Read Dagara, Northern Ʋrɔm 2 Bible Online

Ʋrɔm 2 - Dagara, Northern bible

Ʋrɔm 2

¹A na ɩ à ŋá a, fʋ̃ʋ saa ɩ nɩ-ŋmɩŋmɩn a, fʋ kʋ̃ tʋ̃ɔ́ yel kɛ́ fʋ bɛ bãw kɛ́ lɛ ɩ, fʋ̃ʋ na bãwnɛ a fʋ tɔ yele a. Fʋ na bãwnɛ a fʋ tɔ yele a, a fʋ mɩŋa sãwna n'a fʋ wule, fʋ̃ʋ mɩ̀ na mɩ́ ɩrɛ a lɛ tɔr za a.

²Ɛcɛ, tɩ bãwnɩ a na, a bɛlɩ dem na mɩ́ tɛr a ɩ-ɩrɩ á ŋá taabɛ a, Naaŋmɩn mɩ́ maal'ɩ bɛ nɩ a ƴɛ̀rʋ a tu yel-mɩŋa.

³Fʋ̃ʋ na bãwnɛ a fʋ taabɛ yel-faar ɛ́ mɩ̀ tɛr a alɩ yel-faar nɛ a, fʋ tɩɛrɛ kɛ́ fʋ na tʋ̃ɔ́ na nɩɩrɩ a Naaŋmɩn dɔwrʋ bɛr bɩɩ?

⁴Bɩɩ fʋ bɛ ŋmɛlɛ kaar a Naaŋmɩn ɩ-vɩɛlɩ na bɛ dɩ vuo a, nɩ a ʋ su-bɛ-pawra nɩ a ʋ su-nyɔwra ʋ na tɛr a fʋ zie a ɩ? Fʋ bɛ bãwnɩ a k'aa Naaŋmɩn ɩ-vɩɛlɩ á ŋá fɛrɛ fʋ na kɛ́ fʋ lɩɛbɩ a fʋ ɩb ɛ?

⁵A fʋ zu-kpɛnʋ ƴãw, nɩ fʋ na yel kɛ́ fʋ kʋ̃ lɩɛbɩ a fʋ ɩb a, fʋ cɔbrɛ nɩ dɔwrʋ na ta dɔwrʋ a a fʋ mɩŋa ƴãw, gùre nɩ a Naaŋmɩn suur bibir nɩ a ʋ ƴɛ̀rʋ maalʋ na tu yel-mɩŋa a bibir nãà wa vɩɛ a,

⁶a bibir ʋl ʋ na na kʋ̀ ŋa za man nɩ a ʋ ɩb a[2].

⁷A bɛlɩ dem na su zu ɩrɛ vla bɔbr'ɩ a yúor-vɩɛlʋ-danʋ nɩ a ƴãwfʋ, nɩ a nyɔ-vʋʋrʋ na be kʋralɛ a, bɛlɛ so a nyɔ-vʋʋrʋ na be kʋralɛ a.

⁸Ɛcɛ, a bɛlɩ dem na ɩ a nɩsaal-gaarɩ, bɛ sàwr a yel-mɩŋa ɛ́ tuur a ɩ-faar a, Naaŋmɩn suur, su-tʋlʋ, na ìr'ɩ a bɛ zu.

⁹Nɩsaal za na maalɛ faa a, ʋlɛ so kpɩɛrʋ nɩ pʋl-vʋ̃ɔ, a Zifʋ n'ɩ a dãw-niwn sob, al pùorí, a sob nɛ na bɛ ɩ Zifʋ a.

¹⁰Ɛcɛ, sob nɛ za na ɩrɛ vla a, ʋlɛ so yúor-vɩɛlʋ-danʋ, ƴãwfʋ nɩ ƴã-ɓaarʋ, a dãw-niwn sob n'ɩ a Zifʋ, al pùorí sob nɛ na bɛ ɩ Zifʋ a.

¹¹Naaŋmɩn sɩrɩ bɛ mɩ́ kpɛ ŋa ɛ́ bɛr ŋa ɩ.

¹²Bɛlɩ dem za na bɛ tɩ bãw a Moyiir wulu ɛ́ maalɩ yel-bier a, bɛ na kpi n a Wulu bɛ-bãwfʋ kũu. Ɛcɛ bɛlɩ dem za na tɩ bãw a Wulu ɛ́ maalɩ yel-bier a, a Wulu ŋa n'ʋ bɛ na maal'ɩ bɛ a ƴɛ̀rʋ.

¹³Bɛlɩ dem na mɩ́ bɛrɛ wone a Wulu bɛr-wob tɛwr a, bɛlɛ bɛ nɛbɛ mɩ́ páw a mɩnʋ a Naaŋmɩn zie ɩ, bɛlɩ dem na mɩ́ dier a Wulu a, bɛlɛ nɛbɛ na páw a mɩnʋ.

¹⁴A lɛn daar nɩ-bʋʋr-yoru na bɛ bãw a Naaŋmɩn wulu a, na mɩ́ wa nyɛ̃ bɛ tʋɔra ɩrɛ mɛ̃ a lɛ a Wulu na ƴãw a nʋɔr a, bɛl mɩŋa mɩ́ bãw nɩ a lɛ a na sɛw kɛ́ bɛ ɩrɛ a, bɛl na saa bɛ bãw a Naaŋmɩn wulu a.

