Read Dagara, Northern 1 Korɛ̃tɩ 1 Bible Online

1 Korɛ̃tɩ 1 - Dagara, Northern bible

1 Korɛ̃tɩ 1

¹A mãa Pol, a Naaŋmɩn na nɔ̃w yã bʋɔlɩ k'ɩ̃ɩ wa ɩ a Kɩrɩta Yeezu nɩ-tona a, mãa n'ʋ sɛbr nyɩ, mãa nɩ a tɩ yɛb Sɔsɩtɛn.

²Nyɩɩm na ɩ a Naaŋmɩn Lãw-yir be a Korɛ̃tɩ a, nyɩɩm na páw a sonu lãwnɩ a Kɩrɩta Yeezu a, nyɩɩm bɛ na bʋɔlɛ nɩ-son lãwnɩ a bɛlɩ dem za na bʋɔlɛ a tɩ Sore Yeezu Kɩrɩta yúor zie nɛ za bɛ na be a, ʋl na ɩ a tɩɩm nɩ a bɛl za Sore a, nyɩ za nɛbɛ ɩ̃ sɛbr.

³A Naaŋmɩn tɩ Sãà nɩ a Sore Yeezu Kɩrɩta maalʋ nɩ ƴã-ɓaarʋ, a be a nyɩ zie.

⁴Ɩ̃ puore nɩ a ɩ̃ Naaŋmɩn yãanɩ kʋralɛ a nyɩ ƴãw, a maalʋ ʋ na kʋ̀ nyɩ a Kɩrɩta Yeezu pʋɔ a ƴãw.

⁵Bʋ̃ʋ n'ʋ vɛ̃, nyɩ na lãw nɩ ʋ a n'a nyɩ kpɛ naalʋ bʋʋrɛ za, a ƴɛ̀rʋ bãwfʋ naalʋ nɩ a yele bãwfʋ naalʋ.

⁶A Kɩrɩta dãsɩɛ a nɩbɛ na dɩ a tɛr'ɩ fãw a nyɩ zie,

⁷kɛ̀ Naaŋmɩn maalʋ kãw za bɛ cɛ nyɩ ɛ, nyɩɩm na gùre kɛ́ a tɩ Sore Yeezu Kɩrɩta wa sãá a.

⁸Ʋlɛ n'ʋ mɩ̀ na ɩ nyɩ kpɛmɛ tɩ ta n a baarʋ daar, kɛ́ nɩr ta nyɛ̃ sãwna kãw za yere a nyɩ zie a tɩ Sore Yeezu Kɩrɩta waa bibir ɛ.

⁹A Naaŋmɩn ŋmɛ̃ n ʋ ŋmɛ̃a, ʋl na bʋɔlɩ nyɩ kɛ́ nyɩ wa lãw nɩ a ʋ Bie tɩ Sore Yeezu Kɩrɩta a.

¹⁰Yɛbr i, ɩ̃ zɛlɛ nyɩ nɩ yãayãa a tɩ Sore Yeezu Kɩrɩta yúor ƴãw, nyɩ za nyɩ lãw nʋɔr, nyɩ ta ɩ bʋ́r-taa be a nyɩ cara pʋɔ ɩ. Nyɩ lãw yã ɛ́ tɛr tɩɛr-been.

¹¹Bʋ̃ʋ n'ʋ vɛ̃, ɩ̃ yɛbr i, Kulowe yir dem yel'a kʋ̀ m kɛ́ taw-taa be n a nyɩ cara pʋɔ.

¹²Ɩ̃ manɩ nyɩ nyɛ̃: a nyɩ pʋɔ a, ŋa mɩ́ yel'a: «Pol so m», ŋa kɛ́: «Apɔlɔsɩ so m», ŋa yel kɛ́: «Pɩɛr so m», ɛ́ ŋa kɛ́: «Kɩrɩta so m».

¹³Nyɩ tɩɛrɛ kɛ́ a Kɩrɩta bʋ́r'a bɩɩ? Pol'ʋ bɛ kpa a da-gara zu a nyɩ ƴãw ɩ? Pol yúor ƴãw n'a bɛ kʋ̀ nyɩ a suob ɩ?

¹⁴Naaŋmɩn barka! Ɩ̃ bɛ kʋ̀ nyɩ been kãw za suob ɛ, a bɛ ɩ Kɩrɩsɩpɩsɩ nɩ Gayisɩ ɛ.

¹⁵A na ɩ à ŋá a, nɩr za kʋ̃ sàw yel kɛ́ mãa yúor ƴãw n'a bɛ kʋ̀ nyɩ a suob ɛ.

¹⁶Ãà! Sɩza n'a, ɩ̃ cãà na lɛb kʋ̀ Sɩtefanasɩ yir dem a suob. A al pùorí, ɩ̃ bɛ tɩɛr bãw k'ɩ̃ɩ lɛb'a kʋ̀ nɩr suob ɛ.

¹⁷A Kɩrɩta bɛ tõ m k'ɩ̃ɩ tɩ tɩrɛ suob ɛ, ʋ tõ m'a k'ɩ̃ɩ tɩ hiere a Yel-nʋ̃ɔ̀, ɛ́ ta hiere ʋ tu n a ƴɛ̀r-bãw wa mab ɩ a Kɩrɩta da-gara zu kũu ɩ zawla ɩ.

¹⁸A Kɩrɩta da-gara zu kũu tɩ na hiere a, a ɩ n gẽgẽ-ɩb a bɛlɩ dem na bɔrɛ a zie. Ɛcɛ a bɛlɩ dem na lo a faafʋ sɔ́r a, a tɩɩm zie, a ɩ n Naaŋmɩn kpɛnʋ.

¹⁹À ŋá n'a a Sɛb-sõw yere: «Ɩ̃ na sãw nɩ a yã-bãwnbɛ yã-bãwfʋ bɛr, ɛ́ ɩ a bãw-bãwnbɛ bãwfʋ bɔr[1].»

²⁰A na ɩ à ŋá a, nyɩnɛ n'a a yã-bãwnɛ be? Nyɩnɛ n'a a Naaŋmɩn wulu bãw-bãw-kara be? A dɩ̃a zie ŋa pʋɔ ƴɛ̀r-bãw-ƴɛ̀rɛ wa? A Naaŋmɩn bɛ ɩ a tẽ-daa yã-bãwfʋ lɩɛbɩ gẽgemi ɛ?

²¹Bʋ̃ʋ n'ʋ vɛ̃, a tẽ-daa nɩbɛ nɩ a bɛ yã-bãwfʋ za na faa bɛ tʋ̃ɔ́ bãw a Naaŋmɩn a ʋ yã-bãwfʋ ɩb pʋɔ a, alɛ so a Naaŋmɩn yel k'ʋʋ na faa nɩ a bɛlɩ dem na sàw de ʋ a, nɩ a da-gara zu kũu hieru na sãá mɛ̃ gẽgẽ-ɩb a a.

²²A Zifʋ mɩnɛ zɛlɛ nɩ yele na ɩ bãwfʋ sãá a, ɛ́ a Gɩrɛkɩ mɩnɛ bɔbr yã-bãwfʋ.

²³Ɛcɛ tɩɩm a, Kɩrɩta bɛ na kpa da-gara zu a n'ʋ tɩ hiere: ʋ ɩ n yel-faa na bɛ sɛw taa nɩ a, a Zifʋ mɩnɛ zie, ɛ́ ɩ gẽgemi a nɩ-bʋʋr-yoru zie.

²⁴Ɛcɛ a bɛlɩ dem a Naaŋmɩn na bʋɔlɩ a zie a, bɛ ɩ n Zifʋ bɩɩ Gɩrɛkɩ a, a bɛl zie a, ʋ ɩ n a Kɩrɩta, ʋl na ɩ a Naaŋmɩn kpɛnʋ nɩ a Naaŋmɩn yã-bãwfʋ a.

²⁵Bʋnʋ bɛ ka be ɩ, a al na sãá ɩ Naaŋmɩn gẽgẽ-ɩb a cãà na ɩ yã-bãwfʋ zuo a nɩsaalbɛ yã-bãwfʋ, ɛ́ a al na sãá ɩ Naaŋmɩn bãbàalʋ a, cãà na tɛr fãw zuo a nɩsaalbɛ fãw.

²⁶Yɛbr i, nyɩ nyɛ̃ a lɛ nyɩ na ŋmɛ̃ a, nyɩɩm a Naaŋmɩn na bʋɔlɩ a: a nɩsaalbɛ niŋé a, yã-bãwnbɛ bɛ yãwmɛ a nyɩ pʋɔ ɩ, kpɛnʋ dem bɛ yãwmɛ ɩ, nɩ-yée mɩ̀ bɛ yãwmɛ ɩ.

²⁷Ɛcɛ a al na ɩ gẽgemi a tẽ-daa zie a, alɛ n'a a Naaŋmɩn kaa ír k'ʋʋ ƴãw nɩ a yã-bãwnbɛ vĩ. A alɩ bome nɛ na bɛ tɛr fãw a tẽ-daa zie a, alɛ n'a a Naaŋmɩn kaa ír k'ʋʋ ƴãw nɩ a al na tɛr fãw a vĩ.

²⁸A alɩ bome nɛ na bɛ tɛr yúor a tẽ-daa zie a, a al bɛ na jewre a, a al na bɛ ɩ bom a, alɛ n'a a Naaŋmɩn kaa ír k'ʋʋ sãw nɩ a al na ɩ bʋ̃-sɩza a bɛr,

²⁹kɛ́ nɩsaal za taa wa zɛwr ʋ tʋɔra Naaŋmɩn niŋé ɩ.

³⁰A Naaŋmɩn n'ʋ so nyɩ lãw nɩ a Kɩrɩta Yeezu, ʋl a Naaŋmɩn na ɩ ʋ lɩɛbɩ a tɩ yã-bãwfʋ, a tɩ mɩnʋ, a tɩ sonu, nɩ a tɩ faafʋ a.

³¹À ŋá n'a a ɩ, kɛ́: «Ʋlɩ sob na zɛwr ʋ tʋɔra a, ʋ zɛwr ʋ tʋɔra a Sore ƴãw[2]», mɛ̃ a lɛ a Sɛb-sõw na yel a.