Read Dagara, Northern Ʋrɔm 7 Bible Online

Ʋrɔm 7 - Dagara, Northern bible

Ʋrɔm 7

¹Nyɩ bɛ bãwnɩ a ʋ, yɛbr i? Nɩbɛ na bãw a Naaŋmɩn wulu a zie n'a ɩ̃ ƴɛ̀rɛ: a nɩsaal cãafʋ daar yõ n'a a Naaŋmɩn wulu fɛrʋ be a ʋ zu.

²Mɛ̃ à ŋá a, pɔw na kul sɩr a, a ʋ sɩr na cãà vʋʋrɛ a yõ n'a a Naaŋmɩn wulu 'lẽ ʋlɛ nɩ a ʋ sɩr. Ɛcɛ a sɩr wa ɩ mɛ̃ ʋ kpi na a, a kul-taa nʋɔr na dãw 'lẽ bɛ a, bɛ cãà fɛrɛ ʋ ɛ.

³A na ɩ à ŋá a, a ʋ sɩr wa cãà vʋʋrɛ, ʋʋ be dɛb yũo zie a, bɛ na bʋɔlɛ ʋ nɩ pɔw-gaa-yel-bier-maalɛ. Ɛcɛ a ʋ sɩr wa kpi a, ʋ so nɩ ʋ tʋɔra a Naaŋmɩn wulu niŋé, na tʋ̃ɔ́ ɩ dɛb yũo pɔw ɛ́ bɛ maalɩ pɔw-gaa-yel-bier ɛ.

⁴Ɩ̃ yɛbr i, lɛ n'a a mɩ̀ ŋmɛ̃ a nyɩ zie. A Naaŋmɩn wulu niŋé a, nyɩ ɩ na mɛ̃ nɩ-kũuni a, nyɩ na lãw nɩ a Kɩrɩta a ʋ ƴã-gan pʋɔ a. A na ɩ à ŋá a, nɩ-yũo so nyɩ a ƴɛrɛŋa, a sob nɛ na lɛb yi a kũuni pʋɔ kɛ́ tɩ tʋ̃ɔ́ ɩrɛ ɩ-vɩɛlɩ na nʋmɛ a Naaŋmɩn zie a.

⁵A lɛn daar tɩ na tɩ cãà tɛr a tɩ nɩsaalɛ ɩb tɛwr'a, a Naaŋmɩn wulu mɩ́ tɩ ɩ na a pʋ-tɩɛr-faar tone a tome a tɩ nɩɩlʋ za pʋɔ, mɩ́ tɩ ƴãw tɩ tɛr ɩ-ɩrɩ na wɩɛr'ɩ tɩ kũu pʋɔ a.

⁶Ɛcɛ ƴɛrɛŋa a, bɛ ír tɩ na bɛr a Wulu fɛrʋ pʋɔ, bʋ̃ʋ n'ʋ vɛ̃, a ʋlɩ bom nɛ na tɩ so tɩ ɩ gbãgbaar a, tɩ ɩ na mɛ̃ tɩ kpi na bɛ cãà pʋɔ ʋ pʋɔ a. A na ɩ à ŋá a, tɩ na tʋ̃ɔ́ na tone a Naaŋmɩn tu n pɔ̀l-paala a Vʋʋrʋ na wule a, ɛ́ ta cãà tuur'ɩ a pɔ̀l-kʋra a Wulu na sɛb a na wule a ɩ.

⁷Tɩ na yel'a kɛ́ bo? K'aa Naaŋmɩn wulu ɩ n yel-bier bɩɩ? Lɛ bɛ n'a towtow ɛ! Ɛcɛ a Wulu n'ʋ ɩ ɩ̃ bãw bʋ̃ʋ n'ɩ a yel-bier. Bʋ̃ʋ n'ʋ so, a Wulu bɛ tɩ yel a ƴɛ̀r-bie á ŋá: «Ta nyɛ̃ a fʋ tɔ bom bɔbr ɛ», ɩ̃ kʋ̃ʋ bãw bʋ̃ʋ n'ɩ nyɛ̃ a fʋ tɔ bom bɔbr ɛ[13].

⁸A yel-bier tur'a de a nɔ-ƴãwna, ƴãw a tɔ bom bɔb tɩɛrʋ bʋʋrɛ za a ɩ̃ zie. Bʋ̃ʋ n'ʋ vɛ̃, Wulu bɛ wa ka be a, a yel-bier ɩ n bʋ̃-kũu.

⁹A koro za a, ɩ̃ na bɛ tɩ bãw kɛ́ Naaŋmɩn wulu be n be a, ɩ̃ tɩ vʋʋrɛ nɩ zoomlɛ. Ɛcɛ a nɔ-ƴãwna na wa wa a, a yel-bier vʋla tĩ na kpɩɛr mɛ̃,

¹⁰lɛ n'a a ɩ mɛ̃ ɩ̃ kpi na a. A nɔ-ƴãwna na tɩ sɛw k'ʋʋ wa n nyɔ-vʋʋrʋ a, bɛ wa bere na mãa zie ʋ wa n kũu.

¹¹Bʋ̃ʋ n'ʋ vɛ̃, a yel-bier tur'a de a nɔ-ƴãwna bɛ̀lɩ nɩ mɛ̃, ɛ́ kʋ m nɩ a nɔ-ƴãwna.

¹²A na ɩ à ŋá a, a Naaŋmɩn wulu ɩ n sõw ɛ́ a nɔ-ƴãwna ɩ sõw, tu sɔ́r ɛ́ vɩɛl.

¹³A pãa ɩ lɛ bʋ̃-vla wa lɩɛbɩ kũu bom mãa zie ʋ? Lɛ bɛ n'a towtow ɛ! A yel-bier zie n'a a yi. À ŋá n'a ʋ ɩ, a ʋ ŋmɛ̃a tɔr za sãá: ʋ de nɩ bom na ɩ bʋ̃-vla a kʋ n mɛ̃. Ɛcɛ à à ŋá n'a, a nɔ-ƴãwna zũú, a yel-bier pãa lɛb bãw kpɛ faa tɩ zuo.

¹⁴Tɩ bãw na k'aa Naaŋmɩn wulu bɛ yi nɩsaal zie ɩ. Ɛcɛ mãa ɩ n nɩsaal bɛ na kʋɔrɩ kʋ̀ a yel-bier ɩ̃ ɩ a ʋ gbãgbaa a.

¹⁵Ɩ̃ sɩrɩ bɛ bãw a lɛ ɩ̃ na ɩrɛ a pɛr ɛ: ɩ̃ bɛ ɩrɛ a lɛ ɩ̃ na bɔbr k'ɩ̃ɩ nãá ɩrɛ a ɩ, ɛ́ nɩ̃ɛ ɩrɛ a ʋlɩ bom nɛ ɩ̃ na bɛ nɔnɛ a.

¹⁶Mãa wa ɩrɛ a ʋlɩ bom nɛ ɩ̃ na bɛ bɔbr a, ɩ̃ sàw na k'aa Naaŋmɩn wulu vɩɛl'a.

¹⁷A na ɩ lɛ a, mãa bɛ n'ʋ ɩrɛ à à ŋá ɩ, a yel-bier na be a ɩ̃ zie a n'ʋ.

¹⁸Bʋ̃ʋ n'ʋ so, ɩ̃ bãwnɩ a na a vla na bɛ be a ɩ̃ zie a, a pɛr lɛ k'aa bãbàal ŋa ɩ̃ na ɩ a. Yel-mɩŋa n'a, a vla maalʋ tɩɛrʋ be n a ɩ̃ zie, ɛcɛ a maalʋ fãw bɛ ka be ɩ.

¹⁹Bʋ̃ʋ n'ʋ vɛ̃, ɩ̃ bɛ mɩ́ maalɩ a vla ɩ̃ na bɔbr a ɩ, ɛ́ nɩ̃ɛ mɩ́ maalɩ a faa ɩ̃ na bɛ bɔbr a.

²⁰Mãa mɩ́ wa ɩ a ʋlɩ bom nɛ ɩ̃ na bɛ bɔbr a, a lɛn daar a, mãa bɛ cãà n'ʋ mɩ́ ɩrɛ ɩ, a yel-bier na be a ɩ̃ zie a n'ʋ.

²¹A na ɩ à ŋá a, yel ŋa n'ʋ ɩ̃ nyɛ̃: mãa na mɩ́ bɔbr a vla maalʋ a, faa tɛwr'a ɩ̃ mɩ́ tʋ̃ɔ́ maalɩ.

²²A ɩ̃ pʋ̃ɔmɩ nɩr nɔnɛ nɩ a Naaŋmɩn wulu yaga za.

²³Ɛcɛ ɩ̃ nyɛ̃ nɩ wulu kãw a ɩ̃ pʋɔ ʋ mʋɔr'ɩ a Wulu ʋl a ɩ̃ yã na sàw de a. Ʋ ɩ na k'ɩ̃ ɩ a yel-bier wulu na be a ɩ̃ pʋɔ a gbãgbaa.

²⁴'Woi, zu-bio sob i! Ãa n'ʋ na faa mɛ̃ bɛr a ƴã-gan ŋa ƴãw, a ƴã-gan ŋa na wɩɛr'ɩ mɛ̃ a kũu pʋɔ a?

²⁵Naaŋmɩn so puoru, a Yeezu Kɩrɩta tɩ Sore ƴãw! A na ɩ à ŋá a, ɩ̃ ɩ n a Naaŋmɩn wulu gbãgbaa a ɩ̃ yã pʋɔ, ɛcɛ a ɩ̃ bãbàalʋ pʋɔ ɩ̃ ɩ a yel-bier wulu gbãgbaa.