Read Dagara, Northern Ʋrɔm 3 Bible Online

Ʋrɔm 3 - Dagara, Northern bible

Ʋrɔm 3

¹A na ɩ à ŋá a, fʋ na ɩ a Zifʋ a, a tɛr'ɩ tɔnɛ kãw bɩɩ? A yʋɔr-ŋmãafʋ tɛr'ɩ yel-ɩra bɩɩ?

²A tɔnɛ bɛ dɩ vuo ɩ, a za lɛ pʋɔ. A dãw-niwn sob a, Zifʋ mɩnɛ nɛbɛ a Naaŋmɩn ƴɛ̀r a ʋ ƴɛ̀rʋ kʋ̀ kɛ́ bɛ maal tɛr.

³Ɛ́ bʋnʋ? Bɛ mɩnɛ kãw wa lɛb pùor a bɛ naaŋmɩn-sàw-deb pʋɔ a, a bɛ pùor-lɛbrʋ na ɩ na a Naaŋmɩn mɩ̀ lɛb pùor bɩɩ?

⁴Lɛ bɛ n'a towtow ɛ! A fɛr'a kɛ́ Naaŋmɩn mɩ́ sãá ɩ yel-mɩŋa sob, nɩsaal za saa ɩ zir-ŋmarɛ a, mɛ̃ à ŋá a Sɛb-sõw na yel a Naaŋmɩn ƴãw a: «A fɛr'a kɛ́ bɛ mɩ́ nyɛ̃ b fʋ tɛr yel-mɩŋa a fʋ ƴɛ̀rʋ pʋɔ, fʋ mɩ́ tʋ̃ɔ́ ƴɛ̀r yi, bɛlɛ wa maalɛ nɩ fʋ ƴɛ̀rʋ a[4].»

⁵Ɛcɛ a tɩ yel-mɩŋa bɛ-tɛrʋ mɩ́ wa ɩ a Naaŋmɩn yel-mɩŋa sãá a, tɩ lɛb yel kɛ́ bo? A wul'a kɛ́ a Naaŋmɩn bɛ tɛr yel-mɩŋa ʋ na mɩ́ nyɛ̃ nɩ tɩ suur a bɩɩ? (Ɩ̃ ƴɛ̀rɛ na mɛ̃ nɩsaalbɛ a.)

⁶Lɛ bɛ n'a towtow ɛ! Alɛ bɛ ɩ lɛ, ŋmɩŋmɩn n'a a Naaŋmɩn na tʋ̃ɔ́ maal'ɩ a tẽ-daa a ƴɛ̀rʋ?

⁷Ɛcɛ, a ɩ̃ ziri mɩ́ wa ɩ a Naaŋmɩn yel-mɩŋa ʋ sãá cãàmɩ́, a ʋ yúor-vɩɛlʋ-danʋ ƴãw a, bʋnʋ ƴãw n'a bɛ cãà dɔwrɛ mɛ̃, mɛ̃ yel-bier sob a?

⁸Alɛ wa ɩ à ŋá a, bʋnʋ ƴãw n'a tɩ kʋ̃ maalɛ a faa k'aa vla wa tʋ̃ɔ́ yi a be, mɛ̃ a lɛ bɛ mɩnɛ kãw na ŋmarɛ ziri ƴãwn tɩ kɛ́ lɛ n'a tɩ yere a? A nɩbɛ bɛ ŋa sɛwnɩ nɩ a dɔwrʋ bɛ na na páw a.

⁹Ɛ́ bʋnʋ? A tɩɩm Zifʋ mɩnɛ, tɩ zuo nɩ a nɩbɛ bɩɩ? Lɛ bɛ n'a ɩ! Ɩ̃ dãw na manɩ wul k'aa nɩbɛ za, a Zifʋ mɩnɛ nɩ a bɛl na bɛ ɩ Zifʋ a, k'aa yel-bier dɩ n naalʋ a bɛ za zu,

¹⁰mɛ̃ a lɛ tɔr za a Sɛb-sõw na yel a: «Nɩ-mɩŋa bɛ ka be a ŋan ʋʋ ɩ been ɛ,

¹¹yã-bãwnɛ bɛ ka be ɩ, nɩr kãw za bɛ su zu bɔbr a Naaŋmɩn ɛ.

¹²Bɛ za bɛr'ɩ a sɔ́r vla, bɛ lãw na lɩɛbɩ nɩbɛ na bɛ tɛr bir a. Kãw za bɛ ɩrɛ vla ɩ, fʋ kʋ̃ nyɛ̃ ʋ, ʋʋ ɩ been ɛ.

¹³A bɛ kɔkɔrpʋɔ ɩ na mɛ̃ yaa bɔw-kpol a, bɛlʋ nʋɔr'ʋ bɛ ƴãw, dɔpan lɔw n'a yire a bɛ nʋɔrɩ́,

¹⁴a bɛ nʋɔr ƴɛ̀rɛ nɩ ŋmɛ-ƴãw ƴɛ̀rʋ nɩ nɔ-tuo tɛwr.

¹⁵A bɛ gbɛ́ɛ tʋ̃ɔ́ nɩ zɔba a nɩr kʋb ƴãw,

¹⁶be n za bɛ na tuur tɔlɛ a, yel-sãwnɩ nɩ kpɩɛrʋ mɩ́ gã na,

¹⁷bɛ bɛ bãw a ƴã-ɓaarʋ sɔ́r ɛ.

