Read Dagara, Northern Ʋrɔm 9 Bible Online

Ʋrɔm 9 - Dagara, Northern bible

Ʋrɔm 9

¹Ɩ̃ na lãw nɩ a Kɩrɩta a, yel-mɩŋa n'a ɩ̃ yere, ɩ̃ bɛ ŋmarɛ ziri ɛ, a Vʋʋrʋ Sõw caal'ɩ a ɩ̃ pʋɔ ʋ dɩrɛ a ɩ̃ dãsɩɛ,

²kɛ́ pʋ-sãwna tɛr mɛ̃ nɩ yaga, ɛ́ 'wɔbrʋ kãw 'wɔbr mɛ̃ bɛ tɛr bɛ́rʋ daar ɛ.

³Yel-mɩŋa, a ɩ na mɛ̃ ɩ̃ nãá ɩ nɩr bɛ na ŋmɛ ƴãw a, ɛ́ mãa nɩ a Kɩrɩta bʋ́r taa ɩ̃ lɩɛrɩ a ɩ̃ yɛbr a, a bɛl na ɩ a ɩ̃ bʋʋrɛ a.

⁴Bɛ ɩ n a Ɩsɩrayɛl bʋʋrɛ nɩbɛ: Naaŋmɩn ɩ na bɛ lɩɛbɩ a ʋ bibiir, ʋ kʋ̀ bɛ nɩ a ʋ yúor-vɩɛlʋ-danʋ nɩ a wõ-taar ʋ na maal'ɩ bɛ a, a Wulu nɩ a puoru, a nɛ́ɛ ʋ na ƴãw k'ʋʋ na maalɩ bɛ na a.

⁵Bɛ ɩ n a sãàkʋm-kore bʋʋrɛ, ɛ́ a bɛ bʋʋrɛ pʋɔ n'a a Kɩrɩta yi ɩ nɩsaal, ʋl na zuo bom za, ɩ Naaŋmɩn na tɛr danʋ kʋralɛ a. Amɛn.

⁶Ɛcɛ, a bɛ wul k'aa lɛ a Naaŋmɩn na yel a bɛ cãà pʋɔ ɩ. Bʋ̃ʋ n'ʋ vɛ̃, a Ɩsɩrayɛl bʋʋrɛ za bɛ nɛbɛ ɩ a Ɩsɩrayɛl nɩbɛ yel-mɩŋa ɩ.

⁷Ɛ́ a Abraham bʋʋrɛ bɛ ɩ a ʋ bibiir bɛ za ɩ. Bʋ̃ʋ n'ʋ vɛ̃, Naaŋmɩn tɩ yel'ɩ a Abraham à ŋá: «A Ɩzaakɩ bʋʋrɛ nɛbɛ bɛ na bʋɔlɛ a fʋ bʋʋrɛ[16].»

⁸A pɛr lɛ k'aa bibiir bɛ na dɔw a dɔwfʋ tu a nɩsaalʋ dɔwfʋ tɛwr a, bɛlɛ bɛ nɛbɛ ɩ a Naaŋmɩn bibiir ɛ. A bibiir bɛ na dɔw, a dɔwfʋ tu a lɛ a Naaŋmɩn na yel a, bɛl tɛwr nɛbɛ ɩ a Abraham bʋʋrɛ tɛɛ za.

⁹Bʋ̃ʋ n'ʋ vɛ̃, a ƴɛ̀r-bir ŋa tɩ ɩ n nʋɔr a Naaŋmɩn ƴãw: «À à ŋá tɔ-won ɩ̃ na lɛb'a wa, ɛ́ a Saara na tɛr'ɩ bie[17].»

¹⁰A za cãà bɛ n'a ɩ. Erebeka mɩ̀ n'ɩ ŋa: a ʋ yɩbr ayi tɩ lãw nɩ sãà been, a tɩ sãàkʋm-kʋra Ɩzaakɩ.

