Read Dagara, Northern Ʋrɔm 1 Bible Online

Ʋrɔm 1 - Dagara, Northern bible

Ʋrɔm 1

¹A mãa Pol, Yeezu Kɩrɩta tõ-tõ-bie, a Naaŋmɩn bʋɔlɩ mɛ̃ na k'ɩ̃ɩ wa ɩ nɩ-tona, ʋ kaa na ír mɛ̃ a ʋ Yel-nʋ̃ɔ̀ hieru ƴãw.

²A Yel-nʋ̃ɔ̀ ŋa a, a Naaŋmɩn tɩ dãw na yel a ʋ ƴɛ̀r-manbɛ zie, a Sɛb-son pʋɔ k'ʋʋ na yel'a.

³Ʋ càar'ɩ a ʋ Bie, a tɩ Sore Yeezu Kɩrɩta: Daviir bʋʋrɛ nɩr tɩ n'ʋ a ʋ nɩsaalɛ dɔwlʋ pʋɔ,

⁴ɛcɛ a Vʋʋrʋ Sõw lowr a, bɛ tɩ wul'a nɩ kpɛnʋ a sãá ʋ na ɩ Naaŋmɩn Bie a, a ʋ kũu-pʋɔ-lɛb-yibu zũú.

⁵A ʋl ƴãw n'a ɩ̃ páw a maalʋ lɩɛbɩ nɩ-tona, k'ɩ̃ɩ tɛr a nɩ-bʋʋr-yoru nɩbɛ za wa n bɛ wa sàw de ʋ, ɛ́ sàwr a ʋ nʋɔr, a ʋ yúor zɛwfʋ ƴãw.

⁶Nyɩ mɩ̀ pʋɔ nɩ a bɛ pʋɔ, nyɩɩm a Yeezu Kɩrɩta na bʋɔlɩ a.

⁷Mãa n'ʋ sɛbr nyɩ, nyɩɩm na be a Ʋrɔm a, nyɩɩm za a Naaŋmɩn na nɔnɛ ɛ́ bʋɔlɩ kɛ́ nyɩ wa ɩ a ʋ nɩ-sori a. A Naaŋmɩn tɩ Sãà nɩ a tɩ Sore Yeezu Kɩrɩta kʋ̀ nyɩ a maalʋ nɩ a ƴã-ɓaarʋ.

⁸A Yeezu Kɩrɩta ƴãw n'a ɩ̃ de niwn puore a ɩ̃ Naaŋmɩn yãanɩ a nyɩ za ƴãw, bɛ na ƴɛ̀rɛ a nyɩ sàw-deb ƴɛ̀rʋ a tẽ-daa za zu a ƴãw.

⁹Naaŋmɩn n'ɩ a ɩ̃ yel-mɩŋa sob, ʋl ɩ̃ na puore nɩ ɩ̃ pʋɔ za ɛ́ hiere a ʋ Bie Yel-nʋ̃ɔ̀ a. Ɩ̃ mɩ́ tɛr'ɩ a nyɩ tɩɛrʋ kʋralɛ,

¹⁰zɛlɛ nɩ a ɩ̃ puoru pʋɔ kʋralɛ, k'ɩ̃ɩ wa nanɩ nyɛ̃ vuo wa a nyɩ zie, ʋlɛ wa bɔbr a.

¹¹A nyɩ nyɛ́b vʋla sɩrɩ na tɛr mɛ̃ yaga, k'ɩ̃ɩ wa tʋ̃ɔ́ kʋ̀ nyɩ Vʋʋrʋ Sõw maalʋ kãw, na na ɩ nyɩ tɛr fãw a,

¹²nyɩnɛ n'a mɔ̃, k'ɩ̃ɩ wa tʋ̃ɔ́ nyɛ̃ mɔwlʋ lãwnɩ nyɩ a nyɩ zie be, a naaŋmɩn-sàw-deb tɩ na lãw a zũú, mãa nɩ a nyɩɩm za a.

