛ bɛ tɩ nyɛ̃ nɩr za ɩ.

⁸A Sol tɩ lɛb'a ìr. Ɛcɛ ʋ na saa tɩ yuo a mimie a, ʋ bɛ tɩ nyɛrɛ ɩ. A ʋ sɔr-lãw-cen-taabɛ tɩ nyɔw ʋ nɩ nũú taw tɩ kpɛ n a Damasɩ.

⁹Ʋ tɩ maal'ɩ bibie ata, ɛ́ cãà bɛ nyɛrɛ ɩ. Ɛ́ a bibie ata á ŋá za ʋ bɛ dɩ bom ɛ, ɛ́ bɛ nyũ bom ɛ.

¹⁰Yeezu po-tuure kãw, na dɩ kɛ́ Ananɩasɩ a, tɩ be n a Damasɩ. Ʋ tɩ nyɛ̃ nɩ a Sore ʋ bʋɔl'ʋ: «Ananɩasɩ i!» Ʋ sɔw: «Mãa n'ɩ ŋan Sore e.»

¹¹A Sore tɩ yel ʋ na: «Ìr yi a sɔ́r ʋl zu bɛ na bʋɔlɛ a “Sɔr-dẽdẽ” a, tɩ kpɛ a Zuda yir sowri nɩr kãw na dɩ kɛ́ Sol a, Tarsɩ n'a ʋ yi. Ʋ puore na,

¹²ɛ́ nyɛ̃ nɩr na dɩ kɛ́ Ananɩasɩ a, ʋ wa kpɛ ír nuru dɔwlɩ a ʋ zu k'ʋʋ tʋ̃ɔ́ lɛb nyɛrɛ.»

¹³A Ananɩasɩ tɩ sɔw na: «Sore e, ɩ̃ wõ n nɩ-yaga na ƴɛ̀r a nɩr ŋa ƴɛ̀rʋ a, nɩ a dɔwrʋ al za ʋ na dɔwrɩ a fʋ nɩbɛ a Zerizalɛm a.

¹⁴A bàwr-maal-nɩ-bɛrɛ kʋ̀ ʋ nɩ sɔ́r ʋ wa a ka, k'ʋʋ wa nyɔw a bɛlɩ dem za na bʋɔlɛ a fʋ yúor a ƴãw bamɛ.»

¹⁵Ɛcɛ a Sore tɩ yel ʋ na: «Cen, a nɩr ŋa ɩ n tõ-tõ-bom ɩ̃ na kaa ír k'ʋʋ ɩ a ɩ̃ yúor yi ta a nɩ-bʋʋr-yoru, a na-mɩnɛ nɩ a Ɩsɩrayɛl biir zie a.

¹⁶Mãa mɩŋa na wul ʋ nɩ a tuo al za a na fɛr k'ʋʋ wõ a ɩ̃ yúor ƴãw a.»

¹⁷A Ananɩasɩ tɩ cen na tɩ kpɛ a yir pʋɔ, dɔwlɩ a nuru a ʋ zu ɛ́ yel: «Ɩ̃ yɛb Sol i, a Sore n'ʋ tõ m. A Yeezu ʋl na wul ʋ tʋɔra fʋ nyɛ̃ ʋ a sɔ́r ʋl fʋ na tɩ lo waar a zu a, ʋlɛ n'ʋ tõ m k'ɩ̃ɩ wa ɩ fʋ lɛb nyɛrɛ ɛ́ a Vʋʋrʋ Sõw paalɩ fʋ.»

¹⁸Daadaalɛ bome kãw, na ɩ mɛ̃ zʋm-pɛgɛ a, tɩ yi n a ʋ mimie pʋɔ 'lawrɩ lo, ʋʋ lɛb nyɛrɛ ɛ́ de a suob.

¹⁹Al pùorí, ʋ tɩ dɩ na lɛb páw fãw. A Sol tɩ maal'ɩ bibie blã a Damasɩ, ʋlɛ nɩ a Yeezu po-tuurbɛ na tɩ be a be a.

²⁰Ʋ tɩ tĩ nɩ daadaalɛ hiere a Zifʋ mɩnɛ puoru-dirú kɛ́ a Yeezu n'ɩ a Naaŋmɩn Bie.