¹⁸Bɛ bɛ zɔrɛ a Naaŋmɩn towtow ɛ[5].»

¹⁹Tɩ bãw na k'aa alɩ bome nɛ za a Naaŋmɩn wulu na yere a, ʋ yere na kʋ̀rɛ a Zifʋ mɩnɛ a Wulu ŋa na fɛrɛ a, kɛ́ nɩr za ta tʋ̃ɔ́ háa nʋɔr manɩ a ʋ yel-mɩŋa ɩ, ɛ́ bɛ nyɛ̃ a tẽ-daa za na tɛr sãwna a Naaŋmɩn niŋé a.

²⁰A lɛ n'a so nɩr za kʋ̃ tʋ̃ɔ́ lɛb ɩ nɩ-mɩŋa a Naaŋmɩn niŋé, a Wulu ʋ na na ƴãw fãw sàwr a ƴãw ɛ, bʋ̃ʋ n'ʋ vɛ̃, a yel-bier tɛwr'ʋ a Naaŋmɩn wulu mɩ́ ɩ bɛ bãw.

²¹Ɛcɛ ƴɛrɛŋa a, a Naaŋmɩn wul tɩ nɩ a lɛ ʋ na mɩ́ ɩ tɩ ɩ nɩ-mɩn a ʋ niŋé, ɛ́ a bɛ yi a Wulu zie a. A Naaŋmɩn wulu nɩ a naaŋmɩn-ƴɛ̀r-manbɛ sɛbr tɩ dãw na dɩ a yel ŋa dãsɩɛ à ŋá:

²²Naaŋmɩn mɩ́ ɩ na a nɩsaalbɛ ɩ nɩ-mɩn a ʋ niŋé, a Yeezu Kɩrɩta bɛ na mɩ́ sàw de a zũú. A bɛlɩ dem za na sàw de a Kɩrɩta a ƴãw n'a ʋ mɩ́ ɩ a lɛ, bʋ̃ʋ n'ʋ vɛ̃, ʋ bɛ owre ɩ:

²³bɛ za nɛbɛ maalɩ a yel-bier, bɛ za nɛbɛ bɛ páw a Naaŋmɩn yúor-vɩɛlʋ-danʋ ɛ.

²⁴Ɛcɛ, a ʋ nɔ̃wfʋ zũú a, Naaŋmɩn ɩ na bɛ ɩ nɩ-mɩn a ʋ niŋé zawlalɛ, a faafʋ bɛ na páw a Yeezu Kɩrɩta ƴãw a zũú.

²⁵A Naaŋmɩn maal'ɩ ʋ nɩ bàwr, k'aa Kɩrɩta zɩ̃ɩ ƴãw, ʋ páw a yel-bebe suur kʋ̀ a bɛlɩ dem na sàw de ʋ a. À ŋá n'a a Naaŋmɩn wul k'ʋʋ ɩ n nɩ-mɩŋa kʋralɛ: ʋ tɩ ɩ ʋ nɩ a koro za, a lɛn daar ʋ na tɩ nyɔw ʋ tʋɔra bɛ dɔwrɩ a nɩsaalbɛ a bɛ yel-bebe ƴãw a. Ʋ ɩ ʋ nɩ a dɩ̃a zie ŋa pʋɔ, ʋ na ɩ nɩ-mɩŋa, ɛ́ mɩ̀ ɩ a bɛlɩ dem za na sàw de a Yeezu a bɛ ɩ nɩ-mɩn a.

²⁷Nyɩn lowr'a tɩ na lɛb cãà ɩrɛ pɔ̀lʋ? A yi na zaa! Bʋnʋ zũú? A Wulu ɩ-ɩrɩ zũú bɩɩ? Towtow! Ɛcɛ a Kɩrɩta sàw-deb zũú n'a.

²⁸Bʋ̃ʋ n'ʋ vɛ̃, tɩ tɩɛrɛ na k'aa Naaŋmɩn mɩ́ ɩ na a nɩsaal ɩ nɩ-mɩŋa a ʋ niŋé ʋ na sàw de a zũú, ɛ́ a bɛ ɩ a Wulu ʋ na sàwr a ƴãw n'a ɩ.

²⁹Bɩɩ a Naaŋmɩn taa ɩrɛ wa ɩ Zifʋ mɩnɛ tɛwr Naaŋmɩn ʋ? A nɩ-bʋʋr-yoru Naaŋmɩn mɩ̀ bɛ tʋ̃ɔ́ n'ʋ ɛ? Bʋnʋ ɩ! A nɩ-bʋʋr-yoru Naaŋmɩn mɩ̀ n'ʋ,

³⁰bʋ̃ʋ n'ʋ vɛ̃, Naaŋmɩn-been yõ n'ʋ be. A sàw-deb'a ʋ na ɩ n a Zifʋ mɩnɛ ɩ nɩ-mɩn a ʋ niŋé, a sàw-deb cãà n'a ʋ na ɩ n a bɛlɩ dem na bɛ ɩ Zifʋ mɩnɛ a, bɛ ɩ nɩ-mɩn a ʋ niŋé.

³¹A pãa ɩ lɛ, a sàw-deb zũú, tɩ yel k'aa Wulu bɛ cãà tɛr pɛr towtow ʋ? Lɛ bɛ n'a ɩ, tɩ nɩ̃ɛ na ɩ a Wulu pɛr sɩza ʋ sãá.