Read Dagara, Northern Ʋrɔm 10 Bible Online

Ʋrɔm 10 - Dagara, Northern bible

Ʋrɔm 10

¹Yɛbr i, a ʋlɩ bom nɛ ɩ̃ na bɔbr'ɩ ɩ̃ pʋɔ za, ɛ́ zɛlɛ a Naaŋmɩn zie a Zifʋ mɩnɛ ƴãw a, ʋlɛ n'ɩ kɛ́ bɛ nyɛ̃ a faafʋ.

²Sɩza n'a, ɩ̃ na tʋ̃ɔ́ na dɩ a bɛ dãsɩɛ bɛ na tʋlɛ a Naaŋmɩn yele pùor-tub ƴãw a, ɛcɛ a tʋlʋ ŋa bɛ na tʋlɛ a bɛ tu Naaŋmɩn bãwfʋ sɩza ɩ.

³Bʋ̃ʋ n'ʋ vɛ̃, bɛ bɛ tɩ bãw a lɛ a Naaŋmɩn na mɩ́ ɩ a nɩsaalbɛ bɛ lɩɛbɩ nɩ-mɩn a ʋ niŋé a ɩ, ɛ́ tɩ bɔbr kɛ́ bɛ tɛr bɛ tʋɔra tub a al ƴãw. À ŋá n'a bɛ bɛ tɩ sàw de a lɛ a Naaŋmɩn na mɩ́ ɩ a nɩsaalbɛ ɩ nɩ-mɩn a ʋ niŋé a ɩ.

⁴Bʋ̃ʋ n'ʋ vɛ̃, a Kɩrɩta maal'ɩ a ʋlɩ bom nɛ a Moyiir wulu na tɩ bɔbr k'ʋʋ ɩ a, kɛ́ sob nɛ za na sàw de a tʋ̃ɔ́ lɩɛbɩ nɩ-mɩŋa a Naaŋmɩn niŋé.

⁵À ŋá n'a a Moyiir sɛb càar'ɩ a mɩnʋ na na tʋ̃ɔ́ yi a Wulu pʋɔ a: «Sob nɛ na sàw a Wulu nɛ-ƴãwnɩ a, a na ɩ na k'ʋ vʋʋrɛ[25].»

⁶Ɛcɛ à ŋá n'a a ƴɛ̀rʋ na ƴɛ̀r càar'ɩ a mɩnʋ na na tʋ̃ɔ́ yi a sàw-deb pʋɔ a ƴɛ̀r: «Taa tɩɛrɛ fʋ pʋɔ yere: Ãa n'ʋ na do a salom zu?» (A pɛr lɛ k'ʋʋ tɩ ɩ a Kɩrɩta ʋ siw).

⁷Bɩɩ: «Ãa n'ʋ na siw a kpɩmɛ tẽw?» (A pɛr lɛ k'ʋʋ tɩ ɩ a Kɩrɩta ʋ yi a kũuni pʋɔ do wa).

⁸A na ɩ à ŋá a, a ƴɛ̀rʋ ƴɛ̀r'a kɛ́ bo? Kɛ́: «A ƴɛ̀rʋ pɩɛl'ɩ fʋ na, ʋ be n a fʋ nʋɔrɩ́ nɩ a fʋ socir pʋɔ[26].» A ƴɛ̀rʋ ŋa ɩ n a ƴɛ̀rʋ na càarɩ a sàw-deb a, a ƴɛ̀rʋ ŋa n'ʋ tɩ hiere.

⁹A fʋ nʋɔr wa háa yel k'aa Yeezu n'ɩ a Sore a, ɛ́ fʋ̃ʋ wa sàw de nɩ fʋ pʋɔ za k'aa Naaŋmɩn ɩ na k'ʋ lɛb yi a kũuni pʋɔ a, fʋ na nyɛ̃ nɩ a faafʋ.

¹⁰A sàw de nɩ a pʋɔ za, alɛ n'a waar'ɩ a mɩnʋ, ɛ́ a nʋɔr na háa yel a pʋɔ n'a a faafʋ yire.