²¹A bɛlɩ dem za na tɩ bɛrɛ wone a ʋ kanʋ a, mɩ́ tɩ nyɔw nɩ nʋɔr yere nɩ: «A nɩr ŋa bɛ tʋ̃ɔ́ n'ʋ bɛ tɩ bɛrɛ a bɛlɩ dem na bʋɔlɛ a Yúor ŋa a Zerizalɛm a ɩ? Ɛ́ a bɛ nyɔwfʋ ƴãw bɛ n'a ʋ sʋ̃ɔmɩ bul wa a ka, k'ʋʋ wa nyɔw bɛ 'lẽ cen nɩ tɩ kʋ̀ a bàwr-maal-nɩ-bɛrɛ ɩ?»

²²Ɛcɛ a Sol tɩ nyɛrɛ nɩ fãw dɔwlɛ, ɛ́ mɩ́ tɩ ƴɛ̀r tʋ̃ɔ́ a Damasɩ tẽw Zifʋ mɩnɛ, ʋ na mɩ́ tɩ manɛ wule k'aa Yeezu sɩrɩ n'ɩ a Kɩrɩta a.

²³A wa tɩ kɔwrɩ na, ɛ́ a Zifʋ mɩnɛ bɛ ŋa wa ír bʋ taa kɛ́ bɛ kʋ a Sol.

²⁴A Sol tɩ wõ n a bɛ bʋ-taa ŋa yele. A Zifʋ mɩnɛ mɩ́ tɩ gù n a tẽw dɩ̃dɛɛ mʋ̃tɔ̃w nɩ tɩ̃ɩsɔw za, kɛ́ bɛ tʋ̃ɔ́ piw nyɔw ʋ kʋ.

²⁵Ɛcɛ tɩ̃ɩsɔw kãw, a Sol po-tuurbɛ tɩ ɓáw ʋ na ƴãw zãkpa pʋɔ ɛ́ 'lẽ nɩ mie tur bɛr dapùorí ʋ siw.

²⁶A Sol na tɩ ta a Zerizalɛm a, ʋ tɩ bɔbr'a k'ʋʋ pʋɔ a Yeezu po-tuurbɛ pʋɔ, ɛcɛ bɛ za tɩ zɔrɛ nɩ a ʋ dɛ̃bɩ̃ɛ, ɛ́ bɛ tɩ sàw tɩɛrɛ kɛ́ sɩza n'a ʋ lɩɛbɩ a Yeezu po-tuure ɩ.

²⁷Lɛ n'a a Banabasɩ pãa tɩ tɛr ʋ cen nɩ tɩ wul a nɩ-toni, ɛ́ manɩ kʋ̀ bɛ a lɛ a Sol na tɩ nyɛ̃ a Sore a sɔ́r pʋɔ ʋ ƴɛ̀r a ʋ zie a, nɩ a lɛ a Sol na tɩ nyɔw socir ɛ́ kanɩ nɩ a nɩbɛ a Yeezu yúor ƴãw a Damasɩ a.

²⁸Lɛ n'a a Sol pãa tɩ pʋɔ a bɛ pʋɔ, kpɩɛr ɛ́ yire a Zerizalɛm, ɛ́ nyɔw socir kanɛ nɩ a nɩbɛ a Sore yúor ƴãw.

²⁹A Zifʋ bɛl na ƴɛ̀rɛ a Gɩrɛkɩ a zie n'a ʋ mɩ́ tɩ ƴɛ̀rɛ, ɛ́ ʋlɛ nɩ a bɛl ŋmɩɛr a nɔkpɛn. Ɛcɛ a nɩbɛ bɛ ŋa tɩ bɔbr'ɩ ʋ kʋb.

³⁰A yɛbr na tɩ bãwnɩ a, bɛ tɛr ʋ na cen nɩ Sezaare, tɩ ƴãw k'ʋ cen Tarsɩ.