¹⁵Bɛ mɩ́ wul'a k'aa lɛ a Wulu na bɔbr kɛ́ nɩr za ɩrɛ a, sɛb'ɩ a bɛ pʋ̃ɔmɩ. A bɛ pʋɔ mɩ̀ mɩ́ dɩ n a yel ŋa dãsɩɛ, lãwnɩ a bɛ tɩɛrʋ na mɩ́ yel a mɩnɛ kãw kɛ́ bɛ sãw na a, ɛ́ a mɩnɛ kãw ʋ yel kɛ́ bɛ bɛ sãw a.

¹⁶A yele á ŋá n'a na sãá a bibir ʋl, a Naaŋmɩn na na ƴãw a Yeezu Kɩrɩta maal'ɩ a nɩsaalbɛ ƴɛ̀rʋ a bɛ yel-sɔwlɩ ƴãw a, mɛ̃ a lɛ a Yel-nʋ̃ɔ̀ ɩ̃ na hiere a na yel a.

¹⁷Ɛcɛ fʋ̃ʋ a, fʋ̃ʋ na dɩ kɛ́ Zifʋ a, fʋ ɩrɛ na ƴãwn a Naaŋmɩn wulu ƴãw ɛ́ nyʋʋr a fʋ Naaŋmɩn ƴãw.

¹⁸Fʋ bãw nɩ a lɛ ʋ na bɔbr a, ɛ́ a ʋ Wulu wul fʋ fʋ bãw a vla kaa-íru.

¹⁹Fʋ̃ʋ zie a, bʋnʋ bɛ ka be ɩ, fʋ ɩ n a zɔn tawrɛ, a bɛlɩ dem na be a lige pʋɔ a cãà,

²⁰a bɛlɩ dem na bɛ bãw bom za a wul-wule, a bɛlɩ dem na bɛ bãw bom sɛr a wul-wule, fʋ na bãw k'aa Naaŋmɩn wulu ɩ n a bãwfʋ nɩ a yel-mɩŋa ŋmɛ̃a tɔr za a ƴãw.

²¹A na ɩ à ŋá a, fʋ̃ʋ na wule a fʋ tɔ a, bʋ̃ʋ n'ʋ so fʋ bɛ wule fʋ tʋɔra? Fʋ̃ʋ na kanɛ kɛ́ bɛ ta zure a, bʋ̃ʋ n'ʋ so fʋ zure?

²²Fʋ̃ʋ na yere kɛ́ bɛ ta maalɛ pɔw-gaa-yel-bier a, bʋ̃ʋ n'ʋ so fʋ maalɛ a pɔw-gaa-yel-bier? Fʋ̃ʋ na hɩ̃ɛn a tɩbɛ a, bʋ̃ʋ n'ʋ so fʋ wobr a tɩbɛ diru pʋɔ bome?

²³Fʋ̃ʋ na ɩrɛ pɔ̀lʋ nɩ a Naaŋmɩn wulu a, bʋ̃ʋ n'ʋ so fʋ zawrɛ a Wulu, sãwnɛ nɩ a Naaŋmɩn yúor?

²⁴Bʋ̃ʋ n'ʋ vɛ̃, a Sɛb-sõw yel'a: «Nyɩmɛ nɛbɛ so a nɩ-bʋʋr-yoru ɩrɛ a Naaŋmɩn laar[3].»

²⁵Fʋ̃ʋ wa dier a Naaŋmɩn wulu a, a yʋɔr-ŋmãafʋ tɛr'ɩ yel-ɩra a fʋ zie. Ɛcɛ fʋ̃ʋ wa zawrɛ a Naaŋmɩn wulu a, fʋ̃ʋ nɩ a fʋ yʋɔr-ŋmãafʋ za a, fʋ ɩ na mɛ̃ nɩr na bɛ ŋmãa yʋ̀ɔr a.

²⁶A nɩr na bɛ ŋmãa yʋ̀ɔr a, ʋlɛ wa sàwr a nɛ́ɛ a Naaŋmɩn wulu na ƴãw a, Naaŋmɩn kʋ̃ sàw kʋ̀ ʋ k'aa yʋ̀ɔr-bɛ-ŋmãafʋ ɩ n ŋmãafʋ bɩɩ?

²⁷Ɛ́ a nɩr ʋl na bɛ ŋmãa a ƴã-gan ŋmãafʋ a, ɛ́ mɩ́ tu a Naaŋmɩn wulu tɩ ɓɩɩlɩ a, ʋ na wul'ɩ a fʋ sãwna, fʋ̃ʋ na bãw a Naaŋmɩn wulu na sɛb, ɛ́ ŋmãa a yʋ̀ɔr, ɛ́ zawrɛ a Wulu a.

²⁸Sɩza n'a, a Zifʋ tɔr za bɛ n'ɩ a sob nɛ na sãá Zifʋ a ɩ, ɛ́ bom na sãá a ƴã-ganɩ́ a bɛ n'ɩ a yʋɔr-ŋmãafʋ ɛ.

²⁹Ɛcɛ a Zifʋ tɔr za n'ɩ a sob nɛ na ɩ ʋ nɩ ʋ pʋɔ a, ɛ́ a yʋ̀ɔr ŋmãafʋ ɩ socir pʋɔ ŋmãafʋ a, yʋ̀ɔr ŋmãafʋ na yi Naaŋmɩn Vʋʋrʋ zie ɛ́ bɛ yi Wulu na sɛb a pʋɔ a. A Zifʋ tɔr za ŋa bɛ nyɛrɛ a ʋ danʋ nɩsaalbɛ zie ɩ, Naaŋmɩn zie n'a ʋ nyɛrɛ a ʋ danʋ.