¹³Yɛbr i, ɩ̃ bɔbr'a kɛ́ nyɩ bãwnɩ a, kʋralɛ n'a ɩ̃ tɩɛrɛ a nyɩ zie waa, k'ɩ̃ɩ wa páw a ɩ̃ tome tɔnɛ a nyɩ zie, mɛ̃ a lɛ ɩ̃ na páw a a nɩ-bʋʋr-yoru bɛ mɩnɛ zie a. Ɛcɛ ɩ̃ cãà bɛ nyɛ̃ vuo wa tɔ dɩ̃a ɩ.

¹⁴Ɩ̃ dɩ n a sɛb-bãwnbɛ nɩ a sɛb-bɛ-bãwnbɛ san, a yã-bãwnbɛ nɩ a dãbole san.

¹⁵Lɛ so tɩɛrʋ ŋa na be a ɩ̃ zie, k'ɩ̃ɩ hieri a Yel-nʋ̃ɔ̀ kʋ̀ a nyɩɩm mɩ̀ na kpɩɛr a Ʋrɔm a.

¹⁶Ɩ̃ bɛ zɔrɛ vĩ a Yel-nʋ̃ɔ̀ hieru ƴãw ɛ: bʋ̃ʋ n'ʋ vɛ̃, ʋ ɩ n Naaŋmɩn kpɛnʋ na faarɛ nɩr za na sàw de a, a Zifʋ mɩnɛ n'ɩ a dãw-niwn dem, al pùorí a bɛl na bɛ ɩ Zifʋ mɩnɛ a.

¹⁷A Yel-nʋ̃ɔ̀ mɩ́ sɩrɩ na wule a lɛ a Naaŋmɩn na mɩ́ ɩ a nɩsaalbɛ ɩ nɩ-mɩn a ʋ niŋé a: a sàw-deb yõ zũú n'a, a tib daar tɩ ta n a baarʋ daar, mɛ̃ a lɛ a Sɛb-sõw na yel a: «Sob nɛ na ɩ nɩ-mɩŋa a sàw-deb zũú a na vʋʋrɛ na[1].»

¹⁸A Naaŋmɩn suur sɩrɩ na ìre a salom zu sãá, a nɩsaalbɛ naaŋmɩn-bɛ-ƴãwfʋ ɩb za ƴãw, nɩ a bɛ ɩb za na bɛ tu sɔ́r a ƴãw, bɛl na mɩ́ piwr a yel-mɩŋa tɛrɛ nɩ ɩ-ɩrɩ na bɛ tu yel-mɩŋa a.

¹⁹A Naaŋmɩn bɛ na na tʋ̃ɔ́ bãw a, a sãá nɩ a bɛ zie: a Naaŋmɩn mɩŋa wul bɛ na a sãá.

²⁰Bʋ̃ʋ n'ʋ vɛ̃, a tẽ-daa íru daar za a, a Naaŋmɩn mɩŋa vɩɛlʋ na sɔwlɩ a, a pɛr lɛ k'aa ʋ kpɛnʋ na be kʋralɛ a, nɩ a ʋ naaŋmɩnʋ, a sãá nɩ a ʋ tome pʋɔ a nɩsaal yã na tʋ̃ɔ́ bãw. A na ɩ lɛ a, bɛ kʋ̃ tʋ̃ɔ́ yel kɛ́ bɛ bɛ bãw kɛ́ lɛ n'a ɩ.

²¹Bʋ̃ʋ n'ʋ vɛ̃, bɛ bãw nɩ a Naaŋmɩn ɛ́ bɛ zɛw a ʋ yúor-vɩɛlʋ-danʋ ɛ, bɛ puor'ʋ yãanɩ na sɛw taa nɩ ʋ a ɩ. A bɛ tɩɛrʋ nɩ̃ɛ na lɩɛbɩ tɩɛr-zawlɛ, ɛ́ a bɛ gẽgẽ-yã be lige pʋɔ ʋ za.