³¹A Lãw-yir tɩ tɛr'ɩ ƴã-ɓaarʋ a Zude tẽw za pʋɔ, nɩ a Galile tẽw nɩ a Samaari tẽw. Ʋ tɩ mɩɛr'a yɛlɛ ɛ́ tɛr a Sore zɔba, a Vʋʋrʋ Sõw mɔwlʋ tɩ be n a ʋ zie yaga ʋ kɛrɛ nɩ.

³²A Pɩɛr na tɩ cɔlɛ a ziir za a, ʋ mɩ̀ tɩ tɔl'a siw a Lida a kɩrɩta-nɩbɛ zie.

³³Ʋ tɩ nyɛ̃ nɩ nɩr kãw na dɩ kɛ́ Ene a, ʋ gã sɛ̃w pʋɔ. Yome ani n'ɩ à ŋá ʋ na tɩ gbɛ̀r gã a.

³⁴A Pɩɛr tɩ yel ʋ na: «Ene e, a Yeezu Kɩrɩta sanɩ fʋ na, ìr pili a fʋ sɛ̃w fʋ tʋɔra.» Ʋ tɩ ìr'ɩ daadaalɛ.

³⁵A Lida tẽw dem za, nɩ a Saarɔ̃ tẽw nɩbɛ za na tɩ nyɛ̃ ʋ a, bɛ tɩ lɩɛb'ɩ a bɛ ɩb sàw de a Sore.

³⁶Pɔw kãw tɩ be n a Zope tẽw ɩ a Sore po-tuure. Ʋ tɩ dɩ na kɛ́ Tabɩta, ɛ́ bɛ bʋɔlɛ Dɔrkasɩ a gɩrɛkɩ kɔkɔr pʋɔ, a pɛr lɛ kɛ́ Wala. A ɩ-vɩɛlɩ maalʋ nɩ a nɩ-kɔmɛ sõwfʋ tɩ n'ɩ a ʋ tome.

³⁷Ʋ wa tɩ lo n bàalʋ a alɩ bibie nɛ pʋɔ kpi. Bɛ tɩ so ʋ nɩ a kʋ̃ɔ, ɓáw do n tɩ bin a bɔwpɩɛ pʋɔ.

³⁸A Lida nɩ a Zope pɩɛl'ɩ taa. A kɩrɩta-nɩbɛ na tɩ wõ kɛ́ a Pɩɛr be n a Lida a, bɛ tõ n nɩbɛ ayi kɛ́ bɛ tɩ bʋɔl'ʋ nɩ a ƴɛ̀r-bie á ŋá: «Wa fɔ̃w za a tɩ zie.»

³⁹A Pɩɛr tɩ ìr'ɩ daadaalɛ páw bɛ cen. Ʋ na tɩ ta a, bɛ tɛr ʋ na do n a bɔwpɩɛ pʋɔ. A pɔw-kɔbɛ za tɩ ɓã n taa a be, kone wule nɩ a Pɩɛr a kpali nɩ a kpar-bɛrɛ al a Dɔrkasɩ na tɩ wóbr a ʋ cãafʋ daar a.

⁴⁰A Pɩɛr tɩ ƴãw nɩ a nɩbɛ za bɛ yi, ʋʋ lo gbĩ dume puori. Ʋ na wa puori baar'a, ʋ tɩ lɩɛb'ɩ niwn cɔw a kũu ɛ́ yel: «Tabɩta a, ìr!» Ʋ yuo a mimie, ʋʋ na tɩ nyɛ̃ a Pɩɛr a, ʋ ìr'a zɩ̃.

⁴¹A Pɩɛr tɩ nyɔw ʋ nɩ nũú ʋ ìr, ʋʋ bʋɔlɩ a kɩrɩta-nɩbɛ nɩ a pɔw-kɔbɛ wa wul bɛ a Tabɩta na lɛb vʋʋrɛ a.

⁴²A Zope tẽw nɩbɛ za tɩ wõ n a yel ŋa, ɛ́ bɛ yaga zie tɩ sàw na de a Sore.

⁴³A Pɩɛr tɩ kpɛ n a Zope kɔwrɩ. Ʋ tɩ kpɩɛr'ɩ gán-nɔnɛ kãw bɛ na bʋɔlɛ Sɩmʋ̃ a yir.