Read Dagara, Northern Ʋrɔm 11 Bible Online

Ʋrɔm 11 - Dagara, Northern bible

Ʋrɔm 11

¹A na ɩ à ŋá a, sowru n'a ɩ̃ sowre: a Naaŋmɩn ya jɛ n a ʋ nɩ-bʋʋrɛ Ɩsɩrayɛl bɛr a baarɩ bɩɩ? Lɛ bɛ n'a towtow ɛ! Bʋ̃ʋ n'ʋ vɛ̃, a mãa tɔr za ɩ n Ɩsɩrayɛl nɩr, Abraham bʋʋrɛ, Bɛ̃zamɛ dɔwlʋ nɩr.

²Naaŋmɩn bɛ jɛ a ʋ nɩbɛ ʋ na tɩ dãw kaa ír a bɛr ɛ. Mɛ̃ nyɩ taa bãw a lɛ a Sɛb-sõw na yel a ʋ zie kãw, a lɛ a naaŋmɩn-ƴɛ̀r-manɛ Eli na tɩ manɛ a Ɩsɩrayɛl nɩbɛ sãwna a Naaŋmɩn zie a?

³«Sore e, bɛ kʋ n a fʋ ƴɛ̀r-manbɛ, ɛ́ da a fʋ bàwr-maal-kube lɔb: mãa yõ n'ʋ cɛ, ɛ́ bɛ bɔbr a ɩ̃ kʋb[35].»

⁴Ɛcɛ bʋ̃ʋ n'ʋ a Naaŋmɩn sɔw ʋ? «Ɩ̃ cãà na bɛr nɩbɛ túr-ayopõi (7 000) a ɩ̃ ƴãw, a bɛl na bɛ gbĩ dume a tɩɩb na dɩ kɛ́ Báàl a niŋé a[36].»

⁵Lɛ mɩ̀ n'a, a ƴɛrɛŋa, nɩbɛ ŋmãa blãlɛ, a Naaŋmɩn na kaa ír a ʋ maalʋ zũú a, mɩ̀ cãà be be.

⁶Ʋlɛ wa kaa ír bɛ a ʋ maalʋ zũú a, a bɛ ɩ-ɩrɩ zũú bɛ n'a ɩ, alɛ bɛ ɩ lɛ a, a maalʋ bɛ cãà ɩ maalʋ ɛ.

⁷Ŋmɩŋmɩn za n'a? A Ɩsɩrayɛl nɩbɛ bɛ páw a ʋlɩ bom nɛ bɛ na tɩ bɔbr a ɩ. Ɛcɛ a bɛlɩ dem a Naaŋmɩn na kaa ír a, bɛl páw ʋ na. A ŋmaarɛ bɛl a, bɛ kpawl'ɩ bɛ za,

⁸mɛ̃ a Sɛb-sõw na yere a: «Wa tɩ tɔ a dɩ̃a bibir a, Naaŋmɩn ɩ na a bɛ tɩɛrʋ ʋ gbini, ʋ ƴãw bɛ nɩ mimie kɛ́ bɛ ta nyɛrɛ nɩ ɛ, ƴãw bɛ tobe kɛ́ bɛ ta wone nɩ ɛ[37].»

⁹A nãà Daviir mɩ̀ yere nɩ à ŋá: «A bɛ cuw dɩb, a ɩ bɛrɩ nɩ mɩ̃ɛ a bɛ zie, a ɩ fa-loba zie nɩ dɔwrʋ na sɛwnɩ bɛ a páwfʋ zie.

¹⁰A bɛ mimie, a zɔ̃wnɛ ta tɩ cãà nyɛrɛ ɩ, ɩ bɛ tuo tuor kʋralɛ gʋr'ɩ zɩgɛ.»

¹¹A na ɩ à ŋá a, sowru n'a ɩ̃ sowre: lo ɛ́ ta lɛb ìr ƴãw n'a a Zifʋ mɩnɛ ŋmɛ a gbɛ́r bɩɩ? Lɛ bɛ n'a towtow ɛ! Ɛcɛ a bɛ sãwna ɩ na a nɩ-bʋʋr-yoru nyɛ̃ a faafʋ, kɛ́ nyuur tʋ̃ɔ́ ɩrɛ a Zifʋ mɩnɛ.

¹²A bɛ sãwna wa ƴãw a tẽ-daa naalʋ a, a bɛ nʋɔr na siwri a wa ƴãw a nɩ-bʋʋr-yoru naalʋ a, ŋmɩŋmɩn n'a a pãa nãà ŋmɛ̃ a lɛn daar bɛ za nãà wa nyɛ̃ a faafʋ a!