²²Bɛ na de bɛ tʋɔra bʋɔlɛ yã-bãwnbɛ a, bɛ lɩɛb'ɩ dãbole.

²³Bɛ de nɩ a Naaŋmɩn na bɛ tɛr kũu daar a yúor-vɩɛlʋ-danʋ tɛw nɩ nɩsaal na ɩ bʋ̃-kpiira a dasule, tɛw nɩ bʋ̃-pɩgɛ nɩ dʋ̃-gbɛ́ɛ-anaɩ nɩ bʋ̃-vuri dasuli.

²⁴Alɛ so a Naaŋmɩn bɛr bɛ kʋ̀ a bɛ socie vʋla, bɛ tɛr a pɩ̃ɔ ɩ-ɩrɩ ɩrɛ nɩ vĩ yele a bɛ cara pʋɔ.

²⁵Bɛ de nɩ a yel-mɩŋa na càarɩ a Naaŋmɩn a, tɛw nɩ a ziri. Bɛ ƴãw na ɛ́ maalɩ a bʋ̃-íra, ɛ́ bɛr a Íre, ʋl na sɛwnɩ puoru yome yome za a! Amɛn.

²⁶Alɛ so a Naaŋmɩn bɛr bɛ kʋ̀ a bɛ socie vʋla na ɩrɛ vĩ a, a so bɛ. A bɛ pɔwbɛ de nɩ a dɛb nɩ pɔw lãw-taa na tu sɔ́r a tɛw nɩ a lãw-taa na bɛ tu sɔ́r a.

²⁷Lɛ n'a a dɛbr mɩ̀ bɛr a dɛb nɩ a pɔw lãw-taa na tu sɔ́r a, ɛ́ bɔbr taa dɛb nɩ dɛb, ɩrɛ nɩ vĩ yele dɛb nɩ dɛb zie, ɛ́ páwr a bɛ tulu dɔwrʋ ʋl na sɛw taa nɩ bɛ a, a bɛl mɩŋa zie.

²⁸Bɛ na zawrɩ na bãw a Naaŋmɩn a, ʋ bɛr bɛ na kʋ̀ a bɛ dãbolu, à ŋá n'a bɛ ɩrɛ a lɛ a na bɛ tɩ sɛw kɛ́ bɛ ɩrɛ a.

²⁹Ɩ-bʋʋrɛ za na bɛ tu sɔ́r a, nɩ faalʋ, nɩ tɛra vʋla, nɩ po-tuolu nɩbɛ nɛbɛ. Bɛ ɩ n nyuur tɛwr, nɩ nɩ-kʋrbɛ, nɩ nɔhaarʋ, nɩ nyãnyu-yã, nɩ nɩ-fa-ɩb tɛwr. Bɛ mɩ́ sãwnɛ nɩ a bɛ taabɛ yee,

³⁰ɛ́ manɛ a bɛ taabɛ yele. Naaŋmɩn dɔ̃ dem nɛbɛ, zɛb-ŋmarbɛ, pɔ̀lʋ dem, nɩbɛ na mɩ́ pɔrɛ zawlalɛ a, nɩbɛ na tɛr yã a yel-faar maalʋ ƴãw a, na bɛ sàwr a bɛ dɔwrbɛ nʋɔr a.

³¹Nɩbɛ na bɛ tɛr yã a nɛbɛ, nɩbɛ na mɩ́ ƴɛ̀r ɛ́ bɛ tu a, nɩbɛ na bɛ tɛr nɔ̃wfʋ a, na bɛ zɔrɛ nɩbaalʋ a.

³²Bɛ na saa bãw a lɛ a Naaŋmɩn na ƴɛ̀r bin, kɛ́ bɛlɩ dem na maalɛ a yel-faar á ŋá taabɛ a, sɛwnɩ nɩ kũu a, bɛ maalɛ na, ɛ́ cãà mɩ́ lɛb kpɛ a bɛlɩ dem na ɩrɛ à à ŋá a.