¹¹Bʋ̃ʋ n'ʋ vɛ̃, a Sɛb-sõw yere nɩ à ŋá: «Sob nɛ za na sàw de ʋ a, ʋ kʋ̃ nyɛ̃ vĩ ɛ[27].»

¹²A na ɩ à ŋá a, owru bɛ ka a Naaŋmɩn zie a Zifʋ mɩnɛ nɩ a bɛl na bɛ ɩ Zifʋ mɩnɛ a ƴãw ɛ: bɛ za lãw nɩ a Sore been, na mɩ́ kʋ̀ a ʋ na-bome a bɛlɩ dem za na bʋɔlɛ ʋ a.

¹³Bʋ̃ʋ n'ʋ vɛ̃, a Sɛb-sõw yel'a kɛ́: «Sob nɛ za na bʋɔlɛ a Sore yúor a na nyɛ̃ nɩ a faafʋ[28].»

¹⁴Ɛcɛ ŋmɩŋmɩn n'a bɛ na bʋɔlɩ ʋ, ɛ́ bɛ sàw de ʋ? Ɛ́ ŋmɩŋmɩn n'a bɛ na sàw de ʋ, ɛ́ bɛ wõ a ʋ yele? Ɛ́ ŋmɩŋmɩn n'a bɛ na ɩ wõ a ʋ yele, nɩr bɛ wa be be hiere a ʋ yele a?

¹⁵Ɛ́ ŋmɩŋmɩn n'a bɛ na ɩ hiere a ʋ yele, bɛlɛ bɛ wa tõ nɩbɛ a al ƴãw a? Mɛ̃ a lɛ a Sɛb-sõw na yel a: «Nyɛ̃ a yel-vɩɛlɩ yerbɛ waa na vɩɛl a![29]»

¹⁶Ɛcɛ a nɩbɛ za bɛ nɛbɛ sàw de a Yel-nʋ̃ɔ̀ ɩ. Bʋ̃ʋ n'ʋ vɛ̃, Ɩzayi yere nɩ à ŋá: «Sore e, ãa n'ʋ sàw de a yel tɩ na hieri a?[30]»

¹⁷A na ɩ à ŋá a, a sàw-deb mɩ́ yi n a yel fʋ na wõ a zie, ɛ́ a yel fʋ na wõ a ɩ a Kɩrɩta ƴɛ̀rʋ.

¹⁸Lɛ n'a ɩ̃ pãa sowre: a Zifʋ mɩnɛ taa ɩrɛ bɛ wa wõ a yel ŋa ʋ? Bʋnʋ ɩ, bɛ wõ ʋ na! À ŋá n'a a Sɛb-sõw yere: «A bɛ kɔkɔr yi na làarɩ a tẽw za, ɛ́ a bɛ ƴɛ̀rʋ tɔ a tẽw baarʋ ziir za[31].»

¹⁹Lɛ n'a ɩ̃ pãa sowre a: a Ɩsɩrayɛl nɩbɛ bɛ bãw a pɛr bɩɩ? Bʋnʋ ɩ, Moyiir de nɩ niwn yel à ŋá: «A Naaŋmɩn yere na: Ɩ̃ na ɩ na nyɩ nyuur'ɩ nɩbɛ na bɛ ɩ nɩ-bʋʋrɛ mɩ̀ a, ɩ̃ na ɩ na a nyɩ suur ír nɩ-bʋʋrɛ na bɛ tɛr yã a ƴãw[32].»

²⁰Ɩzayi ʋl sʋ̃ɔm'a sàw yel: «A Naaŋmɩn yere na: A bɛlɩ dem na bɛ tɩ bɔbr mɛ̃ a, bɛ nyɛ̃ m'a, a bɛlɩ dem na bɛ tɩ sowre mɛ̃ a, ɩ̃ ɩ na bɛ nyɛ̃ m[33].»

²¹Ɛcɛ à ŋá n'a ʋ yel càar'ɩ a Ɩsɩrayɛl nɩbɛ: «Ɩ̃ tur'ɩ nuru bibi-ɓil za cɔw nɩbɛ na bɛ sàwr nʋɔr ɛ́ ɩ nɩ-gaarɩ a[34].»