¹³Ƴɛrɛŋa a, a nyɩɩm nɩ-bʋʋr-yoru zie n'a ɩ̃ ƴɛ̀rɛ: mãa n'ɩ a nɩ-bʋʋr-yoru nɩ-tona, ɛ́ a lɛ pʋɔ a, ɩ̃ íre nɩ a ɩ̃ tõ-nʋɔr ŋa yúor,

¹⁴tɩɛrɛ nɩ k'ɩ̃ɩ ɩ a ɩ̃ bʋʋrɛ nyuur ìr, ɩ̃ tʋ̃ɔ́ faa bɛ mɩnɛ.

¹⁵A bɛ vɩrɩ-bɛrʋ wa ɩ a Naaŋmɩn nɩ a tẽ-daa lɛb kpɛ taa a, a pãa na ŋmɛ̃ n ŋmɩn a lɛn daar ʋ nãà wa lɛb de bɛ a? A na sɩrɩ na ɩ kũu pʋɔ bɛ na yi kpɛ nyɔ-vʋʋrʋ pʋɔ a!

¹⁶Bɛlɛ wa de a dipɛ̃-dãw kʋ̀ a Naaŋmɩn a, a dipɛ̃ za n'a bɛ mɩ̀ de kʋ̀ ʋ. Bɛlɛ wa de tɩɛ kãw nyɩgɛ kʋ̀ a Naaŋmɩn a, bɛ mɩ̀ de nɩ a wuli kʋ̀ ʋ[38].

¹⁷A Ɩsɩrayɛl nɩbɛ wa ɩ mɛ̃ olivʋ tɩ-kʋ́ɔra a Naaŋmɩn na cɛ a wuli a mɩnɛ bɛr a, ɛ́ a fʋ̃ʋ, na bɛ ɩ Zifʋ ɛ́ ɩ mɛ̃ mʋ̃ɔ pʋɔ olivʋ tɩɛ a, a Naaŋmɩn wa de fʋ ɓɛrɩ nɩ a olivʋ tɩ-kʋ́ɔra, fʋ pʋɔ a ʋ wuli na cɛ a pʋɔ páwr a tɩ-nyɩgɛ kʋ̃ɔ a,

¹⁸ta zɛwr fʋ tʋɔra mɛ̃ fʋ zuo nɩ a wuli bɛ na cɛ bɛr a ɩ. Fʋ̃ʋ wa zɛwr fʋ tʋɔra mɛ̃ fʋ zuo a na a, fʋ̃ʋ bãwnɩ a fʋ̃ʋ na bɛ n'ʋ so a tɩ-nyɩgɛ be a, a tɩ-nyɩgɛ n'a so fʋ be.

¹⁹Mɛ̃ fʋ taa na yel mɛ̃: «Bɛ cɛ n a wuli á ŋá ŋma, kɛ́ bɛ tʋ̃ɔ́ de mɛ̃ ɓɛr'ɩ a tɩɛ lɩɛr'ɩ a.»

²⁰Sɩza n'a, bɛ cɛ a na ŋma bɛr, a na bɛ sàw de a ƴãw, ɛ́ fʋ̃ʋ a, a fʋ sàw-deb zũú n'a fʋ lɩɛr'a. Ɛcɛ taa wa ɩrɛ pɔ̀l-ɩb ɛ, nɩ̃ɛ vɛ̃ kɛ́ zɔrɛ a Naaŋmɩn.

²¹Bʋ̃ʋ n'ʋ vɛ̃, a Naaŋmɩn bɛ wa jɩɩrɩ a tɩɛ wuli tɛɛ za bɛr a, a pɛr lɛ k'aa Zifʋ mɩnɛ a, ʋ mɩ̀ kʋ̃ jɩɩrɩ fʋ bɛr ɛ.

²²A na ɩ à ŋá a, jɩ́r nyɛ̃ a lɛ a Naaŋmɩn vɩɛlʋ na ɩ a, nɩ a Naaŋmɩn na bɛ tɛr dɩ̃ɛnʋ a: ʋ bɛ tɛr dɩ̃ɛnʋ a bɛlɩ dem na lo a zie ɩ, ɛ́ tɛr a ʋ vɩɛlʋ ɩb a fʋ zie. Ɛcɛ a fɛr'a fʋ cãà ɩrɛ ƴãwn a vɩɛlʋ ŋa ƴãw, alɛ bɛ ɩ lɛ, bɛ mɩ́ na cɛ b'a ŋmãa bɛr mɛ̃ wule a.

²³A Zifʋ mɩnɛ ƴãw a, bɛlɛ wa lɛb sàw de a, Naaŋmɩn na ɩ na bɛ lɛb ɓɛrɩ a tɩɛ, bʋ̃ʋ n'ʋ vɛ̃, ʋ tɛr'ɩ fãw na ɩ bɛ lɛb ɓɛrɩ a tɩɛ.