¹¹Ɛcɛ Naaŋmɩn mɩ́ kaa na ír a nɩbɛ tu n a lɛ ʋ na cɔbrɩ a yele bin a: a ʋ kaa-íru mɩ́ tu n a bʋɔlʋ ʋ na bʋɔlɛ bɛ a, ʋ bɛ mɩ́ tu a bɛ ɩ-ɩrɩ ɛ. A Naaŋmɩn na bɔbr k'ʋʋ wul k'aa lɛ ʋ na cɔbrɩ a yele bin a, a gã nɩ kʋralɛ a, ʋ tɩ yel'ɩ a Erebeka, a lɛn daar a ʋ yɩbr na bɛ tɩ dɔw sɛr, ɛ́ mɩ̀ bɛ tɩ maalɩ vla bɩɩ faa sɛr a: «A kpɛ̃ɛ na ɩ n a bile tõ-tone.»

¹³A tu n à à ŋá a Sɛb-sõw na yel a: «Zakɔb'ʋ ɩ̃ nɔ̃w zuo a Ezawu[18].»

¹⁴Tɩ na yel'a kɛ́ bo? A Naaŋmɩn taa ɩrɛ bɛ wa tuur yel-mɩnʋ ʋ? Lɛ bɛ n'a towtow ɛ!

¹⁵Bʋ̃ʋ n'ʋ vɛ̃, ʋ tɩ yel'ɩ a Moyiir zie à ŋá: «Ɩ̃ na zɔ n sob nɛ nɩbaalʋ ɩ̃ na bɔbr a, ɛ́ tɛr su-ɓaarʋ sob nɛ zie ɩ̃ na bɔbr a[19].»

¹⁶A na ɩ à ŋá a, a bɛ yi nɩsaal na bɔbr a zie, nɩ fãw ʋ na ƴãw a zie ɩ, Naaŋmɩn na zɔrɛ nɩbaalʋ a zie n'a a yi.

¹⁷A Sɛb-sõw pʋɔ a, Naaŋmɩn yel'ɩ à ŋá a Eziptɩ tẽw nãà Faarawɔ̃ zie: «Ɩ̃ ɩ na fʋ ɩ a nãà, k'ɩ̃ɩ tʋ̃ɔ́ wul a ɩ̃ kpɛnʋ a fʋ zie, ɛ́ a ɩ̃ yúor yi a tẽw zu ziir za[20].»

¹⁸À ŋá n'a a Naaŋmɩn mɩ́ zɔ sob nɛ ʋ na bɔbr a nɩbaalʋ, ɛ́ ɩ zu-kpɛnʋ tɛr sob nɛ ʋ na bɔbr a.

¹⁹Kapaw fʋ na yel mɛ̃ na: «Bʋnʋ ƴãw n'a a Naaŋmɩn na cãà yere tɩ? Ãa n'ʋ na tʋ̃ɔ́ yel k'aa ʋ pʋ-tɩɛrʋ ta maalɩ?»

²⁰Ɛcɛ ãa nɩ̃ɛ nɛ b, nɩsaal i, na ƴɛ̀rɛ lɩɛrɛ nɩ a Naaŋmɩn? Yawra bʋ̃-mɩɛra na tʋ̃ɔ́ na yel a ʋ mɩɛrɛ kɛ́ bʋnʋ ƴãw n'a ʋ mɛ ʋ à à ŋá bɩɩ?

²¹A yawr-mɩɛrɛ bɛ tɛr sɔ́r na ɩrɛ lɛ za ʋ na bɔbr a nɩ a yawra bɩɩ? Ʋ kʋ̃ tʋ̃ɔ́ mɛ bom na tɛr yúor a, bɩɩ bom na ɩ sãsaralɛ a, nɩ a yawr-been ʋ na naw a bɩɩ?

²²Naaŋmɩn tɩ bɔbr'a k'ʋʋ wul a ʋ suur, ɛ́ ɩ kɛ̀ bɛ bãw a ʋ kpɛnʋ. A bɛlɩ dem a na tɩ sɛw k'ʋʋ nyɛ̃ nɩ suur a, ɛ́ bɛ tɩ ta a dɔwrʋ kerkerlɛ a, ʋ nyɔw nɩ ʋ tʋɔra yaga a bɛ ƴãw.

²³Ʋʋ mɩ̀ tɩ bɔbr'a wul a lɛ a ʋ yúor-vɩɛlʋ-danʋ na ɩ kpɛ̃ɛ sɛw a bɛl na cɛ a zie a, a bɛl a na tɩ sɛw k'ʋʋ zɔ bɛ nɩbaalʋ a, a bɛl ʋ na dãw de niwn cɔbrɩ kɛ́ bɛ wa pʋɔ a ʋ yúor-vɩɛlʋ-danʋ pʋɔ a.

²⁴Tɩ mɩ̀ pʋɔ na, tɩɩm ʋ na bʋɔlɩ, a bɛ ɩ a Zifʋ mɩnɛ tɛwr pʋɔ, ɛ́ mɩ̀ ɩ a nɩ-bʋʋr-yoru pʋɔ a.

²⁵À à ŋá tɔr za n'a ʋ yere a naaŋmɩn-ƴɛ̀r-manɛ Oze sɛbɛ pʋɔ: «A nɩbɛ bɛl na bɛ tɩ ɩ ɩ̃ nɩbɛ a, ɩ̃ na bʋɔlɛ bɛ nɩ ɩ̃ nɩbɛ, ɛ́ a nɩ-bʋʋrɛ ɩ̃ na bɛ tɩ nɔnɛ a, ɩ̃ na bʋɔlɛ bɛ nɩ ɩ̃ nɩ-nɔnɩ.

²⁶Ɛ́ a be tɔr za bɛ na tɩ yel bɛ: “Nyɩ bɛ ɩ ɩ̃ nɩbɛ a”, bɛ na bʋɔlɛ bɛ nɩ a be: “Naaŋmɩn na vʋʋrɛ a bibiir.”[21]»

²⁷Naaŋmɩn-ƴɛ̀r-manɛ Ɩzayi n'ɩ ŋan ka lowr mɩ̀ yere kpɛ̃w za a Ɩsɩrayɛl nɩbɛ ƴãw: «A Ɩsɩrayɛl bibiir mɩ̀ saa tɩ yãwmɛ man a kʋ̃ɔ-kpɛ̃ɛ nʋɔr biire a, a bɛ ŋmãa na cɛ a tɛwr'a nãá nyɛ̃ a faafʋ.

²⁸Bʋ̃ʋ n'ʋ vɛ̃, a ʋlɩ bom nɛ a Sore na yel a, ʋ na maal'ʋ nɩ ʋ za fɔ̃wlɛ a tẽw zu[22].»

²⁹A Ɩzayi n'ʋ mɩ̀ tɩ cãà dãw yel: «A tẽ-daa za Sore bɛ tɩ cɛ bʋʋrɛ blã bɛr tɩ a, tɩ nãá tɩ ɩ na mɛ̃ Sodɔm tẽw a, tɩ nãá ŋmɛ̃ na taa nɩ Gomɔɔr tẽw[23].»

³⁰Tɩ na yel'a kɛ́ bo? À ŋá n'a tɩ na yel: nɩ-bʋʋr-yoru nɩbɛ na bɛ tɩ bɔbr a mɩnʋ a páw nɩ a mɩnʋ a Naaŋmɩn zie, a mɩnʋ ʋl na yi a sàw-deb zie a n'ʋ ɩ̃ yere.

³¹Ɛcɛ a Ɩsɩrayɛl nɩbɛ na tɩ bɔbr kɛ́ bɛ ɩ nɩ-mɩn a Naaŋmɩn zie, Wulu sàwfʋ zũú a, bɛ bɛ páw a ʋlɩ bom nɛ a Wulu na bɔbr a ɩ.

³²Bʋ̃ʋ n'ʋ so? Bɛ bɛ tɩ bɔbr kɛ́ bɛ pɛlɩ a Naaŋmɩn pʋɔ a sàw-deb zũú ɛ, ɛ́ tɩɛrɛ kɛ́ bɛ pɛlɩ a ʋ pʋɔ a bɛ ɩ-ɩrɩ zũú. Bɛ ŋmɛ n gbɛ́r a gbɛ-ŋmɛ-kʋsɩɛr ƴãw,

³³a kʋsɩɛr ʋl a Sɛb-sõw na yere à ŋá a: «Mãa n'ɩ ŋan ƴãwnɛ gbɛ-ŋmɛ-kʋsɩɛr a Sɩyɔ̃ tẽw pʋɔ, pìir kʋsɩɛr na ɩrɛ bɛ lore a. Ɛcɛ sob nɛ na sàw de ʋ a, ʋ kʋ̃ nyɛ̃ vĩ ɛ[24].»