Read Dagara, Northern Ʋrɔm 16 Bible Online

Ʋrɔm 16 - Dagara, Northern bible

Ʋrɔm 16

¹Ɩ̃ zɛlɛ na kɛ́ nyɩ tɛr maal-ɩrɛ a tɩ yeepuule Febe ƴãw, ʋl na kaarɛ a Sãkire Lãw-yir zie a.

²Nyɩ sàw de ʋ vla a Sore yúor ƴãw, mɛ̃ a lɛ a na sɛw taa nɩ kɩrɩta-nɩbɛ zie a, ɛ́ nyɩ sõw ʋ yel za ƴãw, ʋ nãà wa tɛr a nyɩ yel-ɩra a. Bʋ̃ʋ n'ʋ vɛ̃, ʋ sõw nɩ nɩ-yaga nɩ a mãa mɩŋa.

³Nyɩ puori Pɩrɩsɩl nɩ Akɩlasɩ kʋ̀ m, bɛl na ɩ a ɩ̃ lãw-tõ-taabɛ a Yeezu Kɩrɩta tome pʋɔ a.

⁴Bɛ tɩ cɛ nɩ blã na kpi a ɩ̃ faafʋ ƴãw. Mãa yõ bɛ n'ʋ tɛr a bɛ maalʋ ŋa tɩɛrʋ ɛ, a nɩ-bʋʋr-yoru Lãw-yie za mɩ̀ tɛr'ɩ a ʋ tɩɛrʋ.

⁵Nyɩ mɩ̀ puori a Lãw-yir ʋl nɩbɛ na ɓanɛ taa a bɛ yir a. Nyɩ puori a ɩ̃ bá Epɛnɛtɩ, na ɩ a dãw-niwn sob na sàw de a Kɩrɩta a Azi tẽw a.

⁶Nyɩ puori a Marya na hanɩ hanɩ a nyɩ ƴãw a.

⁷Nyɩ puori Ãdoronikisɩ nɩ Zinɩasɩ na ɩ a ɩ̃ nɩbɛ, ɛ́ lãw nɩ mɛ̃ kpɛ a gaso a. Nɩ-toni na ɩ nɩ-toni a nɛbɛ, ɛ́ bɛ mɔ̃ mɩ̀ de nɩ niwn sàw de a Kɩrɩta a ɩ̃ ƴãw.

⁸Nyɩ puori Ãpiliyatisi ɩ̃ na nɔnɛ a Sore pʋɔ a.

⁹Nyɩ puori Irbɛ̃, tɩ lãw-tõ-tɔ a Kɩrɩta tome pʋɔ, nɩ a ɩ̃ bá Sɩtakɩsɩ.

¹⁰Nyɩ puori Apɛl na wul a sãá ʋ na sàw de a Kɩrɩta a. Nyɩ mɩ̀ puori a Arɩsɩtobul yir dem.

¹¹Nyɩ puori a ɩ̃ nɩr Erodɩ̃ɔ, ɛ́ mɩ̀ lɛb puori Narsɩsɩ yir dem na sàw de a Sore a.

¹²Nyɩ puori Tɩrɩfɛn nɩ Tɩrɩfozi na hanɩ a Sore ƴãw a, ɛ́ mɩ̀ puori a ɩ̃ sɛn Pɛrsisɩ na hanɩ yaga za a Sore ƴãw a.

¹³Nyɩ puori Irifisɩ, a Sore tõ-tõ-bi-yúor, nɩ a ʋ mã mɩ̀ na ɩ mã a ɩ̃ zie a.

¹⁴Nyɩ puori Asɛ̃kiritɩ, nɩ Filegɔ̃, nɩ Ɛrmɛsɩ nɩ Patorobasɩ nɩ Ɛrmasɩ nɩ a yɛbr bɛl na be a bɛ zie a.

¹⁵Nyɩ puori Fɩlɔlɔgɩ nɩ Zili, Neere nɩ a ʋ yeepuule Olɛ̃pasɩ nɩ a kɩrɩta-nɩbɛ bɛl za na be a bɛ zie a.

¹⁶Nyɩ weri taa puori taa nɩ nɔ̃wfʋ na vɩɛl a. A Kɩrɩta Lãw-yie za puore nyɩ na.

¹⁷Yɛbr i, ɩ̃ kpaalɛ nyɩ na kɛ́ nyɩ gùre nyɩ tʋɔra a bɛlɩ dem na bɛ dier a wulu bɛ na kʋ̀ nyɩ a ƴãw, ɛ́ mɩ́ ƴãwnɛ bʋ́r-taa a kɩrɩta-nɩbɛ sɔgɔ, ɛ́ ɩrɛ bɛ bɔrɛ a. Nyɩ taw zãá nɩ bɛ,

¹⁸bʋ̃ʋ n'ʋ vɛ̃, a nɩbɛ bɛ ŋa taabɛ bɛ kaarɛ a Kɩrɩta tɩ Sore yele zie ɩ, bɛl nyagɛ zie n'a bɛ kaarɛ. Ƴɛ̀r-vɩɛlɩ nɩ nɔ-kãá n'a bɛ mɩ́ tɛr bɛ̀lɛ nɩ a nɩbɛ bɛl na bɛ tɛr a mɩnɛ kãw a.

¹⁹A Sore nʋɔr nyɩ na sàwr a, a nɩbɛ za wõ n a yele. Lɛ so nʋ̃ɔ̀ ɩrɛ mɛ̃ a nyɩ ƴãw, ɛcɛ ɩ̃ bɔbr'a kɛ́ nyɩ ɩ yã-bãwnbɛ ɩrɛ a vla, ɛ́ vɩɛl dɛrɛ a faa.

²⁰A Naaŋmɩn na ɩ a ƴã-ɓaarʋ sob a kʋ̃ yaa kɛ́ ƴɛ́r a Sɩtaana ŋmɛr bin a nyɩ gbɛ́ɛ pile ɩ. A tɩ Sore Yeezu maalʋ, ʋ be a nyɩ zie!

²¹A ɩ̃ lãw-tõ-tɔ Timote puore nyɩ na, ʋlɛ nɩ Lisiisɩ nɩ Zazɔ̃ nɩ Sosipatɛɛr na ɩ a ɩ̃ nɩbɛ a.

²²Ɛ́ mãa, Tɛrsiisɩ[51] na sɛb a sɛbɛ ŋa a, ɩ̃ lãw nɩ nɩ a Sore puore nyɩ.

²³Gayisɩ, na de mãa nɩ a Lãw-yir za a sãanʋ a, puore nyɩ na. Ɛrasɩ na ɩ a tẽw libi-bine a, puore nyɩ na, ʋlɛ nɩ a tɩ yɛb Kartisɩ. [

²⁴A tɩ Sore Yeezu Kɩrɩta maalʋ, ʋ be a nyɩ za zie. Amɛn.]

²⁵Naaŋmɩn so danʋ! Ʋ tɛr'ɩ fãw na ɩ tɩ kpɛmɛ a sàw-deb pʋɔ tu n a Yel-nʋ̃ɔ̀ ɩ̃ na hiere manɛ nɩ a Yeezu Kɩrɩta yele a, ɛ́ mɩ̀ tu n a Naaŋmɩn pʋ-tɩɛr-sɔwla ʋ na ɩ tɩ bãw a. A pʋ-tɩɛrʋ ŋa tɩ sɔwl'ɩ a dɩta-pɛ-yome za,

²⁶ɛcɛ ƴɛrɛŋa a, a naaŋmɩn-ƴɛ̀r-manbɛ sɛbr ɩ na k'ʋ yi cãàmɩ́. Mɛ̃ a lɛ a Naaŋmɩn na be kʋralɛ a na ƴãw a nʋɔr a, bɛ ɩ na a nɩ-bʋʋrɛ za bãw a pʋ-tɩɛrʋ ŋa, kɛ́ bɛ tʋ̃ɔ́ sàw de a Naaŋmɩn ɛ́ sàwr a ʋ nʋɔr.

²⁷A Naaŋmɩn yõ na ɩ yã-bãwnɛ a, ʋlɛ so yúor-vɩɛlʋ-danʋ a Yeezu Kɩrɩta ƴãw, a yome yome za! Amɛn.