²⁴Fʋ̃ʋ a, fʋ ɩ n mʋ̃ɔ pʋɔ olivʋ tɩɛ wule tɔr za, a Naaŋmɩn na ŋmãa wa ɓɛrɩ nɩ olivʋ tɩ-kʋ́ɔra a, ɛcɛ à ŋá bɛ n'a a ɩrɛ ɩ. A Zifʋ mɩnɛ bɛl a, bɛ ɩ n a olivʋ tɩ-kʋ́ɔra ŋa wuli tɛɛ za: a na ɩ à ŋá a, Naaŋmɩn na pãa nɩ̃ɛ na tʋ̃ɔ́ ɩ a lɛb ɓɛrɩ a al mɩŋa tɩɛ ƴãw mɔlɛ lɛ.

²⁵Yɛbr i, ɩ̃ bɔbr'a k'ɩ̃ɩ ɩ nyɩ bãw a Naaŋmɩn yel-sɔwla ŋa, kɛ̀ nyɩ taa wa de nyɩ tʋɔra bʋɔlɛ yã-bãwnbɛ ɩ: a Ɩsɩrayɛl nɩbɛ ŋmãa na kpawl'a, ɛ́ gù a nɩ-bʋʋr-yoru za tɩ nyɛ̃ a faafʋ.

²⁶Ɛ́ à à ŋá n'a a Ɩsɩrayɛl nɩbɛ za na nyɛ̃ a faafʋ, mɛ̃ à ŋá a Sɛb-sõw na yere a: «Sɩyɔ̃ tẽw n'a a Faarɛ na yi wa, ʋ na ɩ na a Naaŋmɩn bɛ-ƴãwfʋ ɩ-ɩrɩ baarɩ a Zakɔb bʋʋrɛ zie.

²⁷Ɛ́ a Wõ-taa n'ɩ ŋa ɩ̃ na na maal'ɩ bɛ, a lɛn daar ɩ̃ nãà wa ír a bɛ yel-bebe bɛr a[39].»

²⁸A bɛ Yel-nʋ̃ɔ̀ bɛ-sàw-deb ƴãw wa n'a a, bɛ ɩ n Naaŋmɩn dɔ̃ dem a nyɩɩm vla ƴãw, ɛcɛ alɛ wa ɩ a kaa-íru a Naaŋmɩn na kaa ír bɛ a ƴãw n'a a, ʋ cãà na nɔnɛ bɛ, a bɛ sãàkʋm-kore zũú.

²⁹Bʋ̃ʋ n'ʋ vɛ̃, a Naaŋmɩn maalʋ nɩ a ʋ bʋɔlʋ bɛ tɛr lɩɛb-bɛrʋ ɛ.

³⁰A koro za a, nyɩ tɩ zawr'ɩ a Naaŋmɩn nʋɔr, ɛcɛ ƴɛrɛŋa a, ʋ zɔ n a nyɩ nɩbaalʋ, a Ɩsɩrayɛl nɩbɛ na zawrɩ a nʋɔr a ƴãw.

³¹Lɛ n'a a bɛl mɩ̀ a ƴɛrɛŋa, bɛ zawrɩ a Naaŋmɩn nʋɔr, k'ʋʋ tʋ̃ɔ́ zɔ a nyɩ nɩbaalʋ, kɛ́ a bɛl mɩ̀ tʋ̃ɔ́ páw a nɩbaalʋ zɔba ŋa tɔr za a ƴɛrɛŋa.

³²Bʋ̃ʋ n'ʋ vɛ̃, Naaŋmɩn pàw nɩ a nɩsaalbɛ za a nʋɔr-zawrʋ gaso pʋɔ, k'ʋʋ tʋ̃ɔ́ wul bɛ za a ʋ su-ɓaarʋ.

³³Nyɛ̃ a Naaŋmɩn naalʋ na bɛ vʋʋr a! Nyɛ̃ a ʋ yã-bãwfʋ nɩ a ʋ yele bãwfʋ na zulme a! Nyɛ̃ a ʋ ƴɛ̀rʋ-dɩb na bɛ tɛr bãwfʋ, ɛ́ a ʋ sɛ́ɛ bɛ tɛr bɩ́ɛrʋ a!

³⁴Mɛ̃ à ŋá a Sɛb-sõw na yere a: «Ãa n'ʋ bãw a Sore tɩɛrʋ? Bɩɩ ãa n'ʋ dãw wul ʋ yã?[40]

³⁵Bɩɩ ãa n'ʋ dãw de niwn kʋ̀ ʋ bom, a fɛr k'ʋʋ mɩ̀ kʋ̀ ʋ yáa a san?[41]»

³⁶Bʋ̃ʋ n'ʋ vɛ̃, ʋl zie n'a bom za yi, ʋlɛ n'ʋ so bom za be, ʋl ƴãw n'a bom za be. Ʋlɛ so yúor-vɩɛlʋ-danʋ a yome yome za! Amɛn.