Read Dagara, Northern Ʋrɔm 8 Bible Online

Ʋrɔm 8 - Dagara, Northern bible

Ʋrɔm 8

¹A na ɩ à ŋá a, a ƴɛrɛŋa a, a bɛlɩ dem na lãw nɩ a Yeezu Kɩrɩta a, sãwna dɔwrʋ kãw za bɛ cãà be a bɛ ƴãw ɛ.

²Bʋ̃ʋ n'ʋ vɛ̃, a Vʋʋrʋ Sõw wulu na tɩrɛ a nyɔ-vʋʋrʋ a Yeezu Kɩrɩta ƴãw a, ʋ ír fʋ na bɛr a yel-bier nɩ a kũu wulu pʋɔ, fʋ so fʋ tʋɔra.

³A ʋlɩ bom nɛ, a Moyiir wulu na tɩ bɛ tʋɔr ɩrɛ a, a nɩsaal bãbàalʋ na tɩ ɩ ʋ bɛ tɛr fãw a ƴãw a, Naaŋmɩn ʋl ɩ ʋ na: a yel-bier-ír-bɛrʋ ƴãw a, ʋ dɔwr'ɩ a ʋ Bie a nɩsaal yel-bier ƴãw, ʋ na tõ a ʋl mɩŋa Bie ʋ wa ɩ nɩsaal, ŋmɛ̃ taa nɩ a nɩsaal na ɩ yel-bier sob a.

⁴A Naaŋmɩn ɩ n à à ŋá k'aa mɩnʋ a Wulu na bɔbr kɛ́ tɩ tɛr a, tʋ̃ɔ́ paalɩ tɩ, tɩɩm na bɛ tuur a tɩ nɩsaalʋ ɛ́ tuur a Vʋʋrʋ Sõw a.

⁵Bʋ̃ʋ n'ʋ vɛ̃, a bɛlɩ dem na tuur a nɩsaalʋ a, a nɩsaalʋ yel-bɔbrɩ tɩɛrʋ n'a mɩ́ be a bɛ zie.

⁶A nɩsaalʋ yel-bɔbrɩ pùor-tub a, kũu n'a, ɛcɛ a Vʋʋrʋ Sõw yel-bɔbrɩ pùor-tub a, nyɔ-vʋʋrʋ nɩ ƴã-ɓaarʋ n'a.

⁷Bʋ̃ʋ n'ʋ vɛ̃, bɛlɩ dem na tuur a nɩsaalʋ yel-bɔbrɩ pùor a, bɛ ɩ n Naaŋmɩn dɔ̃ dem, bɛ bɛ sàwr dier a Naaŋmɩn wulu ɛ, bɛ mɩ̀ kʋ̃ tʋ̃ɔ́ mɩ̀ ɛ.

⁸Bɛlɩ dem na bɛr a nɩsaalʋ tʋ̃ɔ́ bɛ a, bɛ kʋ̃ tʋ̃ɔ́ pɛlɩ a Naaŋmɩn pʋɔ ɩ.

⁹Nyɩɩm ƴãw a, nyɩ bɛ bɛr a nɩsaalʋ so nyɩ ɛ. A Vʋʋrʋ Sõw n'ʋ so nyɩ, ʋlɛ wa n'ʋ sɩrɩ kpɩɛr a nyɩ pʋɔ a. Nɩr bɛ wa tɛr a Kɩrɩta Vʋʋrʋ a, ʋ bɛ ɩ a ʋ nɩ-sora ɩ.

¹⁰A Kɩrɩta wa be a nyɩ zie a, yel-mɩŋa n'a, a nyɩ ƴã-gan be n kũu ƴãw a yel-bier zũú, ɛcɛ a Vʋʋrʋ ɩ n a nyɩ nyɔ-vʋʋrʋ, a Naaŋmɩn na ɩ nyɩ lɩɛbɩ nɩ-mɩn a ƴãw.

¹¹A sob nɛ na ɩ a Yeezu ʋ lɛb yi a kũuni pʋɔ a, a ʋ Vʋʋrʋ wa kpɩɛr a nyɩ pʋɔ a, a sob nɛ na ɩ a Kɩrɩta ʋ lɛb yi a kũuni pʋɔ a, mɩ̀ na kʋ̀ n nyɔ-vʋʋrʋ a nyɩ ƴã-gamɛ na ɩ bʋ̃-kpiiri a, a ʋ Vʋʋrʋ na kpɩɛr a nyɩ pʋɔ a ƴãw.

¹²A na ɩ à ŋá a, yɛbr i, tɩ dɩ n san, ɛcɛ a bɛ ɩ a tɩ nɩsaalʋ zie n'a ɩ, ɛ̀ tɩ na ɩrɛ mɛ̃ a lɛ ʋ na bɔbr a ɩ.

¹³Bʋ̃ʋ n'ʋ vɛ̃, a nyɩ nyɔ-vʋʋrʋ wa tu a nɩsaalʋ a, nyɩ na kpi na. Ɛcɛ a Vʋʋrʋ Sõw ƴãw, nyɩmɛ wa kʋ a nɩsaalʋ ɩ-ɩrɩ a, nyɩ na vʋʋrɛ na.

¹⁴Bɛlɩ dem za na ɩrɛ mɛ̃ a lɛ a Naaŋmɩn Vʋʋrʋ na wule bɛ a, bɛlɛ nɛbɛ ɩ a Naaŋmɩn bibiir.

¹⁵A Vʋʋrʋ nyɩ na páw a, ʋ bɛ ƴãwnɛ nyɩ gbãgbaar ɩb tɩɛrʋ nyɩ na lɛb maal zɔrɛ dɛ̃bɩ̃ɛ ɩ, Vʋʋrʋ Sõw na mɩ́ ɩ nyɩ lɩɛbɩ Naaŋmɩn bibiir a n'ʋ. Ʋlɛ n'ʋ tɩ mɩ́ lãw nɩ cɩɩrɛ bʋɔlɛ a Naaŋmɩn kɛ́: «Aba, ɩ̃ Sãà a!»

¹⁶A Vʋʋrʋ Sõw ŋa tɔr za lãw nɩ nɩ a tɩ tɩɛrʋ dɩrɛ a dãsɩɛ kɛ́ tɩ ɩ n Naaŋmɩn bibiir.

¹⁷Tɩ na ɩ a ʋ bibiir a, tɩ mɩ̀ pʋɔ nɩ a maalʋ a Naaŋmɩn na yel k'ʋʋ na kʋ̀ n a ʋ nɩ-bʋʋrɛ a pʋɔ, tɩ pʋɔ na lãw nɩ a Kɩrɩta, bʋ̃ʋ n'ʋ vɛ̃, tɩmɛ wa ɩ mɛ̃ tɩ lãw nɩ nɩ a Kɩrɩta wone a tuo a, tɩ mɩ̀ nãà lãw nɩ ʋ na a ʋ yúor-vɩɛlʋ-danʋ pʋɔ.

¹⁸Ɩ̃ bãwnɩ a na k'aa tuo tɩ na wone a ƴɛrɛŋa a, a bɛ bibli a yúor-vɩɛlʋ-danʋ a Naaŋmɩn nãà wa wul tɩ ʋ sãá a ɩ.

¹⁹A Naaŋmɩn bʋ̃-íri za mĩine na gùre nɩ a daar ʋl a Naaŋmɩn na na wul a ʋ bibiir yúor-vɩɛlʋ-danʋ ʋ sãá a.

²⁰A Naaŋmɩn bʋ̃-íri lɩɛb'ɩ bʋ̃-zawlɛ, ɛ́ a bɛ ɩ alɛ n'a bɔ ɩ, ɛ́ ɩ a Naaŋmɩn na n'ʋ bɔbr ɩ a lɩɛbɩ a bʋ̃-zawlɛ a[14]. Ɛcɛ a mɩ̀ cãà na tɩɛrɛ

²¹kɛ́ bɛ na ír a na bɛr bibir kãw a pʋ̃ɔ́fʋ a na fɛr k'aa pʋ̃ɔ a pʋɔ, a tʋ̃ɔ́ pʋɔ a Naaŋmɩn bibiir tʋɔra-sob pʋɔ nɩ a bɛ yúor-vɩɛlʋ-danʋ pʋɔ.

²²Tɩ bãwnɩ a na, wa tɩ tɔ a ƴɛrɛŋa a, a Naaŋmɩn bʋ̃-íri za cãà na kone ɛ́ wone 'wɔbrʋ mɛ̃ pɔw na dɔwr a.

²³Ɛcɛ al tɛwr bɛ n'a ɩ: a tɩɩm tɛɛ za na páw a Naaŋmɩn maal-dãw na ɩ a Vʋʋrʋ Sõw a, tɩ mɩ̀ waalɛ na kone gùre nɩ k'aa Naaŋmɩn wa de tɩ, tɩ lɩɛbɩ a ʋ bibiir, ʋʋ faa tɩ tɩ ɓɩɩlɩ.

²⁴Tɩ nyɛ̃ nɩ a faafʋ, ɛcɛ ʋ cãà na ɩ bom tɩ na tɩɛrɛ a. Fʋ̃ʋ wa nyɛ̃ a ʋlɩ bom fʋ na tɩɛrɛ a, ʋ bɛ cãà ɩ tɩɛrʋ fʋ tɩɛrɛ ɩ: a bom fʋ na nyɛ̃ a, fʋ na ɩ n ŋmɩn cãà tɩɛrɛ ʋ?

²⁵Ɛcɛ tɩmɛ wa ƴãw a tɩ tɩɛrʋ bom tɩ na bɛ nyɛrɛ a ƴãw a, tɩ dɩ n kanyir gùre nɩ ʋ.

²⁶Lɛ mɩ̀ n'a, a Vʋʋrʋ Sõw mɩ́ wa na wa sõw a tɩ bãbàalʋ. Bʋ̃ʋ n'ʋ vɛ̃, tɩ bɛ bãw a puoru vla k'a sɛw ɛ, a Vʋʋrʋ Sõw mɩŋa n'ʋ mɩ́ puore kʋ̀rɛ tɩ nɩ zɛlʋ puoru na bɛ tɛr manʋ a.

²⁷Ɛ́ a Naaŋmɩn na mɩ́ nyɛ̃ a lɛ a nɩsaal pʋɔ na ŋmɛ̃ a, ʋ bãw nɩ a Vʋʋrʋ Sõw pʋ-tɩɛrʋ: bʋ̃ʋ n'ʋ vɛ̃, a Vʋʋrʋ Sõw mɩ́ puore na kʋ̀rɛ a kɩrɩta-nɩbɛ nɩ zɛlʋ na tu a lɛ a ʋl Naaŋmɩn na bɔbr a.

²⁸Tɩ bãw na k'aa bɛlɩ dem na nɔnɛ a Naaŋmɩn a, a yele za mɩ́ cen na tuori taa a bɛ maalʋ ƴãw, bɛl ʋ na bʋɔlɩ a tu a lɛ ʋ na cɔbrɩ a yele bin a.

²⁹Bʋ̃ʋ n'ʋ vɛ̃, a bɛlɩ dem a Naaŋmɩn na tɩ dãw de niwn bãw a, ʋ mɩ̀ bãwnɩ bɛ na ƴãw bɛ ɩ a ʋ Bie ŋmɛ̃-ta-taabɛ, k'aa Bie ŋa tʋ̃ɔ́ ɩ yɛbr na yãwmɛ yaga a kpɛ̃ɛ.

³⁰A bɛlɩ dem a Naaŋmɩn na tɩ dãw bãwnɩ a, ʋ bʋɔlɩ bɛ na mɩ̀, a bɛlɩ dem ʋ na bʋɔlɩ a, ʋ mɩ̀ ɩ na bɛ lɩɛbɩ nɩ-mɩn, a bɛlɩ dem ʋ na ɩ bɛ lɩɛbɩ nɩ-mɩn a, ʋ mɩ̀ ɩ na kɛ̀ bɛ pʋɔ a ʋ yúor-vɩɛlʋ-danʋ pʋɔ.

³¹A na ɩ à ŋá a, tɩ na lɛb yel a kɛ́ bʋnʋ a yel ŋa ƴãw? A Naaŋmɩn wa kpɛ tɩ a, ãa n'ʋ na dɩ n tɩ ƴɛ̀rʋ?

³²Ʋ bɛ jɩɩrɩ a ʋl mɩŋa Bie bɛr ɛ, ʋ nɩ̃ɛ na de ʋ tɩr bɛ kʋ a tɩ za ƴãw: ŋmɩŋmɩn za n'a ʋ kʋ̃ kʋ̀ tɩ bom za zawla lãwnɩ a ʋ Bie?

³³A bɛlɩ dem a Naaŋmɩn na kaa ír a, ãa n'ʋ na yel kɛ́ bɛ tɛr'ɩ sãwna? Nɩr bɛ ka be ɩ. A Naaŋmɩn na n'ʋ wule kɛ́ bɛ bɛ tɛr sãwna a ƴãw.

³⁴Ãa n'ʋ na maal'ɩ bɛ ƴɛ̀rʋ? Nɩr bɛ ka be ɩ. Bʋ̃ʋ n'ʋ vɛ̃, a Yeezu Kɩrɩta kpi na, mɔ̃ mɩ̀, ʋ lɛb'a yi a kũu pʋɔ, ʋ be n a Naaŋmɩn dʋrʋ lowr zɛlɛ ʋ a tɩ ƴãw.

³⁵Ãa n'ʋ na tʋ̃ɔ́ bʋ́r tɩɩm nɩ a Kɩrɩta a ʋ nɔ̃wfʋ pʋɔ? Kpɩɛrʋ bɩɩ? Pʋl-vʋ̃ɔ bɩɩ? Nɩsaalbɛ dɔwrʋ bɩɩ? Kɔ̃ bɩɩ? Bom-bɛ-tɛrʋ bɩɩ? Bʋ̃-faa bɩɩ? A kũu bɩɩ?

³⁶Mɛ̃ a lɛ a Sɛb-sõw na yel a: «A fʋ̃ʋ ƴãw n'a a kũu jɩɛrɛ tɩ kʋralɛ, bɛ ɩrɛ tɩ mɛ̃ píir bɛ na cere nɩ kʋb zie a[15].»

³⁷Ɛcɛ à á ŋá za pʋɔ a, tɩ zɛb'a tʋ̃ɔ́ pẽlẽpẽlẽ, ɛ́ a ɩ a sob nɛ na nɔ̃w tɩ a zũú n'a.

³⁸Bʋnʋ bɛ ka be ɩ, ɩ̃ bãwnɩ a na k'aa kũu nɩ a nyɔ-vʋʋrʋ, a malkɩ mɩnɛ nɩ a saa-zu kpɛnʋ bʋʋrɛ za, a ƴɛrɛŋa nɩ a nɩdaar, a kpɛnʋ bʋʋrɛ za,

³⁹a saa-zu fãw nɩ a pile fãw, bʋ̃-íra kãw za, bom za kʋ̃ tʋ̃ɔ́ bʋ́r tɩɩm nɩ a Naaŋmɩn a ʋ nɔ̃wfʋ pʋɔ ɩ, a nɔ̃wfʋ ŋa ʋ na wul ʋ sãá a tɩ Sore Yeezu Kɩrɩta